ພິທີວາງສີລາລຶກ ໂຄງການກໍ່ສ້າງໂຮງໄຟຟ້າພະລັງງານຄວາມຮ້ອນຖ່ານຫີນເຊກອງ

​ເຜີຍ​ແຜ່​ໂດຍ: admin|ຢ້ຽມ​ຊົມ: 2 ຄັ້ງ | ເວ​ລາ | 2025-05-03 21:33:27

ໃນຕອນເຊົ້າວັນທີ 2 ເມສາ 2025 ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ຜູ້ຊີ້ນໍາວຽກງານຂົງເຂດ ເສດຖະກິດ ແລະ ການພົວພັນຮ່ວມມື ກັບຕ່າງປະເທດ ໄດ້ໃຫ້ກຽດເຂົ້າຮ່ວມພິທີວາງສີລາລຶກ ໂຄງການກໍ່ສ້າງໂຮງໄຟຟ້າພະລັງງານຄວາມຮ້ອນຖ່ານຫີນເຊກອງ ຂອງກຸ່ມບໍລິສັດ ພອນສັກ ຈຳກັດ ທີ່ເມືອງກະລຶມ, ແຂວງເຊກອງ; ມີທ່ານ ລັດຖະມົນຕີ ກະຊວງພະລັງງານ ແລະ ບໍ່ແຮ່, ທ່ານ ເຈົ້າແຂວງໆເຊກອງ, ທ່ານ ຮອງລັດຖະມົນຕີ ກະຊວງບໍ່ແຮ່ ແລະ ພະລັງງານ ແຫ່ງ ຣາຊະອານາຈັກ ກຳປູເຈຍ; ບັນດາທ່ານ ຮອງລັດຖະມົົນຕີກະຊວງ-ອົງການ, ຜູ້ຕາງໜ້າບັນດາແຂວງໃກ້ຄຽງ, ຄະນະບໍລິຫານໂຄງການ, ພະນັກງານທີ່ກ່ຽວຂ້ອງ ແລະ ແຂກຖືກເຊີນ ເຂົ້າຮ່ວມ.

ໃນພິທີ, ທ່ານ ພອນສັກ ວິໄລສັກ, ປະທານກຸ່ມບໍລິສັດ ພອນສັກ ຈຳກັດ ໄດ້ລາຍງານໃຫ້ຮູ້ວ່າ: ໂຄງການກໍ່ສ້າງໂຮງໄຟຟ້າພະລັງງານຄວາມຮ້ອນຖ່ານຫີນແຫ່ງນີ້ ມີກຳລັງການຜະລິດທັງໝົດ 1,800 ເມກາວັດ, ປະກອບມີ 6 ໂຮງ, ໂຮງລະ 300 ເມກາວັດ, ເຊິ່ງກະແສໄຟຟ້າທີ່ຜະລິດໄດ້ ຈະສົ່ງອອກໄປປະເທດກຳປູເຈຍ ພາຍໃຕ້ສັນຍາຊື້-ຂາຍໄຟຟ້າ (PPA) ກັບລັດວິສາຫະກິດໄຟຟ້າກຳປູເຈຍ. ໂຄງການດັ່ງກ່າວ ມີມູນຄ່າກໍ່ສ້າງທັງໝົດປະມານ 4 ຕື້ໂດລາສະຫະ ລັດ ໂດຍເລີ່ມກໍ່ ສ້າງຢ່າງເປັນທາງການ ໃນວັນທີ 1 ເມສາ 2025 ເຊິ່ງໂຮງໄຟຟ້າຫຼັງທໍາອິດ ຈະເປີດດໍາເນີນການຜະລິດກະແສໄຟຟ້າ ໃນເດືອນມັງກອນ 2028 ແລະ ຈະຜະລິດກະແສໄຟຟ້າເຕັມຮູບແບບທັງ 6 ໂຮງ ໃນເດືອນມັງກອນ 2030; ມີອາຍຸສຳປະທານ 30 ປີ (2030-2060) ເຊິ່ງຈະຕ້ອງນໍາໃຊ້ຖ່ານຫີນ ເພື່ອຜະລິດພະລັງງານໄຟຟ້າ ປະມານ 10-11 ລ້ານໂຕນ/ປີ. ນອກຈາກການກໍ່ສ້າງໂຮງໄຟຟ້າແລ້ວ, ຍັງຈະມີການກໍ່ສ້າງສາຍສົ່ງກະແສໄຟຟ້າ 500 ກິໂລວັດ, ຄວາມຍາວ 253 ກິໂລແມັດ ເຊື່ອມຕໍ່ຈາກໂຮງໄຟຟ້າແຫ່ງນີ້ ຫາ ຊາຍແດນລາວ-ກໍາປູເຈຍ. ສໍາລັບຜູ້ດໍາເນີນການກໍ່ສ້າງໂຮງໄຟຟ້າ ແມ່ນບໍລິສັດ ພີເອັສຈີຊີ ໄທ (PSGC Thai); ສ່ວນຜູ້ສະໜອງອຸປະກອນ ແລະ ເຄື່ອງຈັກຫຼັກ ໃນການກໍ່ສ້າງໂຮງໄຟຟ້າ ແລະ ຜູ້ຮັບເໝົາກໍ່ສ້າງສາຍສົ່ງໄຟຟ້າດັ່ງກ່າວ ແມ່ນບໍລິສັດ ຊີດັບເບີ້ນຢູພີຊີ ຈຳກັດ (CWPC Co., Ltd.).

ໃນໂອກາດນີ້, ທ່ານ ເຈົ້າແຂວງໆເຊກອງ ກໍ່ໄດ້ມີຄຳເຫັນຕໍ່ພິທີວ່າ: ໂຄງການໄຟຟ້າພະລັງງານຄວາມຮ້ອນຖ່ານຫີນແຫ່ງນີ້ ເປັນແຫ່ງທີ່ສອງ ຂອງ ສປປ ລາວ, ເປັນໂຄງການຂະໜາດໃຫຍ່ ເຊິ່ງຈະເປັນປັດໃຈພື້ນຖານໃຫ້ແກ່ການພັດ ທະນາອຸດສາຫະກໍາ, ດຶງດູດການລົງທຶນ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດ ໃຫ້ມີການຂະຫຍາຍຕົວຢ່າງໜັກແໜ້ນ, ເຂັ້ມແຂງ ແລະ ຍົກລະດັບຊີວິດການເປັນຢູ່ຂອງປະຊາຊົນ ໃຫ້ດີຂຶ້ນເປັນກ້າວໆ. ພ້ອມກັນນັ້ນ, ທ່ານ ເຈົ້າແຂວງໆເຊກອງ ຍັງໄດ້ສະເໜີພາກສ່ວນທີ່ກ່ຽວຂ້ອງແຂວງເຊກອງ ແລະ ເມືອງກະລຶມ ເອົາໃຈໃສ່ສ້າງເງື່ອນໄຂເອື້ອອໍານວຍຄວາມສະດວກ ໃຫ້ຜູ້ພັດທະນາໂຄງການ ສາມາດດາໍເນີນໂຄງການຕາມແຜນວຽກທີ່ກຳ ນົດໄວ້; ປະສານສົມທົບກັບພາກສ່ວນກ່ຽວຂ້ອງຂັ້ນສູນກາງ ຕິດຕາມ, ກວດກາການຈັດຕັ້ງປະຕິບັດໂຄງການ ໃຫ້ມີຄວາມຄືບໜ້າ ແລະ ຮັບປະກັນຄຸນນະພາບ; ເປັນເຈົ້າການຊຸກຍູ້-ສົ່ງເສີມປະຊາຊົນ, ຜູ້ປະກອບການປູກຝັງ-ລ້ຽງສັດ ເພື່ອເປັນສິນຄ້າ ສະໜອງໃຫ້ໂຄງການ ທັງເປັນການຫຼຸດຜ່ອນການນໍາເຂົ້າສິນຄ້າ ຈາກພາຍນອກ; ໃຫ້ຜູ້ພັດທະນາໂຄງການເອົາໃຈໃສ່ຄຸ້ມຄອງພະນັກງານ-ກຳມະກອນຂອງຕົນ ເຄື່ອນໄຫວວຽກງານຖືກຕ້ອງຕາມລະບຽບ ແລະ ກົດໝາຍ ສປປ ລາວ ຢ່າງເຂັ້ມງວດ; ສຸມທຶນຮອນ, ພາຫະນະ, ກົນຈັກ, ກໍາລັງແຮງ ແລະ ປະສົບປະການ ເພື່ອເຮັດໃຫ້ການກໍ່ສ້າງ ມີຄວາມຄືບໜ້າ, ຮັບ ປະກັນຄວາມປອດໄພ ແລະ ສາໍເລັດຕາມແຜນການທີ່ວາງໄວ້ ບົນພື້ນຖານການພັດທະນາ ໄປຄຽງຄູ່ກັບການປັບປຸງຊີວິດການເປັນຢູ່ຂອງປະຊາຊົນ ຜູ້ທີ່ໄດ້ຮັບຜົນກະທົບ ຢ່າງທັນການ ແລະ ທົ່ວເຖິງ.

ໃນໂອກາດດຽວກັນ, ທ່ານ ລັດຖະມົນຕີ ກະຊວງພະລັງງານ ແລະ ບໍ່ແຮ່ ກໍ່ໄດ້ມີຄຳເຫັນຕີລາຄາວ່າ: ການກໍ່ສ້າງໂຄງການນີ້ ເປັນການພັດທະນາອຸດສາຫະກໍາທີ່ສໍາຄັນ ແລະ ນອນຢູ່ໃນແຜນຍຸດທະສາດການພັດທະນາວຽກງານພະລັງງານ ແລະ ບໍ່ແຮ່ ຮອດປີ 2030, ເປັນໂຄງການໃຫຍ່ ທີ່ມີການລົງທຶນສູງ, ນໍາໃຊ້ເຕັກນິກ-ເຕັກໂນໂລຊີທີ່ທັນສະໄໝ ພ້ອມທັງ ມີຄວາມເຊື່ອໝັ້ນວ່າ: ພາຍຫຼັງກໍ່ສ້າງໂຄງການສຳເລັດ ຈະ​ເປັນ​ກາຍເປັນເງື່ອນໄຂທີ່ສໍາຄັນ ໃຫ້ແກ່ການ​ພັດທະນາອຸດສາຫະກໍາພະລັງງານ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ໃນສະເພາະໜ້າ ແລະ ຍາວນານ, ສາມາດເຊື່ອມໂຍງພະລັງງານກັບປະເທດໃກ້ຄຽງໄດ້ຫຼາຍຂຶ້ນ, ທັງເປັນການປະຕິບັດທິດທາງ ແລະ ຈຸດໝາຍ ''ຂຸດຄົ້ນທ່າແຮງບົ່ມຊ້ອນ​ ຂອງແຫຼ່ງຊັບພະຍາກອນທໍາມະຊາດ ເພື່ອຜະລິດພະລັງງານສະອາດ, ມີສະຖຽນລະພາບ, ໝັ້ນຄົງ, ສາມາດສະໜອງ​ກະ​ແສ​ໄຟຟ້າ ໃຫ້​ພຽງພໍ​ກັບ​ຄວາມ​ຕ້ອງການຊົມ​ໃຊ້ຢູ່​ພາຍ​ໃນ ແລະ ມີການ​ສົ່ງ​ອອກ'' ໃຫ້ປະກົດຜົນເປັນຈິງ.

ໃນຕອນທ້າຍພິທີ, ທ່ານ ຮອງນາຍົກລັດຖະມົນຕີ ກໍ່ໄດ້ໃຫ້ກຽດກົດປຸ່ມເປີດພິທີວາງສີລາລຶກ ແລະ ລັ່ນຄ້ອງ ເພື່ອເປັນສິລິມຸງຄຸນ ໃຫ້ແກ່ການກໍ່ສ້າງໂຄງການດັ່ງກ່າວ ຕື່ມອີກ.

ຂ່າວ ແລະ ພາບ: ກົມປະຊາສຳພັນ ຫສນຍ.