ປະ​ທານ​ສະ​ພາ​ແຫ່ງ​ຊາດ ສຳ​ເລັດການຢ້ຽມຢາມສັນຖະວະໄມຕີ ສສ ຫວຽດນາມ

​ເຜີຍ​ແຜ່​ໂດຍ: admin|ຢ້ຽມ​ຊົມ: 8 ຄັ້ງ | ເວ​ລາ | 2026-03-17 06:35:31

(ສພຊ) ສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະ​ທານ​ສະ​ພາ​ແຫ່ງ​ຊາດ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ຂອງສະພາແຫ່ງຊາດ ແຫ່ງ ສປປ ລາວ ໄດ້ສໍາເລັດການຢ້ຽມຢາມສັນຖະວະໄມຕີ ແລະ ເຮັດວຽກຢູ່ ສສ ຫວຽດນາມ ໃນ​ວັນ​ທີ 8 ທັນ​ວາ 2021.

(ສພຊ) ສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສະພາແຫ່ງຊາດ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ຂອງສະພາແຫ່ງຊາດ ແຫ່ງ ສປປ ລາວ ໄດ້ສໍາເລັດການຢ້ຽມຢາມສັນຖະວະໄມຕີ ແລະ ເຮັດວຽກຢູ່ ສສ ຫວຽດນາມ ໃນວັນທີ 8 ທັນວາ 2021.

ໃນການຢ້ຽມຢາມ ແລະ ເຮັດວຽກຢູ່ ສສ ຫວຽດນາມ ຄັ້ງນີ້, ສະຫາຍປະທານສະພາແຫ່ງຊາດ ໄດ້ເຂົ້າຢ້ຽມຂໍ່ານັບບັນດາການນໍາຂັ້ນສູງພັກ-ລັດ ແຫ່ງ ສສ ຫວຽດນາມ ເປັນຕົ້ນ: ຢ້ຽມຂໍ່ານັບ ສະຫາຍ ຫງວຽນ ຟູ ຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ; ຢ້ຽມຂໍ່ານັບ ສະຫາຍ ຫງວຽນ ຊວນ ຟຸກ ກຳມະການກົມການເມືອງສູນກາງພັກ ປະທານປະເທດ ແຫ່ງ ສສ ຫວຽດນາມ; ຢ້ຽມຢາມພົບປະ ສະຫາຍ ຟາມ ມິງ ຈິງ ກຳມະການກົມການເມືອງສູນກາງພັກ ນາຍົກລັດຖະມົນຕີ ແຫ່ງ ສສ ຫວຽດນາມ. ທັງນີ້ ກໍເພື່ອປຶກສາຫາລືທິດທາງໃນການພົວພັນຮ່ວມມື ລະຫວ່າງ ສອງປະເທດລາວ-ຫວຽດນາມອ້າຍນ້ອງ.

ໃນການຢ້ຽມຢາມ ແລະ ເຮັດວຽກຢູ່ ສສ ຫວຽດນາມ ຄັ້ງນີ້ຍັງໄດ້ມີການພົບປະສອງຝ່າຍ ລະຫວ່າງ ສອງປະທານສະພາແຫ່ງຊາດ ທີ່ມີ ສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສະພາແຫ່ງຊາດ ແຫ່ງ ສປປ ລາວ ແລະ ສະຫາຍ ເວືອງ ດິງ ເຫວະ ກໍາມະການກົມການເມືອງສູນກາງພັກກອມມູນິດຫວຽດນາມ ປະທານສະພາແຫ່ງຊາດ ແຫ່ງ ສສ ຫວຽນາມ ດ້ວຍບັນຍາກາດແຫ່ງໄມຕີຈິດມິດຕະພາບອັນອົບອຸ່ນ, ສະໜິດສະໜົມຖານສະຫາຍອ້າຍນ້ອງ.

ໃນການພົບປະຄັ້ງນີ້, ສອງຝ່າຍໄດ້ພ້ອມກັນຕີລາຄາຄືນການພົວພັນຮ່ວມມື ລະຫວ່າງ ສອງອົງການນິຕິບັນຍັດຂອງສອງປະເທດ ໃນໄລຍະຜ່ານມາ ແລະ ພ້ອມກັນປຶກສາຫາລືທິດທາງແຜນການໃນຕໍ່ໜ້າ ເປັນຕົ້ນແມ່ນການປັບປຸງບົດບັນທຶກການຮ່ວມມື ລະຫວ່າງ ສອງອົງການນິຕິບັນຍັດ ຊຶ່ງຈະໝົດອາຍຸໃນປີ 2022, ການສ້າງກິດຈະກໍາສະເຫຼີມສະຫຼອງ ສອງວັນປະຫວັດສາດ ແລະ ປີສາມັກຄີມິດຕະພາບ ລາວ-ຫວຽດນາມ ໃນປີ 2022; ທັງສອງຝ່າຍໄດ້ເອກະພາບສືບຕໍ່ການພົວພັນຮວມມື ລະຫວ່າງ ສອງອົງການນິຕິບັນຍັດ ເປັນຕົ້ນການປັບປຸງບົດບັນທຶກສອງຝ່າຍ, ການແລກປ່ຽນຄະນະຜູ້ແທນ, ແລກປ່ຽນຄະນະມິດຕະພາບ, ແລກປ່ຽນສະມາຊິກສະພາແຫ່ງຊາດ (ສສຊ) ໜຸ່ມ, ແລກປ່ຽນ ສສຊ ເພດຍິງ, ແລກປ່ຽນຈັດຕັ້ງກອງປະຊຸມສໍາມະນາໃນຫົວຂໍ້ວິທະຍາສາດຮ່ວມກັນ, ຊຸກຍູ້ການພົວພັນຮ່ວມມືລະຫວ່າງ ສອງລັດຖະບານ, ປະສານສົມທົບຮ່ວມກັນຕິດຕາມກວດກາບັນດາໂຄງການຮ່ວມມືຕ່າງໆ, ປະສານສົມທົບໃນການພົວພັນຮ່ວມມື ໃນເວທີພາກພື້ນ ແລະ ສາກົນ ເປັນຕົ້ນ AIPA, IPU, APPF, ASEP, CLV ແລະ ອື່ນໆ; ຮ່ວມກັນຈັດຕັ້ງບັນດາກິດຈະກໍາສະເຫຼີມສະຫຼອງປີສາມັກຄີມິດຕະພາບ; ສືບຕໍ່ການຄົ້ນຄວ້າຍ້ອງຍໍ ບັນດາກົມກອງ ແລະ ບຸກຄົນຝ່າຍຫວຽດນາມ ທີ່ມີຜົນງານດີເດັ່ນໃນການປຸກສ້າງຫໍສະພາແຫ່ງຊາດລາວຫຼັງໃໝ່ ພ້ອມດຽວກັນນັ້ນ ສສ ຫວຽດນາມ ຈະສືບຕໍ່ໃຫ້ການຮ່ວມມືໃນການຄຸ້ມຄອງ ແລະ ນໍາໃຊ້ຫໍສະພາແຫ່ງຊາດລາວ; ສືບຕໍ່ແລກປ່ຽນບົດຮຽນກ່ຽວກັບວຽກງານອົງຄະນະພັກສະພາແຫ່ງຊາດ.

ສະຫາຍປະທານສະພາແຫ່ງຊາດ ຍັງໄດ້ນໍາພາຄະນະ ເຂົ້າຮ່ວມກອງປະຊຸມສໍາມະນາແລກປ່ຽນບົດຮຽນ ຮ່ວມກັນ ລະຫວ່າງ ສອງສະພາແຫ່ງຊາດ ກ່ຽວກັບການຊັກຖາມໃນກອງປະຊຸມຂອງສະພາແຫ່ງຊາດ, ການນໍາໃຊ້ບັນດາຂໍ້ກໍານົດ ຂອງກົດໝາຍເຂົ້າໃນການຜັນຂະຫຍາຍບັນດາໂຄງການພັດທະນາເສດຖະກິດ-ສັງຄົມ, ໂຄງການລົງທຶນພາຍໃນ ແລະ ຕ່າງປະເທດ; ໄດ້ຕ້ອນຮັບ ແລະ ຢ້ຽມພົບປະກັບ ສະຫາຍ ນົງ ດຶກ ແມັງ ແລະ ສະຫາຍ ຫງວຽນ ວັນ ອານ ອະດີດປະທານສະພາແຫ່ງຊາດ ແຫ່ງ ສສ ຫວຽດນາມ; ສະຫາຍ ເຈິນ ວັນ ຕຸ່ຍ ອະດີດກໍາມະການສູນກາງພັກກອມມູນິດຫວຽດນາມ ອະດີດຫົວໜ້າຄະນະກຳມະການວຽກງານສະມາຊິກສະພາແຫ່ງຊາດ ປະທານສະມາຄົມມິດຕະພາບຫວຽດນາມ-ລາວ ຂັ້ນສູນກາງ; ສະຫາຍ ນາງ ຫງວຽນ ທິ ກິມ ເງິນ ອະດີດປະທານສະພາແຫ່ງຊາດ ແຫ່ງ ສສ ຫວຽດນາມ ແລະ ສະຫາຍ ໂດ ວັນ ຈ້ຽນ ປະທານສູນກາງແນວໂຮມປະເທດຊາດ ແຫ່ງ ສສ ຫວຽດນາມ.

ນອກຈາກນັ້ນ, ຍັງໄດ້ເດີນທາງໄປແຂວງວິ້ງຟຸກ ເພື່ອຢ້ຽມຢາມກຸ່ມບໍລິສັດເກ້ວເລີມ ຊຶ່ງເປັນກຸ່ມບໍລິສັດທີ່ໄດ້ຮັບຜົນສໍາເລັດ ດ້ານກະສິກໍາ ໂດຍສະເພາະແມ່ນການຜະລິດຝຸ່ນຊີວະພາບດ້ວຍເຕັກໂນໂລຊີທີ່ທັນສະໄໝ ແລະ ຍັງໄດ້ຢ້ຽມຢາມ ແລະ ມີຄໍາເຫັນໂອ້ລົມພະນັກງານສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສສ ຫວຽດນາມ.

ການຢ້ຽມຢາມສັນຖະວະໄມຕີ ສສ ຫວຽດນາມ ຢ່າງເປັນທາງການໃນຄັ້ງນີ້ ຍັງເປັນການຮັດ ແໜ້ນ ແລະ ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ກໍຄື ສອງສະພາແຫ່ງຊາດ ລາວ ແລະ ຫວຽດນາມ ໃຫ້ແໜ້ນແຟ້ນ ແລະ ເກີດດອກອອກຜົນງົງາມຍິ່ງໆຂຶ້ນ.

(ຂ່າວ-ພາບ: ບຸນເກີດ ວົງໄຊຍາ)