ຜັນຂະຫຍາຍໂຄງການ ສ້າງລະບົບຖານຂໍ້ມູນຄຸ້ມຄອງພົນລະເມືອງ ແລະ ບັດປະຈໍາຕົວ ຢູ່ ສປປ ລາວ

​ເຜີຍ​ແຜ່​ໂດຍ: admin|ຢ້ຽມ​ຊົມ: 38 ຄັ້ງ | ເວ​ລາ | 2024-11-21 17:18:50

ກອງປະຊຸມ ຜັນຂະຫຍາຍໂຄງການສ້າງລະບົບຖານຂໍ້ມູນຄຸ້ມຄອງ ພົນລະເມືອງ ແລະ ບັດປະຈໍາຕົວ ຢູ່ ສປປ ລາວ ໄດ້ຈັດຂຶ້ນໃນວັນທີ 2 ສິງຫາ 2024, ເປັນປະທານໂດຍ ພົອ ວິໄລ ຫຼ້າຄໍາຟອງ ກຳມະການກົມການເມືອງສູນກາງພັກ ຮອງນາຍົກລັດ ຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ສປປ ລາວ, ມີ ພົຕ ຫງວຽນວັນລອງ ຮອງລັດຖະມົນຕີກະຊວງ ປ້ອງ ກັນຄວາມສະຫງົບ ສສ ຫວຽດນາມ, ມີບັນດາລັດຖະມົນຕີ, ຮອງລັດຖະມົນຕີ ຈາກຂະແໜງການຂັ້ນສູນກາງ ແລະ ກອງບັນຊາການ ປກສ ທ້ອງຖິ່ນ ເຂົ້າຮ່ວມ.

 

ພົອ ວິໄລ ຫຼ້າຄໍາຟອງ ໄດ້ກ່າວໄຂກອງປະຊຸມເຊິ່ງບາງຕອນທ່ານໄດ້ກ່າວວ່າ: ວຽກງານຄຸ້ມຄອງສໍາມະໂນຄົວ ແລະ ບັດປະຈຳ ຕົວແມ່ນວຽກງານໜຶ່ງທີ່ມີຄວາມໝາຍຄວາມສໍາຄັນຢ່າງຍິ່ງ ຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ການພັດທະນາເສດຖະກິດ-ສັງຄົມຂອງປະເທດເຮົາ ເພື່ອໃຫ້ປະເທດເຮົາກ້າວທັນກັບຍຸກສະ ໄໝໃໝ່. ລັດຖະບານແຫ່ງ ສປປ ລາວ ກໍຄືກະຊວງປ້ອງກັນຄວາມສະຫງົບ ຍາມໃດກໍເຫັນໄດ້ຄວາມສໍາຄັນຂອງວຽກງານດັ່ງກ່າວ; ໄລຍະຜ່ານມາ, ສະພາບ ການກໍ່ອາດຊະຍາກຳທີ່ເກີດ ຂຶ້ນພາຍໃນປະເທດຂອງພວກເຮົາ ແມ່ນປະກອບມີກຸ່ມຄົນຫຼາຍສາຂາອາຊີບ, ມີທັງພົນລະ ເມືອງລາວ, ຄົນຕ່າງດ້າວ, ຄົນບໍ່ມີສັນຊາດ ແລະ ຕ່າງປະເທດ.

 

ພາຍຫຼັງກໍ່ອາດຊະຍາກຳແລ້ວ ເອົາຕົວຫຼົບໜີ ໂດຍມີການຍົກຍ້າຍທີ່ຢູ່ເປັນປະຈຳ, ມີການປ່ຽນແປງທາງດ້ານປະຫວັດບຸກຄົນ. ສະນັ້ນ, ການເຮັດວຽກງານຕິດຕາມ, ກວດກາ, ຄຸ້ມຄອງການເຄື່ອນໄຫວ, ການເໜັງຕີງຂອງພົນລະເມືອງ ພົບຄວາມຫຍຸ້ງຍາກ, ລວມໄປເຖິງວຽກງານຕິດຕາມກວດກາຄຸ້ມຄອງການປະກອບອາຊີບຂອງ ພົນລະເມືອງ. ເພື່ອເຮັດໃຫ້ວຽກງານດັ່ງກ່າວມີປະສິດທິຜົນສູງ, ມີຄວາມວ່ອງໄວທັນສະໄໝ ຈໍາເປັນຕ້ອງໄດ້ຫັນເອົາລະບົບເຕັກໂນໂລຊີຂໍ້ມູນຂ່າວສານເຂົ້າມາມີບົດບາດສໍາຄັນໃນການຄຸ້ມຄອງ ຫັນເອົາວຽກງານດັ່ງກ່າວເຂົ້າສູ່ລະບົບດີຈີຕ້ອນ.

 

ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ພ້ອມກັນປຶກສາຫາລື ໃນການຈັດຕັ້ງປະຕິບັດຜັນຂະຫຍາຍໂຄງການຄຸ້ມຄອງສຳມະໂນຄົວ ແລະ ບັດປະຈຳຕົວ ຢູ່ ສປປ ລາວ ທີ່ໄດ້ຮັບທຶນຊ່ວຍເຫຼືອຈາກລັດຖະບານຫວຽດນາມ ກໍຄືກະຊວງປ້ອງກັນຄວາມສະຫົງບ ຫວຽດນາມ ເຊິ່ງລັດຖະບານຂອງສອງປະເທດ ໄດ້ຮັບຮອງເອົາແລ້ວ ແລະ ທັງເປັນການຈັດຕັ້ງປະຕິບັດບົດ ບັນທຶກຮ່ວມມືທີ່ສອງກະຊວງປ້ອງກັນຄວາມສະຫງົບ ລາວ-ຫວຽດນາມ ໄດ້ກຳນົດແລ້ວ.

 

ນອກນັ້ນ, ຍັງໄດ້ຮັບຟັງການການລາຍງານການຄວາມຄືບໜ້າການຈັດຕັ້ງ ປະຕິບັດໂຄງການໄລຍະຕົ້ນ ແລະ ທິດທາງແຜນ ການໃນຕໍ່ໜ້າ. ພ້ອມດຽວກັນນັ້ນ, ໄດ້ພ້ອມກັນຮັບຟັງການນໍາສະເໜີບົດຮຽນ ແລະ ຜົນສໍາເລັດຂອງການຈັດຕັ້ງປະຕິບັດໂຄງການສ້າງຖານ ຂໍ້ມູນພົນລະເມືອງ ແລະ ບັດປະຈຳຕົວ ຢູ່ ສສ ຫວຽດນາມ, ບົດລາຍງານຫຍໍ້ແຜນການຈັດຕັ້ງ ປະຕິບັດໂຄງການຖານຂໍ້ມູນພົນລະເມືອງ ແລະ ບັດປະຈຳຕົວ ຢູ່ ສປປ ລາວ; ບົດສະເໜີຂອງກະຊວງພາຍໃນກ່ຽວກັບການຫັນເປັນດີຈິຕອນຂອງ ສປປ ລາວ ແລະ ກະຊວງເຕັກໂນໂລຢີ ແລະ ການສື່ສານ ຈະສະເໜີການຫັນເປັນດີຈິຕອນຂອງ ສປປ ລາວ ແລະ ການປະກອບຄໍາເຫັນ ຂອງບັນດາກະຊວງ ແລະ ແຂວງຕື່ມອີກ.

 

ແຫຼ່ງ: ກະ​ຊວງ ປກ​ສ, ພາບ-ຂ່າວ: ສິລິພອນ