ທ່ານ ສອນໄຊ ສີພັນດອນ ຕ້ອນຮັບການເຂົ້າຢ້ຽມຂໍ່ານັບຄະນະຜູ້ແທນກະຊວງປ້ອງກັນປະເທດແຫ່ງຣາຊະອານາຈັກໄທ

​ເຜີຍ​ແຜ່​ໂດຍ: admin|ຢ້ຽມ​ຊົມ: 9 ຄັ້ງ | ເວ​ລາ | 2026-03-15 06:59:05

ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ, ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງຄະນະຜູ້ແທນກະຊວງປ້ອງກັນປະເທດ ແຫ່ງ ຣາຊະອານາຈັກໄທ ຊຶ່ງນໍາໂດຍ ທ່ານ ສຸທິນ ຄລັງແສງ ລັດຖະມົນຕີວ່າການກະຊວງປ້ອງກັນປະເທດ ປະທານຄະນະກໍາມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄປໄທ-ລາວ (GBC ໄທ-ລາວ), ໃນວັນທີ 21 ທັນວາ 2023, ທີ່ສໍານັກງານນາຍົກລັດຖະມົນຕີ.
ໃນໂອກາດດັ່ງກ່າວ, ທ່ານ ສອນໄຊ ສີພັນດອນ ໄດ້ສະແດງຄວາມຕ້ອນຮັບ, ຊົມເຊີຍ ແລະ ພ້ອມທັງຕີລາຄາສູງຕໍ່ ທ່ານ ສຸທິນ ຄລັງແສງ ພ້ອມດ້ວຍຄະນະ, ທີ່ໄດ້ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຊຶ່ງເປັນການປະກອບສ່ວນເສີມສ້າງສາຍພົວພັນມິດຕະພາບ ແລະ ການຮ່ວມມື ທີ່ເຄີຍມີມາແຕ່ດົນນານແລ້ວນັ້ນ ໃຫ້ນັບມື້ນັບດີຍິ່ງໆຂຶ້ນ, ໂດຍສະເພາະ ເຂົ້າຮ່ວມປະຊຸມ GBC ລາວ-ໄທ ຄັ້ງທີ 28 ທີ່ ສປປ ລາວ ເປັນເຈົ້າພາບ .
ທ່ານນາຍົກ ສະແດງຄວາມຍິນດີຕໍ່ກັບການພົວພັນຮ່ວມມື ລະຫວ່າງ ສອງປະເທດ ລາວ-ໄທ, ໄທ-ລາວ, ໂດຍສະເພາະ ລະຫວ່າງ  ກະຊວງປ້ອງກັນປະເທດ ລາວ-ໄທ ໃນໄລຍະທີ່ຜ່ານມາ ຊຶ່ງໄດ້ມີການພົວພັນກັນຢ່າງເປັນປົກກະຕິ ແລະ ຕໍ່ເນື່ອງ; ຈາກນັ້ນ  ທ່ານນາຍົກ ໄດ້ອວຍພອນໃຫ້ການມາຢ້ຽມຢາມ ແລະ ການຈັດກອງປະຊຸມ ຄະນະກໍາມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄປ ລາວ-ໄທ, ໄທ-ລາວ ຄັ້ງທີ 28 ຈົ່ງປະສົບຜົນສໍາເລັດ.
ໃນໂອກາດນີ້, ທ່ານ ສຸທິນ ຄລັງແສງ, ຕາງໜ້າໃຫ້ກັບຄະນະຜູ້ແທນ ສະແດງຄວາມຂອບໃຈ ຕໍ່ທ່ານ ນາຍົກ, ທີ່ໄດ້ໃຫ້ການຕ້ອນຮັບອັນອົບອຸ່ນອີກດ້ວຍ. 

(ແຫຼ່ງ: ປະ​ຊາ​ຊົນ, ຂ່າວ-ພາບ: ແສງຈັນ)