ສະຫາຍ ເລ​ຂາ​ທິ​ການ​ໃຫຍ່ ຊີ້ນຳຫຼາຍບັນຫາສຳຄັນ ຕໍ່ຄະນະພັກກະຊວງປ້ອງກັນປະເທດ ຊຸດໃໝ່

​ເຜີຍ​ແຜ່​ໂດຍ: admin|ຢ້ຽມ​ຊົມ: 19 ຄັ້ງ | ເວ​ລາ | 2025-08-21 21:53:29

ສະຫາຍ ທອງລຸນ ສີສຸລິດ ໃຫ້ທິດຊີ້ນຳຫຼາຍບັນຫາສຳຄັນ ຕໍ່ຄະນະພັກກະຊວງປ້ອງກັນປະເທດ ຊຸດໃໝ່

.......................................

ກອງປະຊຸມໃຫຍ່ຜູ້ແທນສະມາຊິກພັກ ຄັ້ງທີ VI ອົງຄະນະພັກ ກະຊວງປ້ອງກັນປະເທດ ໄດ້ດໍາເນີນໃນລະຫວ່າງວັນທີ 7-8 ສິງຫາ 2025 ແລະ ໄດ້ປິດລົງດ້ວຍຜົນສໍາເລັດອັນຈົບງາມ, ເຊິ່ງເປັນເຫດການທາງການເມືອງທີ່ມີຄວາມໝາຍຄວາມສໍາຄັນ ບໍ່ສະເພາະຕໍ່ກໍາລັງປ້ອງກັນຊາດເທົ່ານັ້ນ, ແຕ່ຍັງມີຄວາມໝາຍຄວາມສໍາຄັນຕໍ່ປວງຊົນລາວທັງຊາດ ແລະ ປະຊາຊົນລາວບັນດາເຜົ່າ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ໄດ້ຕາງໜ້າກົມການເມືອງສູນກາງພັກ ສະແດງຄວາມຊົມເຊີຍ ແລະ ນໍາເອົາຄວາມຢື້ຢາມຖາມຂ່າວ, ຄວາມເປັນຫ່ວງເປັນໃຍ ແລະ ຄວາມສາມັກຄີຮັກແພງອັນອົບອຸ່ນ ມາຍັງກອງປະຊຸມ ແລະ ຜ່ານກອງປະຊຸມໄປຍັງພະນັກງານປະຕິວັດອາວຸໂສ, ວີລະຊົນແຫ່ງຊາດ, ນັກຮົບແຂ່ງຂັນ, ຕະຫຼອດເຖິງບັນດາສະຫາຍສະມາຊິກພັກ, ນາຍ ແລະ ພົນທະຫານ ທັງກໍາລັງຫຼວງ ແລະ ກຳລັງທ້ອງຖິ່ນ.

ກອງປະຊຸມໃຫຍ່ ໄດ້ມີຄວາມເປັນເອກະພາບສູງຕໍ່ການຕີລາຄາການ ນໍາພາ-ຊີ້ນໍາ ຂອງອົງຄະນະພັກກະຊວງປ້ອງກັນປະເທດ ກໍຄືການຈັດຕັ້ງປະຕິບັດ 4 ໜ້າທີ່ໃຫຍ່ 26 ແຜນງານ ເຫັນວ່າມີຜົນສໍາເລັດໃຫຍ່ຫຼວງໃນຫຼາຍດ້ານ, ສາມາດຮັກສາໄດ້ທາດແທ້ມູນເຊື້ອ ຂອງກອງທັບປະຕິວັດ ທີ່ນັບມື້ນັບເຕີບໃຫຍ່ຂະຫຍາຍຕົວໃນທຸກດ້ານ, ຫັນເຂົ້າສູ່ຂະບວນການວຽກງານຕົວຈິງຂອງກົມກອງ-ທ້ອງຖິ່ນ ຢ່າງຕັ້ງໜ້າ, ກວ້າງຂວາງ ແລະ ເຂົ້າສູ່ລວງເລິກ. ພ້ອມທັງ ກໍານົດບັນດາຄາດໝາຍ, ທິດທາງເພື່ອສືບຕໍ່ພາລະກິດປະຕິວັດໃນອີກ 5 ປີ ຕໍ່ໜ້າ ໃຫ້ມີບາດກ້າວ ທີ່ໜັກແໜ້ນກວ່າເກົ່າ, ຮັບປະກັນສະຖຽນລະພາບທາງການເມືອງ ແລະ ຄວາມຢູ່ເຢັນເປັນສຸກ ຂອງປະຊາຊົນບັນດາເຜົ່າ.

ຜ່ານການດຳເນີນການເລືອກຕັ້ງເອົາຄະນະບໍລິຫານງານພັກກະຊວງຊຸດໃໝ່ ເຫັນວ່າຖືກຕ້ອງຕາມລະບຽບຂອງພັກ ແລະ ແທດກັບຄວາມຮຽກຮ້ອງຕ້ອງການ ຂອງໜ້າທີ່ການເມືອງໃນໄລຍະໃໝ່, ເຊິ່ງໂຄງປະກອບຄະນະພັກຊຸດໃໝ່ລ້ວນແຕ່ ສ່ອງແສງໃຫ້ເຫັນເຖິງພະນັກງານການ ນໍາ ເປັນຫົວຈັກຫຼັກແຫຼ່ງແກ່ນສານ ທີ່ຕ້ອງໄດ້ນໍາພາຊີ້ນໍາວຽກງານຮອບ ດ້ານຂອງກະຊວງປ້ອງກັນປະເທດ.

ສະຫາຍ ທອງລຸນ ສີສຸລິດ ໄດ້ເນັ້ນໜັກຕື່ມບາງບັນຫາ ຕໍ່ບັນດາສະຫາຍຄະນະພັກ ຊຸດໃໝ່ ໃຫ້ເອົາໃຈໃສ່ ດັ່ງນີ້:

1. ສືບຕໍ່ນໍາພາ-ຊີ້ນໍາ ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ ໃຫ້ເປັນແຜນງານ, ໂຄງການ ແລະ ສ້າງເປັນນິຕິກໍາລະອຽດຢ່າງຕັ້ງໜ້າ ໂດຍເລີ່ມຕັ້ງແຕ່ການຈັດຕັ້ງເຜີຍແຜ່, ເຊື່ອມຊຶມໃນຄະນະບໍລິຫານງານພັກກະຊວງ ລົງໄປເຖິງຄະນະພັກແຕ່ລະຂັ້ນ, ສະມາຊິກພັກ, ພະນັກງານ, ນາຍ ແລະ ພົນທະຫານ ຢູ່ບັນດາກົມກອງສູນກາງ ແລະ ທ້ອງຖິ່ນໃຫ້ເລິກເຊິ່ງ ແລະ ທົ່ວເຖິງ ເພື່ອສ້າງຄວາມຮັບຮູ້ເຂົ້າໃຈ, ເປັນເອກະພາບກັນທາງດ້ານທັດສະນະ ແລະ ການກະທໍາຕົວຈິງ, ມີຄວາມເປັນເຈົ້າການເຂົ້າຮ່ວມການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງນີ້ ຢ່າງເປັນຂະບວນຢ່າງແຂງແຮງ, ຕໍ່ເນື່ອງ ແລະ ມີປະສິດທິຜົນ.

2. ຮີບຮ້ອນໃຫ້ມີການແບ່ງວຽກ-ແບ່ງຄວາມຮັບຜິດຊອບພາຍໃນຄະນະບໍລິຫານງານພັກກະຊວງ, ຄະນະປະຈໍາພັກກະຊວງ ໃຫ້ລະອຽດຈະແຈ້ງ; ເຊີດຊູຄວາມເປັນເຈົ້າການຕໍ່ໜ້າທີ່ການເມືອງ, ທຸ່ມເທເຫື່ອແຮງ, ສະຕິປັນຍາ, ຄວາມຮູ້ ຄວາມສາມາດ, ມີຄວາມເສຍສະຫຼະ ເພື່ອເຮັດສຳເລັດໜ້າທີ່ ທີ່ຖືກມອບໝາຍ. ສິ່ງສໍາຄັນ, ໃຫ້ຖືວ່າການເຂົ້າມາຢູ່ໃນຄະນະບໍລິຫານງານພັກກະຊວງ ເພື່ອຮັບໃຊ້ພາລະກິດປະຕິວັດອັນສູງສົ່ງຂອງພັກ, ເຮັດທຸກຢ່າງເພື່ອຄວາມສົມບູນພູນສຸກຂອງປະຊາຊົນ ແລະ ເພື່ອຄວາມຈະເລີນວັດທະນາຂອງປະເທດຊາດ.

3. ບັນດາສະຫາຍໃນຄະນະບໍລິຫານງານພັກກະຊວງ ຕ້ອງຢຶດໝັ້ນ ແລະ ປະຕິບັດຢ່າງເຂັ້ມງວດບັນດາຫຼັກການ, ລະບອບແບບແຜນວິທີນຳພາຂອງພັກ ແລະ ມີຄວາມຮັບຜິດຊອບໂດຍກົງ ຕໍ່ຜົນໄດ້ຜົນເສຍຂອງວຽກງານທີ່ຖືກມອບໝາຍ, ເດັດຂາດແກ້ໄຂຕໍ່ການປະພຶດແບບອາດຍາສິດ, ສໍ້ລາດບັງຫຼວງ, ເສື່ອມທາດຂາດຄຸນ; ສ້າງໄດ້ຄວາມເຊື່ອໝັ້ນຈາກມະຫາຊົນ, ຕ້ອງຮູ້ອີງໃສ່ກຳລັງແຮງຂອງປະຊາຊົນ ແລະ ເຮັດທຸກສິ່ງທຸກຢ່າງ ເພື່ອສິດຜົນປະໂຫຍດອັນຊອບທຳຂອງປະຊາຊົນ ແລະ ຂອງປະເທດຊາດ; ຕ້ອງປັບປຸງ ແລະ ເພີ່ມທະວີແບບແຜນວິທີນໍາພາທີ່ມີລະບອບການແບ່ງງານ, ການມອບໝາຍຄວາມຮັບຜິດຊອບຢ່າງຈະແຈ້ງຂາດຕົວ, ສົມທົບຢ່າງກົມກຽວ ລະຫວ່າງ ບົດບາດ ແລະ ຄວາມສາມາດນໍາພາ ຂອງໝູ່ຄະນະ ກັບຄວາມສາມາດນໍາພາ ຂອງບຸກຄົນໃນຄະນະ. ການມອບວຽກຕ້ອງມອບທັງສິດທັງອຳນາດ, ຜູ້ຖືກມອບໝາຍຕ້ອງຮັບຜິດຊອບຕໍ່ຜົນໄດ້ຜົນເສຍ ຂອງວຽກງານ ທີ່ຕົນປະຕິບັດ.

4. ບັນດາສະຫາຍ ຕ້ອງສືບຕໍ່ຕັ້ງໜ້າການເຝິກຝົນຫຼໍ່ຫຼອມຕົນເອງທາງດ້ານຄຸນທາດການເມືອງ, ຄຸນສົມບັດສິນທໍາປະຕິວັດ ເປັນແບບຢ່າງນໍາ ໜ້າດ້ານຄວາມຈົງຮັກພັກດີ ແລະ ຄວາມຊື່ສັດບໍລິສຸດຕໍ່ອຸດົມການຂອງພັກ ແລະ ຜົນປະໂຫຍດຂອງປະເທດຊາດ, ມີຄວາມສາມັກຄີຮັກແພງ ແລະ ມີຄວາມຈິງໃຈຕໍ່ໝູ່ຄະນະ ແລະ ຊ່ວຍເຫຼືອກໍ່ສ້າງໝູ່ຄະນະໃຫ້ມີຄວາມເຂັ້ມແຂງ; ດໍາລົງຊີວິດແບບປອດໃສຂາວສະອາດ, ດຸໝັ່ນສັດຊື່, ຕັ້ງໜ້າຄົ້ນຄວ້າຮໍ່າຮຽນ ເພື່ອຍົກລະດັບດ້ານຕ່າງໆ ຂອງຕົນໃຫ້ສູງຂຶ້ນ ຢ່າງບໍ່ຢຸດຢັ້ງ.

5. ເຊີດຊູຄວາມເປັນແບບຢ່າງ ໃນການດໍາລົງຊີວິດ ທີ່ປອດໃສ, ປະຢັດ, ຕ້ານການຟູມເຟືອຍ, ເປັນແບບຢ່າງໃນການປະຕິບັດກົດລະບຽບພັກ, ກົດໝາຍ ແລະ ລະບຽບການຕ່າງໆ; ຊຸກຍູ້ໃຫ້ການຈັດຕັ້ງ, ພະນັກງານ ແລະປະຊາຊົນໃນຂອບເຂດ ທີ່ຕົນຮັບຜິດຊອບມີທັດສະນະ ແລະ ການກະທຳທີ່ຖືກຕ້ອງ, ຕັ້ງໜ້າຕ້ານບັນດາປະກົດການຫຍໍ້ທໍ້, ລ່ວງລະເມີດກົດໝາຍ ແລະ ອື່ນໆ.

6. ສືບຕໍ່ເສີມຂະຫຍາຍມູນເຊື້ອແຫ່ງຄວາມສາມັກຄີ, ຄວາມເປັນເອກະພາບພາຍໃນ ແລະ ຄວາມສາມັກຄີປອງດອງກັບທຸກພາກສ່ວນໃຫ້ແໜ້ນແຟ້ນ, ເຊີດຊູຊ່ວຍເຫຼືອເຊິ່ງກັນ ແລະ ກັນ ບົນພື້ນຖານແນວທາງຂອງພັກ, ເຄົາລົບເຊິ່ງກັນ ແລະ ກັນ; ຕັ້ງໜ້າປຸກລະດົມທຸກກໍາລັງແຮງຂອງທົ່ວປວງຊົນ ເຂົ້າຮ່ວມວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານໃຫ້ນັບມື້ນັບແຂງແຮງ, ຕໍ່ເນື່ອງ ແລະ ມີຄວາມໜັກແໜ້ນ. ກໍາລັງປ້ອງກັນຊາດ ຂອງພວກເຮົາຕ້ອງ: “ຮູ້ໃຫ້ທັນ, ກຳໃຫ້ແໜ້ນ, ຕີຕ້ານໃຫ້ຖືກຈຸດ, ທັນການ, ເດັດຂາດ, ວ່ອງໄວ ແລະ ຊັດເຈນ” ຕໍ່ແຕ່ລະເຫດການທີ່ເກີດຂຶ້ນ.

ແຫຼ່ງ: ກະ​ຊວງ​ປັອງ​ກັນ​ປະ​ເທດ, ໂດຍ: ຈິດ+ແສງເດືອນ