ກອງປະຊຸມໃຫຍ່ຜູ້ແທນອົງຄະນະພັກກະຊວງ ຮສສ ຄັ້ງທີ VII ​ເປີດ​ຂຶ້ນ​ຢ່າງ​ເປັນ​ທາງ​ການ

​ເຜີຍ​ແຜ່​ໂດຍ: admin|ຢ້ຽມ​ຊົມ: 12 ຄັ້ງ | ເວ​ລາ | 2025-09-07 01:55:12

ກອງປະຊຸມໃຫຍ່ຜູ້ແທນອົງຄະນະພັກ ກະຊວງແຮງງານ ແລະ ສະຫວັັດດີການສັງຄົມ (ຮສສ) ຄັ້ງທີ VII ເປີດຂຶ້ນຢ່າງເປັນທາງການໃນ​ວັນ​ທີ 4 ກັນຍານີ້ ທີ່ນະຄອນຫຼວງ​ວຽງ​ຈັນ ໂດຍການ​ເປັນ​ປະທານ​ຂອງສະ​ຫາຍ ໂພໄຊ ໄຊຍະສອນ ກໍາມະການສູນກາງພັກ ເລຂາຄະນະພັກ ລັດຖະມົນຕີກະຊວງ ຮສສ, ​ເປັນ​ກຽດ​ເຂົ້າ​ຮ່ວມ​ຂອງສະຫາຍ ນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ ຄະນະເລຂາທິການສູນກາງພັກຫົວໜ້າຄະນະຈັດຕັ້ງສູນກາງພັກ, ມີບັນດາອະດີດການນໍາກະຊວງ, ຜູ້ແທນສົມບູນຈໍານວນ 131 ສະຫາຍ ຍິງ 59 ສະຫາຍເຂົ້າ​ຮ່ວມ.

ສະຫາຍ ໂພໄຊ ໄຊຍະສອນ ໄດ້ກ່າວເປີດກອງປະຊຸມຢ່າງເປັນທາງການວ່າ: ກອງປະຊຸມຄັ້ງນີ້ຈະໄດ້ທົບທວນຕີລາຄາການຊີ້ນໍາ-ນໍາພາການຈັດຕັ້ງປະຕິບັດວຽກງານຂອງອົງຄະນະພັກກະຊວງໃນໄລຍະຜ່ານມາ ເພື່ອພ້ອມກັນກໍານົດທິດທາງແຜນການໃນຕໍ່ໜ້າຢ່າງມີຈຸດສຸມ, ແຂງແຮງ, ເລິກເຊິ່ງ ແລະ ຮອບດ້ານ ຕໍ່ວຽກງານແຮງງານ ແລະ ສະຫວັັດດີການສັງຄົມ ເພື່ອການຫັນປ່ຽນຢ່າງຕັ້ງໜ້າຕາມຈຸດໝາຍສັງຄົມນິຍົມ. ກອງປະຊຸມບັນດາຜູ້ແທນໄດ້ມີຄວາມເປັນເອກະພາບ ແລະ ພ້ອມກັນຮັບຮອງເອົາບັນດາເນື້ອໃນເອກະສານ ຮ່າງລາຍງານການເມືອງ, ຮ່າງແຜນພັດທະນາວຽກງານແຮງງານ ແລະ ສະຫວັດດີການສັງຄົມ ແລະ ບົດສຳຫຼວດການນໍາພາລວມຂອງຄະ ນະບໍລິຫານງານພັກກະຊວງສະໄໝທີ VI ຜ່ານມາ ຊຶ່ງໄດ້ມີການວິເຄາະວິໄຈຢ່າງເລິກເຊິ່ງ ແລະ ພາວະວິໃສ, ຊອກໃຫ້ເຫັນບັນດາສາເຫດທີ່ເປັນດ້ານອ່ອນ-ຂໍ້ຄົງຄ້າງ ເພື່ອນຳມາຖອດຖອນເປັນບົດຮຽນ ແລະ ວິທີແກ້ໄຂໃນຊຸມປີຕໍ່ໜ້າ.

ສະຫາຍ ນາງ ແກ້ວ ຈັນທະວິໄຊ ກຳມະການຄະນະພັກກະຊວງ ຮອງລັດຖະມົນຕີກະຊວງ ຮສສ ໄດ້ ຜ່ານຮ່າງລາຍງານການເມືອງວ່າ: ໂດຍປະຕິບັດຕາມ 6 ຄາດໝາຍສູ້ຊົນຂອງມະຕິກອງປະຊຸມໃຫຍ່ອົງຄະນະພັກກະຊວງສະໄໝທີ VI ແລະ 5 ເປົ້າໝາຍ, 12 ແຜນວຽກຈຸດສຸມຂອງແຜນພັດທະນາ ຮສສ 5 ປີຄັ້ງທີ 5 (2021-2025) ແລະ 7 ໜ້າວຽກໃນແຜນດຳເນີນງານຂອງອົງຄະນະພັກກະຊວງໄລຍະ 5 ປີ (2021-2025) ຢ່າງຕັ້ງໜ້າ ສາມາດສະຫຼຸບໄດ້ດັ່ງນີ້: ດ້ານວຽກງານວິຊາສະເພາະ ໄດ້ຊີ້ນຳການຈັດຕັ້ງປະຕິບັດ 4 ທິດທາງ ລວມ, 5 ເປົ້າໝາຍ, 12 ແຜນວຽກຈຸດສຸມ, 78 ຄາດໝາຍ, 186 ໂຄງການຢ່າງມີປະສິດທິຜົນ ສາມາດບັນລຸໂຕເລກຄາດໝາຍດັ່ງນີ້: ຂົງເຂດແຮງງານກຳນົດ 27 ຄາດໝາຍ, ປະຕິບັດໄດ້ 26 ຄາດໝາຍ ເທົ່າກັບ 96.29%, ຂອງແຜນການ, ໃນນີ້ລື່ນແຜນການ 9 ຄາດໝາຍ, ບັນລຸຕາມແຜນການ 11 ຄາດໝາຍ ແລະ ບໍ່ບັນລຸ 6 ຄາດໝາຍ; ຂົງເຂດສະຫວັດດີການສັງຄົມກໍານົດ 32 ຄາດໝາຍ, ປະຕິບັດໄດ້ 30 ຄາດໝາຍ ເທົ່າກັບ 93.75% ຂອງແຜນການ, ໃນນີ້ລື່ນແຜນການ 5 ຄາດໝາຍ, ບັນລຸຕາມແຜນການ 14 ຄາດໝາຍ ແລະ ບໍ່ບັນລຸຕາມແຜນການ 13 ຄາດໝາຍ; (ໃນຂົງເຂດນີ້ມີ 2 ຄາດໝາຍ ວຽກກາແດງບໍ່ໄດ້ຈັດຕັ້ງປະຕິບັດ ເພາະໄດ້ໂອນຂຶ້ນກັບການຄຸ້ມຄອງຂອງ ຫສນຍ ໃນໄລຍະກາງໄໝ). ຂົງເຂດຄຸ້ມຄອງ-ບໍລິຫານ ແລະ ນິຕິກໍາ ກຳນົດ 19 ຄາດໝາຍປະຕິບັດໄດ້ 100% ຂອງແຜນການ, ໃນນີ້ລື່ນແຜນການ 1 ຄາດໝາຍ, ບັນລຸຕາມແຜນ 12 ຄາດໝາຍ ແລະ ບໍ່ບັນລຸ 6 ຄາດໝາຍ. ສັງລວມແລ້ວໃນ 5 ປີຜ່ານມາ ສາມາດປະຕິບັດຕົວເລກຄາດໝາຍສູ້ຊົນໄດ້ທັງໝົດ 76 ຄາດໝາຍ ເທົ່າກັບ 97.43%.

ໃນວາລະກອງປະຊຸມຍັງໄດ້ພ້ອມກັນປະກອບຄຳຄິດ-ຄຳເຫັນຢ່າງເລິກຊຶ່ງ ແລະ ດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກກະຊວງຊຸດໃໝ່ ເພື່ອສືບຕໍ່ນຳພາ-ຊີ້ນໍາປະຕິບັດແນວທາງການເມືອງຂອງພັກໃຫ້ປະກົດຜົນເປັນຈິງ ແລະ ປ່ອນບັດຄັດເລືອກເອົາຜູ້ແທນສົມບູນ, ສຳຮອງໄປຮ່ວມກອງປະຊຸມໃຫຍ່ ຄັ້ງທີ XII ຂອງພັກ.

ສະຫາຍ ໂພໄຊ ໄຊຍະສອນ ໄດ້ຮັບເລືອກຕັ້ງເປັນເລຂາຄະນະບໍລິຫານງານພັກກະຊວງແຮງງານ ແລະ ສະຫວັັດດີການສັງຄົມ (ຮສສ) ຊຶ່ງກອງປະຊຸມໃຫຍ່ຜູ້ແທນອົງຄະນະພັກກະຊວງ ຮສສ ຄັ້ງທີ VII ໄດ້ປິດລົງດ້ວຍຜົນສຳເລັດຢ່າງຈົບງານໃນຕອນແລງຂອງວັນທີ 4 ກັນຍານີ້, ​ເປັນ​ກຽດ​ເຂົ້າ​ຮ່ວມ​ໂດຍສະຫາຍ ນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍພາກສ່ວນກ່ຽວຂ້ອງເຂົ້າ​ຮ່ວມ.

ສະຫາຍ ດອນ ໄພວົງ ຮອງຫົວໜ້າຄະນະຈັດຕັ້ງສູນກາງພັກ ​ໄດ້ລາຍງານຜົນການປ່ອນບັດເລືອກຕັ້ງຂອງກອງປະຊຸມວ່າ: ກອງປະຊຸມໃຫຍ່ຜູ້ແທນອົງຄະນະພັກກະຊວງ ຮສສ ຄັ້ງທີ VII ໄດ້ປ່ອນບັດຄັດເລືອກເອົາ ຄະນະບໍລິຫານງານພັກກະຊວງຊຸດໃໝ່ ຊຶ່ງມີຜູ້ສະໝັກ 14 ສະຫາຍ ຍິງ 4 ສະຫາຍ, ເລືອກເອົາ 11 ສະຫາຍຍິງ 2 ສະຫາຍ, ເລືອກເອົາຄະນະປະຈຳພັກ 3 ສະຫາຍ, ກອງປະຊຸມຄັ້ງປະຖົມມະລືກໄດ້ເປັນເອກະພາບກັນ ເລືອກເອົາສະຫາຍ ໂພໄຊ ໄຊຍະສອນ ເປັນເລຂາຄະນະບໍລິຫານງານພັກກະຊວງ, ເລືອກເອົາສະຫາຍ ນາງ ແກ້ວ ຈັນທະວິໄຊ ເປັນຮອງເລຂາພັກ ແລະ ເລືອກເອົາສະຫາຍ ພົງໄຊສັກ ອິນຖາລາດ ເປັນປະທານກວດກາພັກ, ເລືອກເອົາສະຫາຍ ວິໂລພົງ ສີສົມຫວັງ ເປັນຮອງປະທານກວດກາພັກ. ກອງປະຊຸມຍັງໄດ້ປ່ອນບັດຄັດເລືອກເອົາຜູ້ແທນສົມບູນ 7 ສະຫາຍ ແລະ ສຳຮອງ 2 ສະຫາຍໄປຮ່ວມກອງປະຊຸມໃຫຍ່ຄັ້ງທີ XII ຂອງພັກ.

ໂອກາດນີ້, ສະຫາຍ ນາງ ສີໃສ ລືເດດມູນສອນ ໄດ້ໃຫ້ກຽດໂອ້ລົມເນັ້ນໜັກຕໍ່ຄະນະພັກຊຸດໃໝ່ ຕ້ອງເພີ່ມທະວີຄວາມເອົາໃຈໃສ່ໃນການປັບປຸງລະບົບການເມືອງຂອງຕົນໃຫ້ມີຄວາມເຂັ້ມແຂງ ແຂ​ງແຮງ; ເອົາໃຈໃສ່ປັບປຸງບູລະນະກົງຈັກການຈັດຕັ້ງຂອງພັກ ແລະ ບັນດາອົງການຈັດຕັ້ງມະຫາຊົນຂັ້ນຕ່າງໆ ໃຫ້ສອດຄ່ອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນສະເພາະໜ້າ ແລະ ຍາວນານ ຮັບປະກັນໃຫ້ທຸກການຈັດຕັ້ງຂອງພັກ-ລັດ ແລະ ອົງການຈັດຕັ້ງມະຫາຊົນມີຄວາມສະຫງົບ, ໜັກແໜ້ນ ຮັບປະກັນຕາມທິດພັກນໍາພາ, ລັດຄຸ້ມຄອງ ແລະ ເສີມຂະຫຍາຍສິດເປັນເຈົ້າຂອງມະຫາຊົນຢ່າງເຕັມສ່ວນ; ເອົາໃຈໃສ່ປັບປຸງແບບແຜນນໍາພາ ແລະ ວິທີເຮັດວຽກຂອງການຈັດຕັ້ງພັກ-ລັດທຸກຂັ້ນໃຫ້ມີການຫັນປ່ຽນຢ່າງຕັ້ງໜ້າ; ປັບປຸງກົງຈັກການຈັດຕັ້ງຂອງຂະແໜງແຮງງານ ແລະ ສະຫວັດດີການສັງຄົມແຕ່ສູນກາງລົງຮອດທ້ອງຖິ່ນໃຫ້ໜັກແໜ້ນ, ເຂັ້ມແຂງຕາມທິດກະທັດຮັດສົມເຫດ-ສົມຜົນ ແລະ ເຄື່ອນໄຫວຢ່າງມີປະສິດທິພາບສູງ; ສືບຕໍ່ເອົາໃຈໃສ່ນໍາພາ-ຊີ້ນໍາການພັດທະ ນາສີມືແຮງງານລາວໃຫ້ມີຄວາມຊໍານິຊໍານານງານໄດ້ທັງປະລິມານ ແລະ ຄຸນນະພາບໄປຕາມທິດຫັນເປັນອຸດສາຫະກໍາ ແລະ ທັນສະໄໝ ສາມາດຕອບສະໜອງກັບຄວາມຮຽກຮ້ອງຕ້ອງການໃນການພັດທະນາເສດຖະກິດ-ສັງຄົມຂອງຊາດ ແລະ ຄວາມຕ້ອງການຂອງຕະຫຼາດແຮງງານ; ສືບຕໍ່ເອົາໃຈໃສ່ນໍາພາ-ຊີ້ນໍາພັດທະນາລະບົບປົກປ້ອງສັງຄົມໃຫ້ເຂັ້ມແຂງ, ມີປະສິດທິພາບ, ຫັນເປັນທັນສະໄໝ ແລະ ຮັບປະກັນໃຫ້ພົນລະເມືອງລາວເຂົ້າເຖິງການບໍລິການຂັ້ນພື້ນຖານຢ່າງທົ່ວເຖິງ; ປະຕິບັດນະໂຍບາຍຕໍ່ຜູ້ທີ່ມີຜົນງານ ແລະ ຄຸນງາມຄວາມດີໃນພາລະກິດປະຕິວັດຊາດ ປະຊາທິປະໄຕຢ່າງທົ່ວເຖິງ ແລະ ທັນການ. ພາຍຫຼັງສໍາເລັດກອງປະຊຸມໃຫຍ່ຄັ້ງນີ້ແລ້ວໃຫ້ຮີບຮ້ອນແບ່ງວຽກ-ແບ່ງງານ, ແບ່ງຄວາມຮັບຜິດຊອບພາຍໃນຄະນະບໍລິຫານງານພັກກະຊວງ, ຄະນະປະຈໍາພັກກະຊວງໃຫ້ລະອຽດ, ຈະແຈ້ງ, ເພື່ອນໍາພາ-ຊີ້ນໍາ ​ແລະ ອື່ນໆ.

 

ແຫຼ່ງ: ປະ​ຊາ​ຊົນ, ຂ່າວ-ພາບ: ບຸນຕອມ