ວາງສີລາລຶກ ໂຄງການກໍ່ສ້າງເຂື່ອນໄຟຟ້ານໍ້າຕົກ ເຊເສັດ-ແກ້ງຊັນ ຢູ່ເຂດເມືອງວາປີ

​ເຜີຍ​ແຜ່​ໂດຍ: admin|ຢ້ຽມ​ຊົມ: 1 ຄັ້ງ | ເວ​ລາ | 2025-05-03 21:21:43

ບໍລິສັດ ເຊເສັດ-ຫ້ວຍຕະປຸງ ພາວເວີ ຈໍາກັດ ແລະ ກຸ່ມບໍລິສັດ ໂຊກພູນຊັບ ອິນເຕີມາຍນິງ ຈໍາກັດ, ພ້ອມດ້ວຍການນໍາແຂວງສາລະວັນ ແລະ ເມືອງວາປີ ໄດ້ຈັດພິທີວາງສີລາລຶກໂຄງການກໍ່ສ້າງເຂື່ອນໄຟຟ້ານໍ້າຕົກ ເຊເສັດ-ແກ້ງຊັນ ຂຶ້ນເມື່ອບໍ່ດົນມານີ້ ຢູ່ສໍານັກງານຫ້ອງການພາກສະໝາມຂອງບໍລິສັດ (ສາມແຍກທາງເຂົ້າແກ້ງກຸ-ປາກເສັດ) ບ້ານພູມສະຫວັນ ເມືອງວາປີ ແຂວງສາລະວັນ, ໂດຍການເຂົ້າຮ່ວມຂອງທ່ານ ດາວວົງ ພອນແກ້ວ ເຈົ້າແຂວງສາລະວັນ, ທ່ານ ນາງ ສຸກສະຫວັນ ຄໍາສະຫວັນສຸກ ປະທານ ບໍລິສັດ ເຊເສັດ-ຫ້ວຍຕະປຸງ ພາວເວີ ຈໍາກັດ, ທ່ານ ຢາດອາລຸນ ລໍວັນໄຊ ປະທານກຸ່ມບໍລິສັດ ໂຊກພູນຊັບ ອິນເຕີມາຍນິງ ຈໍາກັດ, ມີແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.

ໂຄງການກໍ່ສ້າງເຂື່ອນໄຟຟ້ານໍ້າຕົກ ເຊເສັດ-ແກ້ງຊັນ ແມ່ນໄດ້ສຶກສາສໍາຫຼວດຄວາມເປັນໄປໄດ້, ເຫັນວ່າມີຄວາມຖືກຕ້ອງທາງດ້ານເສດຖະກິດ-ເຕັກນິກ ແລະ ເງື່ອນໄຂອື່ນໆ, ມີກໍາລັງຕິດຕັ້ງ 13 ເມກາວັດ, ໂຄງການດັ່ງກ່າວໄດ້ລົງນາມເຊັນບົດບັນທຶກຄວາມເຂົ້າໃຈ (MOU) ໃນຄັ້ງວັນທີ 24 ກຸມພາ 2011 ແລະ ໄດ້ຮ່ວມເຊັນສັນຍາກັບບັນດາໂຄງການຕ່າງໆ ເປັນຕົ້ນ: ສັນຍາການພັດທະນາໂຄງການ, ສັນຍາຄຸ້ມຄອງໂຄງການ, ສັນຍາຊື້-ຂາຍໄຟຟ້າ ແລະ ອື່ນໆ. ມາໃນວັນທີ 2 ກຸມພາ 2024 ບໍລິສັດເຊເສັດ-ຫ້ວຍຕະປຸງ ພາວເວີ ຈຳກັດ ໄດ້ເຊັນບົດບັນທຶກຄວາມເຂົ້າໃຈ ກັບກຸ່ມບໍລິສັດໂຊກພູນຊັບ ອິນເຕີມາຍນິ້ງ ຈຳກັດ ເພື່ອເປັນຄູ່ຮ່ວມທຸລະກິດໃນການພັດທະນາເຂື່ອນໄຟຟ້າເຊເສັດ-ແກ້ງຊັນ.

ພາຍຫຼັງສໍາເລັດການວາງສີລາລຶກແລ້ວ, ໃນໄລຍະປີ 2024-2025 ນີ້ ທາງໂຄງການຈະໄດ້ລົງມືຈັດຕັ້ງປະຕິບັດການກໍ່ສ້າງ ໃຫ້ສໍາເລັດຕາມກອບວຽກທີ່ວາງໄວ້ ເປັນຕົ້ນ: ການກໍ່ສ້າງຫົວງານຝາຍນໍ້າລົ້ນ, ກໍ່ສ້າງຄອງສົ່ງນໍ້າ ແຕ່ຫົວງານໄປຫາອ່າງພັກນໍ້ານອນ ແລະ ກໍ່ສ້າງຫ້ອງການພາກສະໝາມ, ຖ້າຫາກວ່າໂຄງການກໍ່ສ້າງເຂື່ອນໄຟຟ້ານໍ້າຕົກ ເຊເສັດ-ແກ້ງຊັນ ສໍາເລັດ, ແຂວງສາລະວັນຈະໄດ້ຮັບຜົນປະໂຫຍດຫຼາຍດ້ານ ເປັນຕົ້ນ: ຊ່ວຍປະຊາຊົນໄດ້ມີວຽກເຮັດງານທໍາ ແລະ ອື່ນໆ. ຈານນັ້ນ, ໃນຕອນທ້າຍ ການນໍາຂອງແຂວງ, ເມືອງ ພ້ອມດ້ວຍ ບໍລິສັດ ແລະ ຄູ່ຮ່ວມພັດທະນາໂຄງການ ໄດ້ຮ່ວມກັນວາງສີລາລືກ, ລັ່ນຄ້ອງ ເພື່ອເປີດໂຄງການກໍ່ສ້າງເຂື່ອນໄຟຟ້ານໍ້າຕົກ ເຊເສັດ-ແກ້ງຊັນ ຢູ່ເມືອງວາປີ ຢ່າງເປັນທາງການ.

(ພາບ-ຂ່າວ: ທິດລານີ ໂຄດໂຍທາ)