5 ປີຜ່ານມາ ຄະນະປະຈໍາສະພາແຫ່ງຊາດ ຊຸດທີ IX ສາມາດຍາດໄດ້ຜົນສໍາເລັດຫລາຍດ້ານ

​ເຜີຍ​ແຜ່​ໂດຍ: admin|ຢ້ຽມ​ຊົມ: 5 ຄັ້ງ | ເວ​ລາ | 2026-03-23 20:39:43

5 ປີຜ່ານມາ ຄະນະປະຈໍາສະພາແຫ່ງຊາດ ຊຸດທີ IX ສາມາດຍາດໄດ້ຜົນສໍາເລັດຫລາຍດ້ານ

ຂປລ. ຕະຫລອດໄລຍະເວລາ 5 ປີຜ່ານມາ, ຄະນະປະຈຳສະພາແຫ່ງຊາດ ຊຸດທີ IX ໄດ້ເອົາ ໃຈໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ດ້ວຍຄວາມເປັນເຈົ້າການ ແລະ ດ້ວຍຄວາມຮັບຜິດຊອບສູງ ໃນການຊີ້ນໍາ-ນໍາພາ ການເຄື່ອນໄຫວວຽກງານຂອງສະພາແຫ່ງຊາດ ຊຸດທີ IX ເຊິ່ງ ສາມາດຍາດໄດ້ຜົນສໍາເລັດຫລາຍດ້ານ.

ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ລາຍງານການປະຕິບັດໜ້າທີ່ໃນໄລຍະ 5 ປີຜ່ານມາ ແລະ ກ່າວລາໜ້າທີ່ ຂອງປະທານສະພາແຫ່ງຊາດ ຊຸດທີ IX ໃນກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ X ວັນທີ 23 ມີນາ 2026 ນີ້ ໂດນທ່ານໄດ້ໃຫ້ຮູ້ວ່າ: ສະພາແຫ່ງຊາດ ໄດ້ເອົາໃຈໃສ່ຜັນຂະຫຍາຍແນວທາງນະໂຍບາຍຂອງພັກ ເຂົ້າໃນການສ້າງ ແລະ ປັບ ປຸງກົດໝາຍ ໄດ້ຮັບຜົນສໍາເລັດຫລາຍດ້ານ ເປັນຕົ້ນ ໄດ້ພິຈາລະນາຮັບຮອງເອົາລັດຖະທຳມະນູນ ສະ ບັບປັບປຸງປີ 2025, ສ້າງ ແລະ ປັບປຸງກົດໝາຍຕະຫລອດໄລຍະ ຊຸດທີ IX ໄດ້ 86 ສະບັບ ໃນຈໍານວນ 96 ສະບັບ; ພິຈາລະນາຮັບຮອງເອົາວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃນກອງ ປະ ຊຸມສະໄໝວິສາມັນ ໃນເດືອນສິງຫາ 2021 ແລະ ໄດ້ພິຈາລະນາບັນດາບັນຫາສາຄັນພື້ນຖານຂອງ ປະ ເທດຊາດ; ໄດ້ຕິດຕາມກວດກາບັນດາບັນຫາເຄັ່ງຮ້ອນຂອງສັງຄົມ ແລະ ມີການປຶກສາຫາລືກັບລັດ ຖະບານແກ້ໄຂ ໂດຍມີການວາງບັນດາມາດຕະການຕົວຈິງ ເຮັດໃຫ້ສະພາບການພັດທະນາເສດຖະ ກິດ-ສັງຄົມ ນັບມື້ມີການຫັນປ່ຽນດີຂຶ້ນ; ສະພາແຫ່ງຊາດໄດ້ເອົາໃຈໃສ່ນໍາພາ-ຊີ້ນໍາ ຄົ້ນຄວ້າປັບປຸງກົງ ຈັກຂອງສະພາແຫ່ງຊາດ ໃຫ້ກະທັດຮັດ, ໂລ່ງລ່ຽນ ແລະ ມີປະສິດຕິຜົນສູງ ທີ່ສອດຄ່ອງກັບມະຕິຂອງພັກ ເພື່ອປະຕິບັດພາລະບົດບາດ, ສິດ, ໜ້າທີ່ ທີ່ໄດ້ກຳນົດໄວ້ໃນກົດໝາຍວ່າດ້ວຍສະພາແຫ່ງຊາດ; ເອົາໃຈໃສ່ປະສານສົມທົບກັບລັດຖະບານ, ອົງການໄອຍະການປະຊາຊົນສູງສຸດ, ສານປະຊາຊົນສູງສຸດ, ອົງການກວດສອບແຫ່ງລັດ, ອົງການກວດກາແຫ່ງລັດ, ສູນກາງແນວລາວສ້າງຊາດ, ສະຫະພັນນັກຮົບເກົ່າແຫ່ງຊາດ ແລະ ອົງການຈັດຕັ້ງມະຫາຊົນຂັ້ນສູນກາງໃນການຈັດຕັ້ງກອງປະຊຸມຮ່ວມປະຈໍາປີ ກໍຄືການກະກຽມເນື້ອໃນສໍາຄັນ ແລະ ຈັດຕັ້ງຜັນຂະຫຍາຍບັນດາມະຕິກອງປະຊຸມສະພາແຕ່ລະຄັ້ງ, ໄດ້ເສີມຂະຫຍາຍສິດເປັນເຈົ້າໃນການປະກອບຄໍາຄິດຄໍາເຫັນຂອງປະຊາຊົນ ໂດຍຜ່ານສູນກາງແນວລາວ 1 ສ້າງຊາດ, ບັນດາອົງການຈັດຕັ້ງມະຫາຊົນ ແລະ ສາຍດ່ວນ ຕໍ່ກັບການເຄື່ອນໄຫວວຽກງານຂອງສະ ພາແຫ່ງຊາດ ກໍຄື ສະມາຊິກສະພາແຫ່ງຊາດ ແລະ ບັນຫາເຄັ່ງຮ້ອນໃນສັງຄົມ ຕາມທີ່ກຳນົດໄວ້ໃນລັດຖະທຳມະນູນ ແລະ ກົດໝາຍ.

ພ້ອມນີ້, ສະພາແຫ່ງຊາດ ຊຸດທີ IX ໄດ້ເສີມຂະຫຍາຍການພົວພັນຮ່ວມມືກັບບັນດາປະເທດເພື່ອນມິດ, ລັດຖະສະພາສາກົນ ແລະ ພາກພື້ນ, ອົງການຈັດຕັ້ງສາກົນ ແລະ ໄດ້ຮັບກຽດເປັນເຈົ້າພາບຈັດກອງປະຊຸມສະມັດຊາໃຫຍ່ ລັດຖະສະພາລະຫວ່າຊາດອາຊຽນ (AIPA) ຄັ້ງທີ 45 ໃນປີ 2024 ແລະ ກອງປະຊຸມສຸດຍອດສາມ ປະທານສະພາແຫ່ງຊາດ ລາວ-ກຳປູເຈຍ-ຫວຽດນາມ ຄັ້ງທີ I ໃນປີ 2023 ຜ່ານມາ.

ຂ່າວ: ສົມຫວັງ

ພາບ: ເກດສະໜາ