ສສຊ ຍັງເປັນຫວ່ງຢູ່ບາງຈຸດ ຂອງການຄົ້ນຄວ້ານະໂຍບາຍພິເສດ

​ເຜີຍ​ແຜ່​ໂດຍ: admin|ຢ້ຽມ​ຊົມ: 11 ຄັ້ງ | ເວ​ລາ | 2025-03-20 18:45:23

ການປະກອບຄໍາເຫັນຂອງບັນດາສະມາຊິກສະພາແຫ່ງຊາດ (ສສຊ) ຈາກເຂດເລືອກຕັ້ງຕ່າງໆຕໍ່ບົດລາຍງານກ່ຽວກັບການຄົ້ນຄ້ວານະໂຍບາຍພິເສດໃຫ້ແກ່ຜູ້ລົງທຶນໃນນິຄົມອຸດສາຫະກໍາອະມະຕະ ໃນກອງປະຊຸມສະໄໝວິສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ໃນວັນທີ 20 ມີນານີ້ ທີ່ຫໍສະພາແຫ່ງຊາດ ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ; ສສຊ ຫຼາຍທ່ານຕ່າງກໍເຫັນດີໂດຍພື້ນຖານ ແລະ ໃຫ້ການສະໜັບສະໜູນ ຕໍ່ກັບການຄົ້ນຄວ້ານະໂຍບາຍຕ່າງໆທີ່ກ່ຽວຂ້ອງ, ແຕ່ກໍຍັງມີບາງຈຸດ ທີ່ບັນດາ ສສຊ ສະແດງຄວາມເປັນຫ່ວງ.

ທ່ານ ຄໍາປະສິດ ເທບວົງສາ ສສຊ ເຂດເລືອກຕັ້ງທີ 16 ແຂວງເຊກອງໄດ້ກ່າວວ່າ: ການຄົ້ນຄວ້າໃຫ້ນະໂຍບາຍພິເສດ ເພື່ອສົ່ງເສີມ ແລະ ດຶງດູດການລົງທຶນໃນນິຄົມອຸສາຫະກຳ ຂ້າພະເຈົ້າເຫັນດີໃຫ້ການສະໜັບສະໜູນ, ແຕ່ເຖິງຢ່າງໃດຍັງມີຄວາມເປັນຫ່ວງ ໃນ 5 ຈຸດສໍາຄັນຄື: 1). ກ່ຽວກັບການຍົກເວັ້ນອາກອນກຳໄລ 30 ປີນີ້, ຄວາມຈິງການຍົກເວັ້ນດັ່ງກ່າວ ບໍ່ພຽງແຕ່ຢູ່ປະເທດເຮົາທີ່ອະນຸຍາດ ຢູ່ປະເທດອິນໂດເນເຊຍ ກໍອະນຸຍາດ ໃຫ້ຜູ້ທີ່ລົງທຶນດ້ວຍມູນຄ່າ 6 ແສນໂດລາຂຶ້ນໄປ ແມ່ນຈະອະນຸຍາດໃຫ້ຍົກເວັ້ນອາກອນກໍາໄລ 30 ປີ, ແຕ່ຈະເບິ່ງໃນເຂດການລົງທຶນແບ່ງອອກເປັນລັກສະນະໃນການລົງທຶນໂດຍລວມເຂົາເຈົ້າໃຫ້ລົງທຶນໃສ່ການພັດທະນາພື້ນຖານໂຄງລ່າງ ແລະ ການບໍລິການສາທາລະນະເຊັ່ນ: ຖະໜົນຫົນທາງ, ສະໜາມບິນຕ່າງໆ. ໃນນັ້ນ, ລວມຂົງເຂດອຸດສາຫະກໍາພິເສດ. ສະນັ້ນ, ທິດທາງຂອງພັກ-ລັດ ໄດ້ຫັນໄປໃນທິດທາງເພື່ອດຶງດູດການລົງທຶນໃນຄັ້ງນີ້, ແຕ່ວ່າການຍົກເວັ້ນດັ່ງກ່າວ ໃນໄລຍະ 30 ປີ ກໍມີຂໍ້ດີ ແລະ ຂໍ້ເສຍ ຄື: ສສຊ ເຂດ 13 ມີຄໍາເຫັນເປັນຫ່ວງຢູ່ໃນເຂດເສດຖະກິດພິເສດ ຖ້າເຮົາອະນຸມັດໃນໄລຍະ 30 ປີຂຶ້ນໄປ, ສົມມຸດເຂົາເຮັດວຽກ 20 ປີ ແລ້ວຍົກເລີກ, ປ່ຽນເປັນຊື່ໃໝ່ໃຫ້ຜູ້ໃໝ່ມາເຮັດ ແລ້ວລັດຖະບານຈະຄວບຄຸມແນວໃດ ເພາະສິ່ງເຫຼົ່ານີ້ເຫັນວ່າເກີດມີແລ້ວໃນຜ່ານມາ?.

2). ການດຶງດູດໃຫ້ແຮງງານລາວ ມີວຽກເຮັດແມ່ນຂ້ອນຂ້າງຍາກ ເພາະວ່າແຮງງານລາວບໍ່ມີທັກສະໃນການເຮັດວຽກໂຮງງານອຸດສາຫະກໍາ. ໃນປະເທດເພື່ອນບ້ານ ແຮງງານລາວຢູ່ໂຮງງານອຸດສາຫະກໍາມີບໍ່ຮອດ 5%. ສະນັ້ນ, ຕ້ອງເບິ່ງຈຸດພິເສດຂອງແຮງງານລາວ. ແຮງງານລາວມີທັກສະໃນວຽກງານບໍລິການ, ບັນເທິງຫຼາຍກວ່າ. ອັນທີ່ເປັນຫວ່ງຫຼາຍ ແມ່ນນັກລົງທຶນຈະເຮັດແນວໃດເພື່ອດຶງດູດແຮງງານລາວມາໃຫ້ໄດ້.

3). ເປັນຫ່ວງຜູ້ລົງທຶນກ່ອນໜ້າ, ຈະມີຜົນກະທົບແນວໃດ ເພາະມີການຍາດແຍ່ງກັນຍຸຕິທໍາແລ້ວບໍ? ກັບຜູ້ລົງທຶນກ່ອນໜ້ານັ້ນ; ນະໂຍບາຍພິເສດແຕ່ຄົນດຽວ ເຮັດໃຫ້ສະຖຽນລະພາບໃນການລົງທຶນຂອງລາວ, ຄົນອື່ນກໍບໍ່ຍາກມາລົງທຶນ ຄິດວ່າລັດຖະບານຈະມີທາງອອກ.

4).ໄລຍະເວລາຂອງການລົງທຶນ ຖ້າສົມມຸດເອກະສານການລົງທຶນຖືກອະນຸມັດແລ້ວ, ການລົງທຶນຈະດຶງເວລາສໍາໃດ ເພາະສັງເກດເຫັນວ່າມີໂຄງການ ທີ່ກວມເອົາ 3,400 ເຮັກຕາ ດຽວນີ້ຕ້ອງຊົດເຊີຍ 10 ໝູ່ບ້ານ, ແຕ່ຊົດເຊີຍຕົວຈິງແລ້ວມີພຽງ 2 ໝູ່ບ້ານ, ອີກ 8 ໝູ່ບ້ານຈະໃຊ້ເວລາໃນການຊົດເຊີຍດົນປານໃດ, ຊົດເຊີຍແລ້ວບໍຈຶ່ງຄ່ອຍລົງທຶນ ແລະ ລົງທຶນແລ້ວຕ້ອງເຮັດຫຍັງຈຶ່ງເອົາ 3,400 ເຮັກຕານັ້ນ ຫຼືລັດຖະບານມີວິທີແລ້ວບໍຄືໃຫ້ຈໍານວນໜ້ອຍກ່ອນ ຖ້າເຮັດສໍາເລັດແລ້ວສໍານີ້ຈຶ່ງເພີ່ມເນື້ອທີ່ຕື່ມອີກ ຫຼື ຈໍາເປັນໃຫ້ໝົດ 3,400 ເຮັກຕາບໍ ເພາະຍັງບໍ່ສາມາດລະດົມເອົານັກລົງທຶນມາເຕັມເມັດເຕັມໜ່ວຍໄດ້ ເຂົາໃຊ້ເວລາຮອດ 30 ປີ ກວມຮອດ 30% ຂອງນັກລົງທຶນທີ່ເຂົ້າມາຢູ່ໃນເຂດຂອງເຂົາ. ສະນັ້ນ, ຄວນເອົາບົດຮຽນດັ່ງກ່າວມາເປັນແບບຢ່າງຄືກັນ.

5).ໃນອຸດສາຫະກໍາປຸງແຕ່ງກະສິກໍານໍາໃຊ້ວັດຖຸດິບພາຍໃນເປັນຕົ້ນຕໍ, ຫວັງຢ່າງຍິ່ງວ່າລັດຖະບານເວລາຮັບເອກະສານຕ້ອງເບິ່ງຕົ້ນຕໍຫຼາຍກວ່າ 50%ບໍ, ບາງປະເທດ ກວມ 60% ຫຼື 65% ຂຶ້ນໄປ ຕ້ອງລະບຸເປັນເປີເຊັນຈຶ່ງຂ້ອນຂ້າງແນ່ນອນ.

(ຂ່າວ: ວັນເພັງ, ພາບ: ຕຸໄລເພັດ)