ສະຫາຍ ເລ​ຂາ​ທິ​ການ​ໃຫຍ່ ເນັ້ນ ກຳລັງປ້ອງກັນຄວາມສະຫງົບ ຕ້ອງ “ຮູ້ໃຫ້ທັນ, ກໍາສະພາບໃຫ້ແໜ້ນ, ຕີຕ້ານໃຫ້ຖືກຈຸດ ແລະ ທັນການ, ເດັດຂາດວ່ອງໄວ, ຊັດເຈນ”

​ເຜີຍ​ແຜ່​ໂດຍ: admin|ຢ້ຽມ​ຊົມ: 22 ຄັ້ງ | ເວ​ລາ | 2025-08-22 03:34:23

ສະຫາຍ ທອງລຸນ ສີສຸລິດ ເນັ້ນ ກຳລັງປ້ອງກັນຄວາມສະຫງົບ ຕ້ອງ “ຮູ້ໃຫ້ທັນ, ກໍາສະພາບໃຫ້ແໜ້ນ, ຕີຕ້ານໃຫ້ຖືກຈຸດ ແລະ ທັນການ, ເດັດຂາດວ່ອງໄວ, ຊັດເຈນ”

============

ຜ່ານການດຳເນີນກອງປະຊຸມໃຫຍ່ຜູ້ແທນ ຄັ້ງທີ VI ຂອງອົງຄະນະພັກ ກະຊວງປ້ອງກັນຄວາມສະຫງົບ ໃນລະຫວ່າງ ວັນທີ 5-6 ສິງຫາ 2025, ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສໍາເລັດກອງປະຊຸມດັ່ງກ່າວ ແລະ ຖືໂອກາດນໍາເອົາຄວາມຢ້ຽມຢາມຖາມຂ່າວອັນອົບອຸ່ນ, ສະນິດສະໜົມ ມາສູ່ກອງປະຊຸມ ແລະ ຝາກຜ່ານກອງປະຊຸມໄປເຖິງພະນັກງານປະຕິວັດອາວຸໂສ, ວິລະຊົນແຫ່ງຊາດ, ນັກຮົບແຂ່ງຂັນ ຕະຫຼອດເຖິງສະຫາຍສະມາຊິກພັກ, ນາຍ ແລະ ພົນຕຳຫຼວດ ໃນທົ່ວກໍາລັງປ້ອງກັນຄວາມສະຫງົບ ທີ່ພວມປະຕິບັດໜ້າທີ່ອັນໜັກໜ່ວງ ຢູ່ເຂດຫ່າງໄກສອກຫຼີກ. ພ້ອມທັງສະແດງຄວາມຍ້ອງຍໍຊົມເຊີຍຕໍ່ຜົນງານ ທີ່ບັນດາສະຫາຍຄະນະພັກກະຊວງ, ນາຍ ແລະ ພົນຕຳຫຼວດ ທີ່ສາມາດເຮັດໄດ້ໃນໄລຍະຜ່ານມາ ເຊິ່ງຜົນງານດັ່ງກ່າວ ແມ່ນຍ້ອນມີການນຳພາ-ຊີ້ນຳໂດຍກົງ, ເດັດຂາດ ແລະ ຮອບດ້ານ ຂອງພັກ ຕໍ່ກໍາລັງປ້ອງກັນຄວາມສະຫງົບ, ຄວາມເອົາໃຈໃສ່ນໍາພາ ຢ່າງໃກ້ຊິດຕິດແທດຂອງຄະນະພັກແຕ່ລະຂັ້ນ ແລະ ຄວາມເປັນເຈົ້າການບຸກບືນຂອງສະມາຊິກພັກ, ນາຍ ແລະ ພົນຕໍາຫຼວດ ໃນທົ່ວກໍາລັງປ້ອງກັນຄວາມສະຫງົບ. ສັງລວມແລ້ວ, ກໍາລັງປ້ອງກັນຄວາມສະຫງົບ ຍັງສືບຕໍ່ເປັນກໍາລັງຫຼັກແຫຼ່ງປົກປ້ອງຄວາມສະຫງົບສຸກ ຂອງປະເທດ ໃຫ້ດີຂຶ້ນເລື້ອຍໆ, ທັງໄດ້ປະເຊີນໜ້າການສະກັດກັ້ນ, ຕີຖອຍ ທຸກການທຳລາຍມ້າງເພ, ການກໍ່ຄວາມບໍ່ສະຫງົບ ຂອງຜູ້ບໍ່ຫວັງດີ ແລະ ຜູ້ຈົງໃຈລະເມີດກົດໝາຍ ໄດ້ທັນການກວ່າເກົ່າ; ປະຕິບັດພາລະໜ້າທີ່ສຳຄັນເຂົ້າໃນການຮັບປະກັນສະຖຽນລະພາບການເມືອງ, ຄວາມສະຫງົບ ແລະ ເປັນລະບຽບຮຽບຮ້ອຍ ຂອງສັງຄົມ ໄດ້ເປັນຢ່າງດີ ແລະ ສ້າງເງື່ອນໄຂອໍານວຍໃຫ້ປະຊາຊົນ ສາມາດໄປມາຫາສູ່, ການດຳລົງຊີວິດ, ການພັດທະນາ ເສດຖະກິດ-ສັງຄົມ ໄດ້ຢ່າງສະຫງົບສັນຕິ.

ທາມກາງສະພາບການພາກພື້ນ-ສາກົນ ແລະ ພາຍໃນ ຍັງຈະສືບຕໍ່ຜັນແປໄປຢ່າງສັບສົນ ກໍາລັງປ້ອງກັນຄວາມສະຫງົບ ຕ້ອງ : “ຮູ້ໃຫ້ທັນ, ກໍາສະພາບໃຫ້ແໜ້ນ, ຕີຕ້ານໃຫ້ຖືກຈຸດ ແລະ ທັນການ, ເດັດຂາດວ່ອງໄວ, ຊັດເຈນ...” ເຊີດຊູ ແລະ ຜັນຂະຫຍາຍມູນເຊື້ອອັນດີງາມຂອງຕົນ, ນໍາໃຊ້ບົດຮຽນທີ່ສະສົມມາ, ແຕ່ເວລາດຽວກັນ ຕ້ອງອອກແບບໃໝ່ ທີ່ມີຄວາມເລິກເຊິ່ງ, ປະດິດສ້າງ, ຊອກຫາອັນໃໝ່, ຕຳລາໃໝ່ ໃຫ້ຮັບມືທັນກັບເຫດການຕ່າງໆ, ຫັນເປັນທັນສະໄໝ ຫັນເປັນດີຈີຕ໋ອນ, ຮຽນຮູ້ຫຼັກວິທະຍາສາດແບບໃໝ່ ທັນຍຸກ, ສູ້ໃຫ້ທັນກັບຜູ້ທີ່ເປັນເປົ້າໝາຍ, ຕຳຫຼວດ ຕ້ອງຮູ້ກ່ອນ, ຮູ້ທັນ ແລະ ປ້ອງກັນ, ປາບປາມໃຫ້ໄດ້ ໃນເມື່ອເກີດເຫດ; ຕໍາຫຼວດຍຸກນີ້ ບໍ່ສາມາດເຮັດໃຫ້ກໍາລັງຕົກຍຸກສະໄໝໄດ້; ຕັ້ງໜ້າປັບປຸງ ປກສ ໃຫ້ສືບຕໍ່ເປັນກໍາລັງປ້ອງກັນຄວາມສະຫງົບປະຕິວັດ ທີ່ມີແບບແຜນທັນສະໄໝ, ມີລະບຽບວິໄນ, ໂປ່ງໃສ, ຊື່ສັດ ບໍລິສຸດ ຕໍ່ໜ້າທີ່, ຕໍ່ປະຊາຊົນ; ສືບຕໍ່ປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ, ດຶງເອົາທຸກກໍາລັງ, ທຸກຄົນ, ທຸກການຈັດຕັ້ງ, ທຸກຊັ້ນຄົນ ເຂົ້າຮ່ວມເປັນຫູເປັນຕາ, ເປັນກໍາລັງແຮງສັງລວມ ເພື່ອແກ້ໄຂບັນຫາທີ່ເກີດຂຶ້ນ.

ໃນຕອນທ້າຍ, ສະຫາຍ ທອງລຸນ ສີສຸລິດ ຍັງໄດ້ສະແດງຄວາມຊົມເຊີຍ ຕໍ່ຄະນະບໍລິຫານງານພັກກະຊວງປ້ອງກັນຄວາມສະຫງົບຊຸດໃໝ່ ທີ່ໄດ້ດຳເນີນຖືກຕ້ອງຕາມກົດລະບຽບຂອງພັກ, ຕາມຄວາມຮຽກຮ້ອງຕ້ອງການ ຂອງໜ້າທີ່ການເມືອງ ເພື່ອເປັນຫຼັກແຫຼ່ງແກ່ນສານ ສືບຕໍ່ນໍາພາຊີ້ນໍາ ໃນ 5 ປີຕໍ່ໜ້າ, ເຊິ່ງໂຄງປະກອບຄະນະບໍລິຫານງານພັກ ກະຊວງປ້ອງກັນຄວາມສະຫງົບ ສະໄໝທີ VI ແມ່ນໄດ້ສ່ອງແສງໃຫ້ເຫັນລັກສະນະສືບທອດຕໍ່ເນື່ອງ ລະຫວ່າງ ຮຸ່ນ ຂອງພະນັກງານ, ເພດ, ເຜົ່າ ຢ່າງເໝາະສົມ ແລະ ໄດ້ຕາມມາດຖານເງື່ອນໄຂ ຄົບຖ້ວນແລ້ວ ພ້ອມທັງ ສະແດງຄວາມເຊື່ອໝັ້ນ ແລະ ໝັ້ນໃຈວ່າ ຄະນະພັກຊຸດໃໝ່ ຈະຈັດຕັ້ງປະຕິບັດວຽກງານ ຢ່າງເຕັມປະສິດທິຜົນ. ສະຫາຍ ທອງລຸນ ສີສຸລິດ ຍັງໄດ້ຮຽກຮ້ອງໃຫ້ຄະນະພັກຊຸດໃໝ່ ເອົາໃຈໃສ່ຕື່ມບາງດ້ານ ຄື:

#ໜຶ່ງ, ຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງນີ້ ໃຫ້ເປັນແຜນງານ, ໂຄງການ ແລະ ຫັນເປັນນິຕິກຳລະອຽດ, ສອດຄ່ອງກັບຕົວຈິງ ແລະ ສາມາດຈັດຕັ້ງປະຕິບັດໄດ້; ຈັດຕັ້ງເຜີຍແຜ່, ເຊື່ອມຊຶມ ໃນຄະນະບໍລິຫານງານພັກກະຊວງ ລົງໄປເຖິງ ຄະນະພັກແຕ່ລະຂັ້ນ, ສະມາຊິກພັກ, ພະນັກງານ, ນາຍ ແລະ ພົນຕໍາຫຼວດ ຢູ່ແຕ່ລະຂັ້ນຢ່າງທົ່ງເຖິງ; ສ້າງຄວາມຮັບຮູ້ເຂົ້າໃຈ ແລະ ເປັນເອກະພາບທາງດ້ານທັດສະນະ ແລະ ການກະທໍາຕົວຈິງ; ຍູ້ຂະບວນການ ເພື່ອສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ ໃນວຽກງານປ້ອງກັນຄວາມສະຫງົບ.

#ສອງ, ໃຫ້ຮີບຮ້ອນແບ່ງວຽກ, ແບ່ງຄວາມຮັບຜິດຊອບ ພາຍໃນຄະນະບໍລິຫານງານພັກ, ຄະນະປະຈໍາພັກ ໃຫ້ລະອຽດ, ຈະແຈ້ງ; ຕ້ອງເຊີດຊູຄວາມເປັນເຈົ້າການ ຕໍ່ໜ້າທີ່ການເມືອງ, ຕໍ່ປະເທດຊາດ, ຕໍ່ປະຊາຊົນ; ທຸ້ມເທເຫື່ອ ແຮງ, ສະຕິປັນຍາ, ຄວາມຮູ້-ຄວາມສາມາດ, ມີຄວາມເສຍສະຫຼະ ເພື່ອເຮັດສໍາເລັດໜ້າທີ່ ທີ່ຖືກມອບໝາຍໃຫ້; ການເຂົ້າມາຢູ່ໃນຄະນະບໍລິຫານງານພັກ ບໍ່ແມ່ນເພື່ອມາເປັນອາດຍາ-ເຈົ້ານາຍ, ບໍ່ແມ່ນເພື່ອໃຫ້ມີຕໍາແໜ່ງ, ໜ້າທີ່ ເທົ່ານັ້ນ; ແຕ່ຕ້ອງຖືວ່າແມ່ນເຂົ້າມາ ເພື່ອຮັບໃຊ້ພາລະກິດປະຕິວັດອັນສູງສົ່ງ ຂອງພັກ, ເຮັດທຸກສິ່ງທຸກຢ່າງ ເພື່່ອຄວາມສົມບູນພູນສຸກ ຂອງປະຊາຊົນ, ເພື່ອຄວາມສະຫງົບສຸກ ແລະ ຈະເລີນວັດທະນາ ຂອງປະເທດຊາດ.

#ສາມ, ຄະນະບໍລິຫານງານພັກ ຕ້ອງຢຶດໝັ້ນ ແລະ ປະຕິບັດຢ່າງເຂັ້ມງວດຫຼັກການ, ລະບອບແບບແຜນວິທີນຳພາ ຂອງພັກ; ຮັບຜິດຊອບໂດຍກົງ ຕໍ່ຜົນໄດ້-ຜົນເສຍ ຂອງວຽກງານທີ່ຖືກມອບ ໝາຍ; ເດັດຂາດແກ້ໄຂ ແບບແຜນອາຍາສິດ, ສໍ້ລາດບັງຫຼວງ, ເສື່ອມຄຸນປ່ຽນທາດ; ສ້າງໄດ້ຄວາມເຊື່ອໝັ້ນ ແລະ ສັດທາ ຂອງປະຊາຊົນ ໃຫ້ນັບມື້ນັບສູງຂຶ້ນ.

#ສີ່, ບັນດາສະຫາຍຄະນະພັກຊຸດໃໝ່ ຕ້ອງສືບຕໍ່ຕັ້ງໜ້າຝຶກຝົນຫຼໍ່ຫຼອມຕົນເອງ:

- ດ້ານຄຸນທາດການເມືອງ, ຄຸນສົມບັດສິດທໍາປະຕິວັດ, ຄວາມເປັນແບບຢ່າງນໍາໜ້າດ້ານຄວາມຈົງຮັກພັກດີ ແລະ ຄວາມສັດຊື່ບໍລິສຸດ ຕໍ່ອຸດົມການຂອງພັກ ແລະ ຕໍ່ຜົນປະໂຫຍດຂອງປະຊາຊົນ ແລະ ປະເທດຊາດ; ສາມັກຄີຮັກແພງ ຈິງໃຈຕໍ່ໝູ່ຄະນະ ແລະ ຊ່ວຍເຫຼືອກໍ່ສ້າງໝູ່ຄະນະ ໃຫ້ມີຄວາມເຂັ້ມແຂງ; ຕັ້ງໜ້າຄົ້ນຄວ້າຮໍ່າຮຽນ;

- ເປັນແບບຢ່າງປະຕິບັດກົດລະບຽບຂອງພັກ, ກົດໝາຍ ແລະ ລະບຽບການຂອງລັດ; ຕິດຕາມ, ຊຸກຍູ້ ການຈັດຕັ້ງ, ພະນັກງານ, ສະມາຊິກພັກ ແລະ ປະຊາຊົນ ໃນຂອບເຂດທີ່ຕົນຮັບຜິດຊອບ ໃຫ້ມີທັດສະນະ ແລະ ການກະທໍາທີ່ຖືກຕ້ອງ, ຕັ້ງໜ້າຕ້ານປະກົດການຫຍໍ້ທໍ້ ໃນສັງຄົມທຸກຮູບແບບ; ດໍາລົງຊີວິດປອດໃສ, ປະຢັດ, ຕ້ານການຟຸມເຟືອຍ, ບໍ່ໃຫ້ເຮັດໃນສິ່ງທີ່ຈະນໍາເອົາຜົນເສຍຫາຍມາສູ່ໜ້າທີ່ວຽກງານ ກໍຄື ກະທົບຕໍ່ບົດບາດ ແລະ ຄວາມເຊື່ອໝັ້ນ ຕໍ່ຕົນເອງ, ຕໍ່ຄະນະ ແລະ ຕໍ່ສ່ວນລວມ ຂອງກໍາລັງປ້ອງກັນຄວາມສະຫງົບ ເວົ້າລວມ ແລະ ຄວາມຮັບຜິດຊອບ ຕໍ່ພັກ-ລັດ ແລະ ປະຊາຊົນ ໂດຍກົງ;

- ຄະນະພັກ ຕ້ອງໄດ້ສືບຕໍ່ສ້າງຄວາມສໍາພັນທີ່ດີກັບເພື່ອນມິດ ແລະ ສາກົນ ເພື່ອພັດທະນາຂະ ແໜງການໃຫ້ໄດ້ດີ ກໍ່ຄືການພັດທະນາຕໍ່ໄປ ຕ້ອງເອົາໃຈໃສ່ຍາດແຍ່ງ ແລະ ດຶງດູດການຊ່ວຍເຫຼືອ...ການເຂົ້າຮ່ວມບັນດາອົງການຈັດຕັ້ງສາກົນ-ພາກພື້ນ ກໍ່ຕ້ອງໄດ້ເຮັດວຽກ ແລະ ປະຕິບັດໜ້າທີ່ຮ່ວມນຳເຂົາ ໃຫ້ລະອຽດ, ຊັດເຈນ ແລະ ມີສະຕິ ຕໍ່ທັດສະນະຕ່າງໆ ທີ່ສຳຄັນແມ່ນຕ້ອງໄດ້ຮຽນຮູ້ ແລະ ເອົາບົດຮຽນທີ່ເປັນປະໂຫຍດ ມາໝູນໃຊ້ໃນວຽກງານສະເພາະ ຂອງພວກເຮົາ;

- ສ້າງເສດຖະກິດເອກະລາດ ເປັນເຈົ້າຕົນເອງ, ບໍ່ສະເພາະແຕ່ເວົ້າເລື່ອງເປັນເຈົ້າເສດຖະກິດ, ແຕ່ຖ້າເປັນເຈົ້າເສດຖະກິດ-ເປັນເອກະລາດ ໃຫ້ນັບມື້ນັບດີຂຶ້ນ ແມ່ນຈະສົ່ງຜົນຕໍ່ຄວາມເປັນເຈົ້າ ແລະ ຄວາມໝັ້ນຄົງຂອງຊາດ, ດັ່ງນັ້ນ ກໍາລັງປ້ອງກັນຄວາມສະຫງົບເຮົາ ຕ້ອງຕັດສິນໃຈເຂົ້າຮ່ວມ ແລະ ປະກອບສ່ວນ ເພາະເນື້ອແທ້ແມ່ນການຍົກສູງຄວາມເປັນເຈົ້າຂອງທຸກພາກສ່ວນຢູ່ໃນສັງຄົມ, ຕິດພັນກັບບັນຫາຄວາມໝັ້ນຄົງຂອງປະເທດຊາດ. (ເປັນເຈົ້າຕົນເອງ ໃນການຮັບເອົາການຊ່ວຍເຫຼືອ, ການດຶງດູດ, ການຮ່ວມມືກັບຕ່າງປະເທດ ແລະ ອື່ນໆ).

ແຫຼ່ງ: ກ​ະ​ຊວງ​ປ້ອງ​ກັນ​ປະ​ເທດ