ຖະແຫຼງຜົນສໍາເລັດການດໍາເນີນກອງປະຊຸມໃຫຍ່ ຄັ້ງທີ VI ອົງຄະນະພັກກະຊວງປ້ອງກັນຄວາມສະຫງົບ

​ເຜີຍ​ແຜ່​ໂດຍ: admin|ຢ້ຽມ​ຊົມ: 14 ຄັ້ງ | ເວ​ລາ | 2025-08-21 21:07:00

ຖະແຫຼງຜົນສໍາເລັດການດໍາເນີນກອງປະຊຸມໃຫຍ່ ຄັ້ງທີ VI ອົງຄະນະພັກກະຊວງປ້ອງກັນຄວາມສະຫງົບ

==============

ວັນທີ 6 ສິງຫາ 2025, ສະຫາຍ ພົທ ຄຳກິ່ງ ຜຸຍຫຼ້າມະນີວົງ ຮອງເລຂາຄະນະບໍລິຫານງານພັກກະຊວງປ້ອງກັນຄວາມສະຫງົບ ໄດ້ຖະແຫຼງຜົນສໍາເລັດການດໍາເນີນກອງປະຊຸມໃຫຍ່ ຄັ້ງທີ VI ອົງຄະນະພັກກະຊວງປ້ອງກັນຄວາມສະຫງົບ ພາຍຫຼັງດຳເນີນມາເປັນເວລາວັນເຄິ່ງ.

ສະຫາຍ ພົທ ຄຳກິ່ງ ຜຸຍຫຼ້າມະນີວົງ ກ່າວວ່າ: ພາຍຫຼັງໄດ້ມີຄໍາສັ່ງ ຂອງຄະນະເລຂາທິການສູນກາງພັກ ກ່ຽວກັບການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ, ຄະນະພັກກະຊວງປ້ອງກັນຄວາມສະຫງົບ ໄດ້ສຸມໃສ່ຈັດຕັ້ງຜັນຂະຫຍາຍມາເປັນຄໍາສັ່ງແນະນໍາຂອງຄະນະພັກກະຊວງປ້ອງກັນຄວາມສະຫງົບ ແລະ ໄດ້ຈັດຕັ້ງ ເຜີຍແຜ່ຄໍາສັ່ງດັ່ງກ່າວຢ່າງທົ່ວເຖິງ; ໄດ້ສ້າງແຜນການ, ແຕ່ງຕັ້ງຄະນະຮັບຜິດຊອບກະກຽມດ້ານຕ່າງໆ ແລະ ປະສານສົມທົບກັບຄະນະຮັບຜິດຊອບຕິດຕາມຊຸກຍູ້ກອງປະຊຸມໃຫຍ່ຂັ້ນສູນກາງ; ເພື່ອກ້າວເຂົ້າສູ່ການກະກຽມດໍາເນີນກອງປະຊຸມໃຫຍ່ ແຕ່ລະຂັ້ນໃນທົ່ວກຳລັງປ້ອງກັນຄວາມສະຫງົບ, ຄະນະບໍລິຫານງານພັກກະຊວງ ໄດ້ສຸມໃສ່ນໍາພາ-ຊີ້ນໍາ ໃນການສ້າງຂະບວນການດ້ານຕ່າງໆຢ່າງແຂງແຮງ ແລະ ຕໍ່ເນື່ອງ, ພົ້ນເດັ່ນ ໄດ້ເປີດບັ້ນດໍາເນີນຊີວິດການເມືອງ ຕີລາຄາການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ໃນທົ່ວອົງຄະນະພັກກະຊວງຕິດພັນກັບການຈັດຕັ້ງເຜີຍແຜ່ເຊື່ອມຊຶມເອກະສານການເມືອງ, ເນື້ອໃນວັນສໍາຄັນຕ່າງໆຂອງພັກ, ຂອງຊາດ ແລະ ຂອງກໍາລັງປ້ອງກັນຄວາມສະຫງົບຢ່າງຕໍ່ເນື່ອງ, ພ້ອມນັ້ນ ຍັງໄດ້ຊຸກຍູ້ຂະບວນການຈັດຕັ້ງປະຕິບັດຂໍ້ແຂ່ງຂັນຮັກຊາດ ແລະ ພັດທະນາ, ຂໍ້ແຂ່ງຂັນຂອງອົງການຈັດຕັ້ງມະຫາຊົນໃນດ້ານຕ່າງໆມີຄວາມຕັ້ງໜ້າ ແລະ ຟົດຟື້ນເປັນຢ່າງດີ.

ຂະບວນການປະຕິບັດໜ້າທີ່ການເມືອງ, ທຸກເຫຼົ່າວິຊາສະເພາະ ໄດ້ເອົາໃຈໃສ່ຢ່າງຕັ້ງໜ້າພົ້ນເດັ່ນແມ່ນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ແກ້ໄຂບັນຫາອາຊະຍາກຳປະເພດຕ່າງໆ ເປັນຕົ້ນ ສຸມໃສ່ແກ້ໄຂບັນຫາຢາເສບຕິດ, ຄະດີປຸ້ນຈີ້, ຊີງຊັບ, ຄ້າມະນຸດ, ສໍ້ໂກງຊັບທາງໂທລະຄົມ ແລະ ອື່ນໆ, ໄດ້ເອົາໃຈໃສ່ຫັນກໍາລັງລົງກໍ່ສ້າງຮາກຖານການເມືອງ, ໂດຍສະເພາະແມ່ນຢູ່ນະຄອນຫຼວງວຽງຈັນ, ເຂດໃຈກາງ ແລະ ແຂວງລຽບຊາຍແດນ, ໂຄສະນາປຸກລະດົມປະຊາຊົນບັນດາເຜົ່າ ປະກອບສ່ວນ ແລະ ເຂົ້າຮ່ວມຢ່າງຕັ້ງໜ້າໃນວຽກງານປ້ອງກັນຄວາມສະຫງົບ ເວົ້າສະເພາະແມ່ນການສ້າງທ່າສະໜາມປ້ອງກັນຄວາມສະຫງົບ ຕາມທິດ 3 ສ້າງ ຢູ່ທ້ອງຖິ່ນຮາກຖານ ສາມາດແກ້ໄຂໜໍ່ແໜງຄວາມບໍ່ສະຫງົບ ໄດ້ເປັນຢ່າງດີ; ນອກນັ້ນ, ຍັງໄດ້ຍູ້ແຮງ ຂະບວນການປັບປຸງບູລະນະ, ປະດັບປະດາສຳນັກງານຫ້ອງການ, ຈັດຕັ້ງຂະບວນການແຂ່ງຂັນກິລາ-ສິລະປະວັນນະຄະດີ ແລະ ອອກແຮງງານ ຢ່າງເປັນຂະບວນຟົດຟື້ນດີ; ມາຮອດໄລຍະກາງເດືອນ ມີນາ 2025 ການຈັດຕັ້ງດໍາເນີນກອງປະຊຸມໃຫຍ່ຂັ້ນຮາກຖານພັກ ແລະ ກອງປະຊຸມໃຫຍ່ຜູ້ແທນ ຢູ່ບັນດາກົມໃຫຍ່-ທຽບເທົ່າ ແມ່ນໄດ້ດຳເນີນສໍາເລັດທຸກກົມກອງ ສາມາດບັນລຸໄດ້ຕາມຈຸດປະສົງລະດັບຄາດໝາຍ; ໄປຄຽງຄູ່ກັບການກະກຽມດ້ານຂະບວນການ, ການກະກຽມດ້ານເນື້ອໃນ ແລະ ບຸກຄະລາກອນ ກໍໄດ້ດຳເນີນຖືກຕ້ອງຕາມກົດລະບຽບຂອງພັກ ແລະ ນິຕິກຳທີ່ສູນກາງວາງອອກ, ພາຍຫຼັງໄດ້ກະກຽມຄວາມພ້ອມ ຈຶ່ງໄດ້ນໍາສະເໜີຄະນະພັກຂັ້ນເທິງ ແລະ ໄດ້ຮັບການອະນຸມັດໃຫ້ຈັດຕັ້ງດໍາເນີນກອງປະຊຸມໃຫຍ່ ຄັ້ງທີ VI ຂອງອົງຄະນະພັກກະຊວງປ້ອງກັນຄວາມສະຫງົບ ຂຶ້ນຢ່າງ ເປັນທາງການ ໃນວັນທີ 5-6 ສິງຫາ 2025 ແລະ ມີຜົນສໍາເລັດດັ່ງນີ້:

ກອງປະຊຸມໃຫຍ່ ຄັ້ງທີ VI ຂອງອົງຄະນະພັກກະຊວງປ້ອງກັນຄວາມສະຫງົບ ໄດ້ດໍາເນີນເປັນ ເວລາ 1 ວັນເຄິ່ງ, ພາຍໃຕ້ການເປັນປະທານຂອງ ສະຫາຍ ພົອ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກຄະນະເລຂາທິການສູນກາງພັກ ເລຂາຄະນະບໍລິຫານງານພັກກະຊວງປ້ອງກັນຄວາມສະຫງົບ; ມີແຂກຮັບເຊີນ ແລະ ຜູ້ແທນສົມບູນເຂົ້າຮ່ວມທັງໝົດ 305 ສະຫາຍ; ໃນນັ້ນ ມີແຂກຮັບເຊີນ 40 ສະຫາຍ, ຜູ້ແທນສົມບູນ 265 ສະຫາຍ ຍິງ 21 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທັງໝົດ 10.473 ສະຫາຍ ຍິງ 2.460 ສະຫາຍ; ກອງປະຊຸມຄັ້ງເປັນກຽດຢ່າງສູງທີ່ໄດ້ຂໍ່ານັບຮັບຕ້ອນ ສະຫາຍ ທອງລຸນ ສີສຸລິດ, ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ທີ່ໃຫ້ກຽດເຂົ້າຮ່ວມ ແລະ ມີຄຳເຫັນໂອ້ລົມຕໍ່ກອງປະຊຸມ;

ກອງປະຊຸມໃຫຍ່ໄດ້ດໍາເນີນໄປດ້ວຍບັນຍາກາດອັນຟົດຟື້ນ, ບົນພື້ນຖານຄວາມສະໝານສາມັກຄີເປັນເອກະພາບສູງ, ມີຄວາມຮັບຜິດຊອບອັນເຕັມປ່ຽມຂອງບັນດາສະຫາຍຜູ້ແທນກອງປະຊຸມ ໃນການຄົ້ນຄວ້າຕົກລົງບັນຫາສໍາຄັນຕ່າງໆ ເພື່ອສືບຕໍ່ນໍາພາປັບປຸງກຳລັງ ແລະ ວຽກງານປ້ອງກັນຄວາມສະຫງົບໃນຕໍ່ໜ້າ; ກອງປະຊຸມໄດ້ຮັບຮອງເອົາຮ່າງລາຍງານການເມືອງ ແລະ ບົດສໍາ ຫຼວດການນໍາພາລວມ ຂອງຄະນະບໍລິຫານງານພັກ ສະໄໝທີ V ແລະ ໄດ້ດໍາເນີນການປ່ອນບັດເລືອກຕັ້ງເອົາຄະນະບໍລິຫານງານພັກກະຊວງ ສະໄໝທີ VI, ເຊິ່ງມີຜູ້ອອກສະໝັກຮັບເລືອກຕັ້ງທັງໝົດ 31 ສະຫາຍ, ເລືອກຕັ້ງເອົາ 27 ສະຫາຍ, ຄະນະປະຈຳພັກກະຊວງ 9 ສະຫາຍ, ເລືອກຕັ້ງເອົາຜູ້ແທນສົມບູນ 20 ສະຫາຍ ແລະ ຜູ້ແທນສໍາຮອງ 4 ສະຫາຍ ເພື່ອໄປເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ; ກອງປະຊຸມ ໄດ້ສິ້ນສຸດລົງດ້ວຍຜົນສໍາເລັດອັນຈົບງາມ ຕາມຈຸດປະສົງລະດັບຄາດໝາຍທີ່ໄດ້ກຳນົດໄວ້.

ແຫຼ່ງ: ໜັງ​ສື​ພິມ ປກ​ສ