ປິດການຊ້ອມຮົບຍິງສະແດງສະເຫຼີມສະຫຼອງວັນສ້າງຕັ້ງກອງທັບ ປະຊາຊົນລາວ ຄົບຮອບ 75 ປີ

​ເຜີຍ​ແຜ່​ໂດຍ: admin|ຢ້ຽມ​ຊົມ: 8 ຄັ້ງ | ເວ​ລາ | 2026-03-15 08:45:53

ວິທະຍາຄານກົມມະດໍາໄດ້ມີພິທີປິດການຊ້ອມຮົບຍິງສະແດງສະເຫຼີມສະຫຼອງວັນສ້າງຕັ້ງ ກອງທັບປະຊາຊົນລາວ ຄົບຮອບ 75 ປີຂຶ້ນໃນວັນທີ 17 ມັງກອນ 2024, ທີ່ວິທະຍາຄານກົມມະດໍາ  ໂດຍການເຂົ້າຮ່ວມ ຂອງສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວປະທານປະເທດແຫ່ງສປປ ລາວ, ສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ ນາຍົກລັດຖະມົນຕີແຫ່ງສປປ ລາວ, ມີສະຫາຍ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ,ມີການນໍາພັກ-ລັດ, ພະນັກງານປະຕິວັດອາວຸໂສບໍານານ, ນາຍ ແລະ ພົນທະຫານ, ນາຍ ແລະ ພົນຕໍາຫຼວດ  ແລະ ມວນຊົນເຂົ້າຮ່ວມ.
    ສະຫາຍ ພົນໂທ ຄໍາລຽງ ອຸທະໄກສອນ ກໍາມະການສູນກາງພັກ ຮອງລັດຖະມົນຕີກະຊວງປ້ອງກັນປະເທດ ຫົວໜ້າກົມໃຫຍ່ເສນາທິການກອງທັບ ຫົວໜ້າຄະນະຮັບຜິດຊອບຍິງສະແດງ ສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ໄດ້ກ່າວວ່າ: ການຫັດແອບຊ້ອມຮົບໃນຄັ້ງນີ້ມີຜົນສຳເລັດດີຫຼາຍເກີນຄາດໝາຍທີ່ຄາດເອົາໄວ້ ສະແດງອອກຕົວຈິງຂອງແຕ່ລະເຫຼົ່າຮົບທີ່ເຂົ້າຮ່ວມ, ສາມາດກໍາຈັງຫວະການກະທໍາຕົວຈິງ ຂອງພະນັກງານ-ນັກຮົບ ຂອງແຕ່ລະຈຸ, ໝູ່, ໝວດ ກອງຮ້ອຍ ຂັ້ນກອງພັນນ້ອຍ ປະຕິບັດຖືກຕາມຍຸດທະວິທີສູ້ຮົບຂອງແຕ່ລະເຫຼົ່າຮົບ  ແລະ ມີການປະສານງານກັນໄດ້ຢ່າງໂລ່ງລ່ຽນ ແລະ ຄ່ອງແຄ້ວ, ສຳຄັນໄປກວ່ານັ້ນແມ່ນອ້າຍນ້ອງສາມາດນຳໃຊ້ອາວຸດຍຸດໂທປະກອນໃນການປະກອບເຫຼົ່າຮົບຂອງຕົນເອງ ແລະ ສາມາດດັບສູນເປົ້າໝາຍໄດ້ຢ່າງແມ່ນຢຳ ແລະ ເປົ້າໝາຍທີ່ຄະນະຮັບຜິດຊອບຈັດວາງໄວ້ ຢູ່ໃນໜ້າສະໜາມຖືກທຳລາຍຢ່າງຮາບກ້ຽງ ຊຶ່ງມັນໄດ້ສະແດງໃຫ້ເຫັນເຖິງຄວາມເອົາໃຈໃສ່ປະຕິບັດການຫັດແອບຝຶກຝົນຮອບດ້ານ ເພື່ອກຽມຄວາມພ້ອມປົກປັກຮັກສາອະທິປະໄຕຂອງຊາດໄວ້ໃຫ້ໝັ້ນຄົງ  ເວລາໃດກອງທັບກໍຍັງເປັນກໍາລັງຈົງຮັກພັກດີຂອງພັກ, ຂອງປະເທດຊາດ ກຽມພ້ອມເຮັດໜ້າທີ່ຕອບຕ້ານທຸກກໍລະນີທີ່ອາດຈະເກີດຂຶ້ນຕະຫຼອດເວລາ. 
    ສະຫາຍ ພົນໂທ ຄໍາລຽງ ອຸທະໄກສອນ ຍັງໄດ້ໃຫ້ຮູ້ຕື່ມອີກວ່າ: ໃນການຍິງສະແດງ ຍັງເປັນການປັບປຸງກໍ່ສ້າງ ຍົກລະດັບການກຽມພ້ອມສູ້ຮົບ ຂອງກອງທັບປະຊາຊົນລາວ, ໄດ້ຊີ້ນໍາກົມກອງທຸກເຫຼົ່າຮົບ ໃຫ້ສືບຕໍ່ຫັດແອບ ຮ່ຳຮຽນໃຫ້ເປັນປົກກະຕິນໍາເອົາຄໍາສັ່ງຂອງລັດຖະມົນຕີລົງໄປເຜີຍແຜ່ ແລະ ໄດ້ຫັນທົ່ວກອງທັບເຂົ້າສູ່ລະບຽບແບບແຜນ ເພື່ອຍົກລະດັບຄຸນະພາບຂອງກອງອົບຮົມຫັດແອບ ການທະຫານ ການເມືອງວິິຊາສະເພາະໃຫ້ສູງຂຶ້ນກວ່າເກົ່ານີ້ຄືເປົ້າໝາຍແຕ່ນີ້ຮອດປີ 2025 ເຮັດໃຫ້ກອງທັບມີລະບຽບແບບແຜນທັນສະໄໝ ໃຫ້ກອງທັບມີລະບຽບວິໄນທີ່ເຂັ້ມງວດຂຶ້ນກວ່າເກົ່າ ແລະ ເຮັດໃຫ້ກອງທັບຂອງພວກເຮົາສາມາດກຽມພ້ອມປະຕິບັດໜ້າທີ່ ທີ່ພັກລັດກໍຄືປະຊາຊົນມອບໝາຍໃຫ້.     
    ໃນໂອກາດດັ່ງກ່າວ,ສະຫາຍ ພົນໂທ ຄໍາລຽງ ອຸທະໄກສອນ ຂໍສະແດງຄວາມຂອບໃຈຢ່າງສຸດຊຶ້ງ ແລະ ສະແດງຄວາມຂອບໃຈຢ່າງລົ້ນເຫຼືອ ຕໍ່ການນຳພັກ-ລັດ ແລະ ອວຍພອນ ການນຳພັກ-ລັດ ຈົ່ງມີສຸຂະພາບເຂັ້ມແຂງ ມີພະລານາໄມສົມບູນ ສຶືບຕໍ່ຊີ້ນຳ ນຳພາປະເທດຊາດ ເພື່ອກ້າວຂຶ້ນສູ່ຄວາມຢູ່ເຢັນເປັນສຸກ ແລະ ຮຸ່ງເຮືອງສີວິໄລ, ສືບຕໍ່ຊີ້ນຳ-ນໍາພາກອງທັບປະຊາຊົນລາວໃຫ້ກາຍເປັນກອງທັບປະຕິວັດທີ່ມີແບບແຜນທັນສະໄໝ.
    ໂອກາດດັ່ງກ່າວ, ສະຫາຍປະທານປະເທດຍັງໄດ້ສໍາຜັດມືກັບບັນດາເຫຼົ່າຮົບທີ່ໄດ້ເຂົ້າຮ່ວມ   ແລະ ໄດ້ຢ້ຽມຊົມ ຮ້ານຂອງກົມອຸດສາຫະກໍາ ກົມໃຫຍ່ເຕັກນິກກອງທັບຕື່ມອີກ.

ແຫຼ່ງ​ເ ປະ​ຊາ​ຊົນ, ຂ່າວ: ບຸນອູ້ມ: ພາບ: ບຸນຕອມ