ປະທານປະເທດ ເນັ້ນໃຫ້ເຍົາວະຊົນທັນວາຝຶກຝົນຫຼໍ່ຫຼອມຕົນເອງ ໃຫ້ກາຍເປັນຄົນຮູ້ ມີສະຕິປັນຍາ

​ເຜີຍ​ແຜ່​ໂດຍ: admin|ຢ້ຽມ​ຊົມ: 9 ຄັ້ງ | ເວ​ລາ | 2026-03-17 19:00:17

ໃນວັນທີ 12 ພະຈິກ 2025 ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະທານປະເທດ ໄດ້ພົບປະໂອ້ລົມຫຼານນ້ອຍເຍົາວະຊົນທັນວາທົ່ວປະເທດ ໃນໂອກາດທີ່ເຂົ້າຮ່ວມງານພົບປະຕັ້ງຄ້າຍເຍົາວະຊົນທັນວາທົ່ວປະເທດ ຄັ້ງທີ VI, ທີ່ນະຄອນຫຼວງວຽງຈັນເປັນເຈົ້າພາບ

 ໃນລະຫວ່າງວັນທີ 10-11 ພະຈິກ 2025 ທີ່ສະໜາມກິລາຫລັກ 16 ນະຄອນຫຼວງວຽງຈັນ ໂດຍໄດ້ເນັ້ນໃຫ້ຫຼານນ້ອຍເຍົາວະຊົນທັນວາ ອອກແຮງສຶກສາຮໍ່າຮຽນ, ຝຶກຝົນຫຼໍ່ຫຼອມຕົນເອງໃຫ້ກາຍເປັນຄົນຮູ້, ມີສະຕິປັນຍາ, ມີຄຸນສົມບັດ, ມີຄວາມສຸກເບີກບານມ່ວນຊື່ນ ເພື່ອເປັນຊັບພະຍາກອນມະນຸດອັນປະເສີດ ໃນການພັດທະນາປະເທດຊາດ ໃຫ້ມັ່ງຄັ່ງເຂັ້ມແຂງ, ໃຫ້ປະຊາຊົນຮັ່ງມີຜາສຸກ, ສ້າງສັງຄົມ ສາມັກຄີປອງດອງ, ປະຊາທິປະໄຕ, ຍຸຕິທຳ ແລະ ສີວິໄລ ທີ່ພັກໄດ້ວາງໄວ້ ດັ່ງຄໍາຂວັນຂອງເຍົາວະຊົນ ທີ່ວ່າ “ເພື່ອພາລະກິດຂອງຊາດ ເຍົາວະຊົນກຽມພ້ອມ”. ພ້ອມທັງມີສະຕິຊາດສູງ, ມີຄວາມເຄົາລົບນັບຖືເຊິ່ງກັນ ແລະ ກັນ ລະຫວ່າງຊົນເຜົ່າ-ເຊື້ອຊາດຕ່າງໆ, ປົກປັກຮັກສາສັນຕິພາບ, ສົ່ງເສີມວັດທະນະທຳ, ຮີດຄອງປະເພນີອັນດີງາມຂອງຊາດ, ຂອງເຜົ່າ; ຮັກບ້ານເກີດເມືອງນອນ, ຮັກສາສຸຂະພາບ, ມີຄວາມສາມັກຄີພາຍໃນຄອບຄົວ, ໝູ່ເພື່ອນນັກຮຽນພາຍໃນ, ນອກໂຮງຮຽນ, ຄູອາຈານ, ສາມັກຄີກັບເຍົາວະຊົນລາວບັນດາເຜົ່າ, ສາກົນ ແລະ ເພື່ອນມິດຍຸດທະສາດ; ປົກປັກຮັກສາສິ່ງແວດລ້ອມ, ເພີ່ມພູນຜະລິດຜົນ, ມີສະຕິລະວັງຕົວ, ບໍ່ຫຼົງເຊື່ອຄໍາຕົວະຍົວະຫຼອກລວງຂອງຄົນບໍ່ດີ, ບໍ່ພົວພັນສິ່ງເສບຕິດ, ບໍ່ຫຼິ້ນກິນຟຸມເຟືອຍ ແລະ ການພະນັນ, ບໍ່ຄວນໃຊ້ສື່ອອນລາຍທີ່ບໍ່ຖືກຕ້ອງ ແລະ ສິ່ງລາມົກອານາຈານຕ່າງໆ; ຮັກສາຄວາມຮັກຂອງພໍ່ແມ່ ທີ່ມີຕໍ່ພວກຫຼານ ທີ່ບໍ່ມີຫຍັງທຽບໄດ້ ຂໍໃຫ້ພວກຫຼານຈົ່ງຮັກພໍ່ແມ່ ຜູ້ໃຫຍ່ຜູ້ລ້ຽງດູພວກຫຼານຄືນໃຫ້ຫຼາຍ.

ສະຫາຍ ທອງລຸນ ສີສຸລິດ ຍັງເນັ້ນຕື່ມວ່າ: ພວກລູກຫຼານ ນ້ອງນ້ອຍເຍົາວະຊົນ ຕ້ອງຮູ້ສ້າງ ແລະ ນໍາໃຊ້ລະບົບປັນຍາປະດິດ (AI), ນໍາໃຊ້ວິທະຍາສາດ ເຕັກໂນໂລຊີ ທີ່ທັນສະໄໝຢ່າງມີປະສິດທິຜົນສູງ ເພື່ອເປັນກຳລັງແຮງ ປະກອບສ່ວນໃນການພັດທະນາປະເທດຊາດ ພ້ອມທັງຍັງອວຍພອນໃຫ້ຫຼານນ້ອຍເຍົາວະຊົນລາວບັນດາເຜົ່າ ທີ່ເຂົ້າຮ່ວມງານໃນຄັ້ງນີ້ ຈົ່ງມີສຸຂະພາບແຂງແຮງ, ເປັນເດັກຄໍາຮູ້, ເປັນນັກຮຽນດີ ນັກຮຽນເກັ່ງຂອງຄູ-ອາຈານ ແລະ ເປັນລູກຫຼານທີ່ດີຂອງຂອງພໍ່ແມ່ ແລະ ເປັນອະນາຄົດທີ່ດີປະເທດຊາດ ອັນແສນຮັກຂອງພວກເຮົາ.

ຂ່າວ-ພາບ: ຂປລ