ແຕ່ງຕັ້ງສະຫາຍ ນາງ ພັນຈິນດາ ເລັ່ງສະຫວັດ ເປັນຮອງປະທານ ສສຍລ

​ເຜີຍ​ແຜ່​ໂດຍ: admin|ຢ້ຽມ​ຊົມ: ຄັ້ງ | ເວ​ລາ | 2025-07-08 08:59:04

ສະຫາຍ ນາງ ພັນຈິນດາ ເລັ່ງສະຫວັດ ຖືກແຕ່ງຕັ້ງເປັນຄະນະບໍລິຫານງານສູນກາງສະຫະພັນແມ່ຍິງລາວ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ (ສສຍລ)ຊຶ່ງພິທິປະກາດການແຕ່ງຕັ້ງໄດ້ຈັດຂຶ້ນໃນວັນທີ 7 ກໍລະກົດ ນີ້ ທີ່ສູນກາງສະຫະພັນແມ່ຍິງລາວ. ໂດຍການເຂົ້າຮ່ວມມີ ສະຫາຍ ນາງ ອາລີ ວົງໜໍ່ບຸນທຳ ກຳມະການສູນກາງພັກ ປະທານສູນກາງສະຫະພັນແມ່ຍິງລາວ, ມີບັນດາຄະນະບໍລິຫານງານ ແລະ ພະນັກງານທີ່ກ່ຽວຂ້ອງເຂົ້າຮ່ວມ.

ທ່ານ ທົງສັກ ກົມມະເມືອງ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ໄດ້ຂຶ້ນຜ່ານມະຕິຕົກລົງວ່າດ້ວຍການແຕ່ງຕັ້ງ ສະຫາຍ ນາງ ພັນຈິນດາ ເລັ່ງສະຫວັດ ເປັນຄະນະບໍລິຫານງານສູນກາງສະຫະພັນແມ່ຍິງລາວ ຮອງປະທານຄະນະບໍລິຫານງານສູນກາງສະຫະພັນແມ່ຍິງ ກະຊວງ - ອົງການຂັ້ນສູນກາງ ແລະ ອົງການຈັດຕັ້ງຂັ້ນທ້ອງຖິ່ນ ຈົ່ງຮັບຮູ້.

ໃນໂອກາດນີ້: ສະຫາຍ ນາງ ອາລີ ວົງໜໍ່ບຸນທຳ ກໍໄດ້ໂອ້ລົມເພື່ອເປັນເຂັ້ມທິດເຍື່ອງທາງ ເພື່ອຮັບປະກັນໃຫ້ແກ່ການຈັດຕັ້ງປະຕິບັດວຽກງານຂອງສູນກາງສະຫະພັນແມ່ຍິງລາວ ໃຫ້ຄະນະພັກແຕ່ລະຂັ້ນ ສືບຕໍ່ເປັນເຈົ້າການນໍາພາແນວຄິດ ສະມາຊິກພັກ, ພະນັກງານ-ລັດຖະກອນ ໃຫ້ມີຄວາມເຂົ້າໃຈ ແລະ ເປັນເອກະພາບສູງ, ຮັກສາໄດ້ຄວາມສາມັກຄີເປັນເອກະພາບ, ຮັບປະກັນຄວາມສະຫງົບທາງການເມືອງ ແລະ ສັງຄົມ ຢ່າງໜັກແໜ້ນ; ຍົກສູງສະຕິລະວັງຕົວຕໍ່ຄົນບໍ່ດີ, ເອົາໃຈໃສ່ປຶກສາຫາລື ແບ່ງຄວາມຮັບຜິດຊອບໃຫ້ຈະແຈ້ງ; ມີຄວາມເປັນເຈົ້າການ, ມີຄວາມສາມາດປະຕິບັດພາລະບົດບາດ, ໜ້າທີ່ຂອງຕົນຕາມທິດຫັນເປັນມືອາຊີບ; ປັບປຸງແບບແຜນວິທີເຮັດວຽກໃຫ້ມີວິທະຍາສາດ, ປະດິດສ້າງ, ແກ້ໄຂວຽກວ່ອງໄວ ແລະ ທັນການ, ຮັບປະກັນປະສິດທິຜົນ ໂດຍຫຼຸດຜ່ອນຂອດຂັ້ນ, ສິ່ງກົດໜ່ວງ, ວຽກທີ່ຊໍ້າຊ້ອນ, ຫຼຸດຜ່ອນຊ່ອງວ່າງ ແລະ ບັນຫາຫຍໍ້ທໍ້, ປັບປຸງກົງຈັກໃຫ້ເປັນລະບົບ ສາມາດຜັນຂະຫຍາຍແນວທາງ, ແຜນນະໂຍບາຍ, ກົດໝາຍ ແລະ ນິຕິກໍາທີ່ກ່ຽວຂ້ອງ ໄດ້ເປັນຢ່າງດີ; ສືບຕໍ່ຍູ້ແຮງຂະບວນການປະຕິບັດມະຕິ XI ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ໃນໄລຍະທ້າຍສະໄໝ ໃຫ້ແຂງແຮງ ແລະ ກາຍເປັນຂະບວນການຕົວຈິງ ຕິດພັນກັບການກະກຽມ ແລະ ດໍາເນີນກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ IX, ກອງປະຊຸມໃຫຍ່ຂອງໜ່ວຍພັກ ແລະ ກອງປະຊຸມໃຫຍ່ອົງຄະນະພັກ ສສຍລ ຄັ້ງທີ V ໃຫ້ທັນຕາມກໍານົດເວລາ; ສືບຕໍ່ຍູ້ແຮງຂະບວນການດ້ານຕ່າງໆ ໂດຍສະເພາະການຈັດຕັ້ງສະເຫຼີມສະຫຼອງ 70 ປີ ວັນສ້າງຕັ້ງສະຫະພັນແມ່ຍິງລາວ ຕິດພັນກັບ 3 ວັນປະຫວັດສາດ; ການສະຫຼຸບຕີລາຄາການຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະ ພັດທະນາ 5 ປີ (2021-2025) ທີ່ຕິດພັນກັບການປັບປຸງຄຸນນະພາບທາງດ້ານວິຊາສະເພາະ ໃຫ້ຮັບປະກັນປະສິດທິພາບ, ປະສິດທິຜົນ. ເອົາໃຈໃສ່ຕິດຕາມກວດກາປະເມີນຜົນການຈັດຕັ້ງປະຕິບັດວຽກງານໃນແຕ່ລະໄລຍະ ພ້ອມນີ້ສະເໜີໃຫ້ມີການຖ່າຍຖອດບົດຮຽນຊຶ່ງກັນ ແລະ ກັນ ເພື່ອເຮັດໃຫ້ການຈັດຕັ້ງປະຕິບັດວຽກງານໃນຕໍ່ໜ້າມີປະສິດທິພາບ ແລະ ປະສິດທິຜົນ ແລະ ມີຜົນສໍາເລັດທີ່ຍິ່ງໃຫຍ່ກວ່າເກົ່າ.

ຂ່າວ-ພາບ: ບຸນຕອມ - ບຸນອຸ້ມ