ໂຄງການ ປ່ຽນແປງດິນຟ້າອາກາດ ແລະ ພະລັງງານ ອາຊຽນ ໄລຍະ II ຂັບເຄື່ອນການຫັນປ່ຽນດ້ານພະລັງງານອາຊຽນ ໄປສູ່ກາກບອນຕໍ່າ

​ເຜີຍ​ແຜ່​ໂດຍ: admin|ຢ້ຽມ​ຊົມ: 39 ຄັ້ງ | ເວ​ລາ | 2024-10-12 08:15:27

ກອງປະຊຸມ ໂຄງການ ປ່ຽນແປງດິນຟ້າອາກາດ ແລະ ພະລັງງານ ອາຊຽນ ໄລຍະ II (ACCEPT II) ໄດ້ຂັບເຄື່ອນການຫັນປ່ຽນດ້ານພະລັງງານອາຊຽນ ໄປສູ່ກາກບອນຕໍ່າ ໄດ້ຈັດຂຶ້ນ ເມື່ອບໍ່ດົນມານີ້ ທີ່ນະຄອນຫຼວງວຽງຈັນ, ພາຍໃຕ້ການເປັນປະທານຮ່ວມຂອງ ທ່ານ ໂພໄຊ ໄຊຍະສອນ ລັດຖະມົນຕີ ກະຊວງພະລັງງານ ແລະ ບໍ່ແຮ່ ແລະ ທ່ານ ແອສເປັນ ບາດ ແອັດເລ (Espen Barth Eide) ລັດຖະມົນຕີກະຊວງການຕ່າງປະເທດນອກແວ, ມີ ທ່ານ ເບນີ ເຊີຢາດີ (Beni Suryadi) ຜູ້ບໍລິຫານໂຄງການ ACCEPT II, ມີພາກສ່ວນກ່ຽວຂ້ອງເຂົ້າຮ່ວມ.

ທ່ານ ໂພໄຊ ໄຊຍະສອນ ໄດ້ກ່າວວ່າ: "ການເປັນເຈົ້າພາບຈັດກອງປະຊຸມສໍາຄັນເຫຼົ່ານີ້ ໄດ້ຍົກໃຫ້ເຫັນເຖິງການປະກອບສ່ວນຢ່າງຕັ້ງໜ້າ ແລະ ການສະໜັບສະໜູນຢ່າງຈິງຈັງ ຂອງ ສປປ ລາວ ໃນການນໍາພາພາກພື້ນອາຊຽນໄປສູ່ອະນາຄົດທີ່ຍືນຍົງ ແລະ ການຫັນໄປສູ່ພະລັງງານກາກບອນຕໍ່າ. ສປປລາວ ສະແດງຄວາມຂອບໃຈຢ່າງສູງ ຕໍ່ບົດບາດຂອງ ສູນພະລັງງານອາຊຽນ (ACE) ໃນການອໍານວຍຄວາມສະດວກໃຫ້ແກ່ການຮ່ວມມືຢູ່ໃນພາກພື້ນ, ການຂັບເຄື່ອນຕາຂ່າຍໄຟຟ້າຂອງອາຊຽນ ແລະ ໂຄງການລິເລີ່ມການຫັນໄປສູ່ພະລັງງານກາກບອນຕໍ່າໃນອາຊຽນ ແມ່ນມີຄວາມສໍາຄັນຕໍ່ການບັນລຸເປົ້າໝາຍດ້ານການປ່ຽນແປງດິນຟ້າອາກາດ ແລະ ພະລັງງານຂອງພວກເຮົາ.”

ທ່ານ ແອສເປັນ ບາດ ແອັດເລ ໄດ້ກ່າວວ່າ: "ນອກແວມີຄວາມມຸ່ງໝັ້ນທີ່ຈະສະໜັບສະໜູນການຫັນປ່ຽນພະລັງງານຂອງອາຊຽນ ໃນອະນາຄົດໃຫ້ມີຄວາມຍືນຍົງ ໂດຍການຫັນໄປສູ່ພະລັງງານກາກບອນຕໍ່າ. ຕາຂ່າຍໄຟຟ້າອາຊຽນ ມີທ່າແຮງສໍາຄັນໃນການຫຼຸດຜ່ອນການປ່ອຍອາຍພິດກາກບອນ ແລະ ເພີ່ມທະວີຄວາມໝັ້ນຄົງດ້ານພະລັງງານ ໂດຍຜ່ານການຮ່ວມມືຢູ່ໃນພາກພື້ນ, ການເຊື່ອມໂຍງຂອງພະລັງງານໄຟຟ້ານໍ້າຕົກ ແລະ ແຫຼ່ງພະລັງງານທົດແທນອື່ນໆ. ເຊື່ອໝັ້ນວ່າ ໂຄງການ ACCEPT II ມີບົດບາດສໍາຄັນໃນການຂັບເຄື່ອນແນວຄິດລິເລີ່ມເຫຼົ່ານີ້ໃຫ້ກ້າວໄປຂ້າງໜ້າ."

ກອງປະຊຸມຄັ້ງນີ້ ໄດ້ພ້ອມກັນປຶກສາຫາລື ແລະ ແລກປ່ຽນຄວາມຄິດເຫັນຮ່ວມກັນຢ່າງກົງໄປກົງມາ ທັງນີ້ ກໍເພື່ອຮັບປະກັນໃຫ້ການສ້າງພາກພື້ນອາຊຽນກາຍເປັນພາກພື້ນທີ່ມີການພັດທະນາໄປສູ່ກາກບອນຕໍ່າ ໂດຍສະເພາະໄດ້ປຶກສຫາລື ກ່ຽວກັບການນໍາໃຊ້ປະໂຫຍດຈາກຕາຂ່າຍໄຟຟ້າອາຊຽນ ເພື່ອຫຼຸດຜ່ອນການປ່ອຍທາດກາກບອນໃນຂະແໜງພະລັງງານອາຊຽນ ຊຶ່ງໄດ້ຈັດຂຶ້ນຮ່ວມກັບກະຊວງການຕ່າງປະເທດນອກແວ ແລະ ສະຖາບັນສາກົນນອກແວ (NUPI), ຖືເປັນກອງປະຊຸມສໍາຄັນທີ່ສະໜັບສະໜູນການເປັນປະທານອາຊຽນຂອງ ສປປ ລາວ ພາຍໃຕ້ຄຳຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ”. ການປຶກສາຫາລືດັ່ງກ່າວ ໄດ້ຍົກໃຫ້ເຫັນເຖິງຄວາມສໍາຄັນຂອງ APG ໃນການອໍານວຍຄວາມສະດວກໃຫ້ແກ່ການຊື້-ຂາຍພະລັງງານໄຟຟ້າໃນພາກພື້ນ, ການເຊື່ອມໂຍງພະລັງງານທົດແທນ ແລະ ການບັນລຸຄວາມເປັນກາງທາງກາກບອນໃນທົ່ວອາຊຽນ. ຕາຂ່າຍໄຟຟ້າອາຊຽນ (APG) ແມ່ນໜຶ່ງໃນບັນດາໂຄງການພາຍໃຕ້ແຜນປະຕິບັດງານອາຊຽນ ວ່າດ້ວຍການຮ່ວມມືທາງດ້ານພະລັງງານ (APAEC).

 

ແຫຼ່ງ: ປະ​ຊາ​ຊົນ