ການ​ນຳ​ຂັ້ນ​ສູງ ຕ້ອນຮັບປະທານສະພາແຫ່ງຊາດ ແຫ່ງ ສສ ຫວຽດນາມ

​ເຜີຍ​ແຜ່​ໂດຍ: admin|ຢ້ຽມ​ຊົມ: 10 ຄັ້ງ | ເວ​ລາ | 2026-03-14 15:30:35

ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ເວືອງ ດິງ ເຫວ້ ກໍາມະການກົມການເມືອງສູນກາງພັກກອມມູນິດຫວຽດນາມ ປະທານສະພາແຫ່ງຊາດ ແຫ່ງ ສສ ຫວຽດນາມ ພ້ອມຄະນະຜູ້ແທນຂັ້ນສູງຂອງສະພາແຫ່ງຊາດ ແຫ່ງ ສສ ຫວຽດນາມ ໃນຕອນແລງວັນທີ 4 ທັນວານີ້ ທີ່ຫ້ອງວ່າການສູນກາງພັກ ເນື່ອງໃນໂອກາດທີ່ ສະຫາຍ ເວືອງ ດິງ ເຫວ້ ພ້ອມຄະນະດັ່ງກ່າວ ເດີນທາງມາຢ້ຽມຢາມ, ເຮັດວຽກ ແລະ ເຂົ້າຮ່ວມກອງປະຊຸມສຸດຍອດລັດຖະສະພາ ກຳປູເຈຍ, ລາວ, ຫວຽດນາມ (CLV) ຄັ້ງທີ 1 ໃນລະຫວ່າງວັນທີ 4-7 ທັນວາ 2023 ນີ້.
    ສະຫາຍ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ໄດ້ກ່າວສະແດງຄວາມຍິນດີຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການຢ້ຽມຢາມເຮັດວຽກ ໃນໂອກາດເຂົ້າຮ່ວມກອງປະຊຸມສຸດຍອດລັດຖະສະພາ CLV ຄັ້ງທີ 1 ໃນຄັ້ງນີ້ ຂອງສະຫາຍປະທານສະພາແຫ່ງຊາດຫວຽດນາມ ແລະ ຄະນະ ຊຶ່ງເປັນການປະກອບສ່ວນສໍາຄັນ ເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ເວົ້າລວມ, ເວົ້າສະເພາະ ລະຫວ່າງ ສອງອົງການນິຕິບັນຍັດ ຂອງສອງປະເທດພວກເຮົາ ໃຫ້ນັບມື້ເຂົ້າສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນ. ພ້ອມນີ້, ກໍຍັງໄດ້ຂໍຝາກຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດ ເຖິງ ສະຫາຍ ຫງວຽນ ຟູ ຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມນິດຫວຽດນາມ, ສະຫາຍ ຫວໍ ວັນ ເຖືອງ ປະທານປະເທດແຫ່ງ ສສ ຫວຽດນາມ, ສະຫາຍນາຍົກລັດຖະມົນຕີ ຟ້າມ ມິງ ຈິງ ແລະ ບັນດາສະຫາຍການນໍາຂັ້ນສູງຂອງຫວຽດນາມ.
    ສະຫາຍ ທອງລຸນ ສີສຸລິດ ຍັງໄດ້ກ່າວຂອບໃຈຕໍ່ບັນດາການນໍາພັກ-ລັດຂັ້ນສູງຂອງ ສສ ຫວຽດນາມ ທີ່ໄດ້ສ້າງເງື່ອນໄຂໃຫ້ ສະຫາຍ ເວືອງ ດິງ ເຫວ້ ພ້ອມຄະນະ ເດີນທາງມາຢ້ຽມຢາມ, ເຮັດວຽກ ແລະ ເຂົ້າຮ່ວມກອງປະຊຸມສຸດຍອດລັດຖະສະພາລັດຖະສະພາ CLV ຄັ້ງທີ 1 ຢູ່ ສປປ ລາວ ຄັ້ງນີ້ ຊຶ່ງເປັນການສະໜັບສະໜູນສະພາແຫ່ງຊາດລາວ ພວກຂ້າພະເຈົ້າ ໃນນາມເຈົ້າພາບຈັດກອງປະຊຸມສຸດຍອດດັ່ງກ່າວອັນເປັນການປະກອບສ່ວນສໍາຄັນ ເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ເວົ້າລວມ, ເວົ້າສະເພາະ ລະຫວ່າງ ສອງອົງການນິຕິບັນຍັດ ຂອງສອງປະເທດພວກເຮົາ ໃຫ້ນັບມື້ເຂົ້າສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນ.
    ສະຫາຍ ເວືອງ ດິງ ເຫວ້ ກໍໄດ້ສະແດງຄວາມຍິນດີ ແລະ ປິຕິຊົມຊື່ນເປັນຢ່າງຍິ່ງ ທີ່ໄດ້ມາຢ້ຽມຢາມ ແລະ ເຮັດວຽກຢູ່ ສປປ ລາວ ເນື່ອງໃນໂອກາດມາເຂົ້າຮ່ວມກອງປະຊຸມສຸດຍອດລັດຖະສະພາCLV ຄັ້ງທີ 1 ແລະ ກໍໄດ້ກ່າວລາຍງານກ່ຽວກັບການພົບປະສອງຝ່າຍກັບ ສະຫາຍ ປະທານສະພາແຫ່ງຊາດ ແຫ່ງ ສປປ ລາວ ຕໍ່ສະຫາຍ ເລຂາທິການໃຫຍ່ ປະທານປະເທດ ທອງລຸນ ສີສຸລິດ. ພ້ອມທັງໄດ້ກ່າວສະແດງຄວາມຂອບໃຈເປັນຢ່າງຍິ່ງ ທີ່ໄດ້ໃຫ້ການຕ້ອນຮັບອັນອົບອຸ່ນ ດ້ວຍໄມຕີຈິດມິດຕະພາບ ແລະ ຄວາມສາມັກຄີຮັກແພງ ຖານເພື່ອນມິດສະຫາຍອ້າຍນ້ອງ.
    ໃນຕອນທ້າຍ, ສະຫາຍ ທອງລຸນ ສີສຸລິດ ກໍໄດ້ອວຍພອນໃຫ້ສະຫາຍປະທານສະພາແຫ່ງຊາດ ແຫ່ງ ສສ ຫວຽດນາມ ພ້ອມຄະນະ ປະສົບຜົນສໍາເລັດໃນການເຄື່ອນໄຫວຢູ່ ສປປ ລາວ ຄັ້ງນີ້; ພ້ອມທັງ ອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ສວຍສົດງົດງາມຕະຫຼອດກາລະນານ.
 

ສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າພົບປະຂອງ ສະຫາຍ ເວືອງ ດິງ ເຫວ້ ກໍາມະການກົມການເມືອງສູນກາງພັກກອມມູນິດຫວຽດນາມ ປະທານສະພາແຫ່ງຊາດ ແຫ່ງ ສສ ຫວຽດນາມ ພ້ອມຄະນະຜູ້ແທນຂັ້ນສູງຂອງສະພາແຫ່ງຊາດ ແຫ່ງ ສສ ຫວຽດນາມ ໃນຕອນແລງວັນທີ 4 ທັນວານີ້ ທີ່ຫ້ອງວ່າການສຳນັກງານນາຍົກລັດຖະມົນຕີ ເນື່ອງໃນໂອກາດທີ່ ສະຫາຍ ເວືອງ ດິງ ເຫວ້ ພ້ອມຄະນະດັ່ງກ່າວ ເດີນທາງມາຢ້ຽມຢາມ, ເຮັດວຽກ ແລະ ເຂົ້າຮ່ວມກອງປະຊຸມສຸດຍອດລັດຖະສະພາ ກຳປູເຈຍ, ລາວ, ຫວຽດນາມ (CLV) ຄັ້ງທີ 1 ໃນລະຫວ່າງວັນທີ 4-7 ທັນວາ 2023 ນີ້.
    ໂອກາດນີ້, ສະຫາຍ ສອນໄຊ ສີພັນດອນ ກໍໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາເຄື່ອນໄຫວຢູ່ ສປປ ລາວ ຄັ້ງນີ້ ດ້ວຍໄມຕີຈິດມິດຕະພາບ ແລະ ຄວາມສາມັກຄີຮັກແພງ ຖານເພື່ອນມິດສະຫາຍອ້າຍນ້ອງ ຂອງພັັກ, ລັດຖະບານ ກໍຄື ປະຊາຊົນຫວຽດນາມ ມາສູ່ ພັກ, ລັດຖະບານ ແລະ ປະຊາຊົນລາວບັນດາເຜົ່າ ທັງເປັນການສະໜັບສະໜູນ ສະພາແຫ່ງຊາດລາວ ໃນການເປັນເຈົ້າພາບກອງປະຊຸມສຸດຍອດລັດຖະສະພາ CLV ຄັ້ງນີ້ ໃຫ້ສໍາເລັດຢ່າງຈົບງາມ ແລະ ປະກອບສ່ວນອັນສໍາຄັນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ເຂົ້າສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນ. ພ້ອມກັນນີ້, ນາຍົກລັດຖະມົນຕີ ສະຫາຍ ສອນໄຊ ສີພັນດອນ ກໍໄດ້ຂໍຝາກຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດ ເຖິງ ສະຫາຍ ຟ້າມມິງ ຈິງ ກໍາມະການກົມການເມືອງສູນກາງພັກກອມມູນິດຫວຽດນາມ ນາຍົກລັດຖະມົນຕີ ແຫ່ງ ສສ ຫວຽດນາມ ມາໃນໂອກາດນີ້.
    ສະຫາຍ ເວືອງ ດິງ ເຫວ້ ກໍໄດ້ກໍໄດ້ກ່າວສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງສະຫາຍ ນາຍົກລັດຖະມົນຕີ ແລະ ໄດ້ແຈ້ງກ່ຽວກັບການມາຢ້ຽມຢາມ, ເຮັດວຽກ ແລະ ເຂົ້າຮ່ວມກອງປະຊຸມສຸດຍອດລັດຖະສະພາ (CLV) ຄັ້ງທີ 1; ພ້ອມທັງໃຫ້ຮູ້ກ່ຽວກັບການພົບປະສອງຝ່າຍຂອງສອງລັດຖະສະພາ ກໍຄື ສະພາແຫ່ງຊາດ ແຫ່ງ ສສ ຫວຽດນາມ ແລະ ສະພາແຫ່ງຊາດ ແຫ່ງ ສປປ ລາວ.
    ສະຫາຍ ນາຍົກລັດຖະມົນຕີ ຍັງໄດ້ຕີລາຄາສູງ ຕໍ່ຜົນການພົບປະ ລະຫວ່າງ ສອງສະຫາຍປະທານສະພາແຫ່ງຊາດ ລາວ-ຫວຽດນາມ ຊຶ່ງເປັນການປະກອບສ່ວນສໍາຄັນເຂົ້າໃນການເສີມຂະຫຍາຍການພົວພັນຮ່ວມມື ລະຫວ່າງ ສອງອົງການນິຕິບັນຍັດຂອງສອງປະເທດ ໃນໄລຍະຜ່ານມາ ແລະ ພ້ອມກັນປຶກສາຫາລືທິດທາງແຜນການພົວພັນຮ່ວມມືໃນຕໍ່ໜ້າ; ພ້ອມດຽວກັນນີ້, ກໍຕີລາຄາສູງຕໍ່ ຜົນການຕິດຕາມກວດກາຮ່ວມ ລະຫວ່າງ ສະພາແຫ່ງຊາດ 3 ປະເທດ CLV ໃນເດືອນຕຸລາຜ່ານມາ ຊຶ່ງເຫັນໄດ້ຄວາມພະຍາຍາມ ໃນການພົວພັນຮ່ວມມືກັນ ຢ່າງໃກ້ຊິດຂອງລັດຖະສະພາ 3 ປະເທດ ໃນການຕິດຕາມກວດກາການຈັດຕັ້ງປະຕິບັດ ຂໍ້ຕົກລົງ, ແຜນປະຕິບັດງານໂຄງການຮ່ວມມືຕ່າງໆ ທີ່ລັດຖະບານໄດ້ຮ່ວມລົງນາມກັນຢ່າງຕັ້ງໜ້າ ເພື່ອສົ່ງເສີມສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມືເພື່ອການພັດທະນາ ລະຫວ່າງ ປະເທດຊາດ ກໍຄື ປະຊາຊົນ 3 ປະເທດ ໃຫ້ເຂັ້ມແຂງ ແລະ ຍືນຍົງ.
    ໃນຕອນທ້າຍ, ສະຫາຍ ສອນໄຊ ສີພັນດອນຍັງໄດ້ສະແດງຄວາມຮູ້ບຸນຄຸນຢ່າງສູງຕໍ່ ພັກ, ລັດ ແລະ ປະຊາຊົນອ້າຍນ້ອງຫວຽດນາມ  ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອໃຫຍ່ຫຼວງ, ລໍ້າຄ່າ, ປະສິດທິຜົນ ແລະ ທັນການ ໃຫ້ແກ່ ສປປ ລາວ ພວກຂ້າພະເຈົ້າ ໃນເມື່ອກ່ອນ ແລະ ໃນປັດຈຸບັນ. ພ້ອມທັງອວຍພອນໄຊໃຫ້ສະຫາຍປະທານສະພາແຫ່ງຊາດ ພ້ອມດ້ວຍຄະນະ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ປະສົບຜົນສຳເລັດໃນໜ້າທີ່ອັນສູງສົ່ງຂອງຕົນ; ອວຍພອນໃຫ້ການຢ້ຽມຢາມເຮັດວຽກ ແລະ ເຂົ້າຮ່ວມກອງປະຊຸມສຸດຍອດລັດຖະສະພາ CLV  ຢູ່ ສປປ ລາວ ຂອງສະຫາຍ ແລະ ຄະນະ ຈົ່ງປະສົບຜົນສໍາເລັດຢ່າງຈົບງາມ. 

(ແຫຼ່ງ: ປ​ະ​ຊາ​ຊົນ, ຂ່າວ-ພາບ: ສຸກສະຫວັນ)