ທ່ານ ໄຊສົມພອນ ພົມວິຫານ ເນັ້ນ 9 ວຽກງານສຳຄັນ ຕໍ່ອົງການກວດສອບແຫ່ງລັດ

​ເຜີຍ​ແຜ່​ໂດຍ: admin|ຢ້ຽມ​ຊົມ: 19 ຄັ້ງ | ເວ​ລາ | 2025-03-18 06:20:19

ວາລະປິດ ກອງປະຊຸມສະຫຼຸບການຈັດຕັ້ງປະຕິບັດວຽກງານອົງການກວດສອບແຫ່ງລັດ ປະຈໍາປີ 2024 ແລະ ທິດທາງແຜນການ ປີ 2025 ໃນວັນທີ 21 ກຸມພານີ້ ທີ່ນະຄອນຫຼວງວຽງຈັນ; ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສະພາແຫ່ງຊາດ ໄດ້ໂອ້ລົມຕໍ່ກອງປະຊຸມ ໂດຍມີ ທ່ານ ວຽງທະວີສອນ ເທບພະຈັນ ກໍາມະການສໍາຮອງສູນກາງພັກ ປະທານອົງການກວດສອບແຫ່ງລັດ ແລະ ບັນດາທ່ານລັດຖະມົນຕີ, ຮອງລັດຖະມົນຕີກະຊວງກ່ຽວຂ້ອງ ພ້ອມດ້ວຍບັນດາພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້, ທ່ານ ໄຊສົມພອນ ພົມວິຫານ ໄດ້ຕີລາຄາສູງ ແລະ ສະແດງຄວາມຊົມເຊີຍທີ່ວຽກງານກວດສອບແຫ່ງລັດ ໃນປີ 2024 ຜ່ານມາ ສາມາດບັນລຸໄດ້ 102.​56% ຂອງແຜນການ ແລະ ມີການສະຫຼຸບລາຍງານຜົນການກວດສອບ ຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ແລະ ໄດ້ມີມະຕິຮັບຮອງເອົາເປັນທາງການ; ຄ່ຽງຄູ່ກັບໝາກຜົນທີ່ຍາດມາໄດ້, ອີງຕາມຜົນການກວດສອບ ປີ 2024 ເຫັນວ່າ ຜົນຂອງການກວດສອບແຫ່ງລັດ ຍັງພົບເຫັນ; ສະນັ້ນ, ທ່ານ ໄຊສົມພອນ ພົມວິຫານ ໄດ້ເນັ້ນ 9 ວຽກງານສຳຄັນ ເພື່ອເປັນທິດທາງໃຫ້ອົງການກວດສອບແຫ່ງລັດ ລວມເຖິງພາກສ່ວຍກ່ຽວຂ້ອງເອົາໃຈໃສ່ດັ່ງນີ້:

1. ເພີ່ມທະວີການສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກພັກ, ພະນັກງານ-ລັດຖະກອນ ໃຫ້ມີຄຸນທາດການເມືອງທີ່ໜັກແໜ້ນ, ຢຶດໝັ້ນຕໍ່ອຸດົມການຂອງພັກ; ມີສະຕິຕໍ່ການຈັດຕັ້ງ, ເຄົາລົບລະບຽບກົດໝາຍ, ມີຄວາມຮັບຜິດຊອບສູງຕໍ່ໜ້າທີ່, ຮັກວິຊາສະເພາະ, ມີແນວຄິດອຸ່ນອຽນ, ທຸ່ນທ່ຽງ ຕັ້ງໃຈບຸກບືນປະຕິບັດໜ້າທີ່, ມີຄວາມເສຍສະຫຼະ, ມີຈັນຍາບັນຂອງພະນັກງານນັກກວດສອບ ທີ່ໜັກແໜ້ນ, ບໍ່ສວຍໃຊ້ໜ້າທີ່, ບໍ່ຮັບສິນບົນ ແລະ ບໍ່ຕໍ່ລອງຜົນປະໂຫຍດໃດໆ, ຕ້ອງມີຄວາມສັດຊື່ບໍລິສຸດ ເປັນແບບຢ່າງທີ່ດີ ເພື່ອສ້າງຄວາມເຊື່ອໝັ້ນ ເຊືື່ອຖືໃຫ້ເປົ້າໝາຍທີ່ຖືກກວດສອບ ແລະ ຕໍ່ສັງຄົມ;

2. ໃນສະພາບເສດຖະກິດ-ສັງຄົມ ມີການພັດທະນາຂະຫຍາຍຕົວ, ເຕັກໂນໂລຊີມີຄວາມກ້າວໜ້ານັ້ນ ການລະເມີດກົດໝາຍ, ລະບຽບການ, ວິໄນແຜນການ-ການເງິນ ກໍມີຄວາມເລິກແລບ, ນຽບນຽນ. ສະນັ້ນ, ອົງການກວດສອບແຫ່ງລັດ ຈະຕ້ອງໄດ້ພັດທະນາວຽກງານຂອງຕົນ ໃຫ້ສາມາດຮອງຮັບກັບສະພາບການໄລຍະໃໝ່ ເປັນຕົ້ນ ການປັບປຸງກົນໄກ, ລະບຽບການ, ແບບແຜນວິທີນໍາພາ ແລະ ວິທີເຮັດວຽກຂອງອົງການກວດສອບແຫ່ງລັດ ໃຫ້ຄວາມສໍາຄັນຕໍ່ກັບວຽກງານ ໂດຍຫັນເປັນທັນສະໄໝ ນໍາໃຊ້ເຕັກໂນໂລຊີ ໝູນໃຊ້ເຂົ້າໃນວຽກງານໃຫ້ມີຄວາມສະດວກ, ວ່ອງໄວ, ໂລ່ງລຽນ, ປະຢັດເວລາ ແລະ ທັນກັບສະພາບການ ຢ່າງເຂັ້ມງວດ;

3. ບັນຫາຫຼັກທີ່ເປັນຈຸດສຸມຂອງວຽກງານກວດສອບແຫ່ງລັດ ໃນຕໍ່ໜ້າ ແມ່ນການຈະເຮັດແນວໃດໃຫ້ຜົນການກວດສອບ ໄດ້ຮັບການແກ້ໄຂຕາມກົດໝາຍ ຢ່າງເຂັ້ມງວດ ແລະ ທັນເວລາ. ຖ້າຜູ້ກະທໍາຜິດບໍ່ໄດ້ຖືກລົງໂທດຕາມກົດໝາຍ ກໍຈະເປັນແບບຢ່າງບໍ່ດີໃຫ້ມີກໍລະນີອື່ນເກີດຂຶ້ນ ແລະ ເກີດຂຶ້ນເລື່ອຍໆ, ນັບມື້ຫຼາຍຂຶ້ນ ແລະ ຂອບເຂດກວ້າງອອກ. ສະນັ້ນ, ຈຶ່ງສະເໜີໃຫ້ລັດຖະບານ ມີກົນໄກໃນການແກ້ໄຂຜົນການກວດສອບ ຕາມມະຕິຂອງສະພາແຫ່ງຊາດ ໃຫ້ປະກົດຜົນເປັນຈິງ ໂດຍສະເພາະການປະຕິບັດມາດຕະການ ຕັດລາຍຈ່າຍນອກແຜນອອກຈາກແຜນງົບປະມານຂອງຫົວໜ່ວຍທີ່ມີການລະເມີດ, ຫັກລົບມູນຄ່າໜ້າວຽກທີ່ບໍ່ໄດ້ຈັດຕັ້ງປະຕິບັດອອກຈາກມູນຄ່າໂຄງການ ແລະ ການແກ້ໄຂເລັ່ງທ່ວງ ໜີ້ຕ້ອງຮັບ, ການສະສາງລາຍຈ່າຍລ່ວງໜ້າໃນລະບົບຄັງເງິນແຫ່ງຊາດ;

4. ໃຫ້ຄົ້ນຄວ້າກົນໄກການປະຕິບັດນະໂຍບາຍ ຕາມດຳລັດວ່າດ້ວຍນະໂຍບາຍ ຕໍ່ຜູ້ມີຜົນງານ, ຕ້ານ ແລະ ສະກັດກັ້ນການລະເມີດກົດໝາຍ ແລະ ລະບຽບການກ່ຽວກັບງົບປະມານແຫ່ງລັດ ເລກທີ 349/ລບ, ລົງວັນທີ 13 ພະຈິກ 2023 ແລະ ຄໍາແນະນໍາ ຂອງກະຊວງການເງິນ ເລກທີ 1939/ກງ, ລົງວັນທີ 30 ພຶດສະພາ 2024 ໃຫ້ໂລ່ງລຽນ, ວ່ອງໄວ ແລະ ທັນການ;

5. ຫັນປ່ຽນທິດທາງການກວດສອບ ກ້າວເຂົ້າສູ່ລ່ວງເລິກຢ່າງເຂັ້ມງວດ ເອົາຈິງ ເອົາຈັງ ສະກັດກັ້ນ ອັດຊ່ອງວ່າງການຮົ່ວໄຫຼ່ດ້ານລາຍຮັບ-ລາຍຈ່າຍງົບປະມານແຕ່ຫົວທີ ໃຫ້ທັນກັບສະພາບການ ແລະ ເຂັ້ມງວດການໃຫ້ຄໍາເຫັນແນະນໍາ, ສະເໜີປະຕິບັດວິໄນຕໍ່ອົງການຈັດຕັ້ງ ຫຼື ຜູ້ກະທຳຜິດລະເມີດກົດໝາຍ ຢ່າງເຂັ້ມແຂງ. ຢາກໄດ້ຄືແນວນັ້ນ ອົງການກວດສອບ ຕ້ອງໄດ້ເລືອກເຟັ້ນພະນັກງານນັກກວສອບ ທີ່ມີຄວາມຮູ້, ຄວາມສາມາດ, ມີຈັນຍາບັນໃນອາຊີບ ເພື່ອກໍ່ສ້າງ, ບໍາລຸງ, ຍົກລະດັບຄວາມຮູ້ເຕັກນິກສະເພາະດ້ານ ທີ່ຈໍາເປັນຕິດພັນກັບວຽກງານກວດສອບແຫ່ງລັດ ເປັນຕົ້ນ: ວຽກ ກໍ່ສ້າງຂົວ-ທາງ, ເຄຫາສະຖານ, ພະລັງງານ ແລະ ບໍ່ແຮ່ ໃຫ້ກາຍເປັນຜູ້ຊໍານານ ກວດສອບສະເພາະດ້ານ;

6. ເພື່ອເຮັດໃຫ້ວຽກງານກວດສອບແຫ່ງລັດ ດໍາເນີນໄປດ້ວຍຜົນສໍາເລັດ ຕາມແຜນການທີ່ສະພາແຫ່ງຊາດຮັບຮອງ ສະເໜີໃຫ້ພາກສ່ວນລັດຖະບານ, ກະຊວງການເງິນ, ກະຊວງແຜນການ ແລະ ການລົງທຶນ, ທະນາຄານແຫ່ງ ສປປ ລາວ, ລັດວິສາຫະກິດ, ອົງການຄຸ້ມຄອງໂຄງການເງິນກູ້ຢືມ ແລະ ຊ່ວຍເຫຼືອ ຈົ່ງເອົາໃຈໃສ່ຢ່າງເຂັ້ມງວດ ໃນການແກ້ໄຂບັນຫາຕາມມາດຕະການແນະນໍາ ທີ່ອົງການກວດສອບແຫ່ງລັດໄດ້ລາຍງານ ຕາມມະຕິສະພາແຫ່ງຊາດ ດ້ວຍຄວາມຈິງໃຈ, ກ້າເຮັດ ກ້າຮັບຜິດຊອບ, ກ້າລາຍງານຕາມຄວາມຈິງ, ຊອກຫາທາງອອກຮ່ວມກັນ; ກໍລະນີ ອົງການຈັດຕັ້ງໃດ, ບຸກຄົນໃດ ມີການລະເມີດດ້ວຍຄວາມຕັ້ງໃຈ ມີການວາງແຜນຊອກຫາຊ່ອງຫວ່າງ ເພື່ອເອື້ອຜົນປະໂຫຍດສ່ວນຕົວ ຫຼື ໝູ່ຄະນະ ອົງການຄຸ້ມຄອງເປົ້າໝາຍນັ້ນ ຕ້ອງໄດ້ລົງແກ້ໄຂຢ່າງຮີບດ່ວນ ຕາມຂະບວນການຂອງກົດໝາຍ ແລະ ລະບຽບການທີ່ກ່ຽວຂ້ອງ ຢ່າງເຂັ້ມແຂງ, ເດັດຂາດ;

7. ອີກປະການໜຶ່ງ ວຽກງານກວດສອບແຫ່ງລັດເປັນວຽກທີ່ສໍາຄັນ, ຈໍາເປັນ ແລະ ຂາດບໍ່ໄດ້ ສໍາລັບການນໍາພາຂອງພັກ ແລະ ການຄຸ້ມຄອງຂອງລັດ, ດ້ວຍເຫດນັ້ນ ຄະນະພັກ ແລະ ອົງການປົກຄອງທຸກຂັ້ນ ຕ້ອງມີຄວາມຮັບຜິດຊອບໂດຍກົງ ຕໍ່ວຽກງານນີ້ ແລະ ເອົາວຽກນີ້ເປັນມາດຖານ ຫຼື ໄມ້ລາວັດແທກໜຶ່ງ ຕໍ່ການນໍາພາຂອງຄະນະພັກ, ອົງການປົກຄອງແຕ່ລະຂັ້ນ ກໍຄືກະຊວງອົງການ ແລະ ແຂວງ-ນະຄອນຫຼວງ ໃນການປະຕິບັດນະໂຍບາຍ ຕໍ່ຜູ້ມີຜົນງານ ແລະ ປະຕິບັດວິໄນ ຕໍ່ຜູ້ລະເມີດ. ອັນສໍາຄັນ ແມ່ນໃຫ້ຖືເອົາເນື້ອໃນຂອງ ກົດໝາຍວ່າດ້ວຍການກວດສອບແຫ່ງລັດ ມາດຕາ 72 ຂໍ້ 3 ທີ່ໄດ້ກໍານົດໄວ້ວ່າ: ຖືເອົາການແກ້ໄຂຜົນການກວດສອບ ເປັນເງື່ອນໄຂ ແລະ ບ່ອນອີງໃນການຕີລາຄາ, ປະເມີນຜົນ ຫຼື ປະຕິບັດນະໂຍບາຍ ຕໍ່ການຈັດຕັ້ງ ແລະ ພະນັກງານ-ລັດ ຖະກອນ;

8. ໃຫ້ຄະນະພັກ, ຄະນະນໍາ ແຕ່ລະພາກສ່ວນຢູ່ສູນກາງ ແລະ ທ້ອງຖິ່ນ ທີ່ຢູ່ໃນເປົ້າໝາຍແຜນການກວດສອບ ໃນປີ 2025 ຈົ່ງເອົາໃຈໃສ່ຊີ້ນໍາພາກສ່ວນຂັ້ນລຸ່ມຂອງຕົນ ໃຫ້ການຮ່ວມມື, ສະໜອງເອກະສານຂໍ້ມູນຕ່າງໆ ຕາມທີ່ອົງການກວດສອບມີຄວາມຕ້ອງການຈໍາເປັນ, ພ້ອມກັນນັ້ນ ກະໃຫ້ເອົາໃຈໃສ່ຕື່ມໃນການແຕ່ງຕັ້ງຄະນະປະສານງານ ຮ່ວມເຮັດວຽກກັບອົງການກວດສອບແຫ່ງລັດ ໃຫ້ສຳເລັດໂດຍໄວ ສາມາດເຄື່ອນໄຫວຕາມແຜນການກວດສອບ, ໃນປີຜ່ານມາ ຍັງມີບາງເປົ້າໝາຍໃຊ້ເວລາແຕ່ງຕັ້ງຄະນະປະສານງານ ດົນເກີນໄປ (ເປັນເດືອນ) ເຮັດໃຫ້ສົ່ງຜົນກະທົບໂດຍກົງ ຕໍ່ການ ບໍລິຫານເວລາໃນການເຄື່ອນໄຫວວຽກງານລວມ ຂອງອົງກວດສອບແຫ່ງລັດ;

9. ຄະນະພັກ, ຄະນະນໍາ ອົງການກວດສອບແຫ່ງລັດ ແລະ ອົງການກວດສອບປະຈໍາພາກຕ້ອງເປັນເຈົ້າການຄົ້ນຄວ້າປະຕິບັດໜ້າທີ່ຂອງຕົນໃຫ້ສູງຂຶ້ນຕື່ມ, ປະຕິບັດການປະສານສົມທົບກັບອົງການກວດກາແຫ່ງລັດ ແລະ ພາກສ່ວນຕ່າງໆໃຫ້ກົມກຽວ ເປັນເອກະພາບກັນ, ຮ່ວມປຶກສາຫາລື ຮ່ວມກັນແກ້ໄຂບັນຫາຕ່າງໆ ທີ່ເຫັນວ່າມີຄວາມສັບສົນ ແລະ ສົ່ງຜົນກະທົບກວ້າງຂວາງຕໍ່ການນໍາພາ ຂອງພັກ, ການຄຸ້ມຄອງຂອງລັດ ແລະ ກະທົບຕໍ່ການພັດທະນາສ້າງສາປະເທດ ບົນພື້ນຖານພາລະບົດບາດ, ສິດໜ້າທີ່ ແລະ ຄວາມຮັບຜິດຊອບຂອງແຕ່ລະພາກສ່ວນ.

(ຂ່າວ-ພາບ: ສຸກສະຫວັນ)