ຄະນະກຳມະການຄຸ້ມຄອງ ອິນເຕີເນັດແຫ່ງຊາດ ສະຫລຸບວຽກງານ ປະຈໍາປີ 2020

​ເຜີຍ​ແຜ່​ໂດຍ: admin|ຢ້ຽມ​ຊົມ: 43 ຄັ້ງ | ເວ​ລາ | 2024-11-21 16:05:01

ຂປລ. ຄະນະກຳມະການຄຸ້ມຄອງອິນເຕີເນັດ ແຫ່ງຊາດ (ຄຄອຊ) ໄດ້ຈັດກອງປະຊຸມສະຫລຸບວຽກງານການເຄື່ອນໄຫວປະຈຳປີ 2020 ແລະ ວາງທິດທາງແຜນການປະຈໍາປີ 2021 ໃນວັນທີ 22 ທັນວາ 2020 ໂດຍການເປັນປະທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ແກ້ວວີສຸກ ໂສລະພົມ, ຫົວໜ້າສູນອິນເຕີເນັດ ແຫ່ງຊາດ, ຫົວໜ້າກອງເລຂາຄະນະກຳມະ ການຄຸ້ມຄອງອິນເຕີເນັດແຫ່ງຊາດ, ໄດ້ສະຫລຸບການຈັດຕັ້ງປະຕິບັດວຽກງານການປະຈຳປີ 2020 ເຊິ່ງເປັນໄລຍະທີ່ໃນທົ່ວໂລກ ໄດ້ປະເຊີນໜ້າກັບການລະບາດຂອງພະຍາດ ໂຄວິດ-19 ເຊິ່ງລາວ ກໍ່ໄດ້ຖືກຜົນກະທົບ ແລະ ເຮັດໃຫ້ເກີດມີ ການພົວພັນຂອງຄົນໃນສັງຄົມ ແລະ ການດຳລົງຊີວິດຮູບແບບໃໝ່ ຫລື New Normal, ເຮັດໃຫ້ຫຍັບເຂົ້າໃກ້ການຫັນເປັນ ດິຈິຕອນຫລາຍຂຶ້ນ ເປັນຕົ້ນ ສອນຜ່ານທາງອອນລາຍ, ການດຳເນີນທຸລະກຳອອນລາຍຕ່າງໆ, ການສັ່ງຊື້ເຄື່ອງ-ອາຫານການກິນ ຜ່ານລະບົບອອນລາຍ ແລະ ການຈ່າຍເງິນຜ່ານລະບົບເອເລັກໂຕຣນິກ ໂດຍການສະແກນ QR Code ມີຫລາຍຂຶ້ນ ແນໃສ່ຫລີກລ່ຽງການສຳຜັດກັບຄົນອື່ນ ແລະ ການສຳຜັດເງິນສົດ; ພ້ອມນີ້, ຄຄອຊ ໄດ້ຊີ້ນຳຂະແໜງການກ່ຽວຂ້ອງ ແລະ ບັນດາບໍລິສັດຜູ້ໃຫ້ບໍລິການ ດ້ານໂທລະຄົມມະນາຄົມ ແລະ ອິນເຕີເນັດ ປະກອບສ່ວນຕໍ່ ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດໂຄວິດ 19 ເປັນຕົ້ນ ໄດ້ສ້າງ ແລະ ສະໜອງ ເວັບໄຊ້ທາງການ covid19.gov.la ແລະ ແອັບຕິດຕາມ LaoKYC ເພື່ອເປັນຊ່ອງທາງໃນການເຜີຍແຜ່ຂໍ້ມູນທາງການ, ໄດ້ຕິດຕັ້ງສາຍດ່ວນ 165, 166 ເພື່ອໃຫ້ປະຊາຊົນໂທເຂົ້າມາສອບຖາມຂໍ້ມູນ. ນອກນີ້, ຍັງໄດ້ຊີ້ນຳໃຫ້ຫລຸດຄ່າບໍລິການອິນເຕີເນັດ, ຫລຸດຄ່າໂທລະສັບ, ແຈກດາຕາອິນເຕີເນັດໃຫ້ແກ່ສັງຄົມ ແລະ ໄດ້ສົ່ງຂໍ້ຄວາມສັ້ນ SMS ກ່ຽວກັບສະພາບພະຍາດໂຄວິດ-19 ຜ່ານໂທລະສັບມືຖືໃຫ້ແກ່ສັງຄົມທຸກວັນ ແລະ ອື່ນໆ; ຄຄອຊ ໄດ້ເນັ້ນໜັກ ວຽກງານການຕິດຕາມ, ກວດກາ ແລະ ຕອບຕ້ານບັນດາຫາງສຽງສັງຄົມ ເທິງສື່ສັງຄົມອອນລາຍ, ວຽກງານການແກ້ໄຂການພະນັນອອນລາຍ, ການແກ້ໄຂການຂາຍຫວຍເຖື່ອນ, ການກວດກາການນໍາໃຊ້ຄື້ນຄວາມຖີ່ຂ້າມແດນຕາມຊາຍແດນ ແລະ ການແກ້ໄຂປະກົດການຫຍໍ້ທໍ້ຕາມຮ້ານອິນເຕີເນັດຄາເຟ.

 

 

ຂ່າວ: ກິດຕາ ພາບ: ຂັນໄຊ