ປກຊ ສຸມໃສ່ປັບປຸງກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ຄຸນນະພາບເປັນຕົ້ນຕໍ

​ເຜີຍ​ແຜ່​ໂດຍ: admin|ຢ້ຽມ​ຊົມ: 14 ຄັ້ງ | ເວ​ລາ | 2025-08-22 12:20:47

ອົງຄະນະພັກກະຊວງປ້ອງກັນປະເທດ (ປກຊ) ໄດ້ຖືສໍາຄັນ ແລະ ເອົາໃຈໃສ່ຕໍ່ວຽກງານສຶກສາອົບຮົມການເມືອງ-ນໍາພາແນວຄິດໃຫ້ນາຍ ແລະ ພົນທະຫານໃນທົ່ວກອງທັບດ້ວຍຫຼາຍຮູບການ ແລະ ວິທີການ ທັງທາງກວ້າງ ແລະ ທາງເລິກ ຢ່າງເປັນປົກກະຕິ, ແທດເຖິງແຕ່ລະເປົ້າໝາຍ ຕິດພັນກັບການສ້າງຂະບວນການຕ່າງໆ. ຄຽງຄູ່ກັນນັ້ນ, ເວລາໃດກໍຖືສໍາຄັນກ່ຽວກັບແຜນງານກໍ່ສ້າງພັກ-ພະນັກງານ ແລະ ອົງການຈັດຕັ້ງມະຫາຊົນ. ໃນ 5 ປີຜ່ານມາ ໄດ້ສຸມໃສ່ປັບປຸງກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ມີຄຸນນະພາບເປັນຕົ້ນຕໍ.

ສະຫາຍ ພົນໂທ ຄໍາລຽງ ອຸທະໄກສອນ ກໍາມະການສູນກາງພັກ ເລຂາຄະນະພັກກະຊວງ ລັດຖະມົນຕີກະຊວງ ປກຊ ໄດ້ຂຶ້ນຜ່ານບົດລາຍງານການເມືອງຂອງຄະນະບໍລິຫານງານພັກກະຊວງປ້ອງກັນປະເທດ ຄັ້ງທີ V ຕໍ່ກອງປະຊຸມໃຫຍ່ຜູ້ແທນສະມາຊິກພັກ ຄັ້ງທີ VI ອົງຄະນະພັກກະຊວງ ປກຊ ເມື່ອບໍ່ດົນຜ່ານມາ ທີ່ກະຊວງດັ່ງກ່າວວ່າ: ໃນ 5 ປີຜ່ານມາ ໄດ້ສຸມໃສ່ປັບປຸງກໍ່ສ້າງພັກທັງ 4 ດ້ານໄປພ້ອມໆກັນ; ກໍ່ສ້າງພັກດ້ານການເມືອງ-ແນວຄິດ ໂດຍໄດ້ຈັດຕັ້ງຝຶກອົບຮົມ, ເປີດຊຸດບຳລຸງໄລຍະສັ້ນດ້ານທິດສະດີການເມືອງໃຫ້ພະນັກງານ, ສະມາຊິກພັກໄດ້ 12 ຊຸດ, ມີຜູ້ເຂົ້າຮ່ວມ 1,105 ສະຫາຍ; ການປັບປຸງກໍ່ສ້າງພັກດ້ານການຈັດຕັ້ງ ໄດ້ສຸມໃສ່ຊີ້ນໍາຈັດຕັ້ງເຊື່ອມຊຶມກຳແໜ້ນ ແລະ ປະຕິບັດກົດລະບຽບຂອງພັກ ສະໄໝທີ XI ຢ່າງກວ້າງຂວາງ ໃຫ້ທຸກອົງຄະນະພັກໃນທົ່ວກອງທັບ, ພ້ອມທັງຍູ້ແຮງການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໂດຍຖືເອົາຄຸນນະພາບເປັນຕົ້ນຕໍ, ຕິດພັບກັບການຂະຫຍາຍພັກເຮັດໃຫ້ການຈັດຕັ້ງພັກ ແລະ ສະມາຊິກພັກມີຈຳນວນເພີ່ມຂຶ້ນ. ປັດຈຸບັນທົ່ວກອງທັບ ມີ 71 ຄະນະພັກ, 657 ຄະນະພັກຮາກຖານ, 3,258 ໜ່ວຍພັກ ທຽບໃສ່ປີ 2020 ເພີ່ມຂຶ້ນ 7 ຄະນະພັກ, 74 ຄະນະພັກຮາກຖານ, 408 ໜ່ວຍພັກ; ມີສະມາຊິກພັກທັງໝົດ 77,564 ສະຫາຍ ຍິງ 13,021 ສະຫາຍ ທຽບໃສ່ປີ 2020 ເພີ່ມຂຶ້ນ 10,512 ສະຫາຍ ຍິງ 1,410 ສະຫາຍ. ສະເພາະກຳລັງຫຼວງມີ 53 ຄະນະພັກ 337 ຄະນະພັກຮາກຖານ, 1,812 ໜ່ວຍພັກ ທຽບໃສ່ປີ 2020 ເພີ່ມຂຶ້ນ 7 ຄະນະພັກ, 20 ຄະນະພັກຮາກຖານ, 144 ໜ່ວຍພັກ, ມີສະມາຊິກພັກ 43,115 ສະຫາຍ ຍິງ 8,885 ສະຫາຍ ທຽບໃສ່ປີ 2020 ເພີ່ມຂຶ້ນ 6,442 ສະຫາຍ ຍິງ 1,323 ສະຫາຍ; ທົ່ວກອງທັບໄດ້ຮັບຮອງເປັນໜ່ວຍພັກປອດໃສ ເຂັ້ມແຂງ, ໜັກແໜ້ນ: ປະເພດແຂງ 2,740 ໜ່ວຍພັກ, ກາງ 446 ໜ່ວຍພັກ, ອ່ອນ 19 ໜ່ວຍພັກ ບໍ່ໄດ້ຈັດປະເພດ 49 ໜ່ວຍພັກ; ສະເພາະກໍາລັງຫຼວງ: ປະເພດແຂງ 1,385 ໜ່ວຍພັກ, ປະເພດກາງ 401 ໜ່ວຍພັກ, ອ່ອນ 10 ໜ່ວຍພັກ, ບໍ່ໄດ້ແບ່ງ 16 ໜ່ວຍພັກ.

ສະຫາຍ ພົນໂທ ຄໍາລຽງ ອຸທະໄກສອນ ກ່າວຕື່ມວ່າ: ສິ່ງພົ້ນເດັ່ນໄດ້ເປີດບັ້ນດໍາເນີນຊີວິດການເມືອງກາງສະໄໝ ແລະ ທ້າຍສະໄໝທົ່ວອົງຄະນະພັກກະຊວງ, ຄົ້ນຄວ້າຕີລາຄາຢ່າງກົງໄປກົງມາບັນດາຈຸອ່ອນຂໍ້ຄົງຄ້າງ ທີ່ເປັນສິ່ງທ້າທາຍຕໍ່ການປັບປຸງ ກໍ່ສ້າງກອງທັບ ກໍຄືບົດບາດການນໍາພາຂອງພັກໃນກອງທັບ, ຖືມາດຕະການດັ່ງກ່າວເປັນການປົວແປງພາຍໃນພັກ ເພື່ອສືບຕໍ່ຍູ້ແຮງການກໍ່ສ້າງປັບປຸງພັກໃນກອງທັບໃຫ້ປອດໃສ, ເຂັ້ມແຂງ, ໜັກແໜ້ນຍິ່ງຂຶ້ນ; ຄະນະບໍລິຫານງານພັກກະຊວງປ້ອງກັນປະເທດ, ຄະນະພັກແຕ່ລະຂັ້ນ ຍັງໄດ້ເອົາໃຈໃສ່ຊີ້ນໍາ-ນໍາພາຜັນຂະຫຍາຍແນວທາງຂອງພັກບົນພື້ນຖານມີຄວາມເປັນເອກະພາບ ແລະ ມີວິທະຍາສາດແບບແຜນການນໍາພາ ແລະ ແບບ ແຜນວິທີເຮັດວຽກ ກໍໄດ້ປັບປຸງຕິດແທດກັບຕົວຈິງຫຼາຍຂຶ້ນ ພ້ອມທັງເພີ່ມທະວີການຊີ້ນໍາວຽກງານຕິດ ຕາມ, ກວດກາ ແລະ ແກ້ໄຂສະພາບຫຍໍ້ທໍ້ຕ່າງໆພາຍໃນພັກ, ເດັດດຽ່ວແກ້ໄຂ ແລະ ລົງວິໄນຕໍ່ຜູ້ລະເມີດກົດລະບຽບພັກ, ກົດໝາຍຂອງລັດ ແລະ ອື່ນໆຢ່າງເຂັ້ມງວດ.

ໂດຍ: ວັນເພັງ