ປະກອບຄຳເຫັນຕໍ່ກອງປະຊຸມໃຫຍ່ຜູ້ແທນ ຄັ້ງທີ VI ອົງຄະນະພັກກະຊວງປ້ອງກັນຄວາມສະຫງົບ

​ເຜີຍ​ແຜ່​ໂດຍ: admin|ຢ້ຽມ​ຊົມ: 13 ຄັ້ງ | ເວ​ລາ | 2025-08-21 20:55:55

ປະກອບຄຳເຫັນຕໍ່ກອງປະຊຸມໃຫຍ່ຜູ້ແທນ ຄັ້ງທີ VI ອົງຄະນະພັກກະຊວງປ້ອງກັນຄວາມສະຫງົບ

==================

ສະຫາຍ ພົຈວ ຄອນສະຫວັນ ສົມພາໄຊ ຄະນະພັກກະຊວງ ເລຂາຄະນະພັກກົມໃຫຍ່ ຫົວໜ້າກົມໃຫຍ່ການເມືອງປ້ອງກັນຄວາມສະຫງົບ ໄດ້ປະກອບຄຳເຫັນຕໍ່ກອງປະຊຸມໃຫຍ່ຜູ້ແທນ ຄັ້ງທີ VI ອົງຄະນະພັກກະຊວງປ້ອງກັນຄວາມສະຫງົບ ໃນວັນທີ 5 ສິງຫາ 2025 ທີ່ສະໂມສອນກະຊວງປ້ອງກັນຄວາມສະຫງົບ, ພາຍໃຕ້ການເປັນປະທານຂອງ ສະຫາຍ ພົອ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ ຄະນະເລຂາທິ ການສູນກາງພັກ ເລຂາຄະນະບໍລິຫານງານພັກກະຊວງປ້ອງກັນຄວາມສະຫງົບ, ໃຫ້ກຽດເຂົ້າຮ່ວມໂດຍ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ, ມີບັນດາສະຫາຍແຂກຖືກເຊີນ, ຜູ້ແທນສົມບູນ, ພະນັກງານປະຕິວັດອາວຸໂສບຳນານ ເຂົ້າຮ່ວມ.

ສະຫາຍ ພົຈວ ຄອນສະຫວັນ ສົມພາໄຊ ກ່າວຕໍ່ກອງປະຊຸມວ່າ: ຄະນະບໍລິຫານງານພັກກະຊວງ ກໍຄືຄະນະພັກກົມໃຫຍ່ການເມືອງປ້ອງກັນຄວາມສະຫງົບ ເວລາໃດກໍເປັນຫ່ວງເປັນໃຍ ແລະ ເອົາໃຈໃສ່ນໍາພາ-ຊີ້ນໍາການເຄື່ອນໄຫວວຽກງານ ຢ່າງເປັນປົກກະຕິ ແລະ ແກ້ໄຂ ປະກົດການຍໍ້ທໍ້ຕ່າງໆ ຢ່າງໃກ້ສິດ, ເຮັດເປັນປະຈຳ, ແທດເຖິງຕົວຈິງ ສະແດງອອກຄື: ໄດ້ເອົາໃຈໃສ່ນໍາພາ-ຊີ້ນໍາວຽກງານສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ນາຍ ແລະ ພົນຕຳຫຼວດ ຢ່າງຕັ້ງໜ້າ ດ້ວຍຫຼາຍຮູບການ ແລະ ວິທີການທີ່ເໝາະສົມ, ເອົາໃຈໃສ່ໂຄສະນາເຜີຍແຜ່ທາງກົງ-ທາງອ້ອມຜ່ານສື່ສິ່ງພິມ, ສື່ເອເລັກໂຕຼນິກ ແລະ ສື່ສັງຄົມອອນລາຍຕ່າງໆ ເພື່ອເປັນການສຶກສາອົບຮົມ ຖັນແຖວສະມາຊິກພັກ, ນາຍ ແລະ ພົນຕຳຫຼວດ ໃຫ້ມີຄວາມຮັບຮູ້ເຂົ້າໃຈ, ມີຄວາມໜັກແໜ້ນທາງດ້ານຄຸນທາດການເມືອງ, ມີຄວາມຈົງຮັກພັກດີຕໍ່ພັກ-ຕໍ່ປະເທດຊາດ, ມີຄວາມຮັບຜິດຊອບຕໍ່ໜ້າທີ່ວຽກງານ, ມີລະບຽບວິໄນເຂັ້ມງວດ; ພ້ອມນັ້ນ ກໍສາ ມາດກຳແໜ້ນ ແລະ ຕອບຕ້ານກົນອຸບາຍຂອງພວກອິດທິກຳລັງປໍລະປັກ ແລະ ກຸ່ມຄົນບໍ່ຫວັງດີທີ່ສ້າງຄວາມປັ່ນ ປ່ວນ, ຫວັງມ້າງເພທຳລາຍລະບອບໃໝ່ ແລະ ຢາກຜັນແຍກກໍາລັງປະກອບອາວຸດ ອອກຈາກການນໍາພາຂອງພັກ ໃຫ້ປະລາໄຊ.

ເປັນເຈົ້າການໃນການປັບປຸງບູລະນະກົງຈັກການຈັດຕັ້ງຂັ້ນຕ່າງໆ ລວມທັງອ້ອມຂ້າງກະຊວງ ແລະ ທ້ອງ ຖິ່ນ ໃຫ້ເຂັ້ມແຂງ, ຊັບຊ້ອນພະນັກງານຂັ້ນນໍາພາ-ບັນຊາຕາມທິດມີຂື້ນ, ມີລົງ, ມີເຂົ້າ-ມີອອກ, ຮັບປະກັນໂຄງປະກອບ 3 ຮຸ້ນ ແລະ ຫັນເປັນໜຸ່ມ, ຫັນເປັນມືອາຊີບ ແລະ ຫັນເປັນທັນສະໄໝ, ເດັດດ່ຽວແກ້ໄຂພະນັກງານທີ່ເສື່ອມຄຸນປ່ຽນທາດ; ເອົາໃຈໃສ່ຕໍ່ການຂຶ້ນແຜນກຳນົດພະນັກງານ, ແຜນກຳນົດຕຳແໜ່ງງານ ແລະ ດໍາເນີນການກວດກາ-ຄຸ້ມຄອງກໍາລັງພົນໃຫ້ເຂົ້າສູ່ລະບົບຖານຂໍ້ມູນ ເພື່ອເກັບກຳປະຫວັດການເຄື່ອນໄຫວ ແລະ ຄຸນນະພາບຂອງພະນັກງານ.

ໃນຕໍ່ໜ້າ, ກົມໃຫຍ່ການເມືອງປ້ອງກັນຄວາມສະຫງົບ ຈະສຸມໃສ່ດັ່ງນີ້:

1. ຍົກສູງວຽກງານສຶກສາອົບຮົມການເມືອງແນວຄິດໃຫ້ເລິກເຊິ່ງ, ຖືເອົາວຽກງານການເມືອງແນວ ຄິດເປັນວຽກງານສໍາຄັນ ແລະ ສອດຫ້ອຍເຂົ້າໄປໃນທຸກຂົງເຂດວຽກງານວິຊາສະເພາະ ເພື່ອເຮັດໃຫ້ສະມາຊິກພັກ, ນາຍ ແລະ ພົນຕຳຫຼວດ ມີຄຸນທາດການເມືອງໜັກແໜ້ນ, ມີທັດສະນະຫຼັກໝັ້ນອັນຖືກຕ້ອງ ແລະ ເຂົ້າໃຈແຈ້ງເຖິງ ໄພອັນຕະລາຍຂອງການການເສື່ອມຄຸນປ່ຽນທາດ ແລະ ການຫັນປ່ຽນດ້ວຍຕົນເອງ, ສ້າງໃຫ້ກໍາລັງມີຄວາມຈົງຮັກ ພັກດີຕໍ່ພັກ, ຕໍ່ປະເທດຊາດ ແລະ ຕໍ່ປະຊາຊົນ.

2. ເອົາໃຈໃສ່ຕໍ່ວຽກງານກໍ່ສ້າງພັກ-ກໍ່ສ້າງພະນັກງານ ໂດຍສະເພາະແມ່ນວຽກງານຂະຫຍາຍພັກ, ການສ້າງ ໜ່ວຍພັກປອດໃສ ເຂັ້ມແຂງ ໜັກແໜ້ນ ໃຫ້ຮັບປະກັນຄຸນນະພາບ ສາມາດດໍາລົງບົດບາດເປັນແກນນໍາໃນລະບົບການເມືອງຢູ່ບັນດາກົມກອງຢ່າງແທ້ຈິງ; ພ້ອມກັນນັ້ນ ກໍຊຸກຍູ້ບັນດາອົງການຈັດຕັ້ງມະຫາຊົນໃຫ້ເຄື່ອນໄຫວຕາມພາລະບົດບາດ, ສິດໜ້າທີ່ຂອງຕົນຢ່າງແຂງແຮງ ແລະ ປະກອບສ່ວນຢ່າງຕັ້ງໜ້າ ເຂົ້າໃນການຕ້ານປະກົດການຫຍໍ້ທໍ້.

3. ປັບປຸງແບບແຜນວິທີນໍາພາ-ວິທີເຮັດວຽກ ຂອງຄະນະພັກ-ຄະນະບັນຊາແຕ່ລະຂັ້ນ ໃຫ້ກົມກຽວ, ຢຶດໝັ້ນຫຼັກການນໍາພາຂອງພັກ, ຮັກສາແໜ້ນຄວາມສາມະຄີພາຍໃນ, ຍົກສູງຄວາມຮັບຜິດຊອບ ແລະ ຄວາມ ສາມາດນໍາພາຂອງຄະນະພັກແຕ່ລະຂັ້ນໃຫ້ມີປະສິດທິພາບ, ຖືເອົາການນໍາພາທີ່ດີທີ່ສຸດ ແມ່ນການນໍາພາດ້ວຍຄວາມ ເປັນແບບຢ່າງຂອງຄະນະພັກ ແລະ ສະມາຊິກພັກ, ພ້ອມກັນນັ້ນ ກໍຕ້ອງເອົາໃຈໃສ່ໃນການດໍາເນີນຊີວິດການເມືອງ ໃນແຕ່ລະປີ, ຕີລາຄາແບ່ງປະເພດຢ່າງຖືກຕ້ອງ ແລະ ດໍາເນີນຊີວິດພັກໃນແຕ່ລະເດືອນເປັນປົກກະຕິ, ຖືເອົາໜ່ວຍ ພັກ ເປັນບ່ອນອົບຮົມບົ່ມສອນ, ກຳແໜ້ນຄຸນນະພາບພະນັກງານ, ສະມາຊິກພັກກໍຄືມະຫາຊົນ ບົນພື້ນຖານມີການ ຕໍ່ສູ້ພາຍໃນພັກຢ່າງແຂງແຮງ ເພື່ອແກ້ໄຂຂ້ອງຂາດຕົກບົກຜ່ອງ ແລະ ການເຊື່ອມຄຸນປ່ຽນທາດຂອງກໍາລັງແຕ່ຫົວທີ.

4. ເອົາໃຈໃສ່ປະຕິບັດນະໂຍບາຍດ້ານຕ່າງໆ ຢ່າງເໝາະສົມ, ກໍ່ສ້າງພະນັກງານສືບທອດປ່ຽນແທນ ແຕ່ລະ ຂັ້ນ ໃຫ້ເປັນລະບົບ ແລະ ມີຄຸນນະພາບ, ເອົາໃຈໃສ່ໃນການກວດຮັບກຳລັງໃໝ່, ການບຳລຸງ, ກໍ່ສ້າງນາຍ ແລະ ພົນ ຕຳຫຼວດ ຢູ່ບັນດາສະຖາບັນການສຶກສາ ແລະ ໂຮງຮຽນຂອງກໍາລັງປ້ອງກັນຄວາມສະຫງົບ ນັບທັງຢູ່ພາຍໃນ ແລະ ຕ່າງປະເທດ ໃຫ້ຮັບປະກັນຄຸນນະພາບ, ໂດຍຄໍານຶງເຖິງສົ້ນເຂົ້າ-ສົ້ນອອກ ໃຫ້ໄດ້ຕາມມາດຕະຖານ-ເງື່ອນໄຂ ທີ່ໄດ້ ກຳນົດ.

5. ເພີ່ມທະວີການຕິດຕາມ, ກວດກາ ແລະ ເດັດດ່ຽວແກ້ໄຂບັນດາປະກົດການຫຍໍ້ທໍ້ທີ່ເກີດຂຶ້ນພາຍໃນພັກ, ພາຍໃນກຳລັງຢ່າງແຂງແຮງ ແລະ ໃຫ້ສັງຄົມມີສ່ວນຮ່ວມ ໃນການແກ້ໄຂບັນຫາທີ່ສ້າງຄວາມເສື່ອມເສຍ ຕໍ່ພາບພົດ-ບົດບາດຂອງກໍາລັງປ້ອງກັນຄວາມສະຫງົບ ຢ່າງເຂັ້ມງວດ ແລະ ທັນການ.

#ໜັງສືພິມຄວາມສະຫງົບ