ສສຊ ສະເໜີໃຫ້ພິຈາລະນາການໃຊ້ຄໍາສັບ ໃນຮ່າງລັດຖະທໍາມະນູນ ສະບັບປັບປຸງ ໃຫ້ມີຄວາມຮັດກຸມ

​ເຜີຍ​ແຜ່​ໂດຍ: admin|ຢ້ຽມ​ຊົມ: 8 ຄັ້ງ | ເວ​ລາ | 2025-03-19 17:25:23

ໃນວາລະການປະກອບຄໍາເຫັນ ຕໍ່ຮ່າງລັດຖະທໍາມະນູນ ປີ 2025 ທີ່ໄດ້ນໍາເຂົ້າມາສະເໜີ ພິຈາລະນາໃນກອງປະຊຸມສະໄໝວິສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ໃນວັນທີ 17 ມີນານີ້ ທີ່ຫໍສະພາແຫ່ງຊາດ ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ; ບັນດາສະມາຊິກສະພາແຫ່ງຊາດ (ສສຊ) ຕາງກໍໄດ້ເອົາໃຈໃສ່ໃນການປະກອບຄໍາເຫັນຢ່າງມີຈຸດສຸມ ແລະ ກໍໄດ້ສະເໜີໃຫ້ພິຈາລະນາການໃຊ້ຄໍາສັບ ບາງຄໍາສັບໃນບາງມາດຕາ ເພື່ອໃຫ້ມີຄວາມຮັດກຸມ, ຈະແຈ້ງ, ສອດຄ່ອງ.

ທ່ານ ແດງ ປະທຸມທອງ ສສຊ ເຂດເລືອກຕັ້ງທີ 18 ແຂວງໄຊສົມບູນ ມີຄໍາເຫັນວ່າ: ກ່ອນອື່ນເປັນເອກະພາບເປັນຢ່າງສູງຕໍ່ຮ່າງລັດຖະທໍາມະນູນ ສະບັບປີ 2025 ໂດຍສະເພາະເຫັນດີ ແລະ ຊົມເຊີຍຕໍ່ ຄໍານໍາ ແລະ ສະໜັບສູນ ໜູນຕໍ່ມາດຕາ 11 ທີ່ຂຽນວ່າ “ຜືນແຜ່ນດິນອັນຄົບຖ້ວນ ສາທາລະນະລັດ ປະຊາຊທິປະໄຕ ປະຊາຊົນລາວ ເປັນສິ່ງທີ່ແສນຮັກ ແລະ ຫວງແຫນ ຊຶ່ງບໍ່ມີໃຜລ່ວງລໍ່າໄດ້”. ຕໍ່ກັບມາດຕາ 77 ວັກທີສອງ “ສະພາປະຊາຊົນທ້ອງຖິ່ນ ສ້າງຕັ້ງຂຶ້ນ ຕາມຂັ້ນຂອງການປົກຄອງທ້ອງຖິ່ນ ຊຶ່ງປະກອບດ້ວຍ ສະພາປະຊາຊົນຂັ້ນແຂວງ, ຂັ້ນເມືອງ ແລະ ຂັ້ນຕາແສງ ອາດສ້າງຕັ້ງຂຶ້ນ ຕາມການຕົງລົງຂອງສະພາແຫ່ງຊາດ” ເຫັນວ່າຍັງບໍ່ທັນຈະແຈ້ງ ຢາກໃຫ້ຄະນະຮັບຜິດຊອບລະດັບຊາດ ໄດ້ພິຈາລະນາເບິ່ງຕື່ມ; ເນື່ອງຈາກຕາມການຄົ້ນຄ້ວາເບິ່ງຄໍາວ່າ: “ອາດ” ຍັງບໍ່ເຂົ້າໃນຄໍາວ່າ: “ອາດຈະ”, ເວົ້າເຖິງຄວາມເປັນໄປໄດ້ ແມ່ນ 20-40% ຫຼື ຄວາມເປັນໄປໄດ້ 60-70%, ຄໍາວ່າ: “ຄົງຈະ” ຄວາມເປັນໄປໄດ້ແມ່ນ 90-100%. ສະນັ້ນ, ຈະແມ່ນໃຜແທ້ອອກຂໍ້ຕົກລົງສ້າງຕັ້ງແມ່ນຍັງບໍ່ຈະແຈ້ງ ຈຶ່ງສະເໜີໃຫ້ພິຈາລະນາໃຊ້ຄໍາສັບຕື່ມ.

ທ່ານ ນາງ ວາລີ ເວດສະພົງ ສສຊ ເຂດເລືອກຕັ້ງທີ 1 ນະຄອນຫຼວງວຽງຈັນ ມີຄໍາເຫັນວ່າ: ຕໍ່ມາດຕາ 86 ວັກສອງ ທີ່ໄດ້ກໍານົດຄໍາວ່າ: “ສໍາລັບບ້ານ ແມ່ນການຈັດຕັ້ງຊຸມຊົນ”; ຄໍາວ່າ: “ບ້ານ ປະກອບດ້ວຍປະຊາຊົນ, ປະຊາຊົນ ແມ່ນຊຸມຊົນ” ແມ່ນເຫັນດີສະໜັບສະໜູນ, ຖ້າເຮົາໃສ່ການຈັດຕັ້ງຮາກຖານ ຄໍາສັບດັ່ງກ່າວ ສ່ວນຫຼາຍແມ່ນໃຊ້ຢູ່ໃນສາຍພັກ ແມ່ນບໍ່ເຫັນດີ. ຕໍ່ມາດຕາ 98 ກ່ຽວກັບການກໍານົດ ແລະ ສັບຊ້ອນຈັດລຽນທີ່ຕັ້ງ, ພາລະບົດບາດຂອງອົງການໄອຍະການເປັນອົງການສັ່ງຟ້ອງຜູ້ຖືກຫາຂຶ້ນສານ ແລະ ຕິດຕາມຂະບວນການເຄົາລົບ ແລະ ປະຕິບັດກົດໝາຍໃນການດໍາເນີນຄະດີຕາມຂະບວນຍຸຕິທໍາ ແມ່ນສ່ອດຄ່ອງທີ່ສຸດ ພ້ອມເຫັນດີສະໜັບສະໜູນ. ມາດຕາ 106 ຢາກໃຫ້ພິຈາລະນາຕື່ມ ໂດຍສະເພາະສິດ ແລະ ໜ້າທີ່ຂອງອົງການກວດກາແຫ່ງລັດ ແລະ ສະເໜີຕັດ “ຂໍ້ 6 ສະເໜີມາດຕະການ ແລະ ນິຕິການແກ້ໄຂຜົນຂອງການກວດກາ ໃຫ້ການຈັດຕັ້ງຂັ້ນເທິງ ເພື່ອພິຈາລະນາຕົກລົງ” ອອກ, ຍ້ອນອົງການກວດກາແຫ່ງລັດ ຖືວ່າເປັນອົງການທີ່ສໍາຄັນ, ກົມການເມືອງເປັນປະທານ ສະແດງໃຫ້ເຫັນວ່າພັກ-ລັດເຮົາ ໃຫ້ຄວາມສໍາຄັນຫຼາຍ ເພື່ອໃຫ້ປະຊາຊົນມີຄວາມໄວ້ເນື້ອເຊື່ອໃຈ, ມີຄວາມສັດທາ ແລະ ໜັ້ນໃຈ.

(ຂ່າວ: ວັນເພັງ, ພາບ: ຕຸໄລເພັດ)