ພິທີວາງສີລາລຶກກໍ່ສ້າງສາຍສົ່ງໄຟຟ້າ 115/22 ກິໂລໂວນ.

​ເຜີຍ​ແຜ່​ໂດຍ: admin|ຢ້ຽມ​ຊົມ: 1 ຄັ້ງ | ເວ​ລາ | 2025-05-04 03:32:07

ວັນທີ 21 ພະຈິກນີ້, ທີ່ສະຖານີໄຟຟ້ານາໄຫ ນະຄອນຫຼວງວຽງຈັນ, ໄດ້ມີພິທີວາງສີລາລຶກໂຄງການກໍ່ສ້າງສາຍສົ່ງ ແລະ ສະຖານີໄຟຟ້າ 115/22 ກິໂລໂວນ ນາໄຫ-ດົງໂພສີ, ໂດຍເປັນກຽດເຂົ້າຮ່ວມຂອງທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານ Wang Wentien ເອກອັກຄະລັດຖະທູດ ຜູ້ມີອຳນາດເຕັມ ສປ ຈີນ ປະຈຳລາວ, ທ່ານ ໂຈງຢຽນໜິງ ຜູ້ອຳນວຍການໃຫຍ່ບໍລິສັດ TBEA, ພ້ອມນັ້ນ ຍັງມີທູດເສດຖະກິດ ແລະ ການຄ້າ ສປ ຈີນ ປະຈຳລາວ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ດວງສີ ພາຣາຍົກ ຮອງຜູ້ອຳນວຍການໃຫຍ່ ບໍລິສັດໄຟຟ້າລາວ (ຟຟລ) ກ່າວວ່າ: ໂຄງການກໍ່ສ້າງສາຍສົ່ງ ແລະ ສະຖານີໄຟຟ້າ 115/22 ກິໂລໂວນ ນາໄຫ-ດົງໂພສີ ແມ່ນແຜນງານໜຶ່ງທີ່ສຳຄັນ ແລະ ນອນຢູ່ໃນແຜນແມ່ບົດ ເພື່ອພັດທະນາລະບົບໄຟຟ້າຢູ່ປະເທດລາວ ແຕ່ນີ້ຮອດປີ 2030 ແນໃສ່ສ້າງເງື່ອນໄຂ ແລະ ຂຸດຄົ້ນທຸກຄວາມສາມາດບົ່ມຊ້ອນ ເພື່ອເຮັດໃຫ້ຂະແໜພະລັງງານໄຟຟ້າໄດ້ຮັບການຈັດຕັ້ງປະຕິບັດດ້ວຍຈັງຫວະທີ່ຕໍ່ເນື່ອງ ແລະ ໝັ້ນທ່ຽງ ກາຍເປັນກຳລັງແຮງເພື່ອຍູ້ການຂັບເຄື່ອນເສດຖະກິດແຫ່ງຊາດທັງໃນສະເພາະໜ້າ ແລະ ໄລຍະຍາວ, ປະກອບສ່ວນສ້າງພື້ນຖານທີ່ໜັກແໜ້ນໃຫ້ແກ່ການພັດທະນາປະເທດຊາດກ້າວຂຶ້ນຕາມທິດສັງຄົມນິຍົມ, ພ້ອມນັ້ນ ໂຄງການດັ່ງກ່າວຍັງເປັນໂຄງການໜຶ່ງທີ່ສະໜອງພະລັງງານໄຟຟ້າໃຫ້ຂົງເຂດນະຄອນຫຼວງວຽງຈັນດ້ານໃຕ້, ພ້ອມກັບເຂດເສດຖະກິດໃໝ່ ແລະ ເຂດອຸດສາຫະກຳບໍລິເວນໃກ້ຄຽງ ທີ່ກວມເອົາສອງເມືອງຄື: ຫາດຊາຍຟອງ ແລະເມືອງໄຊເສດຖາ, ໂດຍການກໍ່ສ້າງສາຍສົ່ງ 115 ກິໂລໂວນ ຈາກສະຖານີດົງໂພສີ ຫາ ສະຖານີນາໄຫ ມີໄລຍະ 10 ກິໂລແມັດ, ໃນນີ້ ສະເພາະສະຖານີນາໄຫ ຊຶ່ງເປັນສະຖານີໃໝ່ທີ່ມີກຳລັງຕິດຕັ້ງ ລວມທັງໝົດ 100 ເມກາວັດອຳເປ (MVA) ແລະ ສະຖານີດົງໂພສີ ແມ່ນສ້າງ Bays 115 ກິໂລໂວນ 4 Bays ພ້ອມອຸປະກອນ ແລະ ເຄື່ອງອື່ນໆຄົບຊຸດ ລວມມູນຄ່າທັງໝົດ 76 ລ້ານໂດລາ ຊຶ່ງເປັນເງິນກູ້ນະໂຍບາຍພິເສດຈາກທະນາຄານ Exim Bank of China.

ໂອກາດດຽວກັນນັ້ນ ທ່ານ ຄຳມະນີ ອິນທິລາດ ກໍໄດ້ມີຄຳເຫັນບາງຕອນຊີ້ອອກ ວ່າ: ໃນຊຸມປີຜ່ານມາ, ກະຊວງພະລັງງານ ແລະ ບໍ່ແຮ່ໃນຖານະທີ່ເປັນເສນາທິການໃຫ້ແກ່ລັດຖະບານ ກໍໄດ້ວາງວິໄສທັດ, ຍຸດທະສາດ ແລະ ແຜນພັດທະນາອຸດສາຫະກຳພະລັງງານໄຟຟ້າ ໂດຍສະເພາະການຂຸດຄົ້ນທ່າແຮງບົ່ມຊ້ອນແຫຼ່ງນ້ຳທຳມະຊາດເພື່ອຜະລິດ ແລະ ສະໜອງກະແສໄຟຟ້າ ໃຫ້ພຽງພໍກັບຄວາມຕ້ອງການໃນການຊົມໃຊ້ຢູ່ພາຍໃນປະເທດ ແລະ ເພີ່ມທະວີການສົ່ງອອກໃຫ້ນັບມື້ຫຼາຍຂຶ້ນ, ບົນພື້ນຖານຮັບປະກັນການພັດທະນາພະລັງງານໄຟຟ້າ ທີ່ເປັນມິດກັບສິ່ງແວດລ້ອມ, ຜະລິດພະລັງງານທີ່ສະອາດ, ມີລັກສະນະຍືນຍົງ ແລະ ສູ້ຊົນເພື່ອເຮັດໃຫ້ ສປປ ລາວ ກາຍເປັນໃຈກາງດ້ານພະລັງງານຂອງອາຊຽນເທື່ອລະກ້າວ, ມາຮອດປະຈຸບັນລາວ ມີເຂື່ອນຜະລິດພະລັງງານໄຟຟ້າ ທັງໝົດ 47 ແຫ່ງ, ດ້ວຍກຳລັງຕິດຕັ້ງ 6.465 ເມກາວັດ ແລະ ສາມາດຜະລິດພະລັງງານໄຟຟ້າໄດ້ເຖິງ 35.120 ກິກະວັດໂມງຕໍ່ປີ, ພ້ອມນັ້ນ ຍັງມີ 53 ແຫ່ງ ທີ່ກໍາລັງກໍ່ສ້າງ, ຊຶ່ງຄາດວ່າຮອດປີ 2020-2021 ທີ່ຈະມາເຖິງ ລາວຈະມີແຫຼ່ງຜະລິດພະລັງງານໄຟຟ້າທັງໝົດ 100 ແຫ່ງ ດ້ວຍກໍາລັງຕິດຕັ້ງ 13.120 ເມກາວັດ ແລະ ມີກຳລັງການຜະລິດ 66.944 ກິໂລວັດໂມງຕໍ່ປີ, ໃນນັ້ນ 85% ແມ່ນສົ່ງອອກໄປຈຳໜ່າຍຢູ່ຕ່າງປະເທດ, ສະນັ້ນ ຖ້າໂຄງການນີ້ສຳເລັດກໍ່ຈະກາຍເປັນສ່ວນປະກອບທີ່ສຳຄັນ ແລະ ເປັນພື້ນຖານເຂົ້າໃນການພັດທະນາເສດຖະກິດ-ສັງຄົມ ຢູ່ໃນຂອບເຂດນະຄອນຫຼວງວຽງຈັນ ຊຶ່ງເປັນເຂດຍຸດທະສາດທີ່ສໍາຄັນໃນການຜະລິດກະສິກໍາ, ອຸດສາຫະກຳ, ການຜະລິດເປັນສິນຄ້າ, ເຂດໃຫ້ບໍລິການ ແລະ ອື່ນໆ ໃຫ້ມີຄວາມສະດວກ, ເພາະໂຄງການດັ່ງກ່າວ ຈະເນັ້ນຜ່ານເຂດຊຸມຊົນທີ່ເປັນເຂດພວມພັດທະນາໃນທຸກດ້ານຂອງເຂດເມືອງຫາດຊາຍຟອງ ເພື່ອຮັບປະກັນທາງດ້ານກະສິກຳແບບຄົບວົງຈອນ, ດ້ານອຸດສາຫະກຳ, ການຂົນສົ່ງ, ການປຸງແຕ່ງ, ການບໍລິການ ແລະ ອື່ນໆ ທີ່ພວມຂະຫຍາຍຕົວຢ່າງວ່ອງໄວຢູ່ໃນປະຈຸບັນນີ້.

ແຫຼ່ງ: ຊີ​ອາ​ໄອ