ຫໍຫຼັກເມືອງ ແຂວງບໍ່ແກ້ວ ແມ່ນມີຄວາມໝາຍສໍາຄັນ ໃນການສ້າງສາພັດທະນາ

​ເຜີຍ​ແຜ່​ໂດຍ: admin|ຢ້ຽມ​ຊົມ: 3 ຄັ້ງ | ເວ​ລາ | 2025-05-03 23:02:12

# ຫໍຫຼັກເມືອງ ແຂວງບໍ່ແກ້ວ ແມ່ນມີຄວາມໝາຍ, ຄວາມສໍາຄັນ ເຊິ່ງເປັນນິມິດຫມາຍໃນການສ້າງສາພັດທະນາປະເທດຊາດ ກໍຄື ແຂວງບໍ່ແກ້ວ.ໂຄງສ້າງມີຄວາມກ້ວາງ 14 ແມັດ, ສູງ 16 ແມັດ ມີລັກສະນະຮູບຊົງທາງດ້ານສະຖາປັດຕະຍະກຳຂອງອານາຈັກເມືອງເກົ່າສຸວັນນະໂຄມຄຳ, ເຊິ່ງເສົາຫລັກເມືອງມີຂະໜາດ ເທົ່າໜຶ່ງວາ ຂອງທ່ານເຈົ້າແຂວງບໍ່ແກ້ວ.ໄດ້ຄວັດແກະສະລັກດ້ວຍໄມ້ດູ, ຕົບແຕ່ງລວດລາຍ ສິລະປະແບບລາວບູຮານ,ຫລັກເມືອງຟອກດ້ວຍນໍ້າສີຄໍາ ເປັນຮູບຊົງກົມ ເໝືອນລໍາທຽນ,ສ່ວນໜຶ່ງເປັນຮູບສວຍປະດັບລວດລາຍ ຢ່າງປານີຈົບງາມ,ຈອມສຸດຂອງຫໍຫລັກເມືອງ ເປັນຮູບແກ້ວ ຢອງຢູ່ບົນແທນຮູບແອວຂັນ ທີ່ສູງເດັ່ນສະຫງ່າມີແສງແວວວາວຮຸ່ງເຮືອງຕະຫຼອດເວລາຢູ່ບົນທ້ອງຟ້າ.ແລະ ເປັນຮູບແບບທາດຫລວງ ເພື່ອຮອງຮັບເສົາຫລັກເມືອງ ຕັ້ງຢູ່ບົນແທນກໍ່ປູນດ້ວຍຫີນອ່ອນເປັນຮູບ 4 ຫລ່ຽມຫຍໍ້ມູມ ແບ່ງເປັນ 3 ຖານ, ເຊິ່ງໝາຍເຖິງ ມະນຸດສະໂລກ, ເທວະໂລກ ແລະ ສະຫວັນນະໂລກ.ເປັນສິລະປະທີ່ເປັນເອກກະລັກທາງພາກເໜືອຂອງລາວ.

# ການຝັງຫລັກບ້ານ ຫລັກເມືອງ ເພື່ອເປັນນິມິດໝາຍໃນການກໍ່ສ້າງ ບ້ານໃໝ່ເມືອງໃໝ່ ເປັນປະເພນີຂອງປະຊາຊົນລາວ ທີ່ໄດ້ນັບຖືກັນມາ ແຕ່ບູຮານຈົນຮອດປັດຈຸບັນ.ປະຊາຊົນລາວກ່ອນຈະປຸກເຮືອນໃໝ່ ກໍຕ້ອງຈັດພິທີທາງ ສາສະໜາຝັງເສົາ ແຮງຫລືເສົາທຳອິດກ່ອນ,ກ່ອນຈະສ້າງຕຶກອາຄານກໍ່ຈັດ ພິທີ ຝັງລາສີລຶກເຊັ່ນດຽວກັນ, ກ່ອນຈະສ້າງສິມກໍມີ ພິທີປ່ອຍບີສິມ ຫລື ຝັງບີສິມ ແລະ ກ່ອນຈະສ້າງບ້ານ, ສ້າງເມືອງ ກໍຕ້ອງມີການ ເຕົ້າໂຮມສະຕິປັນຍາຈິດໃຈ ແລະ ຄວາມສາມັກຄີເປັນປຶກແຜນແໜ້ນໜາ. ພ້ອມພຽງກັນຝັງຫລັກບ້ານ, ຫລັກເມືອງ ເພື່ອເປັນສັນຍາລັກຂອງຊາວບ້ານ, ຊາວເມືອງ, ກໍຄືຊາວແຂວງບໍ່ແກ້ວ. ຫໍຫລັກເມືອງບໍ່ແກ້ວນິ້ ໄດ້ຢັ້ງຢືນຄວາມເປັນຊາດລາວ, ຄົນລາວເວົ້າລວມ ແມ່ນປະຊາຊົນແຂວງບໍ່ແກ້ວ.ທັງເປັນປະຫວັດສາດອັນຍາວນານມາແຕ່ສະໄໝ ເມືອງເກົ່າສຸວັນນະໂຄມຄໍາ ສະໄໝປົດປ່ອຍ ປະເທດຊາດ ແລະ ໄດ້ຢັ້ງຢືນເຖິງ, ຄວາມສາມັກຄີ, ຄວາມເປັນຈິດໜຶ່ງໃຈດຽວຂອງປະຊາຊົນລາວບັນດາເຜົ່າ, ຄວາມອົງອາດກ້າຫານ ຂອງຄົນລາວສະໄໝກ່ອນ ກໍຄືສະໄໝປັດຈຸບັນ.ໃນການຕໍ່ສູ້ ເພື່ອປົກປ້ອງຜືນແຜນດິນ ອັນແສນຮັກຂອງຊາດ,ຂອງປະຊາຊົນລາວ ແລະ ສ່ອງແສງເຖິງຄວາມຮຸ່ເຮືອງເຫລືອງເຫລື້ມສີວິໄລ ຄວາມຫມັ້ນຄົງຖາວອນ ແລະ.ຢູ່ດ້ານໃນຂອງຫໍຫຼັກເມືອງບ່ອນປະດິດສະຖານຫຼັກເມືອງ ແມ່ນເຮັດດ້ວຍແທ່ນ 3 ຊັ້ນ ປະດັບດອກດວງສິລະປະບໍ່ແກ້ວ, ສັງລວມໄດ້ວ່າການອອກແບບຫໍຫຼັກເມືອງແມ່ນໄດ້ນໍາເອົາສະຖາປັດຕະຍະກໍາທີ່ເປັນເອກະລັກຄວາມອຸດົມຮັ່ງມີທາງດ້ານວັດທະນະທຳບັນດາເຜົ່າມາລວມຢູ່ໃນຫໍຫຼັກເມືອງແຫ່ງນີ້.

# ພິທີ ວາງສີລາຈາລຶກການໂຄງການກໍ່ສ້າງຫໍຫລັກເມືອງ ໃນວັນທີ 15 ສິງຫາ 2012, ໂດຍແມ່ນບໍລິສັດສອນອາໄພ ອອກແບບ ແລະ ກໍ່ສ້າງ ຈໍາກັດ ເປັນຜູ້ຮັບເໝົາກໍ່ສ້າງ ມີມູນຄ່າກໍ່ສ້າງໃນເບື້ອງຕົ້ນແມ່ນ 7 ຕື້ ກີບ. ລວມມີ 3 ໜ້າວຽກໃຫຍ່ຄື: ຫໍຫຼັກເມືອງ, ປະຕູໂຂງ ແລະ ສວນຍ່ອມ (ສາມແຍກບ້ານປ່າອ້ອຍ) ການກໍ່ສ້າງແມ່ນດໍາເນີນຕາມແຜນ ແລະ ສໍາເລັດລົງໃນເດືອນ ທັນວາ 2013 (ສະເພາະໜ້າວຽກຫໍຫຼັກເມືອງ ແລະ ສວນອ້ອມຫໍຫຼັກເມືອງ) ແລະໄດ້ມີການດັດແກ້ຕ່າງໆເປັນຕົ້ນແມ່ນວຽກຖົມດິນເພີ່ມ,ຕ້ານເຈື່ອນ ແລະ ດັດແກ້ຍອດແກ້ວຫໍຫຼັກເມືອງ ລວມມູນຄ່າ 2.036.000.000 ກີບ (ສອງຕື້ ສາມສິບຫົກລ້ານກີບ) ວັນທີ 27-28 ພະຈິກ 2014 ຈຶ່ງໄດ້ຈັດ ພິທີ ສົມໂພດຫໍຫລັກເມືອງຢ່າງເປັນທາງການ. ມາຮອດປັດຈຸບັນແມນ ຄົບຮອບ 11 ປີ (2024)

# ສະນັ້ນເມື່ອຮອດເດືອນທັນວາ ຂອງທຸກໆປີ ທາງອຳນາດການປົກຄອງແຂວງບໍ່ແກ້ວ,ຈະໄດ້ພ້ອມກັນຈັດ ພິທີ ໄຫວ້ບູຊາຫໍຫຼັກເມືອງ.ເພື່ອເປັນການສືບທອດຕາມວັດທະນະທຳຮີດ 12 ຄອງ 14 ປະເພນີອັນດີງາມຂອງລາວ ໃຫ້ບ້ານເມືອງຢູ່ເຢັນ ເປັນສຸກ ຕະຫຼອດໄປ.

ແຫຼ່ງ: ສະຖານີວິທະຍຸ-ໂທລະພາບ ແຂວງບໍ່ແກ້ວ ## ສັງລວມບົດຂ່າວ: ເງິນຫຼົງ ຈິດພູວົງ.