ຖະແຫຼງຜົນການພິຈາລະນາວຽກງານຂອງອົງການກວດກາແຫ່ງລັດ ແລະ ອົງການກວດສອບແຫ່ງລັດ

​ເຜີຍ​ແຜ່​ໂດຍ: admin|ຢ້ຽມ​ຊົມ: 33 ຄັ້ງ | ເວ​ລາ | 2024-11-21 16:10:54

ວັນທີ 10 ພະຈິກ 2023 ທີ່ສະພາແຫ່ງຊາດ, ທ່ານ ສົມມາດ ພົນເສນາ ຮອງປະທານສະພາແຫ່ງຊາດ ໄດ້ຖະແຫຼງຂ່າວ ຜົນການພິຈາລະນາວຽກງານ ຂອງອົງການກວດກາແຫ່ງລັດ ແລະ ອົງການກວດສອບແຫ່ງລັດ ກ່ຽວກັບການຈັດຕັ້ງປະຕິບັດ ແຜນການເຄື່ອນໄຫວວຽກງານ ກາງສະໄໝ 5 ປີ (2021-2025), ການເຄື່ອນໄຫວ ປະຈຳປີ 2023 ແລະ ແຜນການທ້າຍສະໄໝ ຮອດປີ 2025 ແລະ ແຜນການ ປະຈຳປີ 2024 ວ່າ: ໃນລະຫວ່າງ ວັນທີ 7-8 ພະຈິກ 2023, ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ໄດ້ຮັບຟັງການລາຍງານຂອງອົງການກວດກາແຫ່ງລັດ ແລະ ອົງການກວດສອບແຫ່ງລັດ ກ່ຽວກັບການສະຫຼຸບແຜນການເຄື່ອນໄຫວວຽກງານກາງສະໄໝ 5 ປີ (2021-2025), ການ ເຄື່ອນໄຫວ ປະຈຳປີ 2023 ແລະ ແຜນການທ້າຍສະໄໝ ຮອດປີ 2025 ແລະ ແຜນການ ປະຈຳປີ 2024, ບົດລາຍງານ ຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2022 ແລະ ບົດລາຍງານ ຜົນການກວດກາຕາມຜົນການກວດສອບ ແລະ ມະຕິສະພາແຫ່ງຊາດ. ຈາກນັ້ນ, ຕາງໜ້າໃຫ້ຄະນະປະຈໍາສະພາແຫ່ງຊາດ ໄດ້ຂຶ້ນປະກອບຄໍາເຫັນ ແລະ ບັນດາທ່ານສະມາຊິກສະພາແຫ່ງຊາດ ໃນຖານະທີ່ເປັນຕົວແທນແຫ່ງ ສິດ ແລະ ຜົນປະໂຫຍດ ຂອງປະຊາຊົນລາວບັນດາເຜົ່າ ໄດ້ປະກອບຄຳຄິດຄຳເຫັນ ແລະ ສຸມສະຕິປັນຍາລົງເລິກຄົ້ນຄວ້າ, ວິເຄາະ-ວິໄຈ ດ້ວຍຄວາມຮັບຜິດຊອບສູງ, ມີບັນຍາກາດທີ່ຟົດຟື້ນ, ມີຈຸດສຸມ ໂດຍໄດ້ຍົກໃຫ້ເຫັນ ດ້ານດີ, ດ້ານອ່ອນ-ຂໍ້ຄົງຄ້າງ, ສາເຫດ ແລະ ມາດຕະການແກ້ໄຂ ເພື່ອໃຫ້ອົງການກວດສອບແຫ່ງລັດ ແລະ ອົງການກວດກາແຫ່ງລັດ ນໍາໄປປັບປຸງແກ້ໄຂໃຫ້ມີປະສິດທິພາບ ແລະ ປະສິດທິຜົນ ສູງຂຶ້ນກວ່າເກົ່າ ຊຶ່ງສັງລວມໄດ້ບາງຄໍາເຫັນພົ້ນເດັ່ນ ດັ່ງນີ້:

1. ສະມາຊິກສະພາແຫ່ງຊາດ ໄດ້ສະແດງຄວາມຍ້ອງຍໍຊົມເຊີຍ ອົງການກວດກາແຫ່ງລັດ ແລະ ອົງການກວດສອບແຫ່ງລັດ ທີ່ໄດ້ຈັດຕັ້ງປະຕິບັດໜ້າທີ່ວຽກງານຂອງຕົນດ້ວຍຄວາມບຸກບືນຫ້າວຫັນ ຕາມກົດໝາຍ, ເຖິງວ່າການຈັດຕັ້ງປະຕິບັດໜ້າທີ່ວຽກງານຂອງສອງອົງການ ໃນໄລຍະຜ່ານມາ ຢູ່ໃນສະພາບຫຍຸ້ງຍາກຫຼາຍປະການ ໂດຍສະເພາະງົບປະມານບໍ່ພຽງພໍ, ແຕ່ດ້ວຍຄວາມເອົາໃຈໃສ່ນໍາພາ-ຊີ້ນໍາຂອງຄະນະພັກ, ຄະນະນໍາ ຂອງສອງອົງການ ເຮັດໃຫ້ການຈັດຕັ້ງປະຕິບັດແຜນການ ໄດ້ຮັບຜົນສໍາເລັດຫຼາຍດ້ານ, ສາມາດນໍາເອົາຜົນການກວດກາ-ກວດສອບ ລາຍງານຕໍ່ກອງປະຊຸມສະພາແຫ່ງຊາດ ທັນຕາມກໍານົດເວລາ; 2. ການເຄື່ອນໄຫວວຽກງານ ກວດກາລັດ ແລະ ກວດສອບແຫ່ງລັດ ເປັນການຈັດຕັ້ງຜັນຂະຫຍາຍແນວທາງນະໂຍບາຍຂອງພັກ, ກົດໝາຍ ແລະ ມະຕິຂອງສະພາແຫ່ງຊາດ ເຂົ້າໃນການຄຸ້ມລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍ ໃຫ້ມີຄວາມເປັນລະບຽບຮຽບຮ້ອຍ ຈຶ່ງສະເໜີໃຫ້ຄະນະພັກ, ຄະນະນໍາທັງສູນກາງ ແລະ ທ້ອງຖິ່ນ ເປັນເຈົ້າການນໍາພາ ການແກ້ໄຂຜົນການກວດກາ-ກວດສອບ ຢ່າງເດັດຂາດ ແລະ ເຂັ້ມງວດ, ຖືເປັນຄວາມຮັບຜິດຊອບການເມືອງຂອງຕົນ; 3. ການເຄື່ອນໄຫວວຽກງານ ກວດກາລັດ-ກວດສອບແຫ່ງລັດ ໃນໄລຍະຜ່ານມາ ສາມາດກວດເຫັນ ການລະເມີດວິໄນແຜນການ-ການເງິນ ເປັນຈໍານວນຫຼວງຫຼາຍ ແຕ່ຜູ້ກະທໍາຜິດຍັງບໍ່ໄດ້ຖືກລົງໂທດ ຫຼື ປະຕິບັດວິໄນ ຕາມກົດໝາຍຢ່າງເຂັ້ມງວດ ຈຶ່ງເປັນສາເຫດ ເຮັດໃຫ້ເກີດມີການລະເມີດແບບຊ້ຳເຮື້ອ ແລະ ມີລັກສະນະເພີ່ມຂຶ້ນໃນແຕ່ລະປີ. ເພື່ອແກ້ໄຂບັນຫາດັ່ງກ່າວ ໃນຕໍ່ໜ້າ ສອງອົງການຕ້ອງເອົາໃຈໃສ່ປະສານສົມທົບກັບ ກະຊວງ, ອົງການ ແລະ ອົງການປົກຄອງທ້ອງຖິ່ນ ທີ່ກ່ຽວຂ້ອງເພື່ອສຸມໃສ່ແກ້ໄຂຜົນການກວດກາ-ກວດສອບ ໃຫ້ເປັນຮູບປະທໍາຫຼາຍຂຶ້ນຕື່ມ, ເພື່ອເກັບກູ້ເງິນ, ຊັບສິນຂອງລັດ ເຂົ້າງົບປະມານແຫ່ງລັດ; ນໍາເອົາຜູ້ກະທໍາຜິດມາລົງ ໂທດ ຕາມກົດໝາຍຢ່າງເດັດຂາດ, ເຂັ້ມງວດ; 4. ເພື່ອເຮັດໃຫ້ຜົນການກວດກາ-ກວດສອບ ໄດ້ຮັບການແກ້ໄຂຢ່າງເຂັ້ມງວດນັ້ນ ສະເໜີໃຫ້ທັງສອງອົງການ ເປັນເຈົ້າການເຂົ້າຮ່ວມຢ່າງໃກ້ຊິດ ໃນການແກ້ໄຂຢູ່ແຕ່ລະຂັ້ນ, ພ້ອມທັງປະກອບຂໍ້ມູນຫຼັກຖານຢ່າງລະອຽດ, ຊັດເຈນ ໃຫ້ເປົ້າໝາຍທີ່ຖືກກວດກາ-ກວດສອບ ຮັບຮູ້ການກະທໍາຜິດຂອງຕົນເອງ. ຖ້າການກະທໍາຜິດໃດມີຄວາມຮ້າຍແຮງ, ສ້າງຄວາມເສຍຫາຍມູນຄ່າສູງ ຕ້ອງດໍາເນີນຄະດີຕາມຂະບວນການຍຸຕິທໍາ ຕາມກົດໝາຍຢ່າງເຂັ້ມງວດ, ເດັດຂາດ, ຫຼີກລ່ຽງການມອບໃຫ້ອົງການຈັດຕັ້ງ ຫຼື ທ້ອງຖິ່ນທີ່ກ່ຽວຂ້ອງ ເປັນຜູ້ແກ້ໄຂທາງບໍລິຫານ ແລະ ອື່ນໆ. ຖ້າເປັນການກະທໍາຜິດທີ່ບໍ່ຮ້າຍແຮງ, ສ້າງຄວາມເສຍຫາຍບໍ່ສູງ ຈຶ່ງມອບໃຫ້ອົງການຈັດຕັ້ງທີ່ກ່ຽວຂ້ອງ ດໍາເນີນມາດຕະການທາງບໍລິຫານຕາມກກົດໝາຍ; 5. ເພີື່ອແກ້ໄຂຜົນການກວດກາ-ກວດສອບ ໃຫ້ໄດ້ຮັບຜົນດີນັ້ນ, ສະເໜີໃຫ້ສອງອົງການ ຄົ້ນຄວ້າ, ກວດກາກົດໝາຍຂົງເຂດຂອງຕົນ ຢ່າງລະອຽດເລິກເຊິ່ງ, ຖ້າມີບັນຫາໃດບໍ່ທັນແຈ້ງ ກໍຕ້ອງໄດ້ສືບຕໍ່ປັບປຸງ, ບັນຫາໃດຍັງບໍ່ທັນມີນິຕິກໍາ ກໍໃຫ້ຄົ້ນຄວ້າສ້າງເປັນນິຕິກຳໃໝ່ ເພື່ອເປັນບ່ອນອີງໃນການຈັດຕັ້ງປະຕິບັດ; 6. ຕາມການລາຍງານຂອງສອງອົງການ ເຫັນວ່າ ການລະເມີດກົດໝາຍ ແລະ ວິໄນແຜນການ-ການເງິນ ເປັນບັນຫາທີ່ຊໍ້າເຮື້ອມາຫຼາຍປີ, ມີລັກສະນະຫຼາຍຮູບແບບທີ່ສະຫຼັບສັບຊ້ອນ, ເລິກແລບ ແລະ ມູນຄ່າເສຍຫາຍມີທ່າອ່ຽງເພີ່ມຂຶ້ນ, ສົ່ງຜົນກະທົບຕໍ່ເສດຖະກິດ-ການເງິນຂອງຊາດ ຖ້າບໍ່ຮີບຮ້ອນແກ້ໄຂ ກໍຈະເປັນອຸປະສັກກົດໜ່ວງຖ່ວງດຶງການພັດທະນາເສດຖະກິດຂອງຊາດ. ສະນັ້ນ, ຈຶ່ງສະເໜີໃຫ້ສອງອົງການ ເປັນເຈົ້າການຄົ້ນຄວ້າວິທີການແກ້ໄຂ, ຖ້າມີຄວາມຈໍາເປັນກໍສະເໜີເປັນວາລະແຫ່ງຊາດ ເພືື່ອຍົກລະດັບການແກ້ໄຂຜົນການກວດກາ-ກວດສອບ ໃຫ້ເປັນໜ້າທີ່ຂອງອົງຄະນະພັກທຸກຂັ້ນ ກໍຄື ພະ ນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າ ພ້ອມກັນສູ້ຊົນຈັດຕັ້ງປະຕິບັດ; 7. ຜົນການກວດກາ-ກວດສອບ ທີ່ສະສົມ ແລະ ແກ່ຍາວມາຫຼາຍປີ ເຫັນວ່າ ຜູ້ມີສ່ວນກ່ຽວຂ້ອງ ແລະ ຮັບຜິດຊອບ ບາງຄົນກໍໄດ້ຍົກຍ້າຍໄປຮັບໜ້າທີ່ໃໝ່, ບາງຄົນກໍອອກຮັບບຳນານ, ບາງຄົນກໍເສຍຊີວິດ, ບາງຫົວໜ່ວຍວິສາຫະກິດ ກໍຍຸບເລີກໄປແລ້ວ ແລະ ບໍ່ມີຕົວຕົນ. ສະນັ້ນ, ເພື່ອແກ້ໄຂບັນຫາດັ່ງກ່າວ ກອງປະຊຸມຈຶ່ງສະເໜີໃຫ້ສອງອົງການປຶກສາຫາລື, ກໍານົດຫຼັກການ ແລະ ເງື່ອນໄຂການແກ້ໄຂ, ຄົ້ນຄວ້າ, ວິໄຈ, ສັງລວມ ອັນໃດສາມາດແກ້ໄຂ ແລະ ເກັບກູ້ຄືນໄດ້, ອັນໃດທີ່ບໍ່ສາມາດແກ້ໄຂ ແລະ ບໍ່ມີຕົວຕົນໃຫ້ລະອຽດຈະແຈ້ງເພື່ອລາຍງານຕໍ່ ສະພາແຫ່ງຊາດ ພິຈາລະນາ; 8. ຜູ້ແທນສະເໜີໃຫ້ລັດຖະບານຄົ້ນຄວ້າຈັດສັນງົບປະມານເພີ່ມໃຫ້ສອງອົງການດັ່ງກ່າວ ເຂົ້າໃນວຽກງານ ກວດກາລັດ-ກວດສອບແຫ່ງລັດ. ພ້ອມກັນນັ້ນ ກໍໃຫ້ຄົ້ນຄວ້ານະໂຍບາຍ ຈາກການແກ້ໄຂຜົນການກວດກາ-ກວດສອບ ເພື່ອຊຸກຍູ້ສົ່ງເສີມສ້າງຄວາມເຂັ້ມແຂງ ໃຫ້ແກ່ວຽກງານກວດກາລັດ-ກວດສອບແຫ່ງລັດ.

ພ້ອມນີ້, ທ່ານ ສົມມາດ ພົນເສນາ ກໍໄດ້ກ່າວໃຫ້ຮູ້ວ່າ: ກອງປະຊຸມຄັ້ງນີ້ ນອກຈາກໄດ້ຮັບຟັງການລາຍງານຂອງ ສອງອົງການແລ້ວ, ຍັງໄດ້ມີການຊີ້ແຈງ ແລະ ອະທິບາຍຂອງກະຊວງຈຳນວນໜຶ່ງຕໍ່ຄຳຊັກຖາມ ຂອງສະມາຊິກສະພາແຫ່ງຊາດ. ຕາມວາລະກອງປະຊຸມ ໃນວັນທີ 21 ພະຈິກ 2023 ທີ່ຈະມາເຖິງ ກອງປະຊຸມຈະໄດ້ລົງຄະແນນຮັບຮອງເອົາມະຕິກ່ຽວກັບວຽກງານຂອງສອງອົງການດັ່ງກ່າວ.

(ແຫຼ່ງ: ປະ​ຊາ​ຊົນ, ຂ່າວ-ພາບ: ສຸກສະຫວັນ )/10-11-2023