ສະເໜີຄົ້ນຄວ້າ ຍົກເວັ້ນອາກອນກຳໄລ ໄລຍະ 30 ປີ ໃຫ້ແກ່ຜູ້ລົງທຶນໃສ່ນິຄົມອຸສາຫະກຳ

​ເຜີຍ​ແຜ່​ໂດຍ: admin|ຢ້ຽມ​ຊົມ: 27 ຄັ້ງ | ເວ​ລາ | 2025-03-20 18:36:26

ລັດຖະບານ ໄດ້ສະເໜີການຄົ້ນຄວ້າໃຫ້ນະໂຍບາຍພິເສດ ເພື່ອສົ່ງເສີມ ແລະ ດຶງດູດການລົງທຶນໃນນິຄົມອຸດສາຫະກຳ ອະມະຕະ ຊຶ່ງໄດ້ສະເໜີໃຫ້ນະໂຍບາຍຍົກເວັ້ນອາກອນກຳໄລ ໃນໄລຍະ 30 ປີ ໃຫ້ແກ່ຜູ້ລົງທຶນໃນນິຄົມອຸດສາຫະກຳ ອະມະຕະ ໂດຍໄດ້ກຳນົດ 6 ເງື່ອນໄຂສະເພາະສຳລັບຜູ້ລົງທຶນໃນນິຄົມອຸດສາຫະກຳ ອະມະຕະ ທີ່ຈະໄດ້ນະໂຍບາຍພິເສດດັ່ງກ່າວ.

ໃນວັນທີ 20 ມີນານີ້ ທີ່ຫໍສະພາແຫ່ງຊາດ, ກອງປະຊຸມສະໄໝວິສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ; ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ໄດ້ຕາງໜ້າລັດຖະບານ ຂຶ້ນລາຍງານການຄົ້ນຄວ້າໃຫ້ນະໂຍບາຍພິເສດ ເພື່ອສົ່ງເສີມ ແລະ ດຶງດູດການລົງທຶນໃນຍິຄົມອຸດສາຫະກຳ ຕໍ່ກອງປະຊຸມໃນມື້ດັ່ງກ່າວນີ້ ເພື່ອສະເໜີໃຫ້ບັນດາສະມາຊິກສະພາແຫ່ງຊາດ ພິຈາລະນາ, ປະກອບຄໍາເຫັນ.

ທ່ານ ສະເຫຼີມໄຊ ກົມມະສິດ ໄດ້ກ່າວວ່າ: ບັນຫາທີ່ເປັນໃຈກາງຂອງນະໂຍບາຍພິເສດໃຫ້ແກ່ຜູ້ລົງທຶນໃນ ນິຄົມອຸດສາຫະກໍາ ອະມະຕະ ເປັນໂຄງການພັດທະນານິຄົມອຸດສະຫະກໍາ ຢູ່ເມືອງນາໝໍ້ ແຂວງອຸດົມໄຊ ແລະ ນາເຕີຍ ເມືອງຫຼວງນໍ້າທາ ແຂວງຫຼວງນໍ້າທາ; ນັ້ນແມ່ນນະໂຍບາຍທີ່ກ່ຽວພັນກັບການຍົກເວັ້ນອາກອນກໍາໄລ ໃນໄລຍະ 30 ປີ ໃຫ້ແກ່ຜູ້ລົງທຶນໃນນິຄົມອຸດສາຫະກໍາດັ່ງກ່າວ. ນະໂຍບາຍຍົກເວັ້ນການເກັບອາກອນກໍາໄລ 30 ປີ ດັ່ງກ່າວ, ເປັນນະໂຍບາຍສູງ ເມື່ອທຽບໃສ່ການໃຫ້ນະໂຍບາຍດັ່ງກ່າວ ຢູ່ບັນດາປະເທດໃນພາກພື້ນອາຊຽນ, ລັດຖະບານ ກໍໄດ້ສະເໜີຄວາມຈໍາເປັນ 7 ຂໍ້ ທີ່ເຫັນວ່າມີຄວາມຈໍາເປັນໃນການໃຫ້ນະໂຍບາຍດັ່ງກ່າວ.

ແຕ່ເຖິງຢ່າງໃດກໍຕາມ, ຄຽງຄູ່ກັບການໃຫ້ນະໂຍບາຍຍົກເວັ້ນອາກອນກໍາໄລ 30 ປີ ແລະ ນະໂຍບາຍສົ່ງເສີມພິເສດອື່ນ, ລັດຖະບານ ກໍໄດ້ກໍານົດ 6 ເງື່ອນໄຂສະເພາະສໍາລັບຜູ້ພັດທະນາ ແລະ ຜູ້ຈະມາລົງທຶນໃນນິຄົມອຸດສາຫະກໍາ ອະມະຕະ ທີ່ຈະໄດ້ຮັບນະໂຍບາຍພິເສດດັ່ງກ່າວ.

(ລາຍລະອຽດຄວາມຈໍາເປັນ 7 ຂໍ້ ແລະ 6 ເງື່ອນໄຂ, ແມ່ນຕິດຕາມຢູ່ໜັງສືພິມປະຊາຊົນ ສະບັບລາຍວັນ)

(ຂ່າວ: ວັນເພັງ, ພາບ: ຕຸໄລເພັດ)