ຖວທ ປະດັບຫຼຽນກາລະນຶກ 70 ປີ ພັກປະຊາຊົນ ປະຕິວັດລາວ

​ເຜີຍ​ແຜ່​ໂດຍ: admin|ຢ້ຽມ​ຊົມ: 18 ຄັ້ງ | ເວ​ລາ | 2025-05-03 17:25:55

ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ຈັດພິທີປະດັບຫຼຽນກາລະນຶກ 70 ປີ ວັນສ້າງຕັ້ງພັກປະຊາຊົນ ປະຕິວັດລາວ ຂຶ້ນໃນວັນທີ 29 ເມສາ ຜ່ານມາ ຢູ່ຫໍວັດທະນະທຳແຫ່ງຊາດ ໂດຍການເປັນປະທານຂອງ ສະຫາຍ ນາງ ສວນສະຫວັນ ວິຍະເກດ ກຳມະການສູນກາງພັກ ເລຂາຄະນະພັກກະຊວງ ລັດຖະມົນຕີກະຊວງ ຖວທ, ມີສະມາຊິກພັກປະຈຳການ ແລະ ບຳນານ ເຂົ້າຮ່ວມຮັບຫຼຽນກາລະນຶກ ຈຳນວນ 79 ສະຫາຍ.

ຫຼຽນກາລະນຶກ 70 ປີ ວັນສ້າງຕັ້ງພັກ ເປັນຫຼຽນກາກຽດຕິຄຸນອັນສູງສົ່ງຂອງພັກປະຊາຊົນ ປະຕິວັດລາວ ມອບໃຫ້ແກ່ບັນດາສະຫາຍສະມາຊິກພັກປະຈໍາການ ແລະ ບໍານານ ທີ່ມີຜົນງານອັນໃຫຍ່ ຫຼວງ, ມີວິລະກໍາອັນລ້ຳເລີດ, ເປັນແບບຢ່າງອັນປະເສີດໃຫ້ແກ່ຮຸ່ນຄົນສືບທອດ ໂດຍໄດ້ປະກອບສ່ວນອຸທິດເຫື່ອແຮງ ສະຕິປັນຍາໃຫ້ແກ່ພັກ-ລັດ, ການປະຕິວັດ ແລະ ປະເທດຊາດ.

ສະຫາຍ ນາງ ສວນສະຫວັນ ວິຍະເກດ ໄດ້ມີຄຳເຫັນວ່າ: ການຈັດຕັ້ງພິທີປະດັບຫຼຽນກາລະນຶກ 70 ປີ ໃຫ້ສະມາຊິກພັກປະຈຳການ ແລະ ບຳນານ ເປັນການສະແດງໃຫ້ເຫັນເຖິງຄວາມຮູ້ບຸນຄຸນຢ່າງສຸດຊຶ້ງ, ເປັນການຈາລຶກ ແລະ ຈົດຈໍາຜົນງານອັນໃຫຍ່ຫຼວງຂອງບັນດາສະຫາຍ ທີ່ໄດ້ອຸທິດເລືອດເນື້ອເຫື່ອແຮງ, ສະຕິປັນຍາໃຫ້ແກ່ພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ, ເປັນການຍ້ອງຍໍສັນລະເສີນ, ເປັນຄວາມທະນົງໃຈຂອງພັກ, ລັດຖະບານ ແລະ ປະຊາຊົນລາວບັນດາເຜົ່າທີ່ມີຕໍ່ບັນດາສະຫາຍ. ຜົນງານຄຸນງາມຄວາມດີ ແລະ ວິລະກໍາອັນລໍ້າເລີດຂອງບັນດາສະຫາຍ ຍັງສະຫວ່າງສະໄຫວຢູ່ໃນດວງໃຈ ຂອງພະນັກງານທົ່ວກະຊວງ ຖວທ, ຈະຖືກຈາລຶກໄວ້ໃນປະຫວັດຂອງກະຊວງ ຖວທ ແລະ ໃນໜ້າປະຫວັດສາດຄໍາ ຂອງພັກປະຊາຊົນປະຕິວັດລາວ ແລະ ປະຫວັດສາດຂອງຊາດລາວຕະຫຼອດໄປ. ພວກເຮົາຜູ້ທີ່ເປັນຄົນຮຸ່ນສືບທອດ ຈະຮ່ຳຮຽນເອົາແບບຢ່າງຄຸນສົມບັດສິນທໍາປະຕິວັດ, ຜົນງານອັນໂດດເດັ່ນ, ຄວາມເສຍສະລະເຫື່ອແຮງ ແລະ ທຸ້ມເທຈິດໃຈເຂົ້າໃນການປະຕິບັດໜ້າທີ່ວຽກງານຂອງບັນດາສະຫາຍ; ຄວາມຊື່ສັດບໍລິສຸດ ຈົງຮັກພັກດີ ແລະ ເຊື່ອໝັ້ນຢ່າງຕາຍໃຈ ຕໍ່ການນໍາພາຂອງພັກຂອງບັນດາສະຫາຍໄວ້ເປັນແວ່ນແຍງ ບົນເສັ້ນທາງແຫ່ງການກ້າວຂຶ້ນສູ່ຈຸດໝາຍສັງຄົມນິຍົມ ຈະສືບຕໍ່ປົກປັກຮັກສາ ແລະ ເສີມຂະຫຍາຍມູນ ເຊື້ອອັນດີງາມນີ້ຕະຫຼອດໄປ. ພວກເຮົາຈະພ້ອມກັນຍຶດໝັ້ນໃນອຸດົມການ, ຮັກສາທາດແທ້, ລັກສະນະຊົນຊັ້ນຂອງພັກ; ສ້າງຄວາມສາມັກຄີເປັນປຶກແຜ່ນຢູ່ພາຍໃນພັກ ໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ, ຈັດຕັ້ງປະຕິບັດແນວທາງນະໂຍບາຍຂອງພັກໃຫ້ ບັນລຸຕາມຈຸດໝາຍທີ່ພັກເຮົາໄດ້ກໍານົດໄວ້.

ແຫຼ່ງ: ປ​ະ​ຊາ​ຊົນ, ຂ່າວ-ພາບ: ຂັນໄຊ