ວາງສີລາລຶກໂຄງການກໍ່ສ້າງໂຮງຮຽນທິດສະດີການເມືອງກອງທັບປະຊາຊົນລາວ

​ເຜີຍ​ແຜ່​ໂດຍ: admin|ຢ້ຽມ​ຊົມ: 2 ຄັ້ງ | ເວ​ລາ | 2025-05-03 22:05:22

ຂປລ. ​ໃນ​ວັນ​ທີ 19 ມັງກອນ 2018, ທີ່ບ້ານນາຄວຍ ເມືອງໄຊເສດຖາ ນະຄອນຫລວງວຽງຈັນ, ​ໄດ້​ຈັດພິທີວາງສີລາລຶກ ໂຄງການກໍ່ສ້າງໂຮງຮຽນທິດສະດີ ການເມືອງການປົກຄອງ ກອງທັບປະຊາຊົນລາວ ໂດຍການເປັນປະທານ ຂອງທ່ານ ພົນໂທ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ມີ ທ່ານ ຫງວຽນ ບາຮຸ່ງ ເອກອັກຄະລັດຖະທູດ ຫວຽດນາມ ປະຈໍາລາວ, ການນໍາກະຊວງ ປ້ອງກັນປະເທດ, ນາຍ ແລະ ພົນທະຫານ, ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.

ໃນ​ໂອກາດ​ດັ່ງກ່າວ, ທ່ານ ພົນໂທ ວິໄລ ຫລ້າຄໍາຟອງ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບກ່າວວ່າ: ການກໍ່ສ້າງໂຮງຮຽນທິດສະດີ ການເມືອງ-ການປົກຄອງ ຂອງກອງທັບປະຊາຊົນລາວ ໃນຄັ້ງນີ້, ແມ່ນຄວາມຮຽກຮ້ອງຕ້ອງການ ທີ່ຈໍາເປັນພາວະວິໄສສໍາລັບກອງທັບ, ເປັນການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ທິດນໍາຂອງພັກ ໃນການປັບປຸງກໍ່ສ້າງກອງທັບ ໃຫ້ການເປັນກອງທັບປະຕິວັດ ມີຄວາມໜັກແໜ້ນ ທາງດ້ານແນວຄິດການເມືອງ, ມີແບບແຜນທັນສະໄໝ ຮັບປະກັນກຽມພ້ອມສູ້ຮົບ ໃນສະໜາມຮົບແນວຄິດ ແລະ ທິດສະດີຂອງພັກ ໃນກອງທັບໃຫ້ມີຄຸນນະພາບໃໝ່.

ສໍາລັບໂຄງການກໍ່ສ້າງໂຮງຮຽນ ທິດສະດີການເມືອງ-ການປົກຄອງ ກອງທັບປະຊາຊົນລາວ ໄດ້ຮັບທຶນຊ່ວຍເຫລືອລ້າ ຈາກ ກະຊວງປ້ອງກັນປະເທດ ຫວຽດນາມ, ເຊິ່ງມອບໃຫ້ ກຸ່ມບໍລິສັດ 36 ສາຂາປະຈໍາ ລາວ-ບໍລິສັດ ນາວີນາໂກ ຈາກປະເທດຫວຽດນາມ ເປັນຜູ້ຮັບເໝົາກໍ່ສ້າງ, ໂດຍແມ່ນກົມໃຫຍ່ການເມືອງ ກອງທັບປະຊາຊົນລາວ ເປັນເຈົ້າຂອງໂຄງການ ປະກອບມີ 10 ກວ່າອາຄານ, ພ້ອມດ້ວຍເຄື່ອງອໍານວຍ ຄວາມສະດວກດ້ານຕ່າງໆ ຄົບຊຸດ, ນໍາໃຊ້ງົບປະມານໃນການສ້າງ ທັງຫມົດ 274 ຕື້ດົ້ງ ແລະ ຄາດວ່າຈະສໍາເລັດ 100% ໃນທ້າຍປີ 2019.

ຂ່າວ: ສົມ​ຫວັງ