5 ປີຜ່ານມາ ອົງຄະນະພັກກະຊວງປ້ອງກັນຄວາມສະຫງົບ ນໍາພາ-ຊີ້ນໍາ ວຽກງານຮອບດ້ານມີຜົນສຳເລັດ

​ເຜີຍ​ແຜ່​ໂດຍ: admin|ຢ້ຽມ​ຊົມ: 4 ຄັ້ງ | ເວ​ລາ | 2025-08-22 03:52:43

5 ປີຜ່ານມາ ອົງຄະນະພັກກະຊວງປ້ອງກັນຄວາມສະຫງົບ ນໍາພາ-ຊີ້ນໍາ ວຽກງານຮອບດ້ານມີຜົນສຳເລັດ

=================

ໃນວາລະດຳເນີນກອງປະຊຸມໃຫຍ່ຜູ້ແທນ ຄັ້ງທີ VI ອົງຄະນະພັກກະຊວງປ້ອງກັນຄວາມສະຫງົບ ໃນຕອນເຊົ້າຂອງວັນທີ 5 ສິງຫາ 2025, ພາຍໃຕ້ການເປັນປະທານຂອງ ສະຫາຍ ພົອ ວິໄລ ຫຼ້າຄຳຟອງ ກໍາມະການກົມການເມືອງສູນກາງພັກ ຄະນະເລຂາທິການສູນກາງພັກ ເລຂາຄະນະບໍລິຫານງານພັກກະຊວງປ້ອງກັນຄວາມສະຫງົບ, ໃຫ້ກຽດເຂົ້າຮ່ວມໂດຍ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ, ມີແຂກຖືກເຊີນ, ຜູ້ແທນກອງປະຊຸມ ແລະ ພະນັກງານປະຕິວັດອາວຸໂສບຳນານ ເຂົ້າຮ່ວມ, ສະຫາຍ ພົທ ຄຳກິ່ງ ຜຸຍຫຼ້າມະນີວົງ ຄະນະປະຈຳພັກກະຊວງ ຮອງລັດຖະມົນຕີກະຊວງປ້ອງກັນຄວາມສະຫງົບ ໄດ້ຜ່ານບົດລາຍງານການເມືອງ ຂອງຄະນະບໍລິຫານງານພັກ ກະຊວງປ້ອງກັນຄວາມສະຫງົບ ສະໄໝທີ V ຕໍ່ກອງປະຊຸມໃຫຍ່ຜູ້ແທນ ຄັ້ງທີ VI ອົງຄະນະພັກກະຊວງປ້ອງກັນຄວາມສະຫງົບ ໂດຍໄດ້ຍົກໃຫ້ເຫັນຜົນງານທີ່ຍາດມາໄດ້ໃນຊຸມປີຜ່ານມາ ໃນນີ້ ມີຜົນສຳເລັດຫຼາຍດ້ານ ພ້ອມທັງວາງຄາດໝາຍສູ້ຊົນໃນ ຊຸມປີຕໍ່ໜ້າ.

ສະຫາຍ ພົທ ຄໍາກິ່ງ ຜຸຍຫຼ້າມະນີວົງ ໃຫ້ຮູ້ວ່າ: ຄະນະພັກແຕ່ລະຂັ້ນ ໄດ້ເອົາໃຈໃສ່ນໍາພາ-ຊີ້ນໍາ ຄົ້ນຄວ້າຜັນຂະຫຍາຍເນື້ອໃນມະຕິກອງປະຊຸມໃຫຍ່ ຄັ້ງທີ V ອອກເປັນອັນລະອຽດ ເຊິ່ງໄດ້ກໍານົດເປັນ 4 ຄາດໝາຍ 4 ແຜນງານໃຫຍ່ 41 ໂຄງການ ແລະ 1 ວາລະແຫ່ງຊາດ, ໄດ້ກໍານົດເປັນແຜນດໍາເນີນເປັນແຕ່ລະໄລຍະ ນັບແຕ່ປີ 2021-2025 ຕິດພັນກັບການເສີມຂະຫຍາຍຄວາມເປັນເຈົ້າການ ຂອງບັນດາກົມກອງ ໃຫ້ຫັນເປັນຍຸດທະສາດ ກໍຄື ແຜນງານໃຫຍ່ດັ່ງກ່າວ ເປັນມະຕິນໍາພາ, ເປັນແຜນງານ, ໂຄງການ ແລະ ກິດຈະກໍາອັນລະອຽດຂອງຕົນ ໃນແຕ່ລະໄລຍະ. ພ້ອມທັງນໍາພາ-ຊີ້ນໍາ ຈັດຕັ້ງຜັນຂະຫຍາຍ ເຂົ້າສູ່ວຽກງານຕົວຈິງຢ່າງເລິກເຊິ່ງ, ທົ່ວເຖິງ ແລະ ມີຜົນສໍາເລັດ, ສະແດງອອກ ຄື: ວຽກງານພັກ-ວຽກງານການເມືອງ ໄດ້ຕັ້ງໜ້າສຶກສາອົບຮົມການເມືອງນໍາພາ-ແນວຄິດ ໃຫ້ແກ່ສະມາຊິກພັກ, ນາຍ ແລະ ພົນຕໍາຫຼວດ ຢ່າງເປັນປົກກະຕິຕໍ່ເນື່ອງ ດ້ວຍຫຼາຍເນື້ອໃນ, ຫຼາຍວິທີການ, ເປັນຕົ້ນແມ່ນ ນໍາພາຈັດຕັ້ງເຊື່ອມຊຶມມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມຄົບຄະນະບໍລິຫານງານສູນກາງພັກແຕ່ລະຄັ້ງ, ມະຕິກອງປະຊຸມໃຫຍ່ ຄັ້ງທີ Vຂອງອົງຄະນະພັກກະຊວງປ້ອງກັນຄວາມສະຫງົບ ແລະ ເອກະສານອື່ນໆທີ່ສໍາຄັນ; ຜ່ານການສຶກສາອົບຮົມການ ເມືອງ-ນໍາພາແນວຄິດເຫັນວ່າສະມາຊິກພັກ, ນາຍ ແລະ ພົນຕຳຫຼວດ ຮັກສາໄດ້ ທັດສະນະຫຼັກໝັ້ນຊົນຊັ້ນ, ຄຸນທາດການເມືອງໜັກແໜ້ນ, ມີຈັນຍາບັນ, ຈັນຍາທໍາ, ເຊື່ອໝັ້ນຕໍ່ແນວທາງນະໂຍບາຍຂອງພັກ-ລັດ, ມີຄວາມຈົງຮັກພັກດີຕໍ່ພັກ, ຕໍ່ປະເທດຊາດ ແລະ ປະຊາຊົນ ຢ່າງແທ້ຈິງ.

ວຽກງານພັກໄດ້ປະຕິບັດຖືກຕ້ອງຕາມກົດລະບຽບຂອງພັກ ບົນພື້ນຖານຢຶດໝັ້ນຕາມ 5 ຫຼັກການ ແລະ 3 ທິດນໍາ, ຄົ້ນຄວ້າຜັນຂະຫຍາຍມະຕິ, ຄໍາສັ່ງ ຂອງສູນກາງພັກ ມາເປັນອັນສະເພາະຂອງກໍາລັງປ້ອງກັນຄວາມສະຫງົບ, ໄດ້ສຸມໃສ່ປັບປຸງກໍ່ສ້າງພັກທັງ 4 ດ້ານ ໄປພ້ອມໆກັນ, ໃນນີ້ ໄດ້ຍູ້ແຮງຂະບວນການກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ຢ່າງຕັ້ງໜ້າ ແລະ ຕໍ່ເນື່ອງ, ກາຍເປັນໜ້າທີ່ໃຈກາງໃນການນໍາພາກໍ່ສ້າງພັກ ຕິດພັນກັບວຽກງານກໍ່ສ້າງກໍາລັງ ໃຫ້ມີລະບຽບວິໄນ, ມີຄວາມເຂັ້ມແຂງ ແລະ ທັນສະໄໝ, ຄະນະພັກແຕ່ລະຂັ້ນໄດ້ເອົາໃຈໃສ່ ນໍາພາບຳລຸງ-ກໍ່ສ້າງກໍາລັງໃຫ້ມີ ຄວາມຮູ້-ຄວາມສາມາດ, ຊຳນິຊຳນານທາງດ້ານວິຊາສະເພາະ, ສອດຄ່ອງກັບຍຸດທະສາດພັດທະນາຊັບພະຍາກອນມະນຸດ ຂອງກໍາລັງປ້ອງກັນຄວາມສະຫງົບ, ຖືເອົາຄຸນນະພາບເປັນກົກ, ສ້າງກຳລັງທາງດ້ານທິດສະດີ ຕິດພັນກັບພຶດຕິກຳວຽກງານຕົວຈິງຢູ່ຮາກຖານ; ປະຕິບັດແຜນກໍ່ສ້າງພະນັກງານນໍາພາສືບທອດປ່ຽນແທນແຕ່ລະຂັ້ນ ຕາມທິດຊີ້ນໍາຂອງສູນກາງພັກ ຢ່າງເປັນລະບົບ ແລະ ຕໍ່ເນື່ອງ. ຜ່ານການຈັດຕັ້ງປະຕິບັດ ປັດຈຸບັນອົງຄະນະພັກກະຊວງ ມີ 14 ອົງຄະນະພັກ ແລະ 3 ໜ່ວຍພັກຮາກຖານຂຶ້ນກັບ, ມີຮາກຖານພັກ ທັງໝົດ 380 ໜ່ວຍ, ທຽບໃສ່ປີ 2020 ເພີ່ມຂຶ້ນ 109 ໜ່ວຍ ເທົ່າກັບ 29%, ຂະຫຍາຍສະມາຊິກພັກໃໝ່ໄດ້ 2.284 ສະຫາຍ ທຽບໃສ່ປີ 2020 ເພີ່ມຂື້ນ 23% .

ວຽກງານປົກປັກຮັກສາຄວາມເປັນລະບຽບຮຽບຮ້ອຍທາງສັງຄົມ ໄດ້ເອົາໃຈໃສ່ການສະກັດກັ້ນ ແລະ ແກ້ໄຂປະກົດ ການຫຍໍ້ທໍ້ໃນສັງຄົມ ຢ່າງຕັ້ງໜ້າ ອັນທີ່ພົ້ນເດັ່ນ ແມ່ນການດໍາ ເນີນຄະດີ ແລະ ແກ້ໄຂຄະດີອາຍາ ເຊັ່ນ: ການກະທຳຜິດດ້ານອາຊະຍາກຳຂ້າມຊາດ, ປຸ້ນຊັບ, ຊິງຊັບ, ລັກຊັບພົນລະເມືອງ, ອຸບັດຕິເຫດຕາມທ້ອງຖະໜົນຫຼວງ, ອັກຄີໄພ, ຄະດີຢາເສບຕິດ ແລະອື່ນໆ ຢ່າງຖືກຕ້ອງ ແລະ ຮັບປະກັນ 3 ດ້ານຄື: ດ້ານການເມືອງ, ດ້ານກົດໝາຍ ແລະ ດ້ານວິຊາສະເພາະ, ໃນ 5 ປີຜ່ານມາ ມີຄະດີອາຍາເກີດຂຶ້ນ ທັງໝົດ 5.335 ເລື່ອງ, ສາມາດມ້າງໄດ້ 2.537 ເລື່ອງ, ຍັງສືບຕໍ່ດໍາເນີນ 2.798 ເລື່ອງ, ກັກຜູ້ຖືກຫາ ໄດ້ 2.094 ຄົນ ຍິງ 702 ຄົນ, ຄົນຕ່າງປະເທດ 811 ຄົນ ຍິງ 93 ຄົນ; ສາມາດມ້າງຄະດີກຸ່ມແກ້ງຄ້າ-ຂາຍຢາເສບຕິດ ທັງໝົດ 17.815 ເລື່ອງ, ມີຜູ້ຖືກຫາ 25.961 ຄົນ ຍິງ 2.821 ຄົນ, ມີຄົນຕ່າງປະເທດ 579 ຄົນ, ຢຶດຂອງກາງ ທີ່ເປັນສິ່ງເສບຕິດໄດ້ຫຼາຍລາຍການ, ພົ້ນເດັ່ນແມ່ນປະເພດຢາບ້າ, ເຮໂຣອິນ, ຢາໄອ, ກັນຊາ.

ສໍາລັບທິດທາງແຜນການ 5 ປີຕໍ່ໜ້າ ຈະສືບຕໍ່ຢຶດໝັ້ນແນວທາງປ່ຽນແປງໃໝ່ຮອບດ້ານ ຢ່າງມີຫຼັກການຂອງພັກ, ເຊີດຊູບົດບາດການນໍາພາ ເດັດຂາດ, ໂດຍກົງ ແລະ ຮອບດ້ານຂອງພັກ; ປັບປຸງກຳລັງປ້ອງກັນຄວາມສະຫງົບ ໃຫ້ໜັກແໜ້ນທາງດ້ານການເມືອງ-ແນວຄິດ, ເຂັ້ມແຂງດ້ານການຈັດຕັ້ງ ແລະ ມີແບບແຜນທັນສະໄໝ; ມີຄວາມຮູ້-ຄວາມສາມາດ, ຊຳນິຊຳນານທາງດ້ານວິຊາສະເພາະ - ວິຊາການ, ມີຄຸນສົມບັດສິນທຳປະຕິວັດ, ມີລະບຽບວິໄນເຂັ້ມງວດ ແລະ ມີສະຕິສູ້ຮົບສູງ; ເປັນກຳລັງທີ່ຈົງຮັກພັກດີ, ບໍລິສຸດສັດຊື່ຕໍ່ພັກ, ຕໍ່ປະເທດຊາດ, ຕໍ່ປະຊາຊົນ ແລະ ອຸດົມການສັງຄົມນິຍົມ; ສືບຕໍ່ວຽກງານຫັນລົງກໍ່ສ້າງຮາກຖານການເມືອງຢ່າງແຂງແຮງ, ເຮັດໃຫ້ວຽກງານປ້ອງກັນຄວາມສະຫງົບ ກາຍເປັນສະຕິ ແລະ ຄວາມຮັບຜິດຊອບຂອງທົ່ວສັງຄົມ; ເປັນເຈົ້າການປ້ອງກັນສະກັດກັ້ນ, ແກ້ໄຂບັນດາໜໍ່ແໜງກໍ່ຄວາມບໍ່ສະຫງົບ, “ເອົາການສືບສວນຂັ້ນພື້ນຖານເປັນກົກ, ການກໍານົດເປົ້າໝາຍຕໍ່ສູ້ເປັນສໍາຄັນ, ການສ້າງລາຍຄະດີສະເພາະເປັນປັດໄຈຕັດສິນ” ສືບຕໍ່ປະຕິບັດ 4 ແຜນງານ 29 ໂຄງການວຽກງານວິຊາສະເພາະ ເພື່ອຮັບປະກັນໃຫ້ປະເທດຊາດ ມີສະຖຽນລະພາບທາງດ້ານການເມືອງໜັກ ແໜ້ນ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍ ແລະ ປອດໄພໂດຍພື້ນຖານ; ຍົກສູງຄຸນນະພາບການກໍ່ສ້າງ ແລະ ປັບປຸງກຳລັງປ້ອງກັນຄວາມສະຫງົບ ໃຫ້ເຂັ້ມແຂງ, ມີລະບຽບວິໄນເຂັ້ມງວດ, ມີຄວາມຊໍານິຊໍານານທາງດ້ານວິຊາສະເພາະ, ມີແບບແຜນນໍາພາ-ບັນຊາ ທີ່ມີວິທະຍາສາດ ແລະ ທັນສະໄໝ; ຮັບປະກັນດ້ານພະລາທິການ, ສະໜອງງົບປະມານດ້ານຕ່າງໆ ໃຫ້ແກ່ການເຄື່ອນໄຫວວຽກງານວິຊາສະເພາະ ແລະ ການລ້ຽງດູກຳລັງ ຕາມທິດນໍາຂອງພັກ “ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ” ຕິດພັນກັບການສ້າງເສດຖະກິດເອກະລາດ ເປັນເຈົ້າຕົນເອງ ຢ່າງແຂງແຮງ ແລະ ມີປະສິດທິຜົນ; ຜັນຂະຫຍາຍແນວທາງການຕ່າງປະເທດຂອງພັກ, ພົວພັນຮ່ວມມືກັບກໍາລັງ ປກສ ບັນດາປະເທດເພື່ອນມິດຍຸດທະສາດ, ກຳນົດຄູ່ຮ່ວມມື ໃຫ້ຖືກຕ້ອງເໝາະສົມ ແລະ ມີຈຸດສຸມ ໃນເງື່ອນໄຂສະພາບການໃໝ່ ກໍຄື ສະເພາະໜ້າ ແລະ ຍາວນານ.

#ໜັງສືພິມຄວາມສະຫງົບ