ຮອງນາຍົກລັດຖະມົນຕີ ຢ້ຽມຢາມ ແລະ ເຮັດວຽກຢູ່ເຂດເສດຖະກິດພິເສດສາມຫຼ່ຽມຄຳ

​ເຜີຍ​ແຜ່​ໂດຍ: admin|ຢ້ຽມ​ຊົມ: 7 ຄັ້ງ | ເວ​ລາ | 2025-08-22 03:19:31

ທ່ານ ພົອ ວີໄລ ຫຼ້າຄຳຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ດ້ວຍຄະນະ ເຄືອນໄຫວຢ້ຽມຢາມ ແລະ ເຮັດວຽກຢູ່ເຂດເສດຖະກິດພິເສດສາມຫຼ່ຽມຄຳ ເມືອງຕົ້ນເຜິ້ງ ແຂວງບໍ່ແກ້ວ, ໃນຕອນເຊົ້າຂອງວັນທີ 1 ສິງຫາ 2025ນີ້ ທ່ານ ພົອ ວິໄລ ຫຼ້າຄຳຟອງ ພ້ອມດ້ວຍຄະນະ ໄດ້ເຂົ້າຮ່ວມພິທີມອບ-ຮັບໜ້າທີ່ລະຫວ່າງ ເລຂາຄະນະບໍລິຫານງານພັກແຂວງເຈົ້າແຂວງ ແຂວງບໍ່ແກ້ວ (ຜູ້ເກົ່າ) ແລະ ຮັກສາການແທນເລຂາຄະນະບໍລິຫານງານພັກແຂວງ, ຮັກສາການເຈົ້າແຂວງ ແຂວງບໍ່ແກ້ວ (ຜູ້ໃໝ່) ຕາມຂໍ້ຕົກລົງເລກທີ 20/ກມສພ ວ່າດ້ວຍການອະນຸມັດໃຫ້ທ່ານ ທອງຈັນ ມະນີໄຊ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງ ແຂວງບໍ່ແກ້ວ ອອກພັກການຮັບອຸດໜູນບຳນານ ແລະ ຜ່ານມະຕິຕົກລົງເລກທີ 655/ລຄພສ ວ່າດ້ວຍການແຕ່ງຕັ້ງທ່ານ ພົນຈັດຕະວາ ແປ້ນຄຳ ບຸດຈັນແພງ ຮັກສາການເລຂາພັກແຂວງ, ຮັກສາການເຈົ້າແຂວງ ແຂວງບໍ່ແກ້ວ (ຜູ້ໃໝ່), ແຕ່ງຕັ້ງທ່ານ ພົນຈັດຕະວາ ສຸກພະຈັນ ສີລາເພັດ ເປັນກຳມະການຄະນະພັກ ຮອງເລຂາພັກແຂວງ ຮອງເຈົ້າແຂວງ ແລະ ເຊັນບົດບັນທຶກມອບ-ຮັບໜ້າທີ່ລະຫວ່າງຜູ້ເກົ່າ ແລະ ຜູ້ໃໝ່.

ໃນວັນດຽວກັນນີ້, ທ່ານ ພົອ ວິໄລ ຫຼ້າຄຳຟອງ ພ້ອມດ້ວຍຄະນະ ກໍໄດ້ສືບຕໍ່ຢ້ຽມຢາມ ແລະ ເຮັດວຽກຢູ່ເຂດເສດຖະກິດພິເສດສາມຫຼ່ຽມຄຳ ຊຶ່ງໄດ້ຮັບຟັງການລາຍງານສະພາບລວມການພັດທະນາຈາກທ່ານ ຄຳສະແຫວງ ວິໄລພົງ ຮັກສາການຫົວໜ້າອົງການຄຸ້ມຄອງ-ບໍລິຫານເຂດເສດຖະກິດພິເສດສາມຫຼ່ຽມຄຳໂດຍຫຍໍ້: ການຈັດຕັ້ງປະຕິບັດວຽກງານດ້ານຕ່າງໆຂອງເຂດເສດຖະກິດພິເສດສາມຫຼ່ຽມຄຳຕະຫຼອດໄລຍະ 7 ເດືອນຜ່ານມາ ເປັນຕົ້ນແມ່ນວຽກງານຄວາມສະຫງົບປອດໄພ, ການກໍ່ສ້າງພື້ນຖານໂຄງລ່າງ, ໂຄງການລົງທຶນພັດທະນາແຫຼ່ງທ່ອງທ່ຽວເຂດປ່າປ້ອງກັນພູກິ່ວລົມ, ໂຄງການກໍ່ສ້າງບໍ່ນ້ຳຮ້ອນຈາກປຸ່ງເລາະເຖິງເຂດ, ການປັບປຸງໜອງນ້ຳດອນຊາວ, ການປັບປຸງໂຄງປະກອບຂອງວຽກງານພັກ ແລະ ວຽກງານລັດອົງການຄຸ້ມຄອງບໍລິຫານເຂດເສດຖະກິດພິເສດສາມຫຼ່ຽມຄຳ, ການກໍ່ສ້າງໂຄງການບຳບັດນ້ຳເສຍໄລຍະສອງ, ໂຄງການຜະລິດກະສິກຳ-ປ່າໄມ້, ວຽກງານການຄ້າ-ການລົງທຶນ, ການບໍລິການວຽກງານທ່ອງທ່ຽວລວມທັງວຽກງານປ້ອງກັນຊາດປ້ອງກັນຄວາມສະຫງົບ ແລະ ອື່ນໆ.

ໂອກາດນີ້, ທ່ານ ພົອ ວິໄລ ຫຼ້າຄຳຟອງ ໄດ້ມີຄຳເຫັນ ແລະ ສະແດງຄວາມຊົມເຊີຍຕໍ່ຜົນສຳເລັດວຽກງານການພັດທະນາດ້ານຕ່າງໆຢູ່ພາຍໃນເຂດເສດຖະກິດພິເສດສາມຫຼ່ຽມຄຳຜ່ານມາກໍຄືປັດຈຸບັນຂອງອົງການຄຸ້ມຄອງ-ບໍລິຫານເຂດເສດຖະກິດພິເສດສາມຫຼ່ຽມຄຳ ແລະ ສະພາບໍລິຫານເຂດເສດຖະກິດພິເສດສາມຫຼ່ຽມຄຳທີ່ພ້ອມກັນຍາດມາໄດ້, ພ້ອມທັງໃຫ້ທິດຊີ້ນຳຫຼາຍດ້ານເປັນຕົ້ນແມ່ນການຊຸກຍູ້ສົ່ງເສີມໃຫ້ຜູ້ພັດທະນາເສີມຂະຫຍາຍທຸລະກິດຕ່າງໆໃຫ້ເຄື່ອນໄຫວຖືກຕ້ອງຕາມລະບຽບກົດໝາຍຂອງ ສປປ ລາວ ພ້ອມທັງຊີ້ນຳຂະຫຍາຍທຸລະກິດການຄ້າ, ອຸດສາຫະກຳເບົາ, ການກະສິກຳ, ການບໍລິການໆທ່ອງທ່ຽວທາງດ້ານປະຫວັດສາດ, ທຳມະຊາດ ແລະ ອື່ນໆໃຫ້ມີຄວາມຍືນຍົງ ແລະ ທັນສະໄໝຢູ່ໃນພາກພື້ນ ແລະ ສາກົນອີກດ້ວຍ.

(ແຫຼ່ງຂ່າວ: ປະ​ຊາ​ຊົນ,  ເຂດເສດຖະກິດພິເສດສາມຫຼ່ຽມຄໍາ)