ກອງປະຊຸມໃຫຍ່ສະມາຊິກພັກ ຄັ້ງທີ VI ຂອງ ອົງຄະນະພັກ ສມປຊ

​ເຜີຍ​ແຜ່​ໂດຍ: admin|ຢ້ຽມ​ຊົມ: 16 ຄັ້ງ | ເວ​ລາ | 2025-08-22 13:50:57 ອັບ​ເດດ​ຄັ້ງ​ລ້າ​ສຸດ ໂດຍ: admin ເວ​ລາ 2025-08-22 13:49:45

ກອງປະຊຸມໃຫຍ່ສະມາຊິກພັກ ຄັ້ງທີ VI ຂອງອົງຄະນະພັກ ສະຖາບັນການເມືອງ ແລະ ການປົກຄອງແຫ່ງຊາດ (ສມປຊ) ໄດ້ເປີດຂຶ້ນຢ່າງສະຫງ່າຜ່າເຜີຍ ໃນວັນທີ 8 ສິງຫານີ້ ທີ່ສະໂມສອນ ຂອງສະຖາບັນດັ່ງກ່າວ, ພາຍໃຕ້ຄໍາຂວັນ: “ຍົກສູງຄວາມສາມາດນໍາພາຮອບດ້ານ ຂອງອົງຄະນະພັກ, ສ້າງການຫັນປ່ຽນໃນວຽກງານບໍາລຸງ-ກໍ່ສ້າງພະນັກງານ, ຄົ້ນຄວ້າທິດສະດີ ແລະ ພຶດຕິກຳ ໃນທົ່ວລະບົບໂຮງຮຽນພັກ ຢ່າງແຂງແຮງ, ເລິກເຊິ່ງ, ປະດິດສ້າງ ແລະ ທັນສະໄໝ”. ພາຍໃຕ້ການເປັນປະທານ ຂອງສະຫາຍ ພູວົງ ອຸ່ນຄໍາແສນ ກຳມະການສູນກາງພັກ ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ.

ເປັນກຽດເຂົ້າຮ່ວມ ໂດຍ ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ ພ້ອມດ້ວຍແຂກຖືກເຊີນ ຈາກອະດີດການນຳ ສະຖາບັນການເມືອງ ແລະ ການປົກຄອງແຫ່ງຊາດ, ອົງການອ້ອມຂ້າງສູນກາງພັກ, ສະຖາບັນການສຶກສາ, ໂຮງຮຽນການເມືອງ-ການປົກຄອງແຂວງ, ນະຄອນຫຼວງ, ກະຊວງປ້ອງກັນຄວາມສະຫງົບ, ກະຊວງປ້ອງກັນປະເທດ, ຄະນະພັກເມືອງ, ບ້ານ, ສະມາຊິກພັກພະນັກງານ, ຄູ-ອາຈານ, ນັກສຶກສາ ທົ່ວສະຖາບັນການເມືອງ ແລະ ການປົກຄອງແຫ່ງຊາດ ໃຫ້ກຽດເຂົ້າໃນການເຂົ້າຮ່ວມຢ່າງພ້ອມພຽງ. ໃນນັ້ນ, ສະມາຊິກພັກສົມບູນ ເຂົ້າຮ່ວມທັງໝົດ 173 ສະຫາຍ ຍິງ 75 ສະຫາຍ ແລະ ແຂກຖືກເຊີນ 33 ສະຫາຍ.

ໃນກອງປະຊຸມ, ສະຫາຍ ພູວົງ ອຸ່ນຄຳແສນ ໄດ້ກ່າວເປີດກອງປະຊຸມໃຫຍ່ ພ້ອມທັງໄດ້ຜ່ານຮ່າງລາຍງານການເມືອງ ຂອງຄະນະບໍລິຫານງານພັກສະໄໝທີ V, ສະຫາຍ ໄດ້ເນັ້ນໜັກວ່າ: “ກອງປະຊຸມໃຫຍ່ສະມາຊິກພັກຄັ້ງທີ VI ຂອງອົງຄະນະພັກ ສະຖາບັນ ເປັນກອງປະຊຸມທີ່ມີຄວາມໝາຍສຳຄັນຍິ່ງ ໃນຊີວິດການເມືອງ ຂອງພັກ ກໍຄືຂອງສະຖາບັນ, ເປັນການປະຕິບັດຫຼັກການຈັດຕັ້ງ, ແບບແຜນນຳພາວິທີເຮັດວຽກ, ເປັນບັ້ນດຳເນີນຊີວິດການເມືອງພາຍໃນຄະນະພັກ, ສະມາຊິກພັກ ຢູ່ໃນທົ່ວສະຖາບັນການເມືອງ ແລະ ການປົກຄອງແຫ່ງຊາດ”. ກອງປະຊຸມໄດ້ພ້ອມກັນຄົ້ນຄວ້າ ແລະ ຮັບຮອງເອົາບົດລາຍງານການເມືອງ ແລະ ບົດສຳຫຼວດການນຳພາລວມ ຂອງຄະນະພັກຊຸດທີ V ແລະ ແຜນພັດທະນາສະຖາບັນການເມືອງ ແລະ ການປົກຄອງແຫ່ງຊາດໄລຍະ 2026-2030. ໃນນັ້ນ ໄດ້ຕີລາຄາດ້ານດີ, ຂໍ້ຄົງຄ້າງ, ສາເຫດ, ບົດຮຽນການນຳພາ-ຊີ້ນຳ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ ໃນ 5 ປີຜ່ານມາ, ກອງປະຊຸມ, ຍັງໄດ້ເປັນເອກະສັນກັນຮັບຮອງ ທິດທາງ, ຄາດໝາຍສູ້ຊົນ ແລະ ວຽກງານຈຸດສຸມ ໃນ 5 ປີຕໍ່ໜ້າ (2026-2030), ກອງປະຊຸມໄດ້ຟັງລາຍງານ ແລະ ການປະກອບຄໍາເຫັນ ຈາກຜູ້ຕາງໜ້າອາຈານອາວຸໂສ, ອາຈານໜຸ່ມ, ນັກສຶກສາ, ອົງການຈັດຕັ້ງມະຫາຊົນ ແລະ ຜູ້ແທນກອງປະຊຸມ ຊຶ່ງແຕ່ລະພາກສ່ວນລ້ວນແຕ່ ສະແດງໃຫ້ເຫັນເຖິງ ຄວາມເປັນເອກະພາບ ຕໍ່ບົດລາຍງານການເມືອງ, ທິດທາງ, ແຜນການ ແລະ ວຽກງານຮອບດ້ານຕໍ່ກອງປະຊຸມ, ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດເລືອກເອົາຄະນະບໍລິຫານງານພັກຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານ ເງື່ອນໄຂທີ່ກຳນົດໄວ້ ຊຶ່ງມີຜູ້ອອກຮັບສະໝັກເລືອກຕັ້ງ 12 ສະຫາຍ ຍິງ 4 ສະຫາຍ ແລະ ເລືອກໄດ້ 9 ສະຫາຍ, ກອງປະຊຸມຄັ້ງປະຖົມມະລືກ ຂອງຄະນະບໍລິຫານງານພັກ ສມປຊ ຊຸດທີ VI ໄດ້້ເລືອກເອົາສະຫາຍ ພູວົງ ອຸ່ນຄໍາແສນ ເປັນເລຂາຄະນະບໍລິຫານງານພັກ, ສະຫາຍ ດາວສະຫວັນ ເຄືອມີໄຊ ເປັນຮອງເລຂາຄະນະບໍລິຫານງານພັກ, ສະຫາຍ ຄໍາໃບ ມາລາສິງ ເປັນປະທານກວດກາ ສມປຊ, ສະຫາຍ ສົມສີ ຈັນຕະພົມ ແລະ ສະຫາຍ ນາງ ອານົງ ຂັນທະຍົງ ເປັນຮອງປະທານກວດກາຄະນະພັກ ສມປຊ. ຈາກນັ້ນ, ກອງປະຊຸມ ຍັງໄດ້ຄັດເລືອກຜູ້ແທນສົມບູນ, ສໍາຮອງເຂົ້າຮ່ວມ ກອງປະຊຸມ ຂອງຂັ້ນເທິງ ອີກດ້ວຍ.

ກອງປະຊຸມໃຫຍ່ໄດ້ຮັບຟັງການໂອ້ລົມຈາກສະຫາຍ ບຸນທອງ ຈິດມະນີ ຊຶ່ງໄດ້ສະແດງຄວາມຍ້ອງຍໍຊົມເຊີຍ ຕໍ່ການນໍາພາ-ຊີ້ນໍາ ຂອງຄະນະບໍລິຫານງານພັກຊຸດທິ V ຍາດໄດ້ຜົນສໍາເລັດຫຼາຍດ້ານ. ພ້ອມກັນນັ້ນ ສະຫາຍຍັງໄດ້ສະແດງຄວາມເປັນຫ່ວງເປັນໃຍຕໍ່ດ້ານທີ່ຍັງອ່ອນ, ຂໍ້ຄົງຄ້າງ ຊຶ່ງໄດ້ຮຽກຮ້ອງໃຫ້ຄະນະບໍລິຫານງານພັກຊຸດໃໝ່ ຈະຕ້ອງໄດ້ສືບຕໍ່ປັບປຸງ, ແກ້ໄຂ. ຈາກນັ້ນ ສະຫາຍຍັງໄດ້ໃຫ້ທິດຊີ້ນໍາວຽກງານແຕ່ລະດ້ານຢ່າງເລິກເຊິ່ງ, ສະຫາຍມີຄວາມເຊື່ອໝັ້ນຕໍ່ຄະນະບໍລິຫານງານພັກຊຸດໃໝ່ ທີ່ຈະສືບຕໍ່ນໍາພາ-ຊີ້ນໍາຈັດຕັ້ງປະຕິບັດມະຕິກອງປະຊຸມໃຫຍ່ ຂອງຄະນະບໍລິຫານງານພັກ ສມປຊ ໃຫ້ຍາດໄດ້ຜົນສໍາເລັດສູງຂຶ້ນກວ່າເກົ່າ, ຄະນະພັກຕ້ອງໄດ້ຖືສຳຄັນການສຶກສາອົບຮົມແນວຄິດ ຂອງສະມາຊິກພັກ-ພະນັກງານ, ຄູ-ອາຈານ, ນັກສຶກສາ ໃຫ້ເຊື່ອມຊຶມກຳແໜ້ນແນວທາງ ຂອງພັກ ຢ່າງເລິກເຊິ່ງ; ການສຶກສາອົບຮົມການເມືອງ-ນໍາພາແນວຄິດ ຕ້ອງຕິດພັນກັບການຝຶກຝົນຫຼໍ່ຫຼອມດ້ານຄຸນທາດການເມືອງ, ຄຸນສົມ ບັດສິນທຳປະຕິວັດ, ຍົກສູງຄວາມຮັບຜິດຊອບ ຕໍ່ໜ້າທີ່ວິຊາສະເພາະ, ສະຫາຍເລຂາທິການໃຫຍ່ ໄດ້ໃຫ້ທັດສະນະຊີ້ນໍາວ່າ: ຕ້ອງຮັບປະກັນໃຫ້ໄດ້ ສາມເປັນ, ເຈັດຮູ້: (ສາມເປັນ: ເປັນຄົນດີ, ເປັນຄົນເກັ່ງ, ເປັນຜູ້ຫ້າວຫັນປະຕິວັດ. ເຈັດຮູ້: ຮູ້ເຮັດວຽກ, ຮູ້ເສຍສະຫຼະ, ຮູ້ອັນຖືກ-ອັນຜິດ, ຮູ້ວາງແຜນ, ຮູ້ຈັດຕັ້ງປະຕິບັດແຜນ ຂອງກົມກອງ-ທ້ອງຖິ່ນຕົນ, ຮູ້ການເຮັດວຽກທີ່ຖືກຫຼັກການ, ມີວິທະຍາສາດ, ປະດິດສ້າງ ແລະ ຮູ້ດໍາລົງຊີວິດທີ່ເປັນແບບຢ່າງ, ເປັນຕົວແບບໃຫ້ມະຫາຊົນຮັກແພງ, ໃຫ້ມະຫາຊົນນັບຖື ແລະ ໃຫ້ມະຫາຊົນເດີນຕາມ), ສືບຕໍ່ປ່ຽນແປງໃໝ່ຢ່າງແຂງແຮງເລິກເຊິ່ງ, ວຽກງານຄົ້ນຄວ້າວິທະຍາສາດ, ປະສານສົມທົບຢ່າງສະໜິດແໜ້ນ ລະຫວ່າງຄົ້ນຄວ້າທິດສະດີ ກັບສະຫຼຸບພຶດຕິກຳ. ສຸມໃສ່ຄົ້ນຄວ້າ, ສ້າງຄວາມກະຈ່າງແຈ້ງທິດສະດີມາກ-ເລນິນ, ແນວຄິດ ໄກສອນ ພົມວິຫານ ກໍຄືຂໍ້ຂັດແຍ່ງພື້ນຖານທາງດ້ານແນວຄິດທິດສະດີ ແລະ ພຶດຕິກໍາ ເພື່ອໃຫ້ຄໍາປຶກສາແກ່ສູນກາງພັກ ໃນການບູລະນະແນວທາງປ່ຽນແປງໃໝ່ຮອບດ້ານ ມີຫຼັກການ ຂອງພັກ, ກ່ຽວກັບລັດທິສັງຄົມນິຍົມ ແລະ ເສັ້ນທາງກ້າວຂຶ້ນສູ່ສັງຄົມນິຍົມ, ສໍາລັບອົງຄະນະພັກສະຖາບັນ ຕ້ອງເອົາໃຈໃສ່ໃນການບໍາລຸງສ້າງຖັນແຖວຄູ-ອາຈານ ແລະ ນັກວິທະຍາສາດ, ຍົກລະດັບທາງດ້ານການຄົ້ນຄວ້າທິດສະດີ ແລະ ພຶດຕິກຳໃຫ້ສູງຂຶ້ນ, ມີຄວາມຮູ້ຄວາມສາມາດສູງ ແລະ ມີຫຼັກໝັ້ນການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຄວາມຮູ້ທາງດ້ານພາສາຕ່າງປະເທດ ແລະ ຄວາມຮູ້ດ້ານວິທິຍາສາດຕ່າງໆ ຢ່າງເປັນລະບົບ, ເປັນວິຊາການດ້ານທິດສະດີທີ່ເລິກເຊິ່ງ, ມີວິທີການສິດສອນທີ່ເກັ່ງ, ເປັນມືອາຊີບ, ຮູ້ສົມທົບແໜ້ນ ລະຫວ່າງທິດສະດີ ກັບພຶດຕິກຳ, ສໍາລັບວຽກງານພັກ, ພວກສະຫາຍ ຕ້ອງເດັດດ່ຽວສ້າງສະຖາບັນ ໃຫ້ກາຍເປັນຕົວແບບໃນວຽກງານສ້າງຕັ້ງພັກ, ເປັນຕົວແບບໃນການຮັກສາລະບຽບວິໄນຂອງໂຮງຮຽນ, ລະບຽບວິໄນໃນການຮຽນ “ສອນດີສອນເກັ່ງ, ນັກຮຽນເກັ່ງວິໄນດີ”, ສ້າງໃຫ້ສະຖາບັນກາຍເປັນບ່ອນ “ບົ່ມເຜາະອຸດົມການອັນດີງາມຂອງນັກກອມມູນິດ, ເປັນເບົ້າຫຼອມເຫຼັກກ້າຂອງພັກ” ຕ້ອງເຮັດໃຫ້ພາຍໃນຮົ້ວສະຖາບັນແຫ່ງນີ້ ມີບັນຍາກາດ ຫຼື ກິ່ນອາຍ ຂອງຄວາມເປັນສັງຄົມນິຍົມກ່ອນເພິ່ນ ຕາມທີ່ພວກສະຫາຍ ໄດ້ຕັ້ງຄາດໝາຍໄວ້ນັ້ນ. ເພື່ອເຮັດສໍາເລັດເປົ້າໝາຍເຫຼົ່ານັ້ນ, ຕ້ອງສ້າງການຫັນປ່ຽນໃໝ່ ໃນການຝຶກຝົນຫຼໍ່ຫຼອມ ແລະ ຄົ້ນຄວ້າຮ່ຳຮຽນ, ຕ້ອງຮັບປະກັນໃຫ້ເປັນຜູ້ທີ່ມີຄຸນທາດການເມືອງໜັກແໜ້ນ, ໃນການພັດທະນາໂຄງລ່າງ ແລະ ການປະກອບວັດຖຸເຕັກນິກຮັບໃຊ້ການຮຽນ-ການສອນ ໃຫ້ທັນສະໄໝເທື່ອລະກ້າວນັ້ນ ຕ້ອງຕິດພັນກັບແຜນພັດທະນາເສດຖະກິດ-ສັງຄົມ ຮອດປີ 2030, ຍຸດທະສາດຮອດປີ 2035 ແລະ ວິໄສທັດຮອດປີ 2040 ແລະ ປີ 2055 ທີ່ພັກເຮົາກໍານົດໄວ້. ໃນເງື່ອນໄຂໃໝ່ນີ້, ຕ້ອງຍົກສູງການພົວພັນຮ່ວມມື ກັບສະຖາບັນ ຂອງຕ່າງປະເທດ ເພື່ອນມິດຍຸດທະສາດ ເພື່ອແລກປ່ຽນບົດຮຽນ ໃນການກໍ່ສ້າງບໍາລຸງພະນັກງານນໍາພາ-ຄຸ້ມຄອງ, ແລກປ່ຽນບົດຮຽນການຄົ້ນຄວ້າວິທະຍາສາດດ້ວຍຄວາມເປັນເຈົ້າການສູງ, ຮ່ວມມືກັບສະຖາບັນການສຶກສາຕ່າງໆ ແລະ ວຽກງານອື່ນໆ.

(ແຫຼ່ງ: ໜັງ​ສື​ພິມ ປະ​ຊາ​ຊົນ, ຂ່າວ: ແສງຈັນ)