ວາງສີລາລຶກ ໂຄງການກໍ່ສ້າງຕຶກອະເນກປະສົງ "ແຄນຄູ່" ຢູ່ເຂດເສດຖະກິດໃໝ່ ສີທັນດອນ.

​ເຜີຍ​ແຜ່​ໂດຍ: admin|ຢ້ຽມ​ຊົມ: 4 ຄັ້ງ | ເວ​ລາ | 2025-05-04 04:22:47

ວັນທີ 22 ກຸມພາ 2023, ທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປລາວ ໃຫ້ກຽດເຂົ້າຮ່ວມພິທີວາງສີລາລຶກ ໂຄງການກໍ່ສ້າງຕຶກອາເນກປະສົງແຄນຄູ່ (ໄລຍະທີ 01 ຕຶກຕິບເຂົ້າ) ນອນຢູ່ໃນໂຄງການເຂດພັດທະນາເສດຖະກິດໃໝ່ສີທັນດອນ, ເມືອງໂຂງ ແຂວງຈຳປາສັກ".

(1). ໃນໂອກາດນີ້, ທ່ານ ລາຕີ ສີສຸພັນນະວົງ, ຮອງປະທານສະພາ ຜູ້ຖືຮຸ້ນບໍລິສັດ ຮ່ວມພັດທະນາສີທັນດອນ ຈໍາກັດ ໄດ້ລາຍງານໃຫ້ຮູ້ວ່າ:

1. ໂຄງການກໍ່ສ້າງຕຶກອະເນກປະສົງແຄນຄູ່ (ໄລຍະທີ 01 ຕຶກຕິບເຂົ້າ) ແມ່ນໜຶ່ງໃນບັນດາໂຄງການ ທີ່ນອນຢູ່ໃນແຜນ ການກໍ່ສ້າງ ແລະ ພັດທະນາໂຄງການເຂດພັດທະນາເສດຖະກິດໃໝ່ ສີທັນດອນ, ຕັ້ງຢູ່ເຂດ A ຂອງໂຄງການ (ເຂດບ້ານທ່າຄໍ້, ເມືອງໂຂງ, ແຂວງ ຈໍາປາສັກ) ໂດຍໄດ້ເຊັນສັນຍາກັບລັດຖະບານແຫ່ງ ສປປ !ລາວ ໃນວັນທີ 30 ມິຖຸນາ 2018, ມີເນື້ອທີ່ສໍາປະທານທັງໝົດ 9.846 ເຮັກຕາ, ແບ່ງອອກເປັນ 11 ເຂດ ແລະ 06 ໄລຍະການພັດທະນາ;

2. ຕຶກຕິບເຂົ້າ ແມ່ນນອນຢູ່ໃນໄລຍະທີ 01, ມີຈຳນວນ 02 ຕຶກ, ແຕ່ລະຕຶກສູງ 62 ແມັດ ແລະ ມີ 13 ຊັ້ນ, ມີເນື້ອທີ່ປຸກສ້າງທັງໝົດ 6,7 ເຮັກຕາ, ມູນຄ່າການກໍ່ສ້າງ ປະມານ 200 ລ້ານໂດລາສະຫະລັດ,​ຈະໃຊ້ເວລາການກໍ່ສ້າງປະມານ 03 ປີ, ເມື່ອສ້າງສຳເລັດຈະສາ ມາດຮອງຮັບນັກທ່ອງທ່ຽວໄດ້ຫຼາຍກວ່າ 2.000 ຄົນ/ມື້;

3. ສ່ວນການກໍ່ສ້າງໄລຍະທີ 02 ແມ່ນຕຶກແຄນຄູ່ ມີ 02 ຕຶກ, ແຕ່ລະຕຶກສູງ 248.98 ແມັດ ແລະ ມີ 63 ຊັ້ນ, ມູນຄ່າການກໍ່ສ້າງ ປະມານ 800 ລ້ານໂດລາສະຫະລັດ;

4. ເມື່ອການກໍ່ສ້າງສຳເລັດທັງ 02 ໄລຍະ ຈະເຮັດໃຫ້ເຂດດັ່ງກ່າວ ກາຍເປັນໃຈກາງທາງດ້ານໂຮງແຮມ, ທຸລະກິດ, ການຄ້າ, ວັດທະນະທໍາ, ຄວາມບັນເທີງ ແລະ ສັນຍາລັກ ຂອງເຂດສີ່ພັນດອນ ກໍ່ຄື ສປປລາວ ອີກໜຶ່ງແຫ່ງເວົ້າລວມ;

5. ເວົ້າສະເພາະ, ຈະເປັນໂຮງແຮມ 05 ດາວ ລະດັບສາກົນແບບສະໄໝ ທີ່ກວມລວມເປັນສະຖານທີ່ພັກຜ່ອນ, ທຸລະກິດ, ການຄ້າ, ການປະຊຸມ, ຄວາມບັນເທີງ, ການສະແດງ, ໂຮງແຮມ ແລະ ອື່ນໆ ປະກອບສ່ວນ​ດຶງ​ດູດ​ເອົາ​ນັກ​ທ່ອງ​ທ່ຽວ ເຂົ້າມາທ່ຽວ ສປປລາວ, ​ສ້າງວຽກ​ເຮັດ​ງານ​ທຳ​ ແລະ ​ນຳ​ເອົາ​ຜົນ​ປະ​ໂຫຍດ​ມາໃຫ້​ປະຊາຊົນທ້ອງຖິ່ນ ກໍ່ຄືການ​ພັດ​ທະ​ນາ​ເສດ​ຖະ​ກິດ-​ສັງ​ຄົມ ຢູ່​ທ້ອງ​ຖິ່ນ;

(2). ໃນໂອກາດດຽວກັນ, ທ່ານນາຍົກລັດ ຖະມົນຕີ ກໍ່ໃຫ້ກຽດມີຄຳເຫັນຕໍ່ພິທີ ໂດຍໄດ້:

1. ສະແດງຄວາມຍ້ອງຍໍຊົມເຊີຍ ພາກສ່ວນຮັບຜິດຊອບໂຄງການ ທີ່ໄດ້ເສຍສະຫຼະ, ສຸມສະຕິປັນຍາ ແລະ ເຫື່ອແຮງ ໃນການກະກຽມ ແລະ ລິເລີ່ມໂຄງການນີ້ ແຕ່ປີ 2018 ມາຮອດປະຈຸບັນ ໄດ້ຮັບຜົນສໍາເລັດຈຳນວນໜຶ່ງ ທີ່ໜ້າຊື່ນຊົມຍິນດີ ເປັນກ້າວໆມາ;

2. ພ້ອມທັງໄດ້ຕີລາຄາວ່າ ໂຄງການນີ້ ແມ່ນໜຶ່ງໃນບັນດາຄວາມພະຍາຍາມ ແລະ ຄວາມມຸ້ງມາດປາຖະໜາ ຂອງລັດຖະບານ ກໍຄືທ້ອງຖິ່ນ ແລະ ປະຊາຊົນບັນດາເຜົ່າ ໃນການພັດທະນາເຂດດັ່ງກ່າວ ໃຫ້ກາຍເປັນເຂດຕົວເມືອງໃໝ່ທີ່ທັນສະໄໝຮອບດ້ານ, ມີຄວາມສະຫງົບ -ປອດໄພ, ເປັນເຂດສີຂຽວ, ມີພື້ນຖານເສດຖະກິດທີ່ເຂັ້ມແຂງ, ສັງຄົມສີວິໄລ, ຍຸຕິທຳ, ເສີມສ້າງອະລິຍະທຳ ແລະ ວັດທະນະທຳຂອງຊາດ;

3. ຮັບປະກັນການພັດທະນາແບບຍືນຍົງ ແລະ ຕິດພັນກັບການປົກປັກຮັກສາຊີວະນາໆພັນ, ລວມທັງ ການສ້າງພື້ນຖານໂຄງລ່າງ ແລະ ສິ່ງສາທາລະນຸປະໂພກ;

4. ພ້ອມກັນນັ້ນ ກໍ່ເປັນໂຄງການໜຶ່ງ ທີ່ນອນຢູ່ໃນແຜນພັດທະນາເສດຖະກິດ-ສັງຄົມ ແຫ່ງຊາດ 05 ປີ ຄັ້ງທີ IX (2021-2025) ກໍ່ຄືການຈັດຕັ້ງປະຕິ ບັດຍຸດທະສາດການພັດທະນາເສດຖະກິດສັງຄົມ ໄລຍະ 10 ປີ (2016-2025) ແລະ ວິໄສທັດຮອດປີ 2030;

5. ອີກດ້ານໜຶ່ງ ກໍ່ຍັງເປັນການຊຸກຍູ້, ສົ່ງເສີມການລົງທຶນໃຫ້ນັກລົງທຶນທັງພາຍໃນ ແລະ ຕ່າງປະເທດ ໃຫ້ເຂົ້າມາລົງທຶນຢູ່ພາຍໃນແຂວງຈຳປາສັກ ໃຫ້ນັບມື້ນັບຫຼາຍຂຶ້ນ ແລະ ເຮັດໃຫ້ເສດຖະກິດພາຍໃນແຂວງ ໄດ້ຮັບການພັດທະນາຢ່າງຕໍ່ເນື່ອງ ແລະ ເປັນໄປຕາມໂຄງປະກອບເສດຖະກິດ ທີ່ຫັນປ່ຽນຕາມທິດຫັນເປັນອຸດສາຫະກໍາ ແລະ ທັນສະໄໝ;

6. ອັນສໍາຄັນ, ທ່ານນາຍົກລັດຖະມົນຕີ ໄດ້ຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງ ທັງສູນກາງ ແລະ ທ້ອງຖິ່ນ, ຜູ້ພັດທະນາ, ນັກລົງທຶນ ແລະ ປະຊາຊົນທຸກທົ່ວໜ້າ ຈົ່ງໄດ້ຮ່ວມແຮງຮ່ວມໃຈກັນ ເຂົ້າຮ່ວມ, ອຳນວຍຄວາມສະດວກ ແລະ ປະຕິບັດໂຄງການໃຫ້ມີຜົນສຳເລັດຕົວຈິງ ໄວຂຶ້ນ ແລະ ຫຼາຍກິດຈະການຕາມແຜນການທີ່ວາງໄວ້;

7. ຫຼັງຈາກນັ້ນ, ທ່ານ ນາຍົກລັດຖະມົນຕີ ກໍ່ໄດ້ໃຫ້ກຽດວາງສີລາລຶກ, ຕັດແຖບຜ້າ ແລະ ລັ່ນຄ້ອງ 09 ບາດ ເພື່ອເປີດການກໍ່ສ້າງ ຢ່າງເປັນທາງການ;

(3). ໃນໂອກາດທີ່ເດີນທາງເຂົ້າຮ່ວມພິທີຄັ້ງນີ້, ທ່ານ ນາຍົກລັດຖະມົນຕີ ຍັງໄດ້ໄປຕິດຕາມກວດກາເບິ່ງໂຄງການນິຄົມອຸດສາຫະກຳການປະມົງປາສະຫວາຍແມ່ນໍ້າຂອງ ທີ່ບ້ານບຶງງາມ, ເມືອງໂຂງ;

(4). ປະຊຸມພົບປະໂອ້ລົມ ແລະ ໃຫ້ທິດຊີ້ນຳ ຕໍ່ຜູ້ພັດທະນາເຂດເສດຖະກິດໃໝ່ສີທັນດອນ ແລະ ຂະແໜງການກ່ຽວຂ້ອງຂອງລັດ ເປັນຕົ້ນ:

1. ໃຫ້ເອົາໃຈໃສ່ຕໍ່ການຊົດ ເຊີຍຜົນກະທົບ ຕໍ່ປະຊາຊົນ ທີ່ຖືກຜົນກະທົບຈາກໂຄງການ ຢ່າງສົມເຫດສົມຜົນ, ຮັບປະກັນຄວາມສະຫງົບ ແລະ ຍຸຕິທຳ, ລວມທັງ ການສ້າງອາຊີບ ແລະ ຈັດສັນທີ່ຢູ່ອາໄສ ໃຫ້ແກ່ເຂົາເຈົ້າ ມີຊີວິດການເປັນຢູ່ດີຂຶ້ນກວ່າເກົ່າ ແລະ ຍືນຍົງ;

2. ກວດກາ ແລະ ປັບປຸງຄືນ ແຜນການພັດທະນາ ກໍ່ຄືບົດວິພາກເສດຖະກິດ, ສັນຍາ ແລະ ເອກະສານອື່ນໆ ທີ່ກ່ຽວ ຂ້ອງຂອງໂຄງການ ໃຫ້ສອດຄ່ອງກັບຕົວຈິງ ທັງດ້ານເງື່ອນໄຂ, ກົດໝາຍ ແລະ ລະບຽບການຕ່າງໆ; ພິຈາລະນາ ປັບປຸງໄລຍະການກໍ່ສ້າງໃຫ້ສັ້ນ ຫຼື ໄວຂຶ້ນກວ່າເກົ່າ;

3. ປັບປຸງລະບົບການຈັດຕັ້ງ ຄະນະຄຸ້ມຄອງເຂດເສດຖະກິດພິເສດ ແຂວງຈຳປາສັກ ໃຫ້ແທດເໝາະກັບຕົວຈິງກວ່າເກົ່າ;

4. ເອົາໃຈໃສ່ພັດທະນາບັນດາແຫຼ່ງທ່ອງທ່ຽວ ໃນແຂວງຈຳປາສັກ ໃຫ້ຫຼາຍຂຶ້ນ;

5. ກວດກາ ແລະ ຂຶ້ນທະບຽນທີ່ດິນ ໂຄງການພັດທະນາຕ່າງໆ ເພື່ອຈັດເກັບລາຍຮັບຈາກທີ່ດິນດັ່ງກ່າວ ຢ່າງຖືກຕ້ອງ ແລະ ຄົບຖ້ວນ (ຂໍ້ມູນ ກົມປະຊາສຳພັນ ຫສນຍ).