ເມືອງເງິນ ເຊື່ອມຊຶມເນື້ອໃນບົດບັນທຶກ 2 ກົມການເມືອງ ລາວ-ຫວຽດນາມ

​ເຜີຍ​ແຜ່​ໂດຍ: admin|ຢ້ຽມ​ຊົມ: 81 ຄັ້ງ | ເວ​ລາ | 2025-01-01 11:46:24

ເມືອງເງິນ ແຂວງໄຊຍະບູລີ ໄດ້ຈັດພິທີເຊື່ອມຊຶມເນື້ອໃນບົດບັນທຶກ 2 ກົມການເມືອງ ລາວ-ຫວຽດນາມ ປະຈຳປີ 2020 ແລະ ປາຖະກະຖາວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 60 ປີ (5 ເມສາ 1961-5 ເມສາ 2021) ຂຶ້ນໃນທ້າຍເດືອນມີນານີ້ ທີ່ເມືອງດັ່ງກ່າວ ໂດຍມີຄະນະປະຈຳພັກເມືອງ, ກຳມະການພັກເມືອງ ແລະ ພາກສ່ວນກ່ຽວຂ້ອງພາຍໃນເມືອງເຂົ້າຮ່ວມ.

ທ່ານ ຄຳແພງ ຕັດສະຫວັດ ເລຂາພັກເມືອງ ເຈົ້າເມືອງໆເງິນ ໄດ້ເຜີຍແຜ່ເຊື່ອມຊຶມເນື້ອໃນບົດບັນທຶກ 2 ກົມການເມືອງ ລາວ-ຫວຽດນາມ ປະຈຳປີ 2020 ຊຶ່ງໄດ້ຍົກໃຫ້ເຫັນສະພາບ ແລະ ໝາກຜົນການຮ່ວມມື ລະຫວ່າງ ລາວ-ຫວຽດນາມ ປະຈຳປີ 2020 ແລະ ໄລຍະປີ 2016-2020. ໃນໄລຍະ 5 ປີ ຜ່ານມາ ພາຍໃຕ້ການນຳພາຂອງ ສອງພັກ-ສອງລັດ ແລະ ປະຊາຊົນສອງຊາດລາວ-ຫວຽດນາມ, ຫວຽດນາມ-ລາວ ຊຶ່ງໄດ້ຮັບການຊີ້ນຳໂດຍກົງຈາກ ກົມການເມືອງຂອງ 2 ປະເທດ. ເປັນເຈົ້າການໃນການປະສານສົມທົບ ແລະ ຜັນຂະຫຍາຍໝາກຜົນທີ່ແທດຈິງ ໃນທຸກຂົງເຂດວຽກງານ, ປະກອບສ່ວນສໍາຄັນເຂົ້າໃນການຮັກສາສະຖຽນລະພາບທາງດ້ານການເມືອງ, ການພັດ ທະນາເສດຖະກິດ-ສັງຄົມ, ຮັບປະກັນດ້ານປ້ອງກັນຊາດ-ປ້ອງກັນຄວາມສະຫງົບ ຢູ່ແຕ່ລະປະເທດ, ສືບຕໍ່ປັບປຸງ ແລະ ເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ຫວຽດນາມ-ລາວ.

ຈາກນັ້ນ ທ່ານ ສອນສຸກ ພວງແກ້ວ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ ກໍໄດ້ຂຶ້ນທົບ ທວນຄືນວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນ ຄົບຮອບ 60 ປີ (ວັນທີ 5 ເມສາ 1961 - ວັນທີ 5 ເມສາ 2021) ຊຶ່ງທ່ານໄດ້ຍົກໃຫ້ເຫັນມູນເຊື້ອແຫ່ງການຕໍ່ສູ້ອົງອາດກ້າຫານ, ມູນເຊື້ອພິລະອາດຫານ ແລະ ໄຊຊະນະ ໃນພາລະກິດຕໍ່ສູ້ປົດປ່ອຍຊາດ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຂອງກຳລັງປ້ອງ ກັນຄວາມສະຫງົບປະຊາຊົນພາຍໃຕ້ການນຳພາຂອງພັກ ປະຊາຊົນປະຕິວັດລາວ ໂດຍການໂຄສະນາແນວທາງຂອງ ພັກ-ລັດ ຕິດພັນກັບການໂຄສະນາປຸກລະດົມທົ່ວສັງຄົມ ເຂົ້າຮ່ວມແກ້ໄຂ - ຕີຖອຍ ບັນດາປະກົດການຫຍໍ້ທໍ້ທີ່ເກີດ ຂຶ້ນໃນສັງຄົມ. ພ້ອມທັງຍົກໃຫ້ເຫັນຜົນງານການເຄື່ອນໄຫວ ຂອງກຳລັງປ້ອງກັນຄວາມສະຫງົບ ປະຊາຊົນ ໃນແຕ່ໄລຍະ ອີກດ້ວຍ.

(ແຫຼ່ງ: ປະ​ຊາ​ຊົນ, ຂ່າວ: ອິນແປງ ແຫວນຄຳ)