ຈໍາປາສັກ ຢຸດຕິການເກັບຄ່າຜ່ານທາງ 14 A

​ເຜີຍ​ແຜ່​ໂດຍ: admin|ຢ້ຽມ​ຊົມ: 60 ຄັ້ງ | ເວ​ລາ | 2024-11-21 15:39:20 ອັບ​ເດດ​ຄັ້ງ​ລ້າ​ສຸດ ໂດຍ: admin ເວ​ລາ 0000-00-00 00:00:00

ວັນທີ 1 ສິງຫາ 2024, ຄະນະພັກ - ອົງການປົກຄອງແຂວງຈໍາປາສັກ ຮ່ວມກັບ ບໍລິສັດ ດວງດີກໍ່ສ້າງຂົວ - ທາງ ຈໍາກັດຜູ້ດຽວ ໄດ້ຈັດພິທີຢຸດຕິການເກັບຄ່າຜ່ານທາງ 14 A ບ້ານຫ້ວຍເພັກ ເມືອງໂພນທອງ ຫາ ບ້ານພະພີນ ເມືອງຈໍາປາສັກ ແຂວງຈໍາປາສັກ ຢ່າງຖາວອນ ນັບແຕ່ວັນທີ 1 ສິງຫາ 2024 ເປັນຕົ້ນໄປ. ພິທີຈັດຂຶ້ນ ຢູ່ດ່ານເກັບເງິນບ້ານຫ້ວຍເພັກ ເມືອງໂພນທອງ ໂດຍມີທ່ານ ອາລຸນໄຊ ສູນນະລາດ ກໍາມະການສູນກາງພັກ ເລຂາພັກແຂວງ ເຈົ້າແຂວງຈໍາປາສັກ. ມີທ່ານ ສາຍທອງ ໄຊຍະວົງ ປະທານສະພາປະຊາຊົນ ແຂວງ, ທ່ານ ອຸດອນ ແກ້ວດວງດີ ປະທານບໍລິສັດ ດວງດີກໍ່ ສ້າງຈຳກັດ,ພ້ອມດ້ວຍການນໍາຂອງແຂວງ ເມືອງ ເຂົ້າຮ່ວມ

ທ່ານ ອຸດອນ ແກ້ວດວງດີ ລາຍງານການຈັດຕັ້ງປະຕິບັດ ສັນຍາຮັບເໝົາສຳປະທານກິດຈະການເກັບເງິນຄ່າຜ່ານທາງ ເສັ້ນທາງ 14 A ແຕ່ບ້ານຫວ້ຍເພັກ ເມືອງໂພນທອງ ຫາ ບ້ານພະພິນ ເມືອງຈຳປາສັກ ແລະ ກ່າວມອບຄືນ ເສັ້ນທາງ 14 A ໃຫ້ແກ່ອົງການປົກຄອງແຂວງ ສືບຕໍ່ຄຸ້ມຄອງນໍາໃຊ້. ບາງຕອນວ່າ: ເສັ້ນທາງ 14 ເປັນເສັ້ນທາງປູຢາງອັດສະຟານ ທີ່ໄດ້ມາດຕະການລະດັບສາກົນ, ເຊື່ອມຈອດ ລະຫວ່າງ ຊົນນະບົດ ກັບ ຕົວເມືອງ, ການໄປ - ມາ ແຕ່ກ່ອນມີແຕ່ທາງນໍ້າ (ຂ້າມລອຍ). ເສັ້ນທາງ 14 A ເປັນເສັ້ນທາງໃໝ່ ບໍລິສັດ ດວງດີກໍ່ສ້າງຂົວ - ທາງ ຈໍາກັດຜູ້ດຽວ ໄດ້ສະເໜີສຶກສາສໍາຫຼວດໃນຄັ້ງວັນທີ 13 ມີນາ 2008, ວັນທີ 11 ພຶດສະພາ 2008 ໄດ້ເລີ່ມລົງມືສຳຫຼວດ - ເກັບກຳຂໍ້ມູນພາກສະໜາມ ແລ້ວດຳເນີນການອອກແບບ ຊຶ່ງມີຄວາມຍາວ 25 ກິໂລແມັດ, ໜ້າທາງກວ້າງ 9 ແມັດ, ທາງລົດແລ່ນ ກວ້າງ 7 ແມັດ (ບ່າທາງກວ້າງ ເບື້ອງລະ 1 ແມັດ ແລະ ກໍ່ສ້າງຂົວເບຕົງເສີມເຫຼັກ ຂາງອັດແຮງ ຈໍານວນ 9 ແຫ່ງ ຍາວ 254 ແມັດ) ຊຶ່ງແຂວງຈໍາປາສັກໄດ້ກູ້ຢືມເງິນຈາກທະນາຄານແຫ່ງ ສປປ ລາວ ມາຊຳລະໂຄງການກໍ່ສ້າງເສັ້ນທາງ ມູນຄ່າ 33.686.191 ໂດລາໃນນັ້ນ ລວມມີທັງເສັ້ນທາງແຄມຂອງ ຈາກທ່າບັກບ້ານພະພີນໄປຫາ ບ້ານທາງຄົບ ຮອດວັດພູ, ບໍລິສັດດວງດີ ກໍ່ສ້າງ ຈຳກັດຜູ້ດຽວ ເປັນຜູ້ຮັບເໝົາກໍ່ສ້າງ ແລະ ສຳປະທານກິດຈະການເກັບຄ່າຜ່ານທາງ 14 A, ຊັບສິນຂອງລັດ ແມ່ນເສັ້ນທາງ ແລະ ອາຄານດ່ານເກັບເງິນແລະ ເຮືອນພັກພະນັກງານທັງສອງເບື້ອງ. ພາຍຫຼັງໄດ້ກໍ່ສ້າງເສັ້ນທາງນີ້ສໍາເລັດ ປະຊາຊົນບັນດາເຜົ່າຊາວແຂວງຈໍາປາສັກ (ເວົ້າລວມ) ເວົ້າສະເພາະການໄປມາຫາສູ່ຂອງ ປະຊາຊົນເມືອງມູນລະປະໂມກ, ເມືອງສຸຂຸມາ ແລະ ເມືອງຈຳປາສັກ ກັບເມືອງອື່ນໆ ໄດ້ມີທາງເລືອກໃໝ່ ໃນການຊົມໃຊ້ຫຼາຍຂຶ້ນ ເປັນການອໍານວຍຄວາມສະດວກ ດ້ານການຄ້າ - ການຂົນສົ່ງ, ການທ່ອງທ່ຽວ ແລະ ກະສິກຳ ເຮັດໃຫ້ຫຼຸດຜ່ອນເວລາຂອງຜູ້ຄົນທີ່ໄປທຽວຊົມເມືອງມໍລະດົກໂລກວັດພູຈຳປາສັກ, ພະທາດສາມສໍາປາງ ເມືອງສຸຂຸມາ ນັບແຕ່ມື້ເປີດໂຄງການນໍາໃຊ້ທາງຮອດປັດຈຸບັນ. ຍ້ອນເຫັນໄດ້ຄວາມຫຍຸ້ງຍາກທາງດ້ານເສດຖະກິດ - ການເງິນ ຂອງປະເທດ ແລະ ແຂວງຈໍາປາສັກ ທີ່ກຳລັງປະເຊີນຢູ່, ເພື່ອເປັນການຫຼຸດຜ່ອນພາລະໃຫ້ແກ່ປະຊາຊົນ ບັນດາເຜົ່າ, ພະນັກງານ, ທະຫານ, ຕຳຫຼວດ ທີ່ນໍາໃຊ້ເສັ້ນທາງດັ່ງກ່າວ ໄປ - ມາ ຈິ່ງເຫັນດີເປັນເອກະພາບ ຍົກເລີກສັນຍາສຳປະທານ ກິດຈະການ ແລະ ຢຸດຕິການເກັບຄ່າຜ່ານທາງດັ່ງກ່າວຢ່າງຖາວອນ ນັບແຕ່ວັນທີ 1 ສິງຫາ 2024 ນີ້ເປັນຕົ້ນໄປ. ພ້ອມນີ້ ກໍຂໍມອບເສັ້ນທາງ ຄືນໃຫ້ແກ່ອົງການປົກຄອງແຂວງຈຳປາສັກ ຄຸ້ມຄອງປົກປັກຮັກສາ ແລະ ນໍາໃຊ້ ຕໍ່ໄປ.

ໂອກາດນີ້, ທ່ານ ອາລຸນໄຊ ສູນນະລາດ ມີຄຳເຫັນວ່າ:ຕາງໜ້າອົງການປົກຄອງແຂວງ ກໍຄືປະ ຊາຊົນບັນດາເຜົ່າຊາວແຂວງຈໍາປາສັກ ສຸດທີ່ມີຄວາມພາກພູມ ໃຈ ທີ່ໄດ້ເຂົ້າຮ່ວມພິທີເປີດຫຼັກບາລີແຍ ແລະ ຍົກເລີກການເກັບຄ່າຜ່ານທາງ ເສັ້ນທາງ 14 A ຈາກຫ້ວຍເພັກ ເມືອງໂພນທອງ ຫາ ບ້ານພະພີນ ເມືອງຈໍາປາສັກ.ເສັ້ນທາງເລກທີ 14 A ນີ້, ບໍລິສັດດວງດີ ໄດ້ບຸກເບີກພັດທະນາມາເປັນເວລາຫຼາຍປີ ແລະ ໄດ້ເປີດນໍາໃຊ້ໃບໄລຍະຜ່ານມາ, ເຮັດໃຫ້ແຂວງຈໍາປາສັກພວກເຮົາ ໄດ້ມີເສັ້ນທາງທີ່ອໍານວຍຄວາມສະດວກໃນການໄປ - ມາ ຊຶ່ງກ່ອນໜ້ານີ້ແມ່ນໄດ້ນໍາໃຊ້ເສັ້ນທາງຂ້າມບັກ ຢູ່ທ່າບ້ານມ່ວງ ເມືອງປະທຸມພອນ ເພື່ອທີ່ຈະເດີນທາງຂ້າມໄປເມືອງຈຳປາສັກ.ສະແດງຄວາມຂອບໃຈຕໍ່ບໍລິສັດ ດວງດີ ກໍ່ສ້າງຈໍາກັດ ທີ່ສະຫຼະເຫຶ່ອແຮງ ພ້ອມທັງງົບປະມານ, ແຮງງານ, ພາຫະນະກົນຈັກ ໃນການພັດທະນາເສັ້ນທາງເລກທີ 14 A ນີ້. ເພື່ອເປັນທິດທາງ ໃນການຈັດຕັ້ງປະຕິບັດ, ປົກປັກຮັກສາ, ຄຸ້ມຄອງເສັ້ນທາງ ແລະ ຮັບປະກັນປະສິດທິພາບ - ປະສິທິຜົນໃນຕໍ່ໜ້າ, ມອບໃຫ້ພະແນກໂຍທາທິການ ແລະ ຂົນສົ່ງແຂວງ ເອົາໃຈໃສ່ໃນການປົກປັກຮັກສາ ບູລະນະ ແລະ ການປົວແປງທາງ ແລະ ສິ່ງປະກອບຕ່າງໆທີ່ເຫັນວ່າມີການເປ່ເພໃນຕໍ່ໜ້າ ໃຫ້ເສັ້ນທາງຍັງຢູ່ໃນສະພາບ ແລະ ມາດຕະຖານເດີມ ໂດຍສະເພະ ການຟື້ນຟູ ຫຼື ປັບປຸງທາງເດີມ ແລະ ການ ສ້ອມແປງສຸກເສີນ; ໃຫ້ທຸກພາກສ່ວນ ເອົາໃຈໃສ່ໃນການປົກປັກຮັກສາເສັ້ນທາງ ເພື່ອຫຼີກເວັ້ນການປ່ອຍສັດລ້ຽງ ແລະ ເຄື່ອນຍ້າຍ ສັດລ້ຽງຕາມທາງຫຼວງ ເພື່ອຫຼີກເວັ້ນຜົນກະທົບ ຈາກການເກີດອຸບັດເຫດ ພ້ອມທັງການຈັດກິດຈະກຳຕາມເສັ້ນທາງ ໃຫ້ມີການອະນຸຍາດ ຈາກຂະແໜງການໂຍທາທິການ ແລະ ຂົນສົ່ງ ແລະ ພາກສ່ວນກ່ຽວຂ້ອງ;ໃຫ້ປະທານ ບໍລິສັດ ຜູ້ພັດທະນາ ຊ່ວຍໃນການພັດທະນາເສັ້ນທາງ ຢູ່ແຂວງຈໍາປາສັກພວກເຮົາ ໂດຍສະເພາະບັນດາໂຄງການທີ່ຍັງຈະຕ້ອງໄດ້ສືບຕໍ່ແກ້ໄຂ ເພື່ອໃຫ້ສໍາເລັດ ໃນການສ້າງ - ບູລະນະເສັ້ນທາງ ແລະ ບັນດາໂຄງການຕ່າງໆ ພາຍໃນແຂວງຈໍາປາສັກພວກເຮົາ ໃຫ້ປະຕິບັດສໍາເລັດຕາມລະດັບຄາດໝາຍ. ຕອນທ້າຍ ກໍໄດ້ມີການເປີດຫຼັກບາລີແຍ ແລະ ຍົກເລີກການເກັບຄ່າຜ່ານທາງ ເສັ້ນທາງ 14 A ຕື່ມອີກ.

ແຫຼ່ງ: ປະ​ຊາ​ຊົນ, ຂ່າວ-ພາບ: ທູນທອງໃຈ