ທ່ານນາຍົກລັດຖະມົນຕີ ຊີ້ນຳໂຄງການສ້າງລະບົບຖານຂໍ້ມູນຄຸ້ມຄອງພົນລະເມືອງ

​ເຜີຍ​ແຜ່​ໂດຍ: admin|ຢ້ຽມ​ຊົມ: 71 ຄັ້ງ | ເວ​ລາ | 2024-11-21 13:20:40 ອັບ​ເດດ​ຄັ້ງ​ລ້າ​ສຸດ ໂດຍ: admin ເວ​ລາ 0000-00-00 00:00:00

ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ໃຫ້ກຽດເຂົ້າຮ່ວມ ແລະ ໂອ້ລົມ ຕໍ່ກອງປະຊຸມເຊື່ອມຊຶມ ແລະ ຜັນຂະຫຍາຍໂຄງການສ້າງລະບົບຖານຂໍ້ມູນ ຄຸ້ມຄອງພົນລະເມືອງ ແລະ ບັດປະຈໍາຕົວ ຢູ່ ສປປ ລາວ ໃນວັນທີ 2 ສິງຫາ ນີ້ ທີ່ສະໂມສອນໃຫຍ່ ກະຊວງປ້ອງກັນຄວາມສະຫງົບ; ມີທ່ານ ພົນເອກ ວິໄລ ຫຼ້າຄຳຟອງ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ; ທ່ານ ພົນຕີ ຫງວຽນ ວັນ ລອງຮອງລັດຖະມົນຕີກະຊວງປ້ອງກັນຄວາມສະຫງົບ ສສ ຫວຽດນາມ; ບັນດາລັດຖະມົນຕີ-ຮອງລັດຖະມົນຕີ ແລະ ພະນັກງານທີ່ກ່ຽວຂ້ອງ ຂອງບັນດາກະຊວງ-ອົງການຂັ້ນສູນກາງ ເຂົ້າຮ່ວມແບບເຊິ່ງໜ້າ; ບັນດາທ່ານ ເຈົ້າແຂວງ, ຮອງເຈົ້າແຂວງ, ຮອງເຈົ້າຄອງນະຄອນຫຼວງວຽງຈັນ ແລະ ພະນັກງານທີ່ກ່ຽວຂ້ອງ ຂອງບັນດາແຂວງ ແລະ ນະຄອນຫຼວງວຽງຈັນ ເຂົ້າຮ່ວມຜ່ານລະບົບກອງປະຊຸມທາງໄກ.

ໃນໂອກາດນີ້, ທ່ານ ພົນຕີ ຄຳກິ່ງ ຜຸ້ຍຫຼ້າມະນີວົງ ຮອງລັດຖະມົນຕີ ຫົວໜ້າກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ໄດ້ລາຍງານໃຫ້ທ່ານນາຍົກລັດຖະມົນຕີ ຊາບໂດຍຫຍໍ້ ກ່ຽວກັບຜົນການດຳເນີນກອງປະຊຸມຄັ້ງນີ້ ໃນຕອນເຊົ້າທີ່ຜ່ານມາ ເຫັນວ່າ: ກອງປະຊຸມໄດ້ຮັບຟັງການນໍາສະເໜີຄວາມສໍາຄັນຂອງໂຄງການສ້າງຖານຂໍ້ມູນພົນລະເມືອງ ແລະ ບັດປະຈໍາຕົວ ຢູ່ ສປປ ລາວ; ປະສົບການຢູ່ ສສ ຫວຽດນາມ ໃນການຈັດຕັ້ງປະຕິບັດໂຄງການຖານຂໍ້ມູນແຫ່ງຊາດ ກ່ຽວກັບພົນລະເມືອງ ແລະ ໂຄງການຜະລິດ, ອອກບັດ ແລະ ຄຸ້ມຄອງສໍາມະໂນຄົວ; ໄດ້ຜ່ານຂໍ້ຕົກລົງແຕ່ງຕັ້ງຄະນະຮັບຜິດຊອບຈັດຕັ້ງປະຕິບັດໂຄງການ ແລະ ແຜນການຜັນຂະຫຍາຍໂຄງການ; ການກະກຽມຄວາມພ້ອມ ໃນການຈັດຕັ້ງປະຕິບັດໂຄງການກໍ່ສ້າງຖານຂໍ້ມູນພົນລະເມືອງ ແລະ ບັດປະຈໍາຕົວ ຢູ່ ສປປ ລາວ; ການຫັນເປັນດີຈີຕອນຂອງ ສປປ ລາວ ແລະ ການປະກອບຄໍາຄິດເຫັນຂອງຜູ້ແທນກອງປະຊຸມເຫັນວ່າມີເນື້ອໃນທີ່ສ້າງສັນ, ມີຄວາມເປັນເອກະພາບສູງ, ຮັບຮູ້-ເຂົ້າໃຈ ແລະ ເຊື່ອມຊຶມຕໍ່ໂຄງການດັ່ງກ່າວເປັນຢ່າງດີ.

ຫຼັງຈາກນັ້ນ, ທ່ານນາຍົກລັດຖະມົນຕີ ກໍໃຫ້ກຽດໂອ້ລົມ ແລະ ຊີ້ນຳຕໍ່ກອງປະຊຸມ ເອົາໃຈໃສ່ບາງດ້ານສຳຄັນຕື່ມ ເປັນຕົ້ນ 1). ໃຫ້ບັນດາກະຊວງ, ອົງການລັດທຽບເທົ່າກະຊວງ, ນະຄອນຫຼວງວຽງຈັນ ແລະ ບັນດາແຂວງໃນຂອບເຂດທົ່ວປະເທດ: (1) ຍົກສູງຄວາມຮັບຜິດຊອບຂອງຕົນ ໃນການຈັດຕັ້ງປະຕິບັດຂຶ້ນທະບຽນພົນລະເມືອງ ດ້ວຍການນຳພາ-ຊີ້ນຳ ແລະ ສຶກສາອົບຮົມພະນັກງານ-ລັດຖະກອນ ທີ່ຢູ່ໃນຄວາມຮັບຜິດຊອບຂອງຕົນ ໃຫ້ມີຄວາມຮັບຮູ້ ແລະ ເຂົ້າໃຈ, ໃຫ້ການຮ່ວມມື, ຊ່ວຍເຫຼືອ ແລະ ສະໜັບສະໜູນ ໃນການຈັດຕັ້ງປະຕິບັດໂຄງການນີ້ ຢ່າງເຂັ້ມງວດ, ມີປະສິດທິພາບ ແລະ ປະສິດ ທິຜົນ; (2). ເປັນເຈົ້າການຢ່າງຕັ້ງໜ້າ ໃນການທົບທວນລະບຽບ, ລະບອບບໍລິຫານ, ແກ້ໄຂຂອດທີ່ເປັນຂໍ້ຫຍຸ້ງຍາກ ທາງດ້ານບໍລິຫານໃຫ້ກະທັດຮັດ ແລະ ຫັນເປັນດີຈີຕອນ; (3). ເປັນເຈົ້າການຢ່າງຕັ້ງໜ້າ ໃນການສະຫຼຸບຕີລາຄາ, ປະເມີນຜົນ, ສ້າງບົດລາຍງານ, ເກັບກໍາສະຖິຕິ ແລະ ຜົນສໍາເລັດຂອງການຈັດຕັ້ງປະຕິບັດ ເປັນແຕ່ລະວັນ, ອາທິດ, ເດືອນ, ໄຕມາດ, 6 ເດືອນ ແລະ 1 ປີ ໂດຍມອບໃຫ້ກະຊວງປ້ອງກັນຄວາມສະຫງົບ ສັງລວມລາຍງານລັດຖະບານ ແຕ່ລະໄລຍະ; (4). ຂຶ້ນແຜນງົບປະມານຮັບໃຊ້ ໃນການເຄື່ອນໄຫວວຽກງານຂຶ້ນທະບຽນພົນລະເມືອງ ໂດຍນຳໃຊ້ງົບປະມານຂອງລັດຖະບານ ສົມທົບກັບງົບປະມານ ໄດ້ຈາກການຊ່ວຍເຫຼືອຂອງສັງຄົມ ແລະ ອື່ນໆ ຕາມກົດໝາຍ ແລະ ລະບຽບການ; (5). ຄົ້ນຄວ້າປະຕິບັດນະໂຍບາຍຕ່າງໆ ຕໍ່ກັບຜູ້ທີ່ມີຜົນງານໃນການເຄື່ອນໄຫວຈັດຕັ້ງປະຕິບັດວຽກງານ ຂຶ້ນທະບຽນພົນລະເມືອງ ໂດຍມອບໃຫ້ບັນດາກະຊວງ, ອົງການ, ນະຄອນຫຼວງ ແລະ ແຂວງ ເປັນຜູ້ຄົ້ນຄວ້າ ໂດຍສົມທັບກັບກະຊວງປ້ອງກັນຄວາມສະຫງົບ ເພື່ອສະເໜີຕໍ່ລັດຖະບານ ພິຈາລະນາ ເປັນແຕ່ລະໄລຍະຢ່າງຖືກຕ້ອງ ແລະ ເໝາະສົມ; 2). ໃຫ້ບັນດາທ່ານ ລັດຖະມົນຕີ, ຫົວໜ້າອົງການລັດທຽບເທົ່າກະຊວງ, ເຈົ້ານະຄອນຫຼວງວຽງຈັນ ແລະ ບັນດາທ່ານເຈົ້າແຂວງ ຮັບຜິດຊອບໂດຍກົງຕໍ່ລັດຖະບານ ໃນການນຳພາ, ຊີ້ນຳສ້າງແຜນການຈັດຕັ້ງປະຕິບັດ ຂຶ້ນທະບຽນພົນລະເມືອງຢູ່ຂັ້ນຂອງຕົນ, ທັງກະກຽມຄວາມພ້ອມຮອບດ້ານ ໃນການເຊື່ອມໂຍງຖານຂໍ້ມູນໂດຍສອດຄ່ອງກັບສະພາບ, ຈຸດພິເສດຂອງຂະແໜງການ ແລະ ທ້ອງຖິ່ນຕົນ; 3). ໃຫ້ກະຊວງພາຍໃນ ສົມທົບກັບ ກະຊວງປ້ອງກັນຄວາມສະຫງົບ ກ່ຽວກັບການຫັນເປັນດີຈີຕອນພົນລະເມືອງ ເພື່ອຮັບປະກັນມີນິຕິກຳຮອງຮັບ, ມີມາດຕະຖານ ທາງດ້ານວິຊາສະເພາະດີ ແລະ ເຮັດໜ້າທີ່ຕົ້ນຕໍ ໃນການສະກັດກັ້ນ ແລະ ຕ້ານອາດຊະຍາກໍາ ກໍຄືການຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມຂອງປະເທດເຮົາ; 4). ໃຫ້ກະຊວງປ້ອງກັນຄວາມສະຫງົບ: (1) ເປັນເຈົ້າການຈັດຕັ້ງປະຕິບັດ ແລະ ເປັນເສນາທິການໃຫ້ແກ່ລັດຖະບານ ໃນການສ້າງ ແລະ ປັບປຸງກົດໝາຍ, ນິຕິກຳ, ສ້າງ ແລະ ບຳລຸງບຸກຄະລາກອນ, ກະກຽມຄວາມພ້ອມທາງດ້ານພື້ນຖານໂຄງລາງ, ການພັດທະນາລະບົບຊັອຟແວ ແລະ ຄວາມພ້ອມຮອບດ້ານ ໃນການຈັດຕັ້ງປະຕິບັດການຂຶ້ນທະບຽນພົນລະເມືອງ ເພື່ອຕິດຕາມ, ກວດກາ, ສະຫຼຸບຕີລາຄາ, ປະເມີນຜົນ ແລະ ຊຸກຍູ້ບັນດາຂະແໜງການ ແລະ ພາກສ່ວນກ່ຽວຂ້ອງ ທັງສູນກາງ ແລະ ທ້ອງຖີ່ນ ໃຫ້ສຳເລັດຕາມຈຸດປະສົງ, ຄາດໝາຍ ແລະ ກຳນົດເວລາ ທີ່ວາງໄວ້; (2). ນໍາພາ, ຊີ້ນຳ, ຄຸ້ມຄອງ, ຕິດຕາມ ກວດກາ ໃນການຂຶ້ນທະບຽນພົນລະເມືອງລາວ, ຄົນຕ່າງດ້າວ, ຄົນຕ່າງປະເທດ ແລະ ຄົນບໍ່ມີສັນຊາດ ທີ່ໄດ້ຮັບອະນຸຍາດຂຶ້ນທະບຽນ ໃນຂອບເຂດທົ່ວປະເທດ ຢ່າງເຂັ້ມງວດ; (3) ນໍາໃຊ້ມາດຕະການຢ່າງເດັດຂາດ ແລະ ເຂັ້ມງວດ ຕໍ່ຜູ້ທີ່ບໍ່ໃຫ້ການຮ່ວມມືຕໍ່ເຈົ້າໜ້າທີ່ໃນການຂຶ້ນທະບຽນພົນລະເມືອງ ຢ່າງເຂັ້ມງວດ ຕາມທີ່ໄດ້ກຳນົດໄວ້ໃນກົດໝາຍ ແລະ ລະບຽບການ ທີ່ກ່ຽວຂ້ອງ;

ແຫຼ່ງ: ປະ​ຊາ​ຊົນ, ຂ່າວ ແລະ ພາບ: ກົມປະຊາສຳພັນ ຫສນຍ