ກອງປະຊຸມໃຫຍ່ ຜູ້ແທນອົງຄະນະພັກ ແຂວງ ອຸດົມໄຊ ຄັ້ງທີ X

​ເຜີຍ​ແຜ່​ໂດຍ: admin|ຢ້ຽມ​ຊົມ: 20 ຄັ້ງ | ເວ​ລາ | 2025-08-22 13:18:27 ອັບ​ເດດ​ຄັ້ງ​ລ້າ​ສຸດ ໂດຍ: admin ເວ​ລາ 2025-08-22 13:18:27

ກອງປະຊຸມໃຫຍ່ຜູ້ເເທນອົງຄະນະພັກເເຂວງອຸດົມໄຊຄັ້ງທີ X ໃນວັນທີ 8-9 ສິງຫາ 2025 ຢູ່ສະໂມສອນໃຫຍ່ຂອງເເຂວງ". ພາຍໃຕ້ກາຍເປັນປະທານຂອງສະຫາຍ ບຸນຄົງ ຫລ້າຈຽມພອນ ກໍາມະການສໍາຮອງສູນກາງພັກ ເລຂາຄະນະບໍລິຫານງານພັກເເຂວງ ເຈົ້າເເຂວງໆອຸດົມໄຊ,ໃຫ້ກຽດເຂົ້າຮ່ວມໂດຍສະຫາຍ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ ປະທານສູນກາງເເນວລາວສ້າງຊາດ ທັງເປັນຜູ້ຊີ້ນໍາເເຂວງອຸດົມໄຊ, ມີບັນດາການນໍາຂັ້ນສູງພັກ-ລັດ,ອະດີດການນໍາຂັ້ນສູງພັກ-ລັດ ເເຂວງ. ມີຜູ້ເເທນສົມບູນຈໍານວນ 262 ສະຫາຍຍິງ 42 ສະຫາຍ ທີ່ມາຈາກຂະເເໜງການຕ່າງໆ ເເລະ 7 ເມືອງອ້ອມຂ້າງເເຂວງ, ເເນວລາວສ້າງຊາດ,ສອງກໍາລັງປ້ອງກັນຊາດ-ປ້ອງກັນຄວາມສະຫງົບ, 3 ອົງການຈັດຕັ້ງມະຫາຊົນ,ພ້ອມດ້ວຍພາກສ່ວນກ່ຽວຂ້ອງ.

ກອງປະຊຸມໄດ້ສໍາຫຼວດຕີລາຄາຄືນການນໍາພາ-ຊີ້ນຳຂອງຄະນະບໍລິຫານງານພັກແຂວງສະໄໝທີ IX ໃນດ້ານ​ດີ-ຜົນ​ສຳເລັດ, ດ້ານ​ອ່ອນ-ຂໍ້​ຄົງ​ຄ້າງ, ສາ​ເຫດ​ທີ່​ພາ​ໃຫ້​ດີ, ສາ​ເຫດ​ທີ່​ພາ​ໃຫ້​ອ່ອນ ແລະ ບາງ​ບົດ​ຮຽນ​ທີ່​ຖອດ​ຖອນ​ໄດ້ໃນການນຳພາດ້ານການເມືອງ, ການນໍາພາດ້ານແນວຄິດ, ການນໍາພາດ້ານການຈັດຕັັ້ງ, ການປັບປຸງແບບແຜນນໍາພາ ແລະ ວິທີເຮັດວຽກ, ການນໍາພາການປະຕິບັດໜ້າທີ່ການເມືອງທີ່ໄດ້ຮັບມອບໝາຍ, ຕີລາຄາຄວາມຮັບຜິດຊອບຂອງຄະນະພັກ. ເເຜນພັດທະນາເສດຖະກິດ-ສັງຄົມ 5 ປີນັບເເຕ່ 2021-2025, ການນໍາພາ-ຊີ້ນໍາຢ່າງຮອບດ້ານຂອງຄະນະບໍລິຫານງານພັກເເຂວງຕະຫລອດໄລຍະ 5 ປີຜ່ານມາ ລວມເຖິງການວາງທິດທາງເເຜນການ 5 ປີໃນຕໍ່ຫນ້າ.

ໄລຍະ 5 ປີຜ່ານມາ ພາຍໃຕ້ການນໍາພາຊີ້ນໍາຂອງຄະນະບໍລິຫານງານພັກເເຂວງອຸດົມໄຊສະໄຫມທີ IX ເຫັນວ່າມີຜົນສໍາເລັດຫລາຍດ້ານ ໂດຍສະເພາະດ້ານວຽກງານສຶກສາອົບຮົມການເມືອງເເນວຄິດ ເເລະ ອອກເເຮງສ້າງຂະບວນການ ເຮັດວຽກງານການເມືອງເເນວຄິດໃຫ້ພະນັກງານ, ສະມາຊິກພັກ ຕະຫລອດຮອດປະຊາຊົນບັນດາເຜົ່າ ດ້ວຍຫຼາຍວິທີ, ຫຼາຍສ່ອງທາງຢ່າງກວ້າງຂວາງ ເເລະ ເເຂງເເຮງ ເຮັດໃຫ້, ພະນັກງານ, ສະມາຊິກພັກ ຕະຫລອດຮອດປະຊາຊົນບັນດາເຜົ່າມີຄວາມອຸ່ນອຽງ, ທຸ່ນທ່ຽງ, ເຊື່ອຫມັ້ນຕໍ່ການນໍາພາຂອງພັກ, ປະກອບສອບສ່ວນຢ່າງຫ້າວຫັນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ ມີຄວາມຮັບຮູ້ເຂົ້າໃຈ, ມີສະຕິລະວັງຕົວຕໍ່ກົນອຸບາຍຫັນປ່ຽນໂດຍສັນຕິຂອງກຸ່ມຄົນບໍ່ດີ ເຮັດໃຫ້ມີສະຖຽນລະພາບທາງດ້ານການເມືອງຢ່າງຫນັກຫນັກເເຫນ້ນ ສັງຄົມມີຄວາມສະຫງົບປອດໄພໂດຍພື້ນຖານ ປະຊາຊົນບັນດາເຜົ່າທໍາມາຫາກິນຢ່າງສະດວກສະບາຍ.

ນອກຈາກນັ້ນ, ການກໍ່ສ້າງພື້ນຖານໂຄງລ່າງ,ຖະຫນົນຫົນທາງ,ການຂະຫຍານຕ່າຫນ່າງການສຶກສາ, ສາທາລະນະສຸກ ລວມເຖິງການລົງກໍ່ສ້າງຮາກຖານການເມືອງພັດທະນາຊົນນະບົດ ເເກ້ໄຂຄວາມທຸກຍາກໃຫ້ປະຊາຊົນ ເເລະ ການຜະລິດກະສິກໍາເພື່ອຄໍ້າປະກັນສະບຽງອາຫານ ເເລະ ສົ່ງອອກເປັນສີນຄ້າ ໄດ້ຮັບການຂະຫຍາຍຕົວຢູ່ໃນລະດັບດີສົມຄວນ ເເລະ ອື່ນໆ.

ພາຍຫລັງຜູ້ເເທນກອງປະຊຸມໄດ້ຮັບຟັງຮ່າງບົດລາຍງານການເມືອງຂອງຄະນະບໍລິຫານງານພັກເເຂວງສະໄຫມທີ IX ຈາກສະຫາຍ ບຸນຄົງ ຫລ້າຈຽມພອນ,ໄດ້ສືບຕໍ່ຮັບຟັງຮ່າງບົດລາຍງານເເຜນພັດທະນາເສດຖະກິດ-ສັງຄົມ 5 ປີ ຄັ້ງທີ 09 ໃນໄລຍະ 2021-2025 ຈາກ ສະຫາຍ ອອ່ນເເກ້ວ ອຸ່ນອາລົມ ຄະນະປະຈໍາພັກເເຂວງ ຮອງເຈົ້າເເຂວງໆອຸດົມໄຊວ່າ: ການພັດທະນາເສດຖະກິດ-ສັງຄົມ 5 ປີ ຄັ້ງທີ 9 ໃນໄລຍະ 2021 ຫາ 2025 ຂອງແຂວງໄດ້ຈັດຕັ້ງຜັນຂະຫຍາຍຕາມມະຕິກອງປະຊຸມໃຫຍ່ ຄັ້ງທີ 11 ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ.

ໄດ້ກຳນົດທິດທາງພື້ນຖານໃນການສ້າງບາດລ້ຽວໃໝ່ໃຫ້ແກ່ການພັດທະນາເສດຖະກິດ-ສັງຄົມ ໃນຊຸມປີຕໍ່ໜ້າ ຕ້ອງສ້າງບັນດາປະຖົມປັດໄຈທາງດ້ານການເມືອງ-ແນວຄິດ, ລະບົບເສດຖະກິດ, ພື້ນຖານໂຄງລ່າງ, ວັດທະນະທຳສັງຄົມ, ນັບທັງການສ້າງຄົນ, ການບໍລິຫານ-ການປົກຄອງລັດ, ການປ້ອງກັນຊາດປ້ອງກັນຄວາມສະຫງົບ ແລະ ການພົວພັນຮ່ວມມືກັບຕ່າງປະເທດ ໃຫ້ໄດ້ຮັບການປັບປຸງຍົກລະດັບໃຫ້ມີຄວາມເຂັ້ມແຂງ, ມີການພັດທະນາຕາມທິດສີຂຽວ ແລະ ຍືນຍົງ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງຍົກລະດັບດີຂຶ້ນ.

ຖືເອົາການພັດທະນາເປັນໃຈກາງຂອງທົ່ວພັກ-ທົ່ວປວງຊົນ ປະກອບສ່ວນເຮັດໃຫ້ເສດຖະກິດຂອງເເຂວງຂະຫຍາຍຕົວຢູ່ໃນລະດັບ 4,64 ສ່ວນຮ້ອຍ ລວມຍອດຜະລິດຕະພັນພາຍໃນບັນລຸ 11,672.85 ຕື້ກີບ ສະເລ່ຍລາຍຮັບຕໍ່ຫົວຄົນ ຫລາຍກວ່າ 30 ລ້ານກີບຕໍ່ຄົນ ຕໍ່ປີ ຫລື ເທົ່າກັບ1.500ໂດລາ.

ນອກຈາກນີ້ກອງປະຊຸມຍັງ ໄດ້ຮັບຟັງການໂອ້ລົມເພື່ອເປັນທິດທາງໃນການຈັດຕັ້ງປະຕິບັດວຽກງານໃນຕໍ່ຫນ້າຈາກ ສະ​ຫາຍ ສີນລະວົງ ຄຸດໄພທູນ ກໍາມະການກົມການເມືອງສູນກາງພັກ ປະທານເເນວລາວສ້າງຊາດຕື່ມອີກ.

ຕາງໜ້າຄະນະຈັດຕັ້ງສູນກາງພັກ ໄດ້ຂຶ້ນຜ່ານມາດຖານ, ເງື່ອນໄຂຜູ້ທີ່ຈະສະໝັກເລືອກຕັ້ງ, ຜ່ານມະຕິຮັບຮອງບຸກຄະລາກອນຈະສະໝັກເລືອກຕັ້ງຄະນະພັກຊຸດໃໝ່ ແລະ ຜ່ານມາດຖານເງື່ອນໄຂຜູ້ແທນໄປເຂົ້າຮ່ວມກອງປະຊຸມໃຫຍ່ຄະນະພັກຂັ້ນເທິງ ຊຶ່ງເປັນການປະຕິບັດຕາມລະບຽບຫລັກການຈັດຕັ້ງນຳພາຂອງພັກ, ຮັບປະກັນການຈັດຕັ້ງປະຕິບັດວຽກງານໃຫ້ມີຄວາມເຂັ້ມແຂງ ເປັນບ່ອນອີງໃຫ້ແກ່ການເລືອກເຟັ້ນບຸກຄະລາກອນຜູ້ທີ່ມີຜົນງານດີເດັ່ນ ປະກອບເຂົ້າໃນຄະນະພັກຊຸດໃໝ່ ໃຫ້ຖືກຕ້ອງຕາມມາດຖານ ເງື່ອນໄຂທີ່ໄດ້ກຳນົດໄວ້ ໃນກົດລະບຽບຂອງພັກ.

ຈາກນັ້ນ ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ດຳເນີນການປ່ອນບັດຄັດເລືອກເອົາຄະນະບໍລິຫານງານພັກແຂວງຊຸດໃໝ່ ຊຶ່ງມີຜູ້ອອກສະໝັກເລືອກຕັ້ງທັງໝົດ 40 ສະຫາຍ, ຍິງ 9 ສະຫາຍ, ເລືອກໄດ້ 35 ສະຫາຍ, ຍິງ 7 ສະຫາຍ.
ກອງປະຊຸມຄັ້ງປະຖົມມະລຶກ ໄດ້ເລືອກຕັ້ງຄະນະປະຈຳພັກແຂວງ ຈຳນວນ 11 ສະຫາຍ ຍິງ 2 ສະຫາຍ ມີລາຍຊື່ດັ່ງນີ້:
ສະຫາຍ ບຸນຄົງ ຫຼ້າຈຽມພອນ
ສະຫາຍ ຄໍາດີ ວົງລ້ອມ
ສະຫາຍ ປອ ວົງສະຫວັນ ໄຊຍະວົງ
ສະຫາຍ ວັນນາ ແກ້ວສັນຕິ
ສະຫາຍ ສຸຫວັດ ມະຫາວົງສະນັ່ນ
ສະຫາຍ ວາລີ ຈືນໍເຢັງ
ສະຫາຍ ພົມມາ ວັນນະກຳ
ສະຫາຍ ນາງ ມະນີຈັນ ວິໄລຈິດ
ສະຫາຍ ພົຈວ ຕຸ້ຍ ພົມມີໄຊ
ສະຫາຍ ຄຳແສງ ອາລີ
ສະຫາຍ ນາງ ຄຳໝັ້ນ ແກ້ວບຸນຫວນ
ກອງປະຊຸມໄດ້ເຫັນດີເປັນເອກະສັນກັນຢ່າງສົມບູນ ຮັບຮອງເອົາເລຂາ, ຮອງເລຂາ ຄະນະບໍລິຫານງານພັກແຂວງ ຊຸດ ໃໝ່ ເຊິ່ງມີລາຍຊື່ດັ່ງນີ້: ສະຫາຍ ບຸນຄົງ ຫຼ້າຈຽມພອນ ເປັນເລຂາຄະນະບໍລິຫານງານພັກແຂວງ, ສະຫາຍ ຄຳດີ ວົງລ້ອມ ແລະ ສະຫາຍ ປອ ວົງສະຫວັນ ໄຊຍະວົງ ເປັນຮອງເລຂາຄະນະບໍລິຫານງານພັກແຂວງ.
ກອງປະຊຸມໄດ້ປ່ອນບັດເລືອກຕັ້ງເອົາປະທານ ແລະ ຮອງປະທານກວດກາພັກແຂວງໂດຍເລືອກເອົາສະຫາຍ ວາລີ ຈືນໍເຢັງ ເປັນປະທານຄະນະກວດກາພັກແຂວງ. ສະຫາຍ ທະນູໄຊ ເລື່ອງສະຫວັດ, ສະຫາຍ ອູ່ແສງ ເພັດສະວົງ ແລະ ສະຫາຍ ນາງ ສຸກມີໄຊ ສຸອຳໄພ ເປັນຮອງປະທານຄະນະກວດກາພັກແຂວງ.

ທີ່ມາ: ສະຖານີວິທະຍຸ ແລະ ໂທລະພາບ ແຂວງອຸດົມໄຊ