ສະຫາຍທອງລຸນສີສຸລິດພົບປະໂອ້ລົມພະນັກງານຫຼັກແຫຼ່ງຂອງຫ້ອງວ່າການສູນກາງພັກ

​ເຜີຍ​ແຜ່​ໂດຍ: admin|ຢ້ຽມ​ຊົມ: 8 ຄັ້ງ | ເວ​ລາ | 2026-03-15 07:08:55

ໃນວັນທີ 27 ທັນວາ 2023, ທີ່ຫ້ອງວ່າການສູນກາງພັກ, ສະຫາຍທອງລຸນສີສຸລິດເລຂາທິການໃຫຍ່ປະທານປະເທດແຫ່ງສປປລາວໄດ້ໃຫ້ກຽດພົບປະໂອ້ລົມຕໍ່ພະນັກງານຫຼັກແຫຼ່ງຂອງຫ້ອງວ່າການສູນກາງພັກ ມີສະຫາຍທອງສະລິດມັງໜໍ່ເມກຄະນະເລຂາທິການສູນກາງພັກຫົວໜ້າຫ້ອງວ່າການສູນກາງພັກ, ມີບັນດາສະຫາຍຄະນະພັກ, ຄະນະນຳ, ຄະນະກົມແລະຄະນະພະແນກຢູ່ພາຍໃນຫ້ອງວ່າການສູນກາງພັກເຂົ້າຮ່ວມຮັບຟັງຢ່າງພ້ອມພຽງ.
ສະຫາຍທອງສະລິດມັງໜໍ່ເມກໄດ້ລາຍງານສະພາບລວມໂດຍຫຍໍ້ກ່ຽວກັບປະຫວັດຄວາມເປັນມາຂອງຫ້ອງວ່າການສູນກາງພັກແລະໄດ້ຕີລາຄາຜົນການເຄື່ອນໄຫວໃນໄລຍະຜ່ານມາ, ຊີ້ໃຫ້ເຫັນດ້ານດີ, ດ້ານຄົງຄ້າງ, ສິ່ງທ້າທາຍແລະສະຫຼຸບຖອດຖອນໄດ້ 5 ບົດຮຽນທີ່ເປັນມູນເຊື້ອ, ເປັນອຸດົມການ, ຄະຕິເຕືອນໃຈໃຫ້ສະມາຊິກພັກ-ພະນັກງານທົ່ວຫ້ອງວ່າການສູນກາງພັກສືບຕໍ່ຮັກສາແລະເສີມຂະຫຍາຍຢ່າງບໍ່ຢຸດຢັ້ງ; ພ້ອມທັງໄດ້ລາຍງານກ່ຽວກັບທິດທາງແຜນວຽກຈຸດສຸມຂອງຫ້ອງວ່າການສູນກາງພັກໃນຕໍ່ໜ້າ.
ໃນໂອກາດນີ້ສະຫາຍທອງລຸນສີສຸລິດເລຂາທິການໃຫຍ່ປະທານປະເທດໄດ້ສະແດງຄວາມຍ້ອງຍໍຊົມເຊີຍແລະຕີລາຄາສູງຕໍ່ການນໍາພາຊີ້ນໍາແລະການເຄື່ອນໄຫວວຽກງານຂອງຄະນະພັກ, ຄະນະນຳ, ບັນດາສະຫາຍການນຳຫຼັກແຫຼ່ງແລະພະນັກງານທັງໝົດຂອງຫ້ອງວ່າການສູນກາງພັກ; ຍົກໃຫ້ເຫັນມູນເຊື້ອຂອງຫ້ອງວ່າການສູນກາງພັກ, ພ້ອມທັງໄດ້ໃຫ້ທິດຊີ້ນຳຕໍ່ການປັບປຸງແລະຍົກລະດັບຄຸນນະພາບໃນການປະຕິບັດພາລະບົດບາດ, ໜ້າທີ່ຂອງຫ້ອງວ່າການສູນກາງພັກທີ່ເປັນເສນາທິການໃກ້ຊິດໃຫ້ແກ່ສູນກາງພັກ, ໂດຍໄດ້ເນັ້ນໜັກບາງເນື້ອໃນສຳຄັນຄື:ໜື່ງ,ຕ້ອງສືບຕໍ່ເສີມຂະຫຍາຍທາດແທ້, ມູນເຊື້ອປະຕິວັດຂອງຫ້ອງວ່າການສູນກາງພັກທັງ 5 ດ້ານຄື:ຄວາມຈົງຮັກພັກດີຕໍ່ພັກ, ຕໍ່ພາລະກິດປະຕິວັດຂອງພັກ, ຕໍ່ອຸດົມການ, ເສັ້ນທາງກ້າວເດີນແລະຈຸດໝາຍກ້າວຂຶ້ນຂອງປະເທດຊາດ; ເປັນນໍ້າໜຶ່ງໃຈດຽວກັນ, ສາມັກຄີປຸ້ມລຸມຊ່ວຍເຫຼືອຊຶ່ງກັນແລະກັນຖານສະຫາຍອ້າຍນ້ອງຮ່ວມອຸດົມການດຽວກັນ;ເປັນແບບຢ່າງນໍາໜ້າດ້ານຄຸນທາດການເມືອງ, ຄຸນສົມບັດສິນທໍາປະຕິວັດ;ເປັນເສນາທິການຊ່ວຍການນໍາຂອງພັກດ້ວຍຄວາມຊື່ສັດບໍລິສຸດ, ຮັບປະກັນຄວາມລັບຂອງພັກ, ຂອງຊາດ; ແລະເປັນເບົ້າຫຼໍ່ຝຶກຝົນ, ກໍ່ສ້າງບຸກຄະລາກອນທີ່ສໍາຄັນຂອງພັກ;ສອງ,ຕ້ອງຍົກສູງບົດບາດເປັນເສນາທິການຊ່ວຍສູນກາງພັກແລະການນໍາຂອງພັກໃຫ້ສູງຂຶ້ນຕື່ມ, ຮັບປະກັນປະສິດທິຜົນ, ຕ້ອງເປັນເສນາທິການທີ່ປຽບເໝືອນ“ແຂນ, ຂາແລະມັນສະໝອງ” ທີ່ເຂັ້ມແຂງໃຫ້ແກ່ສູນກາງພັກ; ສາມ,ສືບຕໍ່ຍົກສູງບົດບາດໃນການຕິດຕາມ, ຊຸກຍູ້ການຜັນຂະຫຍາຍ, ຈັດຕັ້ງປະຕິບັດມະຕິ, ຄໍາສັ່ງແລະທິດຊີ້ນຳຂອງສູນກາງພັກ;ສີ່, ສືບຕໍ່ປັບປຸງກົງຈັກການຈັດຕັ້ງຂອງຫ້ອງວ່າການສູນກາງພັກໃຫ້ກະທັດຮັດ, ເຂັ້ມແຂງ,ໜັກແໜ້ນແລະປອດໃສ; ເອົາໃຈໃສ່ຍົກສູງຄຸນນະພາບຂອງຖັນແຖວບຸກຄະລາກອນໂດຍສະເພາະໃນຂົງເຂດຄົ້ນຄວ້າ, ວິເຄາະ, ວິໄຈ, ສະຫຼຸບສັງລວມ;ຫ້າ,ເກັບກໍາ, ຄຸ້ມຄອງ, ນໍາໃຊ້ແລະເຜີຍແຜ່ເອກະສານຂອງພັກຕາມທິດຫັນໄປສູ່ດີຈີຕອນ; ຫົກ,ສືບຕໍ່ເພີ່ມທະວີການຍົກລະດັບການພົວພັນຮ່ວມມືກັບຫ້ອງວ່າການສູນກາງພັກຂອງບັນດາປະເທດເພື່ອນມິດຍຸດທະສາດໃຫ້ນັບມື້້ເຂົ້າສູ່ລວງເລິກ. 
ນອກຈາກນັ້ນ, ສະຫາຍເລຂາທິການໃຫຍ່ຍັງໄດ້ໃຫ້ທິດຊີ້ນຳແລະແບ່ງປັນບົດຮຽນຕົວຈິງໃນການຊ່ວຍການນຳໃນການກະກຽມເອກະສານຕ່າງໆໃຫ້ມີຄຸນນະພາບສູງ, ມີເນື້ອໃນເລິກເຊິ່ງແລະສະແດງຄວາມເຊື່ອໝັ້ນວ່າຫ້ອງວ່າການສູນກາງພັກຈະສືບຕໍ່ຈັດຕັ້ງປະຕິບັດພາລະບົດບາດແລະມະຕິກອງປະຊຸມໃຫຍ່ຄັ້ງທີ VII ຂອງຕົນດ້ວຍຜົນສຳເລັດແລະຍົກສູງບົດບາດການເປັນເສນາທິການໃຫ້ສູນກາງພັກໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI  ຂອງພັກໃຫ້ບັນລຸຕາມຄາດໝາຍທີ່ວາງໄວ້, ສ້າງພື້້ນຖານອັນໜັກແໜ້ນແລະກະກຽມຄວາມພ້ອມຮອບດ້ານເພື່ອກ້າວເຂົ້າສູ່ກອງປະຊຸມໃຫຍ່ຄັ້ງທີ  XII ຂອງພັກດ້ວຍຜົນສໍາເລັດໃໝ່.

ແຫຼ່ງ: ປ​ະ​ຊາ​ຊົນ