5 ປີ ຜ່ານມາ ການປະຕິບັດແຜນພັດທະນາ ຊາວໜຸ່ມ-ເຍົາວະຊົນ ມີຜົນສຳເລັດຫລາຍດ້ານ

​ເຜີຍ​ແຜ່​ໂດຍ: admin|ຢ້ຽມ​ຊົມ: 11 ຄັ້ງ | ເວ​ລາ | 2025-09-06 22:45:32

ຂປລ. ຜ່ານການຈັດຕັ້ງປະຕິບັດແຜນພັດທະນາຊາວໜຸ່ມ, ເຍົາວະຊົນ 5 ປີ ຄັ້ງທີ II (2021-2025) ຂອງຄະນະຊາວໜຸ່ມປະຊາຊົນປະຕິວັດລາວ ແຕ່ລະຂັ້ນ ໄດ້ມີຜົນສໍາເລັດໃນຫລາຍດ້ານ, ເຖິງ ວ່າສະພາບການພາຍໃນ ແລະ ພາກພື້ນ-ສາກົນ ຈະພົບຄວາມຫຍຸ້ງຍາກສັບສົນກໍຕາມ ແຕ່ພາຍໃຕ້ການ ນໍາພາຂອງພັກ, ຄະນະຊາວໜຸ່ມແຕ່ລະຂັ້ນ ກໍໄດ້ສຸມໃສ່ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ ເເຫ່ງຊາດ 5 ປີ ຄັ້ງທີ IX (2021-2025), ມະຕິກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ VIII, ມະຕິກອງປະຊຸມໃຫຍ່ຂອງອົງຄະນະພັກເເຕ່ລະຂັ້ນ, ຈັດຕັ້ງຜັນຂະຫຍາຍ 2 ວາລະແຫ່ງຊາດ ຕິດພັນກັບຂໍ້ແຂ່ງຂັນຮັກຊາດ ແລະ ພັດທະນາ, ເນື້ອໃນຂໍ້ເເຂ່ງຂັນ 4 ບຸກ ຂອງຊາວໜຸ່ມ ແລະ 3 ດີ 4 ຮູ້ ຂອງເຍົາວະຊົນ ຢ່າງເປັນຂະ ບວນການຟົດຟື້ນ.

ທ່ານ ນາງ ແກ້ວອຸດອນ ແສງມະນີ ຄະນະເລຂາທິການ ສູນກາງຊາວໜຸ່ມປະຊາຊົນປະຕິວັດລາວ ໄດ້ລາຍງານໃນກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ IX ເມື່ອບໍ່ດົນມາ ໂດຍທ່ານ ໄດ້ຍົກໃຫ້ເຫັນຜົນສໍາເລັດຫລາຍດ້ານ ການຈັດຕັ້ງປະຕິບັດແຜນພັດທະນາຊາວໜຸ່ມ, ເຍົາວະຊົນ 5 ປີ ຄັ້ງທີ II (2021-2025) ເປັນຕົ້ນ ໄດ້ຍົກສູງຄຸນນະພາບ ວຽກງານສຶກສາອົບຮົມການເມືອງແນວຄິດໃຫ້ຊາວໜຸ່ມລາວ, ປັບປຸງການຈັດຕັ້ງ ແລະ ກໍ່ສ້າງຖັນແຖວພະນັກງານຄະນະຊາວໜຸ່ມແຕ່ລະຂັ້ນໃຫ້ມີປະສິດທິພາບ, ປະສິດທິຜົນ; ພັດທະນາຄວາມຮູ້, ວິທະຍາສາດເຕັກໂນໂລຊີ, ວິຊາຊີບ ແລະ ສີມືແຮງງານ; ເພີ່ມທະວີການປູກຈິດສໍານຶກ, ການຈັດຕັ້ງແບບແຜນ ແລະ ສົ່ງເສີມພອນສະຫວັນຂອງເຍົາ ວະຊົນ-ອະນຸຊົນ; ເອົາໃຈໃສ່ການສົ່ງເສີມສຸຂະພາບ ແລະ ການດໍາລົງຊີວິດທີ່ປອດໃສ ຂອງຊາວໜຸ່ມ, ເຍົາວະຊົນ; ຍົກສູງປະສິດທິພາບຂະບວນການຕະລຸມບອນ ຂອງຊາວໜຸ່ມເຂົ້າໃນການປົກປັກຮັກສາ ແລະ ການພັດທະນາປະເທດຊາດ (ປ້ອງກັນປະເທດ, ປ້ອງກັນຄວາມສະຫງົບ, ເສດຖະກິດ, ວັດທະ ນະທໍາ, ສັງຄົມ ແລະ ຫລຸດຜ່ອນປະກົດການຫຍໍ້ທໍ້); ຈັດຕັ້ງປະຕິບັດວຽກງານປົກປ້ອງສິດຜົນປະ ໂຫຍດຂອງຊາວໜຸ່ມ, ເຍົາວະຊົນໃຫ້ມີກິດຈະກໍາຕົວຈິງ ແລະ ມີຫລາຍມາດຕະການຈັດຕັ້ງປະຕິບັດ; ຈັດຕັ້ງປະຕິບັດວຽກງານປົກປ້ອງສິດຜົນປະໂຫຍດຂອງຊາວໜຸ່ມ, ເຍົາວະຊົນໃຫ້ມີກິດຈະກໍາຕົວຈິງ ແລະ ມີຫລາຍມາດຕະການຈັດຕັ້ງປະຕິບັດ; ສືບຕໍ່ປັບປຸງຂະຫຍາຍສູນຝຶກອົບຮົມວິຊາຊີບ ແລະ ສູນກິດຈະກໍາຊາວໜຸ່ມ, ເຍົາວະຊົນ; ປັບປຸງຮູບການ ແລະ ວິທີການເຄື່ອນໄຫວວຽກງານພົວພັນ-ຮ່ວມມືກັບຕ່າງປະເທດຂອງ ຄຊປປລ.

ໄລຍະຜ່ານມາ, ຄະນະຊາວໜຸ່ມເເຕ່ລະຂັ້ນ ໄດ້ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ, ເສີມຂະຫຍາຍບົດບາດປະຈັນບານຂອງຕົນ ເຂົ້າໃນການບູລະນະ ລະ ບອບການເມືອງ, ຄວາມໝັ້ນຄົງຂອງຊາດ ເປັນຕົ້ນ ໄດ້ນໍາພາຊາວໜຸ່ມອາສາສະໝັກ ເຂົ້າຕ້ານໄພພິບັດ ໄດ້ 1.789 ຄັ້ງ, ສະກັດກັ້ນປະກົດການຫຍໍ້ທໍ້, ການປ້ອງກັນເວນຍາມຕາມຊາຍແດນ, ປ້ອງກັນທີ່ຕັ້ງສໍານັກງານ-ອົງການ, ປ້ອງກັນການນໍາ, ຮ່ວມຂະບວນການບໍລິຈາກເລືອດ ເພື່ອຊ່ວຍເຫລືອສັງຄົມ ໄດ້ 189.395 ຖົງ ແລະ ມີອາສາສະໝັກ ຊາວໜຸ່ມຕະລຸມບອນ 26.997 ຄົນ. ພ້ອມນີ້, ຄະນະຊາວໜຸ່ມປະຊາຊົນ ປະຕິວັດລາວ ໄດ້ເສີມຂະຫຍາຍສາຍພົວພັນຮ່ວມມືຮອບດ້ານ ກັບບັນດາປະເທດເພື່ອນມິດຍຸດທະສາດ, ປະເທດເພື່ອນມິດ, ພາກພື້ນ, ສາກົນ, ບັນດາອົງການຈັດຕັ້ງສາກົນ ທັງພາຍໃນ ແລະ ຕ່າງປະເທດ, ຍາດແຍ່ງການຊ່ວຍເຫລືອທາງດ້ານງົບປະມານ, ອຸປະກອນ, ວິຊາການ, ສ້າງຄວາມເຂັ້ມແຂງໃຫ້ແກ່ການຈັດຕັ້ງ, ພະນັກງານ, ສະມາຊິກຊາວໜຸ່ມ ແລະ ອື່ນໆ.

ຂ່າວ: ທະນູທອງ, ພາບ: ເກດສະໜາ