ວາງສີລາລຶກ ໂຄງການກໍ່ສ້າງສໍານັກກອງຮ້ອຍທະຫານຊາຍແດນ 214 ກອງທັບປະຊາຊົນລາວ

​ເຜີຍ​ແຜ່​ໂດຍ: admin|ຢ້ຽມ​ຊົມ: 1 ຄັ້ງ | ເວ​ລາ | 2025-05-04 03:23:43

​ ໂດຍ​ປະຕິບັດ​ຕາມ​ແຜນການ​​ເຄື່ອນ​ໄຫວ​ຈັດ​ຕັ້ງ​ງານ​ພົບ​ປະ​ແລກປ່ຽນ​ມິດ​ຕະພາບ​ປ້ອງ​ກັນຊາ​ດ​ ຢູ່​ເຂດຊາ​ຍ​ແດ​ນ ລາວ-ຫວຽດນາມ ຄັ້ງ​ທີ 2, ດັ່ງ​ນັ້ນ ​ໃນວັນ​ທີ 23 ຕຸລາ ນີ້ ສະຫາຍ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ​ແລະ ສະຫາຍ ພົນເອກ ຟານວັນຢາງ ກຳມະການກົມການເມືອງສູນກາງພັກກອມ​ມູນິດ​ຫວຽດນາມ ລັດຖະມົນຕີກະຊວງປ້ອງກັນປະເທດ ແຫ່ງ ສສ ຫວຽດນາມ, ພ້ອມ​ດ້ວຍ​ຄະນະຜູ້​ແທນ​ທັງ​ສອງ​ຝ່າຍ ໄດ້​​​ເຂົ້າ​ຮ່ວມ​ພິທີ​ວາງ​ສີ​ລາ​ລຶກ​ ໂຄງການກໍ່ສ້າງສໍານັກກອງຮ້ອຍທະຫານຊາຍແດນ 214 ກອງທັບປະຊາຊົນລາວ, ​​ເຊິ່ງ​ເປັນຂອງຂວັນ​ຈາກກອງ​ທັບ​ປະຊາຊົນຫວຽດນາມ.

ໃນພິທີ, ສະຫາຍ ພົນຈັດຕະວາ ຄໍາເມືອງ ໂຄດວົງຄຸນ ຫົວໜ້າການທະຫານ ກອງບັນຊາການທະຫານແຂວງ ຫົວພັນ ໄດ້ລາຍງານ ໃຫ້ຮູ້ວ່າ: ກອງຮ້ອຍທະຫານຊາຍແດນ 214 ປະກາດສ້າງຕັ້ງຂຶ້ນໃນວັນ 24 ສິງຫາ 2011 ເຊິ່ງໃນເມື່ອ ກ່ອນເປັນກອງຮ້ອຍປ້ອງກັນຊາຍແດນ ຂຶ້ນກັບກອງບັນຊາການທະຫານເມືອງສົບເບົາ. ຕໍ່ມາໃນປີ 2012 ກົມໃຫຍ່ເສນາທິການກອງທັບ ໄດ້ອອກຂໍ້ຕົກລົງ ສະບັບເລກທີ 1026/ກສນ, ລົງວັນທີ 16 ກໍລະກົດ 2012 ວ່າດ້ວຍການຫັນເອົາກອງຮ້ອຍປ້ອງກັນຊາຍແດນ ຂອງບັນດາເມືອງລຽບຕາມຊາຍແດນ ມາເປັນກອງຮ້ອຍທະຫານຊາຍແດນ ຂຶ້ນກັບກອງບັນຊາການທະຫານແຂວງ, ສະນັ້ນ ກອງບັນຊາການທະຫານແຂວງຫົວພັນ ຈິ່ງຕົກລົງຫັນເອົາກອງຮ້ອຍທະຫານຊາຍແດນຈຳນວນ 08 ກອງຮ້ອຍ ມາເປັນກອງຮ້ອຍທະຫານຊາຍແດນ ຂື້ນກັບກອງບັນຊາການທະຫານແຂວງ, ຊຶ່ງກອງຮ້ອຍທະຫານຊາຍແດນ 214 ກໍ່ແມ່ນໜຶ່ງ ໃນ 08 ກົມກອງ ດັ່ງກ່າວ ​ເຊິ່ງມີສໍານັກຕັ້ງຢູ່ບ້ານປ້ອງ, ເມືອງສົບເບົາ, ແຂວງຫົວພັນ ເພື່ອຮັບປະກັນໃຫ້ແກ່ການຊີ້ນໍາບັນຊາ ກໍາລັງເຮັດໜ້າທີ່ເຄື່ອນໄຫວຄຸ້ມຄອງ, ປ້ອງກັນຊາຍແດນ ​ໃຫ້ມີປະສິດທິຜົນ, ປະກອບສ່ວນສ້າງຊາຍແດນລາວ-ຫວຽດນາມ ໃຫ້ເປັນຊາຍແດນສັນຕິພາບ, ມິດຕະພາບ, ຮ່ວມມື ແລະ ພັດທະນາແບບຍືນຍົງ.

​ ໃນ​ໂອກາດດັ່ງກ່າວ, ສະຫາຍ ພົນເອກ ຟານວັນຢາງ ​ໄດ້​ມີ​ຄຳ​ເຫັນ​ຕໍ່​ພິທີ​ວ່າ: ໂຄງການກໍ່ສ້າງສຳນັກກອງຮ້ອຍທະຫານຊາຍແດນ 214 ກອງທັບປະຊາຊົນລາວ, ແມ່ນໂຄງການໜຶ່ງທີ່ເປັນສັນຍາລັກ ລະຫວ່າງສອງກະຊວງປ້ອງກັນປະເທດ ທີ່ໄດ້ຮ່ວມມືຜັນຂະຫຍາຍໄດ້ໄລຍະທີ່ຜ່ານມາ. ສະແດງອອກເຖິງໄມຕີຈິດ, ມິດຕະພາບ ຄວາມສາມັກຄີຮັກ​ແພງ, ຊ່ວຍເຫຼືອເຊິ່ງກັນ ແລະ ກັນ ລະຫວ່າງສອງຊາດ, ສອງກອງທັບ ລາວ-ຫວຽດນາມ ​ໂດຍ​ສະ​ເພາະ​ແມ່ນວຽກງານການຮ່ວມມືປົກປັກຮັກສາຊາຍແດນ ​ເພື່ອຮັບປະກັນຄວາມໝັ້ນຄົງ ທາງດ້ານການເມືອງ, ສັງຄົມຢູ່ເຂດຊາຍແດນມີ​ຄວາມເຂັ້ມແຂງ, ສ້າງເງື່ອນໄຂຄວາມສະດວກ, ຄວາມປອດໄພ ໃຫ້ແກ່ພໍ່ແມ່ປະຊາຊົນ ໃນການຂົນສົ່ງສິນຄ້າ ແລະ ພັດທະນາເສດຖະກິດ-ສັງ​ຄົມຂອງ​ສອງ​ປະ​ເທດ. ເວົ້າສະເພາະກໍ່ຄືກໍາລັງຄຸ້ມຄອງປ້ອງກັນຊາຍແດນລາວ-ຫວຽດນາມ ​ເປັນ​ການສ້າງເງື່ອນໄຂຄວາມສະດວກໃຫ້ແກ່ພະນັກງານ-ນັກຮົບ ​ເຮັດສໍາເລັດໜ້າທີ່ ທີ່ພັກ- ລັດ, ປະຊາຊົນ ແລະ ກອງທັບ ມອບໝາຍໃຫ້.

ຈາກ​ນັ້ນ, ​ສອງ​ລັດຖະມົນຕີ​ກະຊວງ​ປ້ອງ​ກັນ​ປະ​ເທດ​ລາວ-ຫວຽດນາມ ກໍ່​ໄດ້​​ໃຫ້​ກຽດ​ຂຶ້ນມອບ​ຂອງ​ຂວັນ​ທີ່​ລະນຶກ ​ໃຫ້ກອງຮ້ອຍທະຫານຊາຍແດນ 214 ກອງທັບປະຊາຊົນລາວ ​ແລະ ​ກົດ​ປຸ່ມ​ ​​ເພື່ອ​ວາງສີລາລຶກ ໂຄງການກໍ່ສ້າງສໍານັກກອງຮ້ອຍດັ່ງກ່າວ​ຢ່າງ​ເປັນ​ທາງ​ການ.

ໂດຍ: ເຄນໄຊ