ການ​ນຳ​ຂັ້ນ​ສູງ ຕ້ອນຮັບປະທານສະພາແຫ່ງຊາດກຳປູເຈຍເຂົ້າຢ້ຽມຂໍ່ານັບ

​ເຜີຍ​ແຜ່​ໂດຍ: admin|ຢ້ຽມ​ຊົມ: 11 ຄັ້ງ | ເວ​ລາ | 2026-03-14 15:21:40 ອັບ​ເດດ​ຄັ້ງ​ລ້າ​ສຸດ ໂດຍ: admin ເວ​ລາ 2026-03-14 15:21:40

ພະນະທ່ານທອງລຸນສີສຸລິດປະທານປະເທດແຫ່ງສປປລາວໄດ້ຕ້ອນຮັບສົມເດັດມະຫາຣັດສະເພຍທິກາທິພະໄດຄູນສຸດາຣີປະທານສະພາແຫ່ງຊາດແຫ່ງຣາຊະອານາຈັກກຳປູເຈຍເຂົ້າຢ້ຽມຂໍ່ານັບໃນວັນທີ 4 ທັນວາ ນີ້ທີ່ຫ້ອງວ່າການສູນກາງພັກ,ໃນໂອກາດທີ່ ສົມເດັດມະຫາຣັດສະເພຍທິກາທິພະໄດຄູນສຸດາຣີພ້ອມຄະນະເດີນທາງມາຢ້ຽມຢາມແລະເຮັດວຽກຢູ່ ສປປລາວ,ໂດຍຕອບສະໜອງຕາມຄຳເຊີນຂອງພະນະທ່ານໄຊສົມພອນພົມວິຫານປະທານສະພາແຫ່ງຊາດແຫ່ງສປປລາວ,ສົມເດັດມະຫາຣັດສະເພຍທິກາທິພະໄດຄູນສຸດາຣີພ້ອມຄະນະເດີນທາງມາຢ້ຽມຢາມສປປລາວຢ່າງເປັນທາງການໃນລະຫວ່າງວັນທີ 2-4 ທັນວາ 2023 ແລະເຂົ້າຮ່ວມກອງປະຊຸມສຸດຍອດລັດຖະສະພາຂອງ 3 ປະເທດກຳປູເຈຍ, ລາວແລະຫວຽດນາມຄັ້ງທີ1(CLV) ທີ່ ສປປລາວເປັນເຈົ້າພາບຈັດຂຶ້ນທີ່ນະຄອນຫຼວງວຽງຈັນ.
    ໃນໂອກາດດັ່ງກ່າວພະນະທ່ານທອງລຸນສີສຸລິດໄດ້ສະແດງຄວາມຍິນດີຕ້ອນຮັບອັນອົບອຸ່ນແລະຕີລາຄາສູງຕໍ່ ສົມເດັດມະຫາຣັດສະເພຍທິກາທິພະໄດຄູນສຸດາຣີພ້ອມຄະນະທີ່ເດີນທາງມາຢ້ຽມຢາມແລະເຮັດວຽກຢູ່ ສປປລາວຄັ້ງນີ້ຊຶ່ງເປັນມິດໝາຍສຳຄັນເຂົ້າປະກອບສ່ວນເສີມສ້າງສາຍພົວພັນ, ການຮ່ວມມືແລະຊ່ວຍເຫຼືອຊຶ່ງກັນແລະກັນເວົ້າ, ເວົ້າສະເພາະກໍຄືສອງສະພາແຫ່ງຊາດ ແຫ່ງ ສປປ ລາວ-ສະພາແຫ່ງຊາດແຫ່ງຣາຊະອານາຈັກກຳປູເຈຍທີ່ມີມູນເຊື້ອມາແຕ່ດົນນານແລ້ວນັ້ນໃຫ້ນັບມື້ແຕກດອກອອກຜົນຍິ່ງໆຂຶ້ນ, ພະນະທ່ານທອງລຸນສີສຸລິດຍັງໄດ້ອອຍພອນໃຫ້ ສົມເດັດມະຫາຣັດສະເພຍທິກາທິພະໄດຄູນສຸດາຣີພ້ອມຄະນະຈົ່ງປະສົບຜົນສຳເລັດໃນການມາເຄື່ອນໄຫວຢ້ຽມຢາມແລະເຮັດວຽກຢູ່ ສປປລາວໃນຄັ້ງນີ້.
    ສົມເດັດມະຫາຣັດສະເພຍທິກາທິພະໄດຄູນສຸດາຣີໄດ້ສະແດງຄວາມຂອບໃຈຕໍ່ ພະນະທ່ານທອງລຸນສີສຸລິດທີ່ໄດ້ໃຫ້ການຕ້ອນຮັບຢ່າງອົບອຸ່ນ,ນີ້ຍັງໄດ້ລາຍງານຈຸດປະສົງໃນການມາເຄື່ອນໄຫວຢ້ຽມຢາມແລະເຮັດວຽກຢູ່ ສປປລາວໃຫ້ພະນະທ່ານທອງລຸນສີສຸລິດໄດ້ຮັບຊາບຕື່ມອີກ.

ພະນະ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບ ສົມເດັດ ມະຫາ ຣັດສະເພຍທິກາ ທິພະໄດ ຄູນ ສຸດາຣີ ປະທານ ສະພາແຫ່ງຊາດ ແຫ່ງຣາຊະອານາຈັກ ກຳປູເຈຍ ເຂົ້າຢ້ຽມພົບປະ  ໃນວັນທີ 4 ທັນວານີ້ ທີ່ສຳນັກ ງານນາຍົກລັດຖະມົນຕີ, ໃນໂອກາດທີ່ ສົມເດັດ ມະຫາ ຣັດສະເພຍທິກາ ທິພະໄດ ຄູນ ສຸດາຣີ ພ້ອມຄະນະ ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການ ໃນລະຫວ່າງວັນທີ 2-4 ທັນວາ 2023 ແລະ ເຂົ້າຮ່ວມກອງປະຊຸມ ສຸດຍອດລັດຖະສະພາຂອງ 3 ປະເທດ ກຳປູເຈຍ, ລາວ ແລະ ຫວຽດນາມ ຄັ້ງທີ 1 (CLV) ທີ່ ສປປ ລາວ ເປັນເຈົ້າພາບຈັດຂຶ້ນທີ່ນະຄອນຫຼວງວຽງຈັນ.
ໃນໂອກາດດັ່ງກ່າວ ພະນະ ທ່ານນາຍົກລັດຖະມົນຕີ ໄດ້ສະແດງຄວາມຕ້ອນຮັບຊົມເຊີຍ ຕໍ່ສົມເດັດ ມະຫາ ຣັດສະເພຍທິກາ ທິພະໄດ ຄູນ ສຸດາຣີ ພ້ອມຄະນະ ທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ແລະ ຕີລາຄາສູງຕໍ່ການພົວພັນຮ່ວມມືທີ່ເປັນມູນເຊື້ອອັນດີງາມ ຖານບ້ານໃກ້ເຮືອນຄຽງ, ບ້ານແກ່ວເມືອງດອງ ແລະ ຄວາມສາມັກຄີຮັກແພງ ລະຫວ່າງ ລາວ-ກຳປູເຈຍ ທີ່ມີມູນເຊື້ອມາແຕ່ດົນນານແລ້ວນັ້ນ ໃຫ້ນັບມື້ເພີ່ມພູນຄູນສ້າງ ແລະ ແຕກດອກແແກຜົນຍິ່ງໆຂຶ້ນ, ສະແດງຄວາມຂອບໃຈຢ່າງຈິງໃຈຕໍ່ການສະໜັບສະໜູນ ແລະ ຊ່ວຍເຫູືອຈາກລັດຖະບານ, ສະພາແຫ່ງຊາດ ແລະ ປະ ຊາຊົນກຳປູເຈຍທີ່ມີຕໍ່ ສປປ ລາວ ໃນພາລະກິດປົດປ່ອຍປະເທດຊາດ ກໍຄື ໃນໄລຍະປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ, ທ່ານນາຍົກລັດຖະມົນຕີຍັງໄດ້ອອຍພອນໃຫ້ຄະນະຜູ້ແທນດັ່ງກ່າວ ຈົ່ງປະສົບຜົນສຳເລັດໃນການມາຢ້ຽມຢາມ ແລະ ເຮັດວຽກ ຢູ່ ສປປ ລາວໃນຄັ້ງນີ້.
ສົມເດັດ ມະຫາ ຣັດສະເພຍທິກາ ທິພະໄດ ຄູນ ສຸດາຣີ ໄດ້ສະແດງຄວາມຂອບໃຈຕໍ່ ພະນະທ່ານນາຍົກລັດຖະມົນທີ ທີ່ໃຫ້ການຕ້ອນຮັບຢ່າງອົບອຸ່ນ ພ້ອມນີ້ຍັງໄດ້ແຈ້ງຈຸດປະສົງໃນການມາຢ້ຽມຢາມ ແລະ ເຮັດກວຽກ ຢູ່ ສປປ ລາວ ໃຫ້ ທ່ານ ນາຍົກໄດ້ຮັບຊາບຕື່ມອີກ.

(ແຫຼ່ງ:ປະ​ຊາ​ຊົນ, ຂ່າວ-ພາບ:ສຳນານ)