ຂະບວນຍ່າງເພື່ອຂໍ່ານັບຊົມເຊີຍ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ

​ເຜີຍ​ແຜ່​ໂດຍ: admin|ຢ້ຽມ​ຊົມ: 23 ຄັ້ງ | ເວ​ລາ | 2025-03-18 07:58:29

ຂະບວນຍ່າງເພື່ອຂໍ່ານັບຊົມເຊີຍວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ ໄດ້ຈັດຂຶ້ນໃນວັນທີ 15 ມີນານີ້ ທີ່ສວນປະຕູໄຊ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງທ່ານ ທອງລຸນ ສີສຸລິດ ເລຂາທິການໃຫຍ່ ປະທານປະເທດແຫ່ງ ສປປ ລາວ, ມີທ່ານ ສອນໄຊ ສີພັນດອນ ກຳມະການກົມການເມືອງສູນກາງພັກ ນາຍົກລັດຖະມົນຕີແຫ່ງ ສປປ ລາວ, ບັນດາຮອງປະທານປະທດ, ຮອງນາຍົກລັດຖະມົນຕີ, ປະທານສູນກາງແນວລາວສ້າງຊາດ, ການນໍາພັກ-ລັດ ແລະ ມວນຊົນເຂົ້າຮ່ວມ.

ທ່ານ ອານຸພາບ ຕຸນາລົມ ຄະນະເລຂາທິການສູນກາງພັກ ເລຂາຄະນະພັກ ປະທານສະພາປະຊາຊົນ ນະຄອນຫຼວງວຽງຈັນ ກ່າວວ່າ: ຕະຫຼອດ 70 ປີຜ່ານມາ ແມ່ນໄລຍະທີ່ພັກປະຊາຊົນ ປະຕິວັດລາວ ໄດ້ສ້າງໜ້າປະຫວັດສາດອັນມະຫັດສະຈັນໃຫ້ແກ່ຊາດ ແລະ ປະຊາຊົນບັນດາເຜົ່າ, ແມ່ນໄລຍະທີ່ພັກປະຊາຊົນ ປະຕິວັດລາວໄດ້ທົດສອບ ແລະ ເຕີບໃຫຍ່ທາງດ້ານປະລິມານ ແລະ ຄຸນນະພາບ ໂດຍຜ່ານແປວໄຟທີ່ລະອິດລະອ້ຽວ, ເຕັມໄປດ້ວຍຂວາກໜາມ, ພາຍຸລົມແດງ ຊຶ່ງມີທັງໂສກເສົ້າ ແລະ ຮອຍຍິ້ມ ມີທັງໄຊຊະນະ ແລະ ເສຍໄຊດ້ວຍການເສຍສະຫຼະອັນໃຫຍ່ຫຼວງ ແຕ່ກໍເປັນໄລຍະເວລາທີ່ສະຫວ່າງສະໄຫວ ແລະ ມີກຽດສະຫງ່າງາມໃນປະຫວັດສາດຂອງປະເທດເຮົາ, ບັນດາທ່ານຜູ້ນຳນັກຮົບປະຕິວັດ ແລະ ປະຊາຊົນລາວບັນດາເຜົ່າທີ່ເສຍສະຫຼະທຸກສິ່ງທຸກຢ່າງ ເພື່ອຍາດເອົາປະເທດຊາດ ແລະ ຄວາມເປັນອິດສະຫຼະພາບມາໃຫ້ປວງຊົນລາວທັງຊາດ. ທາດແທ້ ແລະ ມູນເຊື້ອອັນສະຫງ່າງາມຂອງພັກປະຊາຊົນ ປະຕິວັດລາວ ຍາມໃດກໍມີຄວາມຈົງຮັກພັກດີ, ມີນ້ຳໃຈເສຍສະຫຼະອັນສູງສົ່ງເພື່ອຊາດ ເພື່ອປະຊາຊົນຢ່າງແທ້ຈິງ.

ພິທີຍ່າງໃນຄັ້ງນີ້ ແມ່ນກິດຈະກຳໜຶ່ງເພື່ອສ້າງຂະບວນການຂໍ່ານັບຊົມເຊີຍວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ ໂດຍປີ 2025 ເປັນປີທີ່ມີຄວາມໝາຍສໍາຄັນ ຊຶ່ງທົ່ວພັກ, ທົ່ວລັດ, ທົ່ວກໍາລັງປະກອບອາວຸດ ແລະ ທົ່ວປວງຊົນລາວທັງຊາດ ຈະພ້ອມກັນສະເຫຼີມສະຫຼອງວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ, ວັນສະຖາປະນາ ສປປ ລາວ ຄົບຮອບ 50 ປີ ແລະ ວັນເກີດປະທານ ໄກສອນ ພົມວິ ຫານ ຄົບຮອບ 105 ປີ; ພ້ອມກັນນັ້ນ. ກໍເປັນປີມ້ວນທ້າຍແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ຕິດພັນກັບການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນ, ການກະກຽມກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ, ພັກປະ ຊາຊົນ ປະຕິວັດລາວໄດ້ຮັບການສ້າງຕັ້ງຂຶ້ນໃນວັນທີ 22 ມີນາ ປີ 1955, ໂດຍສືບທອດພາລະກິດຂອງພັກກອມ ມູນິດອິນດູຈີນ ຊຶ່ງແມ່ນປະທານ ໄກສອນ ພົມວິຫານ ເປັນຫຼັກແຫຼ່ງນໍາພາກໍ່ຕັ້ງ, ທະນຸບໍາລຸງ, ຝຶກຝົນຫຼໍ່ຫຼອມ, ກໍ່ສ້າງ ແລະ ປັບປຸງໃຫ້ໜັກແໜ້ນ, ເຂັ້ມແຂງຢ່າງບໍ່ຢຸດຢັ້ງ, ວັດຖຸປະສົງຂອງພັກ ແມ່ນນໍາພາປວງຊົນລາວທັງຊາດດໍາເນີນພາລະກິດປ່ຽນແປງໃໝ່ຮອບດ້ານທີ່ມີຫຼັກການຂອງພັກ, ປົກປັກຮັກສາປະເທດຊາດໄວ້ໃຫ້ໝັ້ນຄົງ, ກໍ່ສ້າງລະບອບປະຊາທິປະໄຕ ປະຊາຊົນໃຫ້ບັນລຸຕາມຈຸດໝາຍສັງຄົມນິຍົມ, ໂດຍຢຶດໝັ້ນລັດທິມາກ-ເລນິນ, ແນວຄິດ ໄກສອນ ພົມວິຫານ, ມູນເຊື້ອອັນດີງາມຂອງພັກ ເປັນພື້ນຖານແນວຄິດ, ທິດສະດີຂອງພັກ, ເປັນເຂັມຊີ້ທິດໃຫ້ແກ່ການຈັດຕັ້ງ ແລະ ການເຄື່ອນໄຫວຂອງພັກ ມາຮອດວັນທີ 22 ມີນາ ປີ 2025 ນີ້ພັກເຮົາ ກໍມີອາຍຸຄົບຮອບ 70 ປີ. ພັກປະຊາຊົນ ປະຕິວັດລາວ ນັບແຕ່ມື້ກໍ່ຕັ້ງ ກໍໄດ້ປະເຊີນໜ້າກັບຈັກກະພັດລ່າເມືອງຂຶ້ນແບບໃໝ່ໂຕຮ້າຍກາດ ແຕ່ເຖິງຢ່າງໃດກໍຕາມພັກໄດ້ນໍາພາປວງຊົນລາວທັງຊາດ ຕໍ່ສູ້ຢ່າງອົງອາດກ້າຫານ ໂດຍບໍ່ຍອມຈໍານົນກັບສັດຕູຜູ້ຮຸກຮານ ຈົນສາມາດຍາດໄດ້ໄຊຊະນະມາສູ່ກໍາມືຂອງປະຊາຊົນ, ສະຖາປະນາ ສປປ ລາວ ຂຶ້ນໃນວັນທີ 2 ທັນວາ ປີ 1975, ປີ 1986 ມາຮອດປັດຈຸບັນ ພັກໄດ້ວາງແນວທາງປ່ຽນແປງໃໝ່ຮອບດ້ານທີ່ມີຫຼັກການຂອງພັກ ໂດຍເລີ່ມຈາກສະພາບຄວາມເປັນຈິງຂອງປະເທດຊາດ ນັບແຕ່ປີ 1975 ເປັນຕົ້ນມາ ແລະ ດ້ວຍຄວາມສະດຸ້ງໄວຂອງພັກ, ໃນກອງປະຊຸມໃຫຍ່ ຄັ້ງທີ IV ຂອງພັກ (1986) ພັກໄດ້ກຳນົດແນວທາງປ່ຽນແປງໃໝ່ ໂດຍເລີ່ມຈາກປ່ຽນແປງໃໝ່ດ້ານເສດຖະກິດ ເປັນຕົ້ນແມ່ນການປ່ຽນແປງໃໝ່ດ້ານນະໂຍບາຍເສດຖະກິດ, ຮັບຮູ້ ແລະ ນຳໃຊ້ເສດຖະກິດຫຼາຍພາກສ່ວນ, ເສດຖະກິດຕະຫຼາດ, ເປີດກວ້າງການພົວພັນຮ່ວມມືກັບຕ່າງປະເທດບົນພື້ນຖານຕ່າງຝ່າຍຕ່າງມີຜົນປະໂຫຍດ; ຫັນເສດຖະກິດທຳມະຊາດ ແລະ ເຄິ່ງທຳມະຊາດ, ເພິ່ງຕົນເອງ, ກຸ້ມຕົນເອງ ໄປສູ່ເສດຖະກິດສິນຄ້າ; ກອງປະຊຸມໃຫຍ່ ຄັ້ງທີ V-XI ໄດ້ສືບຕໍ່ນຳພາຈັດຕັ້ງຜັນຂະຫຍາຍແນວທາງປ່ຽນແປງໃໝ່ ດ້ວຍການກວດກາ, ສະຫຼຸບຕີລາຄາ, ຖອດຖອນບົດຮຽນຈາກພຶດຕິກຳຕົວຈິງໃນແຕ່ລະໄລຍະຢ່າງເປັນລະບົບ, ຕໍ່ເນື່ອງ ທັງປັບປຸງຍົກລະດັບເປັນກ້າວໆ ເຮັດໃຫ້ແນວທາງປ່ຽນແປງໃໝ່ຮອບດ້ານຢ່າງມີຫຼັກການຂອງພັກ ນັບມື້ນັບບໍລິບູນຂຶ້ນເລື້ອຍໆ ອັນໄດ້ເຮັດໃຫ້ຊີວິດການເປັນຢູ່ຂອງປວງຊົນລາວທັງຊາດນັບມື້ນັບດີຂຶ້ນ. ກິດຈະກຳຍ່າງໃນຄັ້ງນີ້ໂດຍເລີ່ມຈາກປະຕູໄຊຫາຫໍຄຳ ແລະ ລ້ຽວກັບຄືນມາຫາປະຕູໄຊ.

ແຫຼ່ງ: ປະ​ຊາ​ຊົນ, ຂ່າວ-ພາບ: ບຸນອູ້ມ