ວາງສີລາລຶກໂຄງການກໍ່ສ້າງອານຸສາວະລີຮູບຫຼໍ່ເຄິ່ງຄີງຂອງປະທານໄກສອນ ພົມວິຫານ

​ເຜີຍ​ແຜ່​ໂດຍ: admin|ຢ້ຽມ​ຊົມ: 1 ຄັ້ງ | ເວ​ລາ | 2025-05-04 03:57:28

ຫວ່າງບໍ່ດົນມານີ້, ທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ ຊີ້ນໍາວຽກງານວັດທະນະທໍາ-ສັງຄົມແຂວງ ໄດ້ຮ່ວມວາງສີລາລຶກໂຄງການກໍ່ສ້າງອານຸສາວະລີຮູບຫຼໍ່ເຄິ່ງຄີງຂອງປະທານໄກສອນພົມວິຫານ ຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ ທີ່ເດີ່ນສວນສາທາລະນະຂອງເມືອງ ໄຊພູທອງ ແຂວງສະຫວັນນະເຂດ, ມີຍາທ່ານ ທອງ ດໍາຈັນທະວົງ ເຈົ້າຄະນະ ອພສ ເມືອງໄຊພູທອງ ພ້ອມດ້ວຍການນໍາຂັ້ນສູງຂອງເມືອງ ແລະ ຜູ້ທີ່ມີຈິດໃຈເຫຼື້ອມໃສສັດທາເຂົ້າຮ່ວມ

ໃນພິທີ ທ່ານ ນາງ ດາວວອນ ໄຊສຸລຽນ ເຈົ້າເມືອງໄຊພູທອງ ໄດ້ຂຶ້ນລາຍງານໃນພິທີວາງສີລາລຶກໂຄງການກໍ່ສ້າງອານຸສາວະລີຮູບຫຼໍ່ເຄິ່ງຄີງຂອງປະທານໄກສອນພົມວິຫານ ຜູ້ນໍາທີ່ແສນຄົບລົບຮັກຂອງປວງຊົນລາວທັງຊາດ ທີ່ເປັນບັນພະບູລຸດ ທີ່ມີຄວາມອົງອາດກ້າຫານ ກອບກູ້ເອົາເອກະລາດ ປະຊາທິປະໄຕ ແລະ ຜືນແຜ່ນ ດິນອັນຄົບຖ້ວນມາສູ່ປະຊາຊົນບັນດາເຜົ່າ ໄດ້ຮໍ່າຮຽນເອົາຄຸນງາມຄວາມດີຂອງປະທານໄກສອນ ພົມວິຫານ ຜູ້ທີ່ອຸທິດຕົນ ເພື່ອພາລະກິດປະຕິວັດ ປົດປ່ອຍຊາດ ແລະ ປະຊາຊົນບັນດາເຜົ່າ, ເພີ່ນໄດ້ສຸມສະຕິປັນຍາຄວາມຮູ້-ຄວາມສາມາດ ແລະ ຄວາມສະຫຼາດສະຫຼຽວຂອງຕົນຢ່າງບໍ່ຮູ້ອິດເມື່ອຍໃນພາລະກິດກອບກູ້ເອກະລາດຕ້ານການຮຸກຮານຂອງພວກລ່າເມືອງຂຶ້ນທັງແບບເກົ່າ ແລະ ແບບໃໝ່ທີ່ຍືດເຍື້ອຍາວນານ, ທັງເປັນຜູ້ກໍ່ຕັ້ງກອງລາດຊະວົງ ຊຶ່ງເປັນຕົ້ນກໍາເນີດຂອງກອງທັບປະຊາຊົນລາວ ແລະ ເປັນຜູ້ສ້າງຕັ້ງພັກປະຊາຊົນລາວ ຫຼື ພັກ ປະຊາຊົນ ປະຕິວັດລາວ ໃນປັດຈຸບັນ.

ສໍາລັບໂຄງການກໍ່ສ້າງອານຸສາວະລີຂອງປະທານໄກສອນ ພົມວິຫານ ແມ່ນຈະໄດ້ລົງມືກໍ່ສ້າງຕາມແຜນຜັງ,ເຕັກນິິກວິຊາການ, ຂະໜາດຮູບຫຼໍ່ເຄິ່ງຄີງສູງ 0,75 ແມັດ ຂອງປະທານໄກສອນ ພົມວິຫານ ແລະ ປະກອບມິການການຕົບແຕ່ງປະດັບປະດາຖືກກັບການກໍານົດຂອງອານຸສອນສະຖານສູນກາງກໍານົດອອກໃນທົ່ວປະເທດ, ສ່ວນໂຄງສ້າງເສດຕະສັດປະກອບມີລະບົບໄຟຟ້າ, ນໍ້າປະປາ, ມີຮົ້ວອ້ອມຮອບ ແລະ ໜ້າວຽກອື່ນໆ. ສ່ວນງົບປະມານຂອງແຂວງປະກອບ 300 ລ້ານກີບ ແລະ ທຶນປະກອບສ່ວນຈາກການຈັດງານບຸນຜ້າປ່າສາມັກຄີພາຍໃນເມືອງ ຈໍານວນ 84,550,000 ກີບ.

(ຂ່າວ: ສະຫວັນ)