ປິດຝຶກອົບຮົມວຽກງານກວດກາ ຄັ້ງທີ IV ຂອງກະຊວງການຕ່າງປະເທດ

​ເຜີຍ​ແຜ່​ໂດຍ: admin|ຢ້ຽມ​ຊົມ: 35 ຄັ້ງ | ເວ​ລາ | 2024-11-21 15:47:52

 

ໃນວັນທີ 11 ກັນຍາ ນີ້ ທີ່ ກະຊວງການຕ່າງປະເທດ ໄດ້ມີພິທີປິດຊຸດຝຶກອົບຮົມວຽກງານກວດກາ ຄັ້ງທີ IV ຂອງກະຊວງການຕ່າງປະເທດ ໂດຍໃຫ້ກຽດເປັນປະທານ ຂອງ ທ່ານ ຕິ່ງ ສຸກສັນ ຄະນະປະຈໍາພັກ ຮອງເລຂາຄະນະພັກກະຊວງ ຮອງລັດຖະມົນຕີກະຊວງການຕ່າງປະເທດ, ມີຜູ້ຕາງໜ້າຈາກຄະນະກວດກາສູນກາງພັກ, ອົງການກວດສອບແຫ່ງລັດ, ອົງການໄອຍະການປະຊາຊົນສຸງສຸດ, ຫົວໜ້າກົມ, ຮອງກົມ ແລະ ຜູ້ຕາງໜ້າຈາກບັນດາກົມ ຂອງກະຊວງການຕ່າງປະເທດ ແລະ ສໍາມະນາກອນ ເຂົ້າຮ່ວມຢ່າງພ້ອມພຽງ.

ໃນພິທີປິດຊຸດຝຶກອົບຮົມຄັ້ງນີ້, ທ່ານ ນາງ ໄກມະນີ ອໍລະບູນ ກຳມະການຄະນະພັກກະຊວງ ຮອງປະທານຄະນະກວດກາພັກ ຫົວໜ້າກົມກວດກາ ໄດ້ຜ່ານບົດລາຍງານກ່ຽວກັບຜົນການຈັດຝຶກອົບຮົມວຽກງານກວດກາ ໃນຄັ້ງນີ້ ຊຶ່ງໄດ້ດຳເນີນມາແຕ່ວັນທີ 28 ສິງຫາ-11 ກັນຍາ 2023 (11 ວັນ) ດ້ວຍຜົນສຳເລັດອັນຈົບງາມ. ຜ່ານການຝຶກອົບຮົມ ເຮັດໃຫ້ສຳມະນາກອນມີຄວາມຮັບຮູ້ ແລະ ເຂົ້າໃຈ ກ່ຽວກັັບການເຄື່ອນໄຫວວຽກງານຕິດຕາມ, ກວດກາດີຍິ່ງຂຶ້ນ ຊຶ່ງເປັນວຽກທີ່ຕ້ອງໄດ້ເຮັດເປັນປົກກະຕິ ຕໍ່ເນື່ອງ ແລະ ການກວດກາເປັນເຄື່ອງມືສຳຄັນ ເພື່ອຊ່ວຍເຕືອນ ແລະ ແກ້ໄຂບັນຫາໄດ້ຢ່າງທັນການ; ນອກນັ້ນ, ຍັງເປັນໂອກາດແລກປ່ຽນບົດຮຽນ ແລະ ປະສົບການຕົວຈິງນຳບັນດາອາຈານ ທີ່ມີປະສົບການ ແລະ ບົດ ຮຽນຫຼາກຫຼາຍ ຊຶ່ງເປັນຂໍ້ມູນພື້ນຖານອັນສໍາຄັນ ແລະ ຄວາມຮູ້ອັນລໍ້າຄ່າ ທີ່ສາມາດນຳໄປຈັດຕັ້ງຜັນຂະ ຫຍາຍ ແລະ ນຳໃຊ້ເຂົ້າໃນການເຄື່ອນໄຫວວຽກງານຕິດຕາມ, ກວດກາຕົວຈິງ.

ໃນໂອກາດດັ່ງກ່າວ, ທ່ານ ຕິ່ງ ສຸກສັນ ປະທານກອງປະຊຸມ ໄດ້ໃຫ້ກຽດມອບໃບຢັ້ງຢືນ ໃຫ້ແກ່ສໍາມະນາກອນທີ່ເຂົ້າຮ່ວມຝຶກອົບຮົມ ທັງໝົດ 32 ທ່ານ ຍິງ 16 ທ່ານ. ພ້ອມດຽວກັນນັ້ນ, ກໍໄດ້ສະແດງຄວາມຂອບໃຈມາຍັງຄະນະກວດກາສູນກາງພັກ, ອົງການກວດສອບແຫ່ງລັດ ແລະ ອົງການໄອຍະການປະຊາຊົນສູງສຸດ ທີ່ໄດ້ໃຫ້ການຮ່ວມມື ແລະ ອຳນວຍຄວາມສະດວກໃນການຕອບສະໜອງວິທະຍາກອນ, ເອກະສານບົດຮຽນ ແລະ ປະກອບສ່ວນບໍາລຸງ-ກໍ່ສ້າງ ສະມາຊິກພັກ-ພະນັກງານ ທີ່ເຮັດວຽກງານກວດ ກາຂອງບັນດາໜ່ວຍພັກ ທີ່ຂຶ້ນກັບອົງຄະນະພັກກະຊວງການຕ່າງປະເທດ ໃຫ້ມີຄວາມເຂັ້ມແຂງ. ພ້ອມນັ້ນ, ທ່ານຍັງໄດ້ເນັ້ນໃຫ້ບັນດາສໍາມະນາກອນທຸກທ່ານເອົາໃຈໃສ່ວຽກງານດັ່ງກ່າວ ແລະ ນໍາເອົາບົດຮຽນທີ່ສໍາຄັນດັ່ງກ່າວໄປໝູນໃຊ້ເຂົ້າໃນການປະຕິບັດໜ້າທີ່ວຽກງານຂອງຕົນ ເພື່ອຍົກສູງວຽກງານຕິດຕາມ, ກວດກາ ຂອງກະຊວງການຕ່າງປະເທດ ໃຫ້ມີຄວາມເຂັ້ມແຂງ, ຖືກຕ້ອງ ແລະ ມີຜົນສັກສິດຍິ່ງຂຶ້ນ.

ຊຸດຝຶກອົບຮົມຄັ້ງນີ້ ໄດ້ດຳເນີນໄປດ້ວຍຜົນສຳເລັດອັນຈົບງາມ ຊຶ່ງໃນຕອນທ້າຍ ທ່ານ ເທບຖາວອນ ແສງມະນີ ກຳມະການໜ່ວຍພັກ ຮອງຫົວໜ້າກົມສົນທິສັນຍາ ແລະ ກົດໝາຍ ໃນນາມຕາງໜ້າໃຫ້ສຳມະນາກອນ ໄດ້ກ່າວສະແດງຄວາມຂອບໃຈຕໍ່ທ່ານປະທານ, ບັນດາວິທະຍາກອນ ແລະ ແຂກຖືກເຊີນ ພ້ອມທັງຮັບເອົາບັນດາທິດນໍາ ແລະ ຄໍາເຫັນຕ່າງໆ ເພື່ອນໍາໄປໝູນໃຊ້ ແລະ ຖ່າຍທອດບົດຮຽນຕ່າງໆ ທີ່ໄດ້ຮັບຈາກຊຸດຝຶກອົບຮົມໃນຄັ້ງນີ້ ໃຫ້ເກີດດອກອອກຜົນໃນຕໍ່ໜ້າ.

(ແຫຼ່ງ: ປະ​ຊາ​ຊົນ, ຂ່າວ-ພາບ: ກຕທ)/12-9-2023