ປະທານປະເທດຕ້ອນຮັບທູດປະເທດເພື່ອນມິດຍື່ນສານຕາຕັ້ງເພື່ອມາປະຈຳລາວ

​ເຜີຍ​ແຜ່​ໂດຍ: admin|ຢ້ຽມ​ຊົມ: 7 ຄັ້ງ | ເວ​ລາ | 2026-03-16 02:42:20

ທ່ານທອງລຸນສີສຸລິດປະທານປະເທດແຫ່ງສປປລາວໄດ້ຕ້ອນຮັບບັນດາທູດປະເທດເພື່ອນມິດເຂົ້າຍື່ນສານຕາຕັ້ງເພື່ອມາດຳລົງຕຳແໜ່ງເປັນເອກອັກຄະລັດຖະທູດແລະເອກອັກຄະຣາຊະທູດວິສາມັນຜູ້ມີອຳນາດເຕັມຂອງບັນດາປະເທດເພື່ອນມິດປະຈຳສປປລາວໃນວັນທີ 8 ກຸມພາ 2024, ທີ່ຫ້ອງຮັບແຂກສະພາແຫ່ງຊາດໂດຍມີ 7 ທ່ານດັ່ງນີ້:ທ່ານມໍຄໍາມັມບາ (Morecome Mumba) ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງສາທາລະນະລັດຊຳບີປະຈຳສປປລາວ(ຄົນໃໝ່),ມີສຳນັກງານຕັ້ງຢູ່ ກົວລາລຳເປີມາເລເຊຍ,ທ່ານບາເດີອັບດຸນລາຊາອີດບິນຊາເຢດອາລມາໂຕຣຊີ (Bader Abdulla Saeed Bin Saayed Almatrooshi) ເອກອັກຄະຣາຊະທູດວິສາມັນຜູ້ມີອຳນາດເຕັມແຫ່ງສະຫະນະຄອນເອເມຣັດອາຣັບປະຈຳສປປລາວ(ຄົນໃໝ່)ຊຶ່ງມີສຳນັກງານຕັ້ງຢູ່ຮ່າໂນ້ຍສສຫວຽດນາມ, ທ່ານເຊີເນມີເລີ (Jernei Müller) ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງສາທາລະນະລັດສະໂລເວນີປະຈຳສປປລາວ(ຄົນໃໝ່) ຊຶ່ງມີສຳນັກງານຕັ້ງຢູ່ ເຊອູນ ສ ເກົາຫຼີ, ທ່ານດາກີອີຟຣີອາມເອຟຣີຄາ (Darkey Ephraim Africa) ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງສາທາລະນະລັດອາຟຣິກາໃຕ້ ປະຈຳສປປລາວ(ຄົນໃໝ່) ຊຶ່ງມີສຳນັກງານຕັ້ງຢູ່ ບາງກອກຣາຊະອານາຈັກໄທ, ທ່ານນາງອາມີນາຕາຄອຍຕາ (Aminata KOITA) ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສ ກິເນປະຈຳສປປລາວຊຶ່ງມີສຳນັກງານຕັ້ງຢູ່ ປັກກິ່ງສປຈີນ,ທ່ານນາງແອນນາແຮມມາເກັນ (Anna Hammargren) ເອກອັກຄະຣາຊະທູດວິສາມັນຜູ້ມີອຳນາດເຕັມແຫ່ງຊູແອດປະຈຳສປປລາວຊຶ່ງມີສຳນັກງານຕັ້ງຢູ່ ບາງກອກຣາຊະອານາຈັກໄທແລະທ່ານຄູບິໂຕມັນຊີບາກຸຣາມຸດຊາ (Nkubito Manzi Bakuramutsa) ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສຣູວັນດາປະຈຳສປປລາວຊຶ່ງມີສຳນັກງານຕັ້ງຢູ່ ເຊອູນ ສ ເກົາຫຼີ.
ໃນໂອກາດດັ່ງກ່າວທ່ານປະທານປະເທດແຫ່ງສປປລາວໄດ້ສະແດງຄວາມຍິນດີຕ້ອນຮັບແລະຊົມເຊີຍຕໍ່ບັນດາທ່ານທູດປະເທດເພື່ອນມິດທີ່ຖືກແຕ່ງຕັ້ງມາດຳລົງຕຳແໜ່ງເປັນເອກອັກຄະລັດຖະທູດແລະເອກອັກຄະຣາຊະທູດວິສາມັນຜູ້ມີອຳນາດເຕັມຄົນໃໝ່  ປະຈຳສປປລາວຄັ້ງນີ້,ພ້ອມທັງໃຫ້ຄວາມຫວັງວ່າຕະຫຼອດໄລຍະໃນການປະຕິບັດໜ້າເປັນເອກອັກຄະລັດຖະທູດປະຈຳລາວ,ບັນດາທ່ານທູດຈະສືບຕໍ່ຢ່າງຕັ້ງໜ້າເຂົ້າໃນການປະກອບສ່ວນເສີມສ້າງສາຍພົວພັນຮ່ວມມື ແລະຊ່ວຍເຫຼືອຊຶ່ງກັນແລະກັນໃຫ້ແຕກດອກອອກຜົນຢ່າງແທ້ຈິງຊຶ່ງລັດຖະບານແລະພາກສ່ວນທີ່ກ່ຽວຂ້ອງຂອງລາວພ້ອມທີ່ຈະໃຫ້ການຮ່ວມມື,ສະໜັບສະໜູນແລະອຳນວຍຄວາມສະດວກເພື່ອໃຫ້ບັນດາທ່ານທູດສາມາດເຮັດໜ້າທີ່ໄດ້ຮັບການມອບໝາຍໃຫ້ມີຜົນສຳເລັດ, ທ່ານປະທານປະເທດຍັງໄດ້ອວຍພອນໃຫ້ບັນດາທ່ານທູດປະເທດເພື່ອນມິດຈົ່ງປະສົບຜົນສຳເລັດໃນການມາປະຕິບັດໜ້າທີ່ເປັນເອກອັກຄະລັດຖະທູດປະຈຳລາວໃນຄັ້ງນີ້
ບັນດາທູດປະເທດເພື່ອນມິດກໍໄດ້ສະແດງຄວາມຂອບໃຈຕໍ່ທ່ານປະທານປະເທດແຫ່ງສປປລາວທີ່ໄດ້ໃຫ້ການຕ້ອນຮັບຢ່າງອົບອຸ່ນ,ພ້ອມນີ້ຍັງໄດ້ກ່າວຢືນຢັນວ່າຈະຕັ້ງໜ້າປະຕິບັດໜ້າທີ່ທີ່ໄດ້ຮັບການມອບໝາຍໃນຄັ້ງນີ້ໃຫ້ປະສົບຜົນສຳເລັດຢ່າງຈົບງາມໂດຍຈະສືບຕໍ່ຊຸກຍູ້ສົ່ງເສີມສາຍພົວພັນມິດຕະພາບອັນດີງາມແລະການຮ່ວມມື,ການຊ່ວຍເຫຼືອຊຶ່ງກັນແລະກັນລະຫວ່າງປະເທດຂອງຕົນກັບສປປລາວໃຫ້ນັບມື້ມີບາດກ້າວດີຂຶ້ນຢ່າງບໍ່ຍຸດຢັ້ງ.

(ແຫຼ່ງ: ປະ​ຊາ​ຊົນ, ຂ່າວ-ພາບ:ສຳນານ)