ກອງປະຊຸມສະໄໝວິສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ປິດລົງດ້ວຍຜົນສຳເລັດ

​ເຜີຍ​ແຜ່​ໂດຍ: admin|ຢ້ຽມ​ຊົມ: 14 ຄັ້ງ | ເວ​ລາ | 2025-03-20 19:05:06

ກອງປະຊຸມສະໄໝວິສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ທີ່ໄດ້ເປີດຂຶ້ນ ແລະ ດຳເນີນມາແຕ່ວັນທີ 17 ມີນາ ຜ່ານມາ ທີ່ຫໍສະພາແຫ່ງຊາດ, ມາຮອດຕອນບ່າຍວັນທີ 20 ມີນານີ້ ກອງປະຊຸມດັ່ງກ່າວ ໄດ້ປິດລົງດ້ວຍຜົນສຳເລັດອັນຈົບງາມ; ພິທີປິດກອງປະຊຸມ ໄດ້ຈັດຂຶຶ້ນພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສະພາແຫ່ງຊາດ; ໃຫ້ກຽດເຂົ້າຮ່ວມໂດຍ ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ, ມີ ທ່ານ ສອນໄຊ ສີພັນດອນ ກຳມະການກົມການເມືອງສູນກາງພັກ ນາຍົກລັດຖະມົນຕີ, ບັນດາທ່ານອະດີດການນໍາຂັ້ນສູງຂອງພັກ-ລັດ, ບັນດາທ່ານສະມາຊິກສະພາແຫ່ງຊາດ (ສສຊ) ພ້ອມດ້ວຍບັນດາທ່ານສະມາຊິກລັດຖະບານ ແລະ ແຂກຖືກເຊີນ ເຂົ້າຮ່ວມ.

ທ່ານ ໄຊສົມພອນ ພົມວິຫານ ໄດ້ກ່າວສູນທອນພົດປິດກອງປະຊຸມ ມີເນື້ອໃນສຳຄັນວ່າ: ກອງປະຊຸມສະໄໝວິສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ທີ່ໄດ້ດໍາເນີນດ້ວຍຈິດໃຈເຄັ່ງຮ້ອນ ທີ່ເຕັມໄປດ້ວຍບັນຍາກາດ ຟົດຟື້ນແຫ່ງການເສີມຂະຫຍາຍ ສິດປະຊາທິປະໄຕ, ການຍົກສູງຄວາມຮັບຜິດຊອບການເມືອງຂອງບັນດາທ່ານ ສສຊ ມາຮອດມື້ນີ້ ໄດ້ບັນລຸຜົນສໍາເລັດ ຢ່າງຈົບງາມ ຊຶ່ງໄດ້ພິຈາລະນາ, ຮັບຮອງເອົາເນື້ອໃນສໍາຄັນຈໍານວນໜຶ່ງ ດັ່ງນີ້:

ກອງປະຊຸມໄດ້ພິຈາລະນາ ແລະ ຮັບຮອງເອົາ ລັດຖະທໍາມະນູນ ສະບັບປັບປຸງປີ 2025 ຊຶ່ງກອງປະຊຸມໄດ້ສະແດງຄວາມຊົມເຊີຍ ຕໍ່ຄະນະກໍາມະການລະດັບຊາດ ປັບປຸງລັດຖະທໍາມະນູນ ທີ່ໄດ້ມີຄວາມຮັບຜິດຊອບສູງ, ເປັນເຈົ້າການດໍາເນີນຕາມແຕ່ລະຂັ້ນຕອນ ເປັນຕົ້ນ ການຈັດຕັ້ງປະເມີນລັດຖະທໍາມະນູນ, ການນໍາເອົາຮ່າງລັດຖະທໍາມະນູນລົງໄປທາບທາມ ປະກອບຄໍາເຫັນນໍາທຸກຊັ້ນຄົນຢ່າງກວ້າງຂວາງ ທົ່ວປະເທດ, ການຈັດຕັ້ງກອງປະຊຸມສໍາມະນາວິທະຍາສາດ, ການຂໍທິດຊີ້ນໍາຈາກກອງປະຊຸມກົມການເມືອງສູນກາງພັກ, ກອງປະຊຸມຄະນະບໍລິຫານງານສູນກາງພັກ ຄັ້ງທີ 9 ແລະ ກອງປະຊຸມຄົບຄະນະສະໄໝວິສາມັນ ຂອງຄະນະບໍລິຫານງານສູນກາງພັກ ສະໄໝທີ XI ແລະ ກອງປະຊຸມຍົກສູງດ້ານເນື້ອໃນໃຫ້ແກ່ກອງປະຊຸມສະໄໝວິສາມັນເທື່ອທີ 2 ຂອງສະພາແຫ່ງຊາດ ຊຸດທີ IX;

ການປັບປຸງລັດຖະທໍາມະນູນ ປີ 2025 ນີ້, ເນື້ອແທ້ ເປັນການສືບຕໍ່ຜັນຂະຫຍາຍແນວທາງປ່ຽນແປງໃໝ່ຂອງພັກ ທີ່ວາງອອກໃນແຕ່ລະໄລຍະ ໃຫ້ເປັນອັນລະອຽດ ເຂົ້າໃສ່ເນື້ອໃນຂອງລັດຖະທໍາມະນູນ ຊຶ່ງເປັນກົດໝາຍພື້ນຖານສໍາຄັນຂອງຊາດ, ເປັນເຄື່ອງມືສໍາຄັນຂອງລັດ ໃນການປົກປ້ອງສິດ ແລະ ຜົນປະໂຫຍດຂອງພັກກຳອຳນາດ, ການຄຸ້ມຄອງລັດ ແລະ ຄຸ້ມຄອງສັງຄົມດ້ວຍກົດໝາຍ. ການປັບປຸງລັດຖະທໍາມະນູນຄັ້ງນີ້ ແມ່ນແນໃສ່ການປັບປຸງລະບົບອໍານາດແຫ່ງລັດ ປະຊາທິປະໄຕ ປະຊາຊົນ ໃຫ້ມີປະສິດທິພາບ, ປະສິດທິຜົນສູງ, ສ້າງບາດລ້ຽວໃໝ່ໃຫ້ແກ່ການປົກປັກຮັກສາ ແລະ ສ້າງສາປະເທດຊາດ, ສາມາດເຊື່ອມໂຍງເສດຖະກິດພາກພື້ນ ແລະ ສາກົນ, ແນໃສ່ສ້າງພື້ນຖານທາງດ້ານກົດໝາຍ ກໍຄືນິຕິກໍາທີ່ວາງອອກໃນຕໍ່ໜ້າ ໃຫ້ຮັບປະກັນຄວາມສອດຄ່ອງກັບແນວທາງການເມືອງຂອງພັກ, ທັງຈະເປັນການຊ່ວຍໃຫ້ການຄຸ້ມຄອງ-ບໍລິຫານລັດ ດ້ວຍກົດໝາຍ ໃນໄລຍະໃໝ່ ໃຫ້ມີຄຸນນະພາບສູງຂຶ້ນເລື້ອຍໆ.

ກອງປະຊຸມ ໄດ້ສະເໜີໃຫ້ຄະນະກໍາມະການລະດັບຊາດ ປັບປຸງລັດຖະທໍາມະນູນ ຮີບຮ້ອນ ຮຽບຮຽງ, ປັບປຸງເນື້ອໃນຕາມບັນດາຄໍາຄິດ ຄໍາເຫັນ ຂອງກອງປະຊຸມ ເພື່ອນໍາສະເໜີຂໍການພິຈາລະນາລົງລາຍເຊັນ ຈາກປະທານສະພາແຫ່ງຊາດ. ຫຼັງຈາກນັ້ນ, ນໍາສະເໜີຂໍການພິຈາລະນາຈາກທ່ານປະທານປະເທດ ໃນການອອກລັດຖະດໍາລັດ ປະກາດນໍາໃຊ້ຢ່າງເປັນທາງການໃນມໍ່ໆນີ້.

ກອງປະຊຸມໄດ້ພິຈາລະນາ, ຮັບຮອງເອົາການປັບປຸງກົດໝາຍ ຈໍານວນ 2 ສະບັບຄື: ກົດໝາຍວ່າດ້ວຍການປົກຄອງທ້ອງຖິ່ນ ແລະ ກົດໝາຍວ່າດ້ວຍພະນັກງານ-ລັດຖະກອນ ເພື່ອໃຫ້ສອດຄ່ອງກັບມະຕິຂອງພັກ, ການປັບປຸງກົງຈັກການຈັດຕັ້ງ ແລະ ສອດຄ່ອງກັບລັດຖະທໍາມະນູນ ສະບັບປັບປຸງ ປີ 2025 ທັງເປັນການປະກອບສ່ວນສໍາຄັນໃນການຄຸ້ມຄອງລັດ, ຄຸ້ມຄອງສັງຄົມ ດ້ວຍກົດໝາຍ ໃຫ້ເປັນຮູບປະທໍາ ແລະ ມີປະສິດທິຜົນຍິ່ງໆຂຶ້ນ. ກອງປະຊຸມ ມອບໃຫ້ຄະນະຮັບຜິດຊອບ ນໍາເອົາເນື້ອໃນຂອງຮ່າງໄປ ຮຽບຮຽງໃຫ້ຄົບຖ້ວນສົມບູນ ເພື່ອໄດ້ປະກາດໃຊ້ໂດຍໄວ ແລະ ນໍາໄປສູ່ການຈັດຕັ້ງປະຕິບັດໃຫ້ມີປະສິດພາບ ແລະ ປະສິດທິຜົນເປັນຢ່າງດີ.

ກອງປະຊຸມ ໄດ້ພິຈາລະນາ ແລະ ຮັບຮອງເອົາຄໍາສະເໜີຂອງນາຍົກລັດຖະມົນຕີ ກ່ຽວກັບການປັບປຸງກົງຈັກການຈັດຕັ້ງຂອງກະຊວງ-ອົງການ ຈໍານວນໜຶ່ງ ຊຶ່ງກອງປະຊຸມໄດ້ສະແດງຄວາມຊົມເຊີຍທີ່ລັດຖະບານ ໄດ້ມີຄວາມຕັດສິນໃຈສູງ ໃນການປັບປຸງກົງຈັກການຈັດຕັ້ງ ຕາມທິດກະທັດຮັດ, ໂລ່ງລ່ຽນ, ມີປະສິດທິພາບ, ສອດຄ່ອງກັບສະພາບການພັດທະນາເສດຖະກິດ-ສັງຄົມໃນປັດຈຸບັນ, ທັງເປັນການຍົກສູງປະສິດທິພາບຂອງການນໍາພາ-ຊີ້ນໍາ ແລະ ຄຸ້ມຄອງລັດ; ຄຸ້ມຄອງເສດຖະກິດ-ສັງຄົມ ໃນເງື່ອນໄຂໃໝ່. ພ້ອມທັງຈະເປັນການເພີ່ມຄວາມເຂັ້ມງານ ແລະ ຄວາມຮັບຜິດຊອບຂອງພະນັກງານ-ລັດຖະກອນໃຫ້ສູງຂຶ້ນ.

ກອງປະຊຸມມີຄວາມເຊື່ອໝັ້ນວ່າ ລັດຖະບານຈະສຸມໃສ່ການປັບປຸງຂັ້ນກະຊວງ-ອົງການ ໃຫ້ສໍາເລັດພາຍໃນເດືອນພຶດສະພາ 2025 ແລະ ການປັບປຸງການຈັດຕັ້ງສາຍຕັ້ງຢູ່ທ້ອງຖິ່ນ ໃຫ້ສໍາເລັດພາຍໃນເດືອນກໍລະກົດ 2025 ເພື່ອກ້າວສູ່ການປັບປຸງກົງຈັກໃນຂອບເຂດທົ່ວປະເທດ ແລະ ສ້າງບັນຍາກາດໃໝ່ ໃຫ້ແກ່ການສ້າງຜົນງານຕ້ອນຮັບ 3 ວັນປະຫວັດສາດ ແລະ ການກະກຽມກອງປະຊຸມໃຫຍ່ 3 ຂັ້ນ ກ້າວໄປສູ່ການດໍາເນີນກອງປະຊຸມໃຫຍ່ຄັ້ງທີ XII ຂອງພັກໃນຕໍ່ໜ້າ.

ກອງປະຊຸມໄດ້ພິຈາລະນາ ແລະ ຮັບຮອງເອົານະໂຍບາຍສົ່ງເສີມພິເສດ ສະເພາະໃຫ້ຜູ້ລົງທຶນ ໃນນິຄົມອຸດສາຫະກໍາ ອະມະຕະ ຕາມການສະເໜີຂອງລັດຖະບານ ກ່ຽວກັບການຍົກເວັ້ນອາກອນກໍາໄລ ໄລຍະ 30 ປີ (ສະເພາະຜູ້ທີ່ມາລົງທຶນພາຍໃນ 7 ປີທໍາອິດຂອງການດໍາເນີນນິຄົມດັ່ງກ່າວ) ທີ່ຈະລົງທຶນໃນ 4 ກິດຈະກໍາສົ່ງເສີມພິເສດ ຄື: ອຸດສາຫະກໍາຜະລິດ, ປະກອບເຄື່ອງຈັກ ແລະ ອຸປະກອນຮັບໃຊ້ການກະເສດ, ອຸດສາຫະກໍາຝຸ່ນຊີວະພາບ, ເຄມີ ແລະ ການຜະລິດອາຫານສັດ; ອຸດສາຫະກໍາຜະລິດແຜງຊິ້ນສ່ວນພະລັງງານແສງອາທິດ ແລະ ພະລັງງານທົດແທນ; ອຸດສາຫະກໍາຜະລິດ ລົດຍົນ ແລະ ອາໄຫຼ່; ອຸດສາຫະກໍາຜະລິດອຸປະກອນໄຟຟ້າ ແລະ ເອເລັກໂຕຣນິກ.

ຜ່ານການພິຈາລະນາດ້ວຍເຫດຜົນ ແລະ ເຫັນໄດ້ຄວາມຈໍາເປັນໃນການດຶງດູດເອົາການລົງທຶນ ມາພັດທະນາເຂດທຸລະການດານ, ພື້ນຖານໂຄງລ່າງບໍ່ທັນມີຄວາມສະດວກນັ້ນ, ຜູ້ແທນກອງປະຊຸມໄດ້ມີຄວາມເຫັນເປັນເອກະພາບ ເຫັນດີ ຮັບຮອງເອົາ ນະໂຍບາຍສົ່ງເສີມພິເສດ ສະເພາະໃຫ້ຜູ້ລົງທຶນໃນນິຄົມອຸດສາຫະກໍາ ອະມະຕະ ຊຶ່ງຈະເປັນເງື່ອນໄຂສໍາຄັນໃນການສົ່ງເສີມ ແລະ ດຶງດູດເອົາການລົງທຶນຂອງຕ່າງປະເທດ ສອດຄ່ອງກັບທິດທາງໃນການພັດທະນາເຂດເສດຖະກິດຂອງປະເທດເຮົາ, ສ້າງການຫັນປ່ຽນໂຄງປະກອບເສດຖະກິດ ທີ່ຈະສົ່ງເສີມການຜະລິດອຸດສາຫະກໍາ, ການຜະລິດເພື່ອສົ່ງອອກ ແທນການຂຸດຄົ້ນ ແລະ ຂາຍຊັບພະຍາກອນທໍາມະຊາດດັ່ງຜ່ານມາ ແລະ ປັດຈຸບັນ.

ກອງປະຊຸມສະເໜີໃຫ້ລັດຖະບານ ເອົາໃຈໃສ່ຄຸ້ມຄອງວຽກງານນິຄົມອຸດສາຫະກໍາດັ່ງກ່າວ ໃຫ້ປະຕິບັດຕາມລະບຽບ, ກົດໝາຍຢ່າງເຂັ້ມງວດ, ຊຸກຍູ້ໃຫ້ນັກລົງທຶນມີການປະກອບສ່ວນພັດທະນາທ້ອງຖິ່ນ, ມີການຖ່າຍທອດບົດຮຽນ-ເຕັກນິກວິຊາການ ໃຫ້ແກ່ຄົນລາວ ແລະ ມີການສ້າງວຽກເຮັດງານທໍາໃຫ້ປະຊາຊົນໃນທ້ອງຖິ່ນ ໃຫ້ນັບມື້ຫຼາຍຂຶ້ນ.

(ແຫຼ່ງ: ປະ​ຊາ​ຊົນ, ຂ່າວ: ສຸກສະຫວັນ, ພາບ: ຕຸໄລເພັດ)