ຄຳ​ມ່ວນ ວາງສີລາລືກໂຄງການກໍ່ສ້າງໂຮງຮຽນມັດທະຍົມ-ວິຊາຊີບ ມິດຕະພາບລາວ-ຫວຽດນາມ

​ເຜີຍ​ແຜ່​ໂດຍ: admin|ຢ້ຽມ​ຊົມ: 3 ຄັ້ງ | ເວ​ລາ | 2025-05-04 04:13:37

ວັນທີ 5 ມັງກອນ 2022 ຜ່່ານມາ ທີ່ໂຮງຮຽນ ມ.ສ ສອງເໜືອງ ເມືອງໜອງບົກ ແຂວງຄຳມ່ວນ ໄດ້ວາງສີລາລືກໂຄງການກໍ່ສ້າງໂຮງຮຽນມັດທະຍົມ - ວິຊາຊີບ ຕົວແບບມິດຕະພາບລາວ - ຫວຽດນາມ, ໃຫ້ກຽດເຂົ້າຮ່ວມໃນພິທີໂດຍ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ທ່ານ ນາງ ສີສຸກ ວົງວິຈິດ ຮອງລັດຖະມົນຕີກະຊວງສຶກສາທິການ ແລະ ກິລາ, ມີປະທານສະພາປະຊາຊົນແຂວງ, ທ່ານ ນາງ ຫວູ ຕູ ແອງ ທີ່ປຶກສາສະຖານເອກອັກຄະລັດຖະທູດແຫ່ງ ສສ ຫວຽດນາມ ປະຈຳລາວ, ມີກົມທີ່ກ່ຽວຂ້ອງ ຕະຫຼອດຮອດອຳນາດການປົກຄອງບ້ານເຂົ້າຮ່ວມ.

ໂຄງການກໍ່ສ້າງໂຮງຮຽນດັ່ງ​ກ່າວ, ແມ່ນໄດ້ຮັບທຶນ​ຊ່ວຍ​ເຫຼືອ ແລະ ເປັນຂອງຂວັນຈາກ ທ່ານ ຫງຽນ ຊວນ ຟຸກ ປະທານປະເທດ ແຫ່ງ ສສ ຫວຽດນາມ ຊຶ່ງໄດ້ເດີນທາງມາຢ້ຽມຢາມ ສປປ ລາວ ໃນເດືອນສິງຫາ 2021 ຜ່ານມາ ແລະ ໃນໂອກາດດັ່ງກ່າວ ທ່ານປະທານປະເທດ ແຫ່ງ ສສ ຫວຽດນາມ ໄດ້ມອບທຶນໃນການກໍ່ສ້າງໂຮງຮຽນມັດ​ທະ​ຍົມ-ວິຊາຊີບຢູ່ແຂວງຄຳມ່ວນ 5 ລ້ານໂດລາ. ໃນນີ້, ໄດ້ຈັດສັນງົບປະມານເຂົ້າໃນການປັບປຸງພື້ນຖານໂຄງລ່າງ 3 ລ້ານໂດລາ, ນຳໃຊ້ເຂົ້າໃນການສະໜອງອຸປະກອນເຕັກນິກ ແລະ ວັດສະດຸ 1 ລ້ານກວ່າໂດລາ ແລະ ວຽກງານວິຊາການ, ຝຶກອົບຮົມ, ບໍລິຫານ 5 ແສນໂດລາ ໂດຍມອບໃຫ້ ບໍລິສັດ ຈິດຈະເລີນ ກໍ່ສ້າງຈຳກັດເປັນຜູ້ຮັບເໜົາກໍ່ສ້າງໃນມູນຄ່າ 2 ລ້ານກວ່າໂດລາ ຊຶ່ງປະກອບມີການກໍ່ສ້າງອາຄານຮຽນ 4 ຫຼັງ, ອາຄານບໍລິຫານ 1 ຫຼັງ, ກໍ່ສ້າງຫໍພັກ 2 ຊັ້ນ 3 ຫຼັງ, ຫ້ອງທົດລອງ 1 ຫຼັງ, ຫ້ອງບໍລິຫານ 1 ຫຼັງ, ໂຮງຊ່າງ 4 ຫຼັງ (ໄຟຟ້າ, ສ້ອມແປງ, ກໍ່ສ້າງເຄຫາສະຖານ ແລະ ກະສິກໍາ), ກໍ່ສ້າງລະບົບຫ້ອງນໍ້າຊາຍ - ຫ້ອງນໍ້າຍິງ, ກໍ່ສ້າງລະບົບເສັ້ນທາງສັນຈອນພາຍໃນໂຮງຮຽນ, ກໍ່ສ້າງລະບົບນໍ້າໃຊ້ - ນໍ້າເສຍ ແລະ ອື່ນໆ ແລະ ຈະໃຫ້ສຳເລັດການກໍ່ສ້າງ ພາຍໃນ 11 ເດືອນ ຕາມແຜນ​ການຂອງໂຄງການ.

ທ່ານ ນາງ ຫວູ ຕູແອງ ໄດ້ກ່າວວ່າ: ການກໍ່ສ້າງໂຮງຮຽນແບບພິເສດຄັ້ງນີ້ ແມ່ນສະແດງໃຫ້ເຫັນເຖິງຄວາມຍິ່ງໃຫຍ່ແຫ່ງການຮ່ວມມືຮອບດ້ານລະຫວ່າງສອງພັກສອງລັດ ແລະ ປະຊາຊົນທັງສອງປະເທດຫວຽດນາມ - ລາວ, ລາວ - ຫວຽດນາມ ສະແດງໃຫ້ເຫັນເຖິງຄວາມເອົາໃຈໃສ່ຂອງການນຳທັງສອງປະເທດ ສຳລັບພາລະກິດໃນການສຶກສາ ແລະ ພັດທະນາໂຄງລ່າງພື້ນຖານ ແລະ ບຸກຄະລາກອນຂອງລາວ ເວົ້າສະເພາະກໍຄືແຂວງຄຳມ່ວນ ສະແດງໃຫ້ເຫັນເຖິງຄວາມສະໜິດຕິດພັນ ແລະ ຄວາມຮັກແພງຂອງ ທ່ານ ຫງຽນ ຊວນ ຟຸກ ທີ່ມີຕໍ່ຄົນຮຸ່ນໃໝ່ຂອງລາວ ເພື່ອສືບຕໍ່ໃນການຮັກສາຄວາມສາມັກຄີ ອັນຍິ່ງໃຫຍ່ໃນການພົວພັນຮ່ວມມື. ໂຄງການນີ້ຈະສຳເລັດ ແລະ ເປີດການນຳໃຊ້ໃນທ້າຍປີ 2022 ເພື່ອເປັນການສະເຫຼີມສະຫຼອງ ແລະ ຂໍ່ານັບຊົມເຊີຍ 2 ວັນປະຫວັດສາດ ຄື: 60 ປີ ແຫ່ງການສ້າງຕັ້ງສາຍພົວພັນການທູດ ຫວຽດນາມ - ລາວ ແລະ 45 ປີ ວັນເຊັນສົນທິສັນຍາມິດຕະພາບ ແລະ ການຮ່ວມມື ຫວຽດນາມ-ລາວ ແລະ ລາວ-ຫວຽດນາມ.

ໂອກາດນີ້, ທ່ານ ວັນໄຊ ພອງສະຫວັນ ໄດ້ກ່າວຕໍ່ພິທີວ່າ: ໂຄງການກໍ່ສ້າງໂຮງຮຽນວິຊາຊີບຕົວແບບມິດຕະພາບ - ລາວຫວຽດນາມ ແມ່ນໂຄງການທີ່ມີຄວາມໝາຍ ຄວາມສໍາຄັນ ທີ່ສຸດຕໍ່ແຜນພັດທະນາຂະແໜງການສຶກສາທິການ ແລະ ກິລາ ກໍຄືແຜນພັດທະນາເສດຖະກິດ - ສັງຄົມ ຂອງແຂວງດ້ວຍທຶນຊວຍເຫຼືອ ເປັນຂອງຂວັນຈາກພັກກອມມູນິດ ແລະ ລັດຖະບານຫວຽດນາມ ຊຶ່ງໄດ້ກຳນົດເອົາໂຮງຮຽນມັດທະຍົມສອງເໜືອງ ເປັນບ່ອນສ້າງຕັ້ງຕິດພັນກັບສະຖານທີ່ປະຫວັດສາດການເຄື່ອນໄຫວຂອງ ປະທານ ໂຮ່ຈິມິນ. ໂຄງການກໍ່ສ້າງໂຮງຮຽນວິຊາຊີບຕົວແບບແຫ່ງນີ້ເປັນໂຮງຮຽນແຫ່ງທຳອິດ ຂອງແຂວງທີ່ປະຕິບັດ 2 ຫຼັກສູດ ການຮຽນ - ການສອນຄວບຄູ່ກັນໄປ.

(ແຫຼ່ງ: ປະ​ຊາ​ຊົນ, ຂ່າວ-ພາບ: ມະນີວັນ).