ປທສ ເຜີຍແຜ່ຄວາມຮູ້ດ້ານໄອຊີທີໃຫ້ແກ່ນັກສຶກສາ

​ເຜີຍ​ແຜ່​ໂດຍ: admin|ຢ້ຽມ​ຊົມ: 53 ຄັ້ງ | ເວ​ລາ | 2024-12-23 00:00:00

             ກະຊວງ ໄປສະນີ ໂທລະຄົມມະນາຄົມ ແລະການສື່ສານ ຮ່ວມກັບ ລັດວິສາຫະກິດ ລາວໂທລະຄົມ ໄດ້ຈັດງານ ກິດຈະກຳເຜີຍແຜ່ຄວາມຮູ້ດ້ານໄອຊີທີໃຫ້ແກ່ນັກສຶກສາພາຍໃນສະຖາບັນເຕັກໂນໂລຊີສື່ສານຂໍ້ມູນຂ່າວສານ (ICT), ໃນເມື່ອບໍ່ດົນມານີ້, ທີ່ສະຖາບັນດັ່ງກ່າວ. ໂດຍການເປັນປະທານຂອງ ທ່ານ ທະວີສັກ ມະໂນທັມ, ຫົວໜ້າກົມ ເຕັກໂນໂລຊີການສື່ສານ ຂໍ້ມູນຂ່າວສານ, ກະຊວງ ປທສ ແລະ ທ່ານ ສຸພອນ ປັນຍາດາ, ຫົວໜ້າ ຝ່າຍສະໜັບສະໜູນ ນະຄອນຫຼວງ, ລັດວິສາຫະກິດ ລາວໂທລະຄົມ, ມີພາກສ່ວນທີ່ກ່ຽວຂ້ອງເຂົ້າຮ່ວມ.

           ກິດຈະກຳໃນຄັ້ງນີ້ແມ່ນ ການສະເໜີຄວາມຮູ້ກ່ຽວກັບ ສື່ສັງຄົມອອນລາຍ ໂດຍມີເນື້ອໃນທັງດ້ານດີ ແລະ ດ້ານຫຍໍ້ທໍ້ ທີ່ສົ່ງຜົນກະທົບຕໍ່ສັງຄົມ ພ້ອມທັງໄດ້ ແນະນຳແນວທາງ ການໃຊ້ ສື່ສັງຄົມອອນລາຍ ຢ່າງຖືກຕ້ອງ ແລະ ປອດໄພ. ນອກນັ້ນ ກໍ່ຍັງໄດ້ສະເໜີເນື້ອໃນ ກົດໝາຍວ່າດ້ວຍ ການຕ້ານ ແລະ ສະກັດກັ້ນອາຊະຍາກຳທາງຄອມພິວເຕີ ເພື່ອໃຫ້ຜູ້ເຂົ້າຮ່ວມໄດ້ຮູ້ ແລະ ມີສະຕິໃນການນຳໃຊ້ອິນເຕີເນັດ. ພ້ອມດຽວກັນນັ້ນ, ບໍລິສັດ ລັດວິສາຫະກິດ ລາວໂທລະຄົມ ກໍ່ໄດ້ມີການແນະນຳ ການນຳໃຊ້ອິນເຕີເນັດຢ່າງປະຫຍັດ ເລືອກຜະລິດຕະພັນ ໃຫ້ເໝາະສົມກັບຄວາມຕ້ອງການຂອງຕົນ.

         ທ່ານ ທະວີສັກ ມະໂນທັມ ກ່າວວ່າ່ “ ປະຈຸບັນ ສື່ສັງຄົມອອນລາຍໄດ້ກາຍເປັນໜຶ່ງປັດໃຈສຳຄັນ ຂອງການດຳລົງຊີວິດ ແລະ ຫຼາຍຄົນກໍ່ຂາດບໍ່ໄດ້ ໂດຍສະເພາະ ແມ່ນການນຳໃຊ້ໃນວຽກງານ, ການເຮັດທຸລະກິດ ຫຼື ການສຶກສາ-ຮຳຮຽນ, ແຕ່ຄຽງຄູ່ກັນນັ້ນ ສື່ສັງຄົມອອນລາຍກໍ່ມີຄວາມສ່ຽງ ແລະ ສ້າງຜົນເສຍຫາຍຫຼາຍຢ່າງໃຫ້ແກ່ຜູ້ໃຊ້ໄດ້ຫຼາຍເຊັ່ນກັນ. ຈາກບັນຫາດັ່ງກ່າວ ຈຶ່ງຈຳເປັນທີ່ພວກເຮົາຕ້ອງຮັບຮູ້ເຖິງຜົນດີ-ຜົນຮ້າຍຂອງການນຳໃຊ້ສື່ສັງຄົມອອນລາຍນີ້ ”.

            ໃນການເຜີຍແຜ່ຄັ້ງນີ້ເຫັນວ່າ ບັນດານັກສຶກສາຜູ້ເຂົ້າຮ່ວມມີຄວາມສົນໃຈ ແລະ ຕິດຕາມການນຳສະເໜີເນື້ອໃນແຕ່ລະຫົວຂໍ້ຢ່າງກະຕືລືລົ້ນ ເນື່ອງຈາກໃນຊີວິດປະຈຳວັນແມ່ນໄດ້ໃຊ້ເວລາກັບການນຳໃຊ້ສື່ສັງຄົມອອນລາຍເປັນສ່ວນຫຼາຍຈຶ່ງເຮັດໃຫ້ບັນດາຜູ້ເຂົ້າຮ່ວມເຂົ້າໃຈໄດ້ໄວ ໂດຍສະແດງອອກດ້ວຍການແຂ່ງຂັນກັນຕອບ-ຄຳຖາມຢ່າງຄຶກຄື້ນ ແລະ ດຳເນີນໄປດ້ວຍຜົນສຳເລັດອັນຈົບງາມ. ໂດຍກິດຈະກຳດັ່ງກ່າວນີ້ ກໍ່ຈະສືບຕໍ່ຈັດຕັ້ງຢູ່ ສະຖາບັນການສຶກສາ, ອົງການປົກຄອງໃນໄລຍະຕໍ່ໄປ ເພື່ອໃຫ້ສັງຄົມໄດ້ຮັບຮູ້ຜົນດີ ແລະ ຫຼີກລ້ຽງ ຜົນຮ້າຍຂອງສື່ສັງຄົມອອນລາຍ.

ໂດຍ: ກົມໄອທີ. /16/06/2017