ຜົນກອງປະຊຸມສະໄໝສາມັນ ຂອງລັດຖະບານ ປະຈໍາເດືອນພະຈິກ 2024

​ເຜີຍ​ແຜ່​ໂດຍ: admin|ຢ້ຽມ​ຊົມ: 25 ຄັ້ງ | ເວ​ລາ | 2024-12-25 08:01:45 ອັບ​ເດດ​ຄັ້ງ​ລ້າ​ສຸດ ໂດຍ: admin ເວ​ລາ 2024-12-25 08:05:15

ໃນວັນທີ 22 ພະຈິກນີ້, ທ່ານ ສອນໄຊ ສິດພະໄຊ ລັດຖະມົນຕີປະຈໍາສໍານັກງານນາຍົກລັດຖະມົນຕີ ໂຄສົກລັດຖະບານ ໄດ້ຖະແຫຼງຂ່າວຕໍ່ສື່ມວນຊົນ ກ່ຽວກັບຜົນກອງປະຊຸມສະໄໝສາມັນຂອງລັດຖະບານ ປະຈຳເດືອນພະຈິກ 2024 ໃຫ້ຮູ້ວ່າ: ກອງປະຊຸມໄດ້ເປີດຂຶ້ນ ໃນຕອນເຊົ້າວັນທີ 21 ແລະ ປິດລົງ ໃນຕອນບ່າຍ ວັນທີ 22 ພະຈິກນີ້ ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານ ຂອງທ່ານ ສອນໄຊ ສີພັນດອນ ນາຍົກລັດຖະມົນຕີ; ມີບັນດາທ່ານຮອງນາຍົກລັດຖະມົນຕີ, ສະມາຊິກລັດຖະບານ, ຜູ້ຕາງໜ້າກະຊວງ-ອົງການ ເຂົ້າຮ່ວມແບບເຊິ່ງໜ້າ; ການນໍາຂອງບັນດາແຂວງ ແລະ ນະຄອນຫຼວງວຽງຈັນ ເຂົ້າຮ່ວມຜ່ານລະບົບກອງປະຊຸມທາງໄກ ເພື່ອຮັບຟັງ ແລະ ປະກອບຄຳເຫັນ ຕໍ່ການລາຍງານສະພາບພົ້ນເດັ່ນ ປະຈຳເດືອນພະຈິກ ແລະ ທິດທາງແຜນວຽກຈຸດສຸມ ປະຈຳເດືອນທັນວາ 2024.

ກອງປະຊຸມຄັ້ງນີ້ ໄດ້ພ້ອມກັນຄົ້ນຄວ້າ, ປຶກສາຫາລື, ປະກອບຄໍາເຫັນ ແລະ ເຫັນດີດ້ານຫຼັກການຮັບຮອງເອົາບັນດາຫົວຂໍ້ສໍາຄັນ ຄື:

ສະຫຼຸບການຈັດຕັ້ງປະຕິບັດວຽກງານຈຸດສຸມປະຈໍາເດືອນພະຈິກ ແລະ ທິດທາງແຜນການປະຈໍາເດືອນທັນວາ 2024 ຂອງລັດຖະບານ; ລາຍງານຜົນການປະເມີນໂຄງການບໍ່ແຮ່ທີ່ໄດ້ອະນຸມັດຜ່ານມາ ແລະ ສະເໜີທິດທາງ, ນະໂຍບາຍ ແລະ ມາດຕະການ ໃນການພັດທະນາແຮ່ທາດໃນຕໍ່ໜ້າ; ລາຍງານຄວາມຄືບໜ້າໃນການແກ້ໄຂບັນຫາລົດເຖື່ອນ ແລະ ລາຍງານການຜັນຂະຫຍາຍວຽກງານຮ່ວມມືກັບຕ່າງປະເທດ, ໃນນັ້ນ:

ຕໍ່ການສະຫຼຸບວຽກງານພົ້ນເດັ່ນປະຈໍາເດືອນພະຈິກ ແລະ ທິດທາງແຜນການ ປະຈຳເດືອນທັນວາ 2024 ຂອງລັດຖະບານ: ກອງປະຊຸມ ໄດ້ຊີ້ນໍາໃຫ້ຫ້ອງວ່າການສໍານັກງານນາຍົກລັດຖະມົນຕີ ນຳໄປປັບປຸງຕາມຄຳເຫັນຂອງສະມາຊິກລັດຖະບານ, ພ້ອມກັນນັ້ນ ແຜນວຽກຈຸດສຸມປະຈໍາເດືອນທັນວາ 2024 ໃຫ້ສືບຕໍ່ເອົາໃຈໃສ່ບັນດາຄາດໝາຍ ປີ 2024 ຂອງລັດຖະບານ ເພື່ອເຮັດໃຫ້ວຽກງານຈຸດສຸມທີ່ຍັງຄົງຄ້າງ ກໍຄືການແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ ໄປຄວບຄູ່ກັບການແກ້ໄຂບັນຫາເຄັ່ງຮ້ອນທາງດ້ານສັງຄົມ ໄດ້ຮັບການຈັດຕັ້ງປະຕິບັດ ໃຫ້ເປັນຮູບປະທໍາຕົວຈິງຫຼາຍຂຶ້ນ.

ຕໍ່ຜົນການປະເມີນໂຄງການບໍ່ແຮ່ທີ່ໄດ້ອະນຸມັດຜ່ານມາ ແລະ ສະເໜີທິດທາງ, ນະໂຍບາຍ ແລະ ມາດຕະການໃນການພັດທະນາແຮ່ທາດໃນຕໍ່ໜ້າ: ກອງປະຊຸມໄດ້ຊີ້ນໍາໃຫ້ຄະນະຮັບຜິດຊອບປະເມີນສົມທົບກັບພາກສ່ວນກ່ຽວຂ້ອງ ສືບຕໍ່ຊຸກຍູ້ຕິດຕາມ, ກວດກາບັນດາບໍລິສັດຂຸດຄົ້ນບໍ່ແຮ່ຕ່າງໆ ໃນຂອບເຂດທົ່ວປະເທດ ໃຫ້ເອົາໃຈໃສ່ປະຕິບັດຖືກຕ້ອງຕາມມາດຕະຖານເຕັກນິກ, ສັນຍາສຳປະທານ ແລະ ມາດຕະການປົກຮັກສາສິ່ງແວດລ້ອມ ຢ່າງເຂັ້ມງວດ ລວມທັງຄົ້ນຄວ້າການກໍານົດບັນດາມາດຖານເງື່ອນໄຂ ກ່ຽວກັບກິດຈະການ ຂຸດຄົ້ນບໍ່ແຮ່ ທີ່ຕິດພັນກັບຂະແໜງການຕົນ ໃຫ້ລະອຽດ, ຈະແຈ້ງ, ຄົບຖ້ວນ ແລະ ຊັດເຈນ.

ຕໍ່ຄວາມຄືບໜ້າໃນການແກ້ໄຂບັນຫາລົດເຖື່ອນ: ກອງປະຊຸມໄດ້ຊີ້ນໍາໃຫ້ຄະນະຮັບຜິດຊອບວຽກງານດັ່ງ ກ່າວ ສົມທົບກັບພາກສ່ວນກ່ຽວຂ້ອງ ສືບຕໍ່ລົງເລິກໄຈ້ແຍກ ບັນດາປະເພດລົດທີ່ນຳເຂົ້າບໍ່ຖືກຕ້ອງ ໃນແຕ່ລະກໍລະນີ ເພື່ອຈະໄດ້ດໍາເນີນການແກ້ໄຂຕາມກົດໝາຍ ແລະ ລະບຽບການກ່ຽວຂ້ອງກໍານົດໄວ້ຢ່າງເຂັ້ມງວດ ແລະ ເດັດຂາດ.

ສໍາລັບການຜັນຂະຫຍາຍວຽກງານຮ່ວມມືກັບຕ່າງປະເທດ: ກອງປະຊຸມໄດ້ຊີ້ນໍາກະຊວງການຕ່າງປະເທດ ໃຫ້ເປັນໃຈກາງປະສານສົມທົບກັບພາກສ່ວນທີ່ກ່ຽວຂ້ອງ ສືບຕໍ່ຈັດຕັ້ງຜັນຂະຫຍາຍຜົນກອງປະຊຸມສຸດຍອດອາຊຽນ ປີ 2024, ຜົນການຢ້ຽມຢາມຕ່າງປະເທດ ຂອງການນຳຂັ້ນສູງ; ກະກຽມຄວາມພ້ອມຮອບດ້ານ ໃຫ້ແກ່ການນໍາຂັ້ນສູງຕ່າງປະເທດ ທີ່ເດີນທາງມາຢ້ຽມຢາມ ສປປ ລາວ ແລະ ການເຄື່ອນໄຫວຢ້ຽມຢາມຕ່າງປະເທດ ຂອງການນຳຂັ້ນສູງ ໃນເດືອນທັນວາ 2024 ໃຫ້ມີປະສິດທິພາບ ແລະ ປະສິດທິຜົນ.

ກອງປະຊຸມເຫັນດີດ້ານຫຼັກການ ຮັບຮອງເອົານິຕິກຳ ຈຳນວນ 9 ສະບັບຄື:

ຮ່າງດໍາລັດ ວ່າດ້ວຍການແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງ (ສະບັບປັບປຸງ);

ຮ່າງກົດໝາຍ ວ່າດ້ວຍຄວາມປອດໄພທາງໄຊເບີ;

ຮ່າງດຳລັດ ວ່າດ້ວຍລະບົບລະຫັດສາລະບານສະຖິຕິ;

ຮ່າງດໍາລັດ ວ່າດ້ວຍກະສິກໍາແບບມີສັນຍາ;

ຮ່າງດໍາລັດ ວ່າດ້ວຍທີ່ດິນກະສິກໍາ;

ຮ່າງດໍາລັດ ວ່າດ້ວຍສະມາຄົມ (ສະບັບປັບປຸງ);

ຮ່າງດໍາລັດ ວ່າດ້ວຍມູນນິທິ (ສະບັບປັບປຸງ);

ຮ່າງດຳລັດ ວ່າດ້ວຍການກວດກາແຮງງານ;

ຮ່າງດຳລັດ ວ່າດ້ວຍ ເຂດເຕັກໂນໂລຊີລະດັບສູງ.

ກອງປະຊຸມ ໄດ້ຊີ້ນຳໃຫ້ພາກສ່ວນກ່ຽວຂ້ອງ ນໍາໄປປັບປຸງຕາມການປະກອບຄຳເຫັນຂອງສະມາຊິກລັດ ຖະບານ ໃຫ້ມີເນື້ອໃນຄົບຖ້ວນສົມບູນ, ຈະແຈ້ງ, ຊັດເຈນ, ຮັດກຸມ ແລະ ສາມາດຈັດຕັ້ງປະຕິບັດໄດ້, ທັງຮັບປະ ກັນຄວາມສອດຄ່ອງກັບບັນດາກົດໝາຍ ແລະ ນິຕິກຳ ທີ່ໄດ້ປະກາດນຳໃຊ້ແລ້ວ.

ສຳລັບວຽກຈຸດສຸມຂອງລັດຖະບານ ໃນເດືອນທັນວານີ້, ນອກຈາກຈະຕ້ອງໄດ້ສືບຕໍ່ສຸມໃສ່ປະຕິບັດແຜນວຽກຈຸດສຸມ 6 ເດືອນທ້າຍປີ 2024 ທີ່ໄດ້ກຳນົດໄວ້ມະຕິກອງປະຊຸມລັດຖະບານເປີດກວ້າງ ຄັ້ງທີ I ປີ 2024 ໂດຍສະເພາະ ຈັດຕັ້ງປະຕິບັດຕາມທິດຊີ້ນຳຂອງເລຂາທິການໃຫຍ່ ປະທານປະເທດ ກ່ຽວກັບມາດຕະການໃໝ່ ເພື່ອແກ້ໄຂ 6 ບັນຫາເຄັ່ງຮ້ອນ ໃຫ້ບັນລຸ 9 ຄາດໝາຍສູ້ຊົນ ໂດຍເອົາໃຈໃສ່ 5 ວິທີເຮັດວຽກແບບບຸກທະລຸ ແລະ ເອົາໃຈໃສ່ແກ້ໄຂ 3 ບັນຫາຮີບດ່ວນ ທີ່ເລຂາທິການໃຫຍ່ໄດ້ເນັ້ນໃນກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9 ສະໄໝທີ XI ຄື: ແກ້ໄຂບັນຫາບຸກຄະລາກອນ, ຄວາມຮັບຜິດຊອບ, ຈັນຍາບັນຂອງພະນັກງານ ໃນຂົງເຂດຕ່າງໆ; ກົນໄກປະສານງານ, ການປັບປຸງອໍານວຍຄວາມສະດວກ ໃຫ້ແກ່ການລົງທຶນ, ການສົ່ງເສີມການທ່ອງທ່ຽວ ແລະ ການປັບປຸງພື້ນຖານໂຄງລ່າງແລ້ວ, ຍັງຈະໄດ້ສຸມໃສ່ປະຕິບັດໜ້າວຽກຕົວຈິງຈໍານວນໜຶ່ງ ດັ່ງນີ້:

ກະກຽມບັນດາເນື້ອໃນບົດຊີ້ແຈງ ເພື່ອຕອບຄຳຊັກຖາມຂອງສະມາຊິກສະພາແຫ່ງຊາດ ໃນກອງປະຊຸມສະ ໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX;

ກະກຽມຜັນຂະຫຍາຍບັນດາແຜນວຽກ ທີ່ໄດ້ລາຍງານຕໍ່ກອງປະຊຸມສະພາພິຈາລະນາຮັບຮອງ, ແລ້ວນໍາເຂົ້າປຶກສາຫາລື ແບ່ງຄວາມຮັບຜິດຊອບຈັດຕັ້ງປະຕິບັດ ຢູ່ໃນກອງປະຊຸມລັດຖະບານເປີດກວ້າງ ຄັ້ງທີ II ປີ 2024;

ສືບຕໍ່ສຸມໃສ່ຈັດຕັ້ງປະຕິບັດ ບັນດາມາດຕະການແກ້ໄຂບັນຫາເຄັ່ງຮ້ອນທາງດ້ານເສດຖະກິດ - ການເງິນ, ບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງປະເທດ ຕາມແຜນວຽກຈຸດສຸມ ຂອງຄະນະສະເພາະກິດ 19/ກມສພ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃຫ້ສຳເລັດຕາມແຜນທີ່ກຳນົດໄວ້.

ສືບຕໍ່ສຸມໃສ່ເກັບລາຍຮັບຈາກຖານລາຍຮັບທີ່ມີແລ້ວໃຫ້ໄດ້ຄົບຖ້ວນ, ຈໍາກັດການຍົກເວັ້ນການປະຕິບັດພັນທະຕ່າງໆ, ກະຊວງກ່ຽວຂ້ອງ ເລັ່ງພັດທະນາລະບົບຊໍາລະສະສາງຕ່າງໆ ຜ່ານລະບົບທະນາຄານ ເພື່ອຫັນການຈັດເກັບລາຍຮັບ ເປັນທັນສະໄໝ ໃຫ້ສຳເລັດຕາມແຜນ, ຄົ້ນຄວ້າສ້າງຖານລາຍຮັບໃໝ່ ເພື່ອຮັບປະກັນຖານລາຍຮັບໃຫ້ໝັ້ນຄົງ.

ສືບຕໍ່ຕິດຕາມ, ກວດກາ ການຈັດຕັ້ງປະຕິບັດບັນດາໂຄງການແຮ່ທາດ ໃຫ້ໄປຕາມລະບຽບກົດໝາຍ, ຊຸກຍູ້ການສ້າງຕັ້ງໂຮງງານປຸງແຕ່ງແປຮູບ ເປັນຜະລິດຕະພັນສຳເລັດຮູບ ແລະ ເຄິ່ງສຳເລັດຮູບ ເພື່ອສົ່ງອອກ.

ສືບຕໍ່ກວດກາລົດເຖື່ອນ, ລົດນໍາເຂົ້າບໍ່ຖືກຕ້ອງ ນໍາໃຊ້ບໍ່ຖືກເປົ້າໝາຍ ຢູ່ບັນດາແຂວງທີ່ຍັງເຫຼືອ, ຮີບຮ້ອນແກ້ໄຂ ສຳລັບເປົ້າໝາຍທີ່ໄດ້ກວດພົບເຫັນ ແລະ ສັງລວມແລ້ວ ໂດຍສະເພາະການຈັດຕັ້ງປະຕິບັດມາດຕະການປັບໃໝ.

ສືບຕໍ່ເລັ່ງຊຸກຍູ້, ຕິດຕາມ ແລະ ກວດກາ ການປະຕິບັດໂຄງການລົງທຶນຂະໜາດໃຫຍ່ ໃຫ້ສໍາເລັດໄວ ໂດຍສະເພາະແກ້ໄຂບັນດາຂໍ້ຫຍຸ້ງຍາກ ທີ່ເປັນອຸປະສັກໃນການປະຕິບັດໂຄງການຕາມສະພາບຕົວຈິງ.

ສືບຕໍ່ຊຸກຍູ້, ສົ່ງເສີມການຜະລິດສິນຄ້າ ທົດແທນການນໍາເຂົ້າ ແລະ ການຜະລິດເພື່ອສົ່ງອອກ, ໃນນີ້ ສຸມໃສ່ການຜະລິດລະດູແລ້ງ ຕ້ອງໄດ້ກະກຽມລະບົບສະໜອງນ້ຳໃຫ້ພື້ນທີ່ການຜະລິດ, ການສ້າງໂຮງງານຜະລິດຝຸ່ນປຸ໋ຍໃຫ້ພຽງພໍ ເພື່ອຊ່ວຍຫຼຸດຜ່ອນຕົ້ນທຶນ; ດຸ່ນດ່ຽງການນໍາເຂົ້າ-ສົ່ງອອກສິນຄ້າ ຕິດພັນກັບການດຸ່ນດ່ຽງດັດສົມ ຄວາມຕ້ອງການເງິນຕາຕ່າງປະເທດ, ປະຕິບັດມາດຕະການຈໍາກັດ ການນໍາເຂົ້າສິນຄ້າ ທີ່ພາຍໃນຜະລິດໄດ້ພຽງພໍ ເປັນຕົ້ນ ເບຍ, ເຄື່ອງດື່ມ, ສະບຽງອາຫານ, ຕິດຕາມ, ກວດກາ, ປ້ອງກັນ ແລະ ສະກັດກັ້ນ ການລັກລອບນຳເຂົ້າສິນຄ້າ ຕາມປ່ອງຂ້າມລອຍຕ່າງໆ.

ສຸມໃສ່ປັບປຸງບັນດາແຫຼ່ງທ່ອງທ່ຽວ, ຂອດການບໍລິການ, ຄວາມສະຫງົບປອດໄພ, ຄວາມເປັນລະບຽບຮຽບຮ້ອຍ ແລະ ແກ້ໄຂເສັ້ນທາງເຂົ້າຫາແຫຼ່ງທ່ອງທ່ຽວຕ່າງໆ. ສຳລັບເສັ້ນທາງທີ່ທາງເປ່ເພ ຍ້ອນການຂົນສົ່ງແຮ່ທາດ ໃຫ້ມີການປະກອບສ່ວນຂອງພາກທຸລະກິດ ໃນການສ້ອມແປງເສັ້ນທາງ ແລະ ກຳນົດນໍ້າໜັກການຂົນສົ່ງໃຫ້ເໝາະສົມ ຕາມທິດຊີ້ນຳ ລະບຸໃນແຈ້ງການ ຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 412/ຫສນຍ, ລົງວັນທີ 27 ກຸມພາ 2024.

ໃຫ້ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ຮີບຮ້ອນສົມທົບກັບ ກະຊວງການຕ່າງປະເທດ, ອົງການປົກຄອງແຂວງວຽງຈັນ ຖະແຫຼງຂ່າວ ກ່ຽວກັບກໍລະນີນັກທ່ອງທ່ຽວຕ່າງປະເທດເສຍຊີວິດ ຢູ່ເມືອງວັງວຽງ. ໃນຕໍ່ໜ້າ ຫາກເກີດມີກໍລະນີລັກສະນະດຽວກັນນີ້ ເຫດເກີດບ່ອນໃດ ແມ່ນໃຫ້ບ່ອນນັ້ນ ເປັນເຈົ້າການຖະແຫຼງຂ່າວຊີ້ແຈງ ໃຫ້ທັນການ.

ສືບຕໍ່ສຸມໃສ່ປະຕິບັດ ມະຕິ 09/ລບ, ໃນນີ້ ການແກ້ໄຂບັນຫາຂາດແຄນຄູສອນ ໂດຍໃຫ້ກະຊວງສຶກສາທິການ ແລະ ກິລາ ຮີບຮ້ອນປະສານສົມທົບກະຊວງປ້ອງກັນປະເທດ ເພື່ອນຳໃຊ້ທະຫານພັນທະມາຊ່ວຍສອນໃນບ່ອນຂາດແຄນຄູ, ສືບຕໍ່ຄົ້ນຄວ້ານະໂຍບາຍຕໍ່ຄູ, ການເພີ່ມເງິນເບ້ຍລ້ຽງໃຫ້ນັກສຶກສາ ທີ່ຮຽນສາຍຄູ ໂດຍໃຫ້ຮີບຮ້ອນຄົ້ນຄວ້າກົນໄກ ແລະ ວິທີການຕົວຈິງ ຕາມທີ່ໄດ້ຕົກລົງໃນກອງປະຊຸມນາຍົກ-ຮອງນາຍົກລັດຖະມົນຕີ ຄັ້ງວັນທີ 20 ພະຈິກ 2024.

ສືບຕໍ່ເລັ່ງຂະຫຍາຍການຄຸ້ມຄອງແຮງງານຢ່າງລວມສູນ ແລະ ຫັນໄປສູ່ການຄຸ້ມຄອງ ແລະ ການບໍລິການທັນສະໄໝ ດ້ວຍລະບົບດີຈີຕອນ ໃຫ້ກວມເອົາທົ່ວເຖິງ.

ສຸມໃສ່ຈັດຕັ້ງຜັນຂະຫຍາຍຜົນກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ, ຜົນກອງປະຊຸມສຸດຍອດ GMS, ACMECS, CLMV ໃຫ້ເປັນຮູບປະທໍາ; ສືບຕໍ່ກະກຽມໃຫ້ທ່ານນາຍົກລັດຖະມົນຕີ ທີ່ຈະເດີນທາງໄປຢ້ຽມຢາມທາງການ ຣາຊະອານາຈັກກຳປູເຈຍ ໃນຕົ້ນເດືອນທັນວາ 2024 ໂດຍມອບໃຫ້ກະຊວງການຕ່າງປະເທດ ເປັນເຈົ້າການສົມທົບກັບພາກສ່ວນກ່ຽວຂ້ອງ ກະກຽມທາງດ້ານເນື້ອໃນໃຫ້ດີ.

ໃຫ້ຫ້ອງວ່າການສຳນັກງານນາຍົກລັດຖະມົນຕີ ສົມທົບກັບກະຊວງທີ່ກ່ຽວຂ້ອງ ຮີບຮ້ອນປັບປຸງບັນດາຮ່າງນິຕິກຳຕ່າງໆ ທີ່ໄດ້ຜ່ານກອງປະຊຸມລັດຖະບານແຕ່ລະຄັ້ງໃຫ້ໄວ, ເອກະສານໃດ ຈະຕ້ອງໄດ້ຜ່ານສະພາແຫ່ງຊາດ ພາຍຫຼັງປັບປຸງ ແລະ ກວດຜ່ານແລ້ວ ໃຫ້ນຳສະເໜີ ຄະນະປະຈຳສະພາແຫ່ງຊາດ ພິຈາລະນາ. ໃຫ້ແຕ່ລະກະຊວງ ສຸມໃສ່ຈັດຕັ້ງສະຫຼຸບ ການຈັດຕັ້ງປະຕິບັດວຽກງານປະຈຳປີ 2024 ແລະ ວາງທິດທາງແຜນການປີ 2025 ໃຫ້ລະອຽດຈະແຈ້ງ, ຖືກຕ້ອງ ແລະ ຊັດເຈນ ແລ້ວສົ່ງໃຫ້ຫ້ອງວ່າການສຳນັກງານນາຍົກລັດຖະມົນຕີ ເພື່ອສັງລວມເຂົ້າບົດສະຫຼຸບ ປະຈຳປີ 2024 ແລະ ສະເໜີແຜນວຽກປະຈຳປີ 2025 ຂອງລັດຖະບານ.

(ແຫຼ່ງ: ໜັງ​ສື​ພິມ ປະ​ຊາ​ຊົນ, ຂ່າວ-ພາບ: ກົມປະຊາສຳພັນ ຫສນຍ).