ມ.ສ ລຽວໂຕວ໌ ກຽມສ້າງອາຄານຫຼັງໃໝ່ບັນຈຸນັກຮຽນໄດ້ 1.200 ກວ່າຄົນ.

​ເຜີຍ​ແຜ່​ໂດຍ: admin|ຢ້ຽມ​ຊົມ: 1 ຄັ້ງ | ເວ​ລາ | 2025-05-04 03:37:18

11 ກຸມພາ 2022 ນີ້ ທີ່ໂຮງຮຽນ ມ.ສ ລຽວໂຕວ໌ ນະຄອນຫຼວງວຽງຈັນ ໄດ້ມີພິທີວາງສີລາລຶກ ໂຄງການປຸກສ້າງອາຄານຮຽນໃໝ່ທີ່ໃຫຍ່ ໂດຍເປັນກຽດເຂົ້າຮ່ວມຂອງທ່ານ ສົມປະສົງ ຈັນທະວົງ ຕາງໜ້າໂຮງຮຽນ ມ.ສ ລຽວໂຕວ໌, ທ່ານ ເລັ່ງ ສະຫວັນວາລີ ຕາງໜ້າຜູ້ອາວຸໂສຊາວຈີນ ແລະຄະນະກໍາມະການປຸກສ້າງ, ທ່ານ ທອງດີ ແກ້ວມະນີທອງ ຫົວໜ້າພະແນກສຶກສານະຄອນຫຼວງວຽງຈັນ ພ້ອມດ້ວຍແຂກຖືກເຊີນເຂົ້າຮ່ວມ.

ໃນໂອກາດນີ້, ທ່ານ ເລັ່ງ ສະຫວັນວາລີ ໄດ້ກ່າວວ່າ: ທຶນປຸກສ້າງອາຄານໃໝ່ຫຼັງນີ້ລວມມີ 800.000 ໂດລາສະຫະລັດ ຫຼື 9 ຕື້ກວ່າກີບ,ໄດ້ຮັບການປຸກລະດົມມາໄດ້ຫຼາຍປີແລ້ວຈາກລູກສິດເກົ່າຂອງໂຮງຮຽນລຽວໂຕວ໌ທີ່ຢູ່ລາວ ແລະຕ່າງປະເທດ ລວມເຖິງປະຊາຊົນທົ່ວໄປໃນສັງຄົມ.ນອກນັ້ນ, ລັດຖະບານຈີນຍັງຈະຊ່ວຍເຫຼືອອຸປະກອນການຮຽນ,ລວມເຖິງສົ່ງຄູອາຈານສອນມາຊ່ວຍເຫຼືອຕື່ມອີກ.ປັດຈຸບັນໂຮງຮຽນລຽວໂຕວ໌ມີນັກສຶກສາ 3000 ກວ່າຄົນ, ລູກຫຼານນັກຮຽນລາວມີ 2000 ກວ່າຄົນ ເຫຼືອນັ້ນແມ່ນນັກຮຽນຕ່າງປະເທດ.

ທ່ານ ສະໝານ ບົວຜາວົງ ອາຈານໂຮງຮຽນ ມ.ສ ລຽວໂຕວ໌ ໄດ້ໃຫ້ສໍາພາດຕໍ່ນັກຂ່າວ CRI ວ່າ: ພວກເຮົາຮູ້ສຶກດີໃຈຫຼາຍເພາະພວກເຮົາໄດ້ຄອງຄອຍມາເປັນເວລາຫຼາຍປີ.ຫາກສ້າງສຳເລັດອາຄານ

ໃໝ່ຫຼັງນີ້ຈະສາມາດຮັບນັກຮຽນໄດ້ອີກ1.000 ກວ່າຄົນ ເຊິ່ງຈະເປັນໂຮງຮຽນຈີນທີ່ໃຫຍ່ທີ່ສຸດໃນປະເທດລາວ.ອັນນີ້ກໍຖືວ່າເປັນສິ່ງທີ່ທ້າທາຍແລະພວກເຮົາຕ້ອງໄດ້ສຸມກຳລັງເພື່ອເຮັດໃຫ້ໄດ້,ເມື່ອມີອາຄານຮຽນດີແລ້ວພວກເຮົາກໍຕ້ອງມີຄວາມຮູ້ຄວາມສາມາດໄປສິດສອນເພື່ອໃຫ້ເກີດດອກອອກຜົນໃຫ້ສົມກັບນັກຮຽນຢາກມາຮຽນກັບພວກເຮົາ.

ໂອກາດນີ້, ຜູ້ປົກຄອງນັກຮຽນໄດ້ໃຫ້ສໍາພາດຕໍ່ນັກຂ່າວ CRI ວ່າ: ໂຮງຮຽນນີ້ເປັນໂຮງຮຽນສອນ2ພາສາກໍຄື: ພາສາລາວ ແລະພາສາຈີນ ເຊິ່ງທາງຄອບຄົວກໍ່ມີຈຸດປະສົງຢາກໃຫ້ລູກຫຼານໄດ້ຮຽນພາສາຈີນ. ເພາະພາສາຈີນໃນທຸກມື້ນີ້ກໍເປັນພາສາສາກົນພາສາໜຶ່ງຂອງໂລກທີ່ມີຄົນໃຊ້ຫຼາຍ ແລະນອກຈາກຈະຮຽນ 2 ພາສາເປັນຫຼັກແລ້ວ ກໍ່ຍັງມີພາສາອັງກິດເພີ່ມອີກ. ແຕ່ສໍາລັບພາສາອັງກິດແມ່ນ ປ3 ຈຶ່ງຈະໄດ້ຮຽນ ແລະນີ້ກໍເທົ່າກັບວ່າໄດ້ຮຽນ3ພາສາ.ຂ້າພະເຈົ້າຮູ້ສຶກດີໃຈຫຼາຍ ແລະລູກທີ່ມາຮຽນຢູ່ນີ້ກໍມີຄວາມດີໃຈຫຼາຍທີ່ຈະໄດ້ມີຕຶກອາຄານໃໝ່, ເດີ່ນໂຮງຮຽນກໍກວ້າງຂວາງ. ໃນອະນາຄົດຢາກເຊີນຊວນລູກຫຼານໃຫ້ເຂົ້າມາຮຽນຢູ່ໂຮງຮຽນແຫ່ງນີ້ ເພາະວ່າທາງໂຮງຮຽນແມ່ນມີການຮັບປະກັນເລື່ອງການສອນທີ່ໄດ້ມາດຕະຖານ, ຄູ-ອາຈານ ສອນກໍມີຄຸນນະພາບມີທັງຄູ່ສອນຄົນຈີນແລະລາວ.

ອີງຕາມຂໍ້ມູນໃຫ້ຮູ້ວ່າ: ອາຄານຮຽນຫຼັງໃໝ່ນີ້ມີ 4 ຊັ້ນ, 28 ຫ້ອງຮຽນ,ກວມເອົາເນື້ອທີ່ 3.400 ຕາຕະລາງແມັດ ເຊິ່ງຜູ້ຮັບເໝົາກໍ່ເປັນບໍລິສັດຄົນລາວ,ກຳນົດເວລາການກໍ່ສ້າງໃຫ້ສຳເລັດຕາມສັນຍາແມ່ນ 1 ປີ, ໃນອາຄານຫຼັງນີ້ປະກອບມີອະນຸບານຈົນຮອດມັດທະຍົມຕອນປາຍ ແລະໃນອະນາຄົດຍັງຈະມີແຜນສ້າງມະຫາວິທະຍາໄລຕື່ມອີກ,ຊຶ່ງຈະເປັນເງື່ອນໄຂດີໃຫ້ແກ່ຜູ້ປົກຄອງເດັກແລະນັກຮຽນເອງທີ່ສົນໃຈຢາກຮຽນຢູ່ພາຍໃນປະເທດ.

ແຫຼ່ງ: ຊີ​ອາ​ໄອ