ສປ ຈິນຊ່ວຍເຫຼືອ ສປປ ລາວກໍ່ສ້າງສະຖາບັນເຕັກໂນໂລຊີການສື່ສານ

​ເຜີຍ​ແຜ່​ໂດຍ: admin|ຢ້ຽມ​ຊົມ: 2 ຄັ້ງ | ເວ​ລາ | 2025-05-03 17:39:18

ສະຖານບັນເຕັກໂນໂລຊີການສື່ສານຂໍ້ມູນຂ່າວສານ ຂອງ ສປປ ລາວໄດ້ເລີ່ມກໍ່ສ້າງຂຶ້ນຢ່າງເປັນທາງການ ໂດຍມີພິທີວາງສີລາລຶກໂຄງການກໍ່ສ້າງສະຖາບັນດັ່ງກ່າວໃນວັນທີ 25 ເມສາ 2022 ທີ່ນະຄອນຫຼວງວຽງຈັນ, ໃຫ້ກຽດເຂົ້າຮ່ວມໂດຍທ່ານ ບໍ່ວຽງຄໍາ ວົງດາລາ ລັດຖະມົນຕີກະຊວງເຕັກໂນໂລຊີ ແລະການສື່ສານ ແລະທ່ານ ຈ່ຽງຈ້າຍຕົ່ງ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ ພ້ອມດ້ວຍບັນດາຄະນະກໍາມະການຮ່ວມມືລາວ-ຈີນ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານ ບໍ່ວຽງຄໍາ ວົງດາລາ ໄດ້ຕາງໜ້າລັດຖະບານລາວກ່າວສະແດງຄວາມຂອບໃຈຢ່າງສູງຕໍ່ພັກລັດ ແລະປະຊາຊົນຈີນອ້າຍນ້ອງຄູ່ຮ່ວມຊາຕາກໍາ ທີ່ຍາມໃດກໍ່ໃຫ້ການຊ່ວຍເຫຼືອຢ່າງຈິງໃຈ ຕໍ່ລັດຖະບານລາວ, ເວົ້າລວມກໍ່ຄື ໂຄງການກໍ່ສ້າງສະຖາບັນເຕັກໂນໂລຊີການສື່ສານຂໍ້ມູນຂ່າວສານຫຼັງໃໝ່ນີ້. ທ່ານລັດຖະມົນຕີເວົ້າອີກວ່າ: ໂຄງການກໍ່ສ້າງສະຖາບັນດັ່ງກ່າວມີຄວາມສໍາຄັນຫຼາຍຕໍ່ປະເທດລາວ ເພາະວ່າປັດຈຸບັນນີ້, ລັດຖະບານລາວກໍາລັງເອົາໃຈໃສ່ຕໍ່ການຫັນປະເທດເຂົ້າສູ່ລະບົບເປັນດີຈິຕອນ (Digital) ແຕ່, ວຽກງານການພັດທະນາດັ່ງກ່າວພັດມີຄວາມຫຍຸ້ງຍາກຫຼາຍດ້ານ. ສະນັ້ນ, ໂຄງການກໍ່ສ້າງດັ່ງກ່າວໄດ້ສ້າງເງື່ອນໄຂທີ່ດີຕໍ່ການການພັດທະນາຊັບພະຍາກອນມະນຸດແບບຍືນຍົງໃຫ້ແກ່ ສປປ ລາວ.

ໂອກາດດຽວກັນທ່ານເອກອັກຄະລັດຖະທູດຈີນປະຈໍາລາວໄດ້ກ່າວວ່າ: ປະເທດລາວມີທ່າແຮງທາງດ້ານຊັບພະຍາກອນຫຼາຍຢ່າງທີ່ບົ່ມຊ້ອນ ແຕ່ຫາກມີອຸປະສັກເລັກໜ້ອຍຕໍ່ການພັດທະນາ, ສະນັ້ນ, ປະເທດຈີນໄດ້ມີການຮ່ວມມືກັບປະເທດລາວ ເພື່ອເພີ່ມຂີດຄວາມສາມາດ ເຮັດໃຫ້ປະເທດລາວສາມາດພັດທະນາດ້ວຍຕົນເອງ ໂດຍສະເພາະໂຄງການທາງລົດໄຟລາວ-ຈີນ, ທາງດ່ວນລາວ-ຈີນ ທີ່ຊ່ວຍໃນການພັດທະນາດ້ານກະສິກໍາໃຫ້ມີການຂະຫຍາຍຕົວຢ່າງແຂງແຮງ ແລະໂຄງການອື່ນໆອີກ. ອັນທີ່ສໍາຄັນທີ່ສຸດ ແມ່ນການຫັນຄວາມສາມາດບົ່ມຊ້ອນ ໃຫ້ກາຍເປັນຜົນປະໂຫຍອັນແທ້ຈິງມາສູ່ປະຊາຊົນ.

ໂຄງການສະຖາບັນເຕັກໂນໂລຊີການສື່ສານຂໍ້ມູນຂ່າວສານ ແມ່ນເປັນການຈັດຕັ້ງປະຕິບັດຕາມແນວຄິດລິເລີ່ມຂອງ “ຫນຶ່ງແລວຫນຶ່ງເສັ້ນທາງ” ແຫ່ງ ສປ ຈີນ ແລະເປັນໂຄງການທຶນຊ່ວຍເຫຼືອລ້າຈາກລັດຖະບານ ສປ ຈີນ ເຊິ່ງໄດ້ອອກແບບກໍ່ສ້າງສູນຝຶກອົບຮົມດ້ານໄອຊີທີເປັນອາຄານ 5 ຊັ້ນ ຈໍານວນ 1 ຫຼັງ, ໃນເນື້ອທີ່ 5.000 ກວ່າຕາແມັດ ປະກອບດ້ວຍຫ້ອງຮຽນ, ຫ້ອງທົດລອງ, ຫ້ອງການ, ຫ້ອງສະຫມຸດ, ຫ້ອງປະຊຸມໃຫຍ່ ເປັນຕົ້ນ ລວມເຖິງອຸປະກອນການຮຽນ-ການສອນທີ່ຈໍາເປັນ ແລະອື່ນໆ. ພາຍຫຼັງໂຄງການລິເລີ່ມການກໍ່ສ້າງ, ຄູອາຈານ ແລະນັກສຶກສາຈໍານວນ 312 ຄົນ ຈະໄດ້ຮັບການຝຶກອົບຮົມ ແລະສອບເສັງວັດລະດັບໃນ 4 ຫຼັກສູດ ເພື່ອກຽມພ້ອມຮອງຮັບໃນການເປີດສະຖາບັນ. ຄາດວ່າການກໍ່ສ້າງຈະສໍາເລັດພາຍໃນ 20 ເດືອນ.

ແຫຼ່ງ: ຊີ​ອາ​ໄອ