29 ປີແຫ່ງການຮ່ວມມືລາວ-ສ ເກົາຫຼີຍິ່ງແນບແໜ້ນ

​ເຜີຍ​ແຜ່​ໂດຍ: admin|ຢ້ຽມ​ຊົມ: 10 ຄັ້ງ | ເວ​ລາ | 2024-11-21 13:21:30

ໂດຍ: ຣັດສະໝີດວງສັດຈະ

ກ່ອນໜ້ານີ້ 29 ປີ ຄືໃນວັນ 25 ຕຸລາ 1995-25 ຕຸລາ 2024; ສປປ ລາວ ແລະ ສ ເກົາຫຼີ ໄດ້ຮັບການ ສ້າງຕັ້ງສາຍພົວພັນການທູດຢ່າງເປັນທາງການຕາມນະໂຍບາຍຂອງລັດຖະບານຂອງ 2 ປະເທດ ແລະ ມີຄວາມ ໃກ້ຊິດ, ຮັບຜົນສໍາເລັດໃນຫຼາຍດ້ານ ແລະ ກວມເອົາຫຼາຍຂົງເຂດ ພ້ອມນັ້ນ ທັງສອງປະເທດຍັງ ສາມາດຮັກສາ ການພົວພັນມິດຕະພາບອັນດີງາມ ແລະ ສະໜັບສະໜູນເຊິ່ງກັນ ແລະ ກັນໃນຂອບສອງຝ່າຍ ແລະ ຫຼາຍຝ່າຍ.

ພາຍຫຼັງທີ່ໄດ້ມີການເປີດສະຖານທູດ ສ ເກົາຫຼີ ຢູ່ນະຄອນຫຼວງວຽງຈັນໃນປີ1996 ແລະ ສະຖານທູດລາວ ທີ່ເຊອູນໃນປີ 2001, ສອງປະເທດໄດ້ເລີ່ມການພົວພັນ ແລະ ຮ່ວມມືຢ່າງກວ້າງຂວາງ. ໃນນັ້ນ ລວມທັງການ ພົບປະຄັ້ງປະຫວັດສາດຂອງພະນະທ່ານ ນາຍົກລັດຖະມົນຕີ ບຸນຍັງ ວໍລະຈິດ ໃນປີ2002 ແລະ ພະນະທ່ານ ປະທານາທິບໍດີ Roh Moo-hyum ທີ່ໄດ້ເດີນທາງມາຢ້ຽມຢາມ ສປປ ລາວ ໃນປີ 2004, ໄດ້ກາຍເປັນຈຸດຫັນ ປ່ຽນຂອງການພົວພັນຂອງສອງປະເທດ ຊຶ່ງໄດ້ສະແດງອອກໃຫ້ເຫັນເຖິງຄຳໝັ້ນສັນຍາອັນໜັກແໜ້ນຂອງການນຳ ຂັ້ນສູງພວກເຮົາຕໍ່ການພັດທະນາສາຍພົວພັນລະຫວ່າງສອງປະເທດທີ່ມີມູນເຊື້ອອັນຍາວນານ.

ໃນຕະຫຼອດໄລຍະເກືອບ 3 ທົດສະວັດມານີ້, ໄດ້ມີຄຳໝັ້ນສັນຍາທາງດ້ານການເມືອງໄດ້ຖືກຢືນຢັນອີກຄັ້ງ ໂດຍການມາຢ້ຽມຢາມ ສປປ ລາວ ຂອງພະນະທ່ານປະທານາທິບໍດີ Moon Jae-in ແລະ ການຢ້ຽມຢາມ ສ ເກົາຫຼີຂອງພະນະທ່ານນາຍົກລັດຖະມົນຕີ ທອງລຸນ ສີສຸລິດ ໃນປີ 2019. ການຮ່ວມມືທາງດ້ານການເມືອງ ແລະ ຄວາມສາມັກຄີມິດຕະພາບທີ່ເປັນມູນເຊື້ອໄດ້ເປີດເສັ້ນທາງໃຫ້ແກ່ການພົວພັນດ້ານເສດຖະກິດການຄ້າ ແລະ ການຮ່ວມມືພັດທະນາລະຫວ່າງສອງປະເທດເພີ່ມຂຶ້ນຢືນຢູ່ໃນອັນດັບຕົ້ນໆ ໃນບັນດາຄູ່ຮ່ວມມືການຄ້າຂອງລາວ. ການລົງທຶນບັນດາບໍລິສັດຂອງ ສ ເກົາຫຼີ ມີທ່າອ່ຽງເພີ່ມຂຶ້ນໃນນີ້ຂົງເຂດ SME ຈົນເຖິງໂຄງການໄຟຟ້ານ້ຳຕົກ. ສິ່ງທີ່ພົ້ນເດັ່ນໃນການພົວພັນຜ່ານມາແມ່ນຂະແໜງການທ່ອງທ່ຽວ, ຊຶ່ງເຫັນວ່າມີຈໍານວນນັກທ່ອງທ່ຽວ ຈາກ ສ ເກົາຫຼີ ມາທ່ຽວ ສປປ ລາວ ໃນໄລຍະກ່ອນໂຄວິດມີຈຳນວນຫຼາຍກວ່າ 2 ແສນຄົນ ລວມທັງ ສ ເກົາຫຼີ ກໍຍັງມີຖ້ຽວບິນມາລາວຫຼາຍກວ່າໝູ່ໃນແຕ່ລະວັນ.

ການຮ່ວມມືດ້ານການຊ່ວຍເຫຼືອເພື່ອການພັດທະນາ (ODA) ແລະ ການກູ້ຢືມໃນເງື່ອນໄຂທີ່ຜ່ອນຜັນ (EDCF) ລະຫວ່າງ ສປປ ລາວ ແລະ ສເກົາຫຼີ ໄດ້ຮັບການເສີມຂະຫຍາຍໃນຫຼາຍຂົງເຂດເພື່ອໃຫ້ແທດ ເໝາະກັບເປົ້າໝາຍການພັດທະນາຂອງລັດຖະບານລາວ; ສ ເກົາຫຼີ ຢູ່ໃນອັນດັບທີ່ດີ ໃນບັນດາຄູ່ຮ່ວມພັດທະນາ ໃຫຍ່ຂອງ ສປປ ລາວ ໃນດ້ານ ODA ແລະ ຂົງເຂດການຮ່ວມມື ລວມທັງການພັດທະນາຊັບພະຍາກອນມະນຸດ ແລະ ວຽກງານ UXO ເປັນຕົ້ນການຫຼຸດຜ່ອນຄວາມທຸກຍາກຈາກຕົວແບບເຊມາອຶນດົງ. ນອກຈາກການຊ່ວຍ ເຫຼືອລະຫວ່າງພາກລັດຖະບານແລ້ວອັນພົ້ນເດັ່ນອີກອັນໜຶ່ງແມ່ນການຊ່ວຍເຫຼືອຂອງອົງການບໍ່ຫວັງຜົນກຳໄລທີ່ໃຫ້ ການຊ່ວຍເຫຼືອປະຊາຊົນລາວເຊັ່ນ: ການສ້າງໂຮງຮຽນ, ໂຮງໝໍ, ຈັດສົ່ງເຄື່ອງນຸ່ງຫົ່ມ, ອຸປະກອນການສຶກສາ, ຢາ ແລະ ອຸປະກອນການແພດເປັນຈໍານວນບໍ່ໜ້ອຍໃນແຕ່ລະປີ.

ໃນລະຫວ່າງການເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 43 ໃນປີ 2023, ພະນະທ່ານສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ ໄດ້ພົບປະສອງຝ່າຍກັບພະນະທ່ານຢຸນຊອກຢອນ (Yoon Suk Yeol) ປະທານາທິບໍດີ ແຫ່ງ ສ ເກົາຫຼີ ຊຶ່ງຝ່າຍລາວສະແດງຄວາມພ້ອມເພື່ອສືບຕໍ່ເສີມຂະຫຍາຍການພົວພັນ ຮ່ວມມືລາວ-ສ ເກົາຫຼີ ໃຫ້ມີບາດກ້າວອັນໃໝ່ໃນອະນາຄົດໂດຍທັງສອງຝ່າຍໄດ້ຕີລາຄາສູງຕໍ່ການພົວພັນມິດ ຕະພາບທີ່ດີ ແລະ ການຮ່ວມມືທີ່ເຕັມໄປດ້ວຍໝາກຜົນຕະຫຼອດໃນຜ່ານມາ, ຊຶ່ງຝ່າຍ ສ ເກົາຫຼີ ຍິນດີທີ່ຈະສືບຕໍ່ ໃຫ້ການຊ່ວຍເຫຼືອໃນຮູບແບບການຊ່ວຍເຫຼືອເພື່ອການພັດທະນາ (ODA) ແລະ ການສະໜອງເງິນກູ້ຜ່ານກອງ ທຶນຮ່ວມມືພັດທະນາເສດຖະກິດ (EDCF) ຂອງ ສ ເກົາຫຼີ ໃຫ້ແກ່ ສປປ ລາວ ໂດຍສະເພາະການພັດທະນາ ໂຄງລ່າງພື້ນຖານ, ສາທາລະນະສຸກ, ວຽກງານສຶກສາ, ກະສິກຳ ແລະ ອື່ນໆ ເພື່ອແນໃສ່ປັບປຸງຊີວິດການເປັນ ຢູ່ຂອງປະຊາຊົນລາວໃຫ້ນັບມື້ນັບດີຂຶ້ນ ລວມທັງການພິຈາລະນາຂໍ້ສະເໜີຂອງຝ່າຍລາວ ສໍາລັບໂຄງການຫັນ ເປັນດີຈີຕອນ ຂອງລັດຖະບານ ສປປ ລາວ.

ໃນໂອກາດທີ່ພະນະທ່ານປະທານາທິບໍດີແຫ່ງ ສ ເກົາຫຼີ ເດີນທາງມາຢ້ຽມຢາມເຮັດວຽກ ແລະ ເຂົ້າຮ່ວມ ກອງປະຊຸມສຸດຍອດອາຊຽນ-ສ ເກົາຫຼີຄັ້ງທີ 25 ເພື່ອສະເຫຼີມສະຫຼອງຄົບຮອບ 35 ປີຂອງການພົວພັນອາຊຽນ-ສ ເກົາຫຼີ ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງທີ່ ສປປ ລາວ ເປັນເຈົ້າພາບນັ້ນ ໃນວັນທີ 10 ຕຸລາ 2024, ພະນະທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ໄດ້ພົບປະສອງຝ່າຍກັບທ່ານ ຢຸນຊອກຢອນ (Yoon Suk Yeol) ປະທານາທິບໍດີແຫ່ງ ສ ເກົາຫຼີ ຊຶ່ງທັງສອງຝ່າຍໄດ້ເຫັນດີເປັນເອກະພາບຕີລາຄາສູງ ຕໍ່ການພົວພັນຮ່ວມມືທີ່ເຕັມໄປດ້ວຍໝາກຜົນສູງຕະຫຼອດໄລຍະເກືອບ 3 ທົດສະວັດຜ່ານມາ, ການນຳຂັ້ນສູງສອງ ປະເທດໄດ້ສືບຕໍ່ແລກປ່ຽນການຢ້ຽມຢາມເຊິ່ງກັນ ແລະ ກັນຢ່າງເປັນປົກກະຕິ, ບັນດາໂຄງການຊ່ວຍເຫຼືອ, ໂຄງການຮ່ວມມື ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນຊຶ່ງໃນປີ 2025 ທີ່ຈະມາເຖິງນີ້, ສອງຝ່າຍເຫັນດີ ຈະຮ່ວມກັນສະເຫຼີມສະຫຼອງຄົບຮອບ 30 ປີແຫ່ງການສ້າງຕັ້ງສາຍພົວພັນການທູດ ສປປ ລາວ-ສ ເກົາຫຼີ ໃຫ້ມີບັນຍາກາດຄຶກຄື້ນ ແລະ ມີຄວາມໝາຍສຳຄັນ;

ສອງຝ່າຍໄດ້ຢືນຢັນຄືນຄວາມໝາຍໝັ້ນທີ່ຈະຍົກລະດັບການພົວພັນຮ່ວມມືຂຶ້ນສູ່ລະດັບໃໝ່ໃນອະນາຄົດອັນ ໃກ້ນີ້ ຊຶ່ງຈະເປັນການເປີດສັງກາດໃໝ່ແຫ່ງການພົວພັນຮ່ວມມືລະຫວ່າງສອງປະເທດໃຫ້ສູງເດັ່ນຂຶ້ນກວ່າເກົ່າ. ພ້ອມນີ້, ສອງຝ່າຍກໍໄດ້ຕີລາຄາສູງຕໍ່ການພົວພັນຮ່ວມມືດ້ານເສດຖະກິດ-ການຄ້າທີ່ໄດ້ຮັບການພັດທະນາຂຶ້ນເປັນ ກ້າວໆ, ເຫັນດີຊຸກຍູ້ການແລກປ່ຽນຂໍ້ມູນລະຫວ່າງນັກທຸລະກິດສອງປະເທດເພື່ອດຶງດູດນັກລົງທຶນ ສ ເກົາຫຼີ ໃຫ້ມາລົງທຶນຢູ່ ສປປ ລາວ ຫຼາຍຂຶ້ນ, ຊຸກຍູ້ການຂົນສົ່ງສິນຄ້າຂອງລາວໄປຍັງຕະຫຼາດຂອງ ສ ເກົາຫຼີ ໃຫ້ຫຼາຍຂຶ້ນ ໂດຍສະເພາະໃນຂົງເຂດອຸດສາຫະກຳການຜະລິດ (manufacturing), ອຸດສາຫະກໍາຍານຍົນ (automobile), ເຄື່ອງໃຊ້ໄຟຟ້າ, ການຜະລິດ Semi-Conductor, ອຸດສາຫະກໍາໜັກ, ອຸດສາຫະກໍາປຸງແຕ່ງ ຜົນຜະລິດກະສິກໍາ ແລະ ອື່ນໆ.

ພ້ອມນັ້ນ, ຝ່າຍລາວໄດ້ຕີລາຄາສູງຕໍ່ຂໍ້ລິເລີ່ມການຮ່ວມມື ດ້ານສິ່ງແວດລ້ອມພາຍໃຕ້ເປົ້າໝາຍການຫຼຸດ ຜ່ອນທາດອາຍເຮືອນແກ້ວເພື່ອຍົກລະດັບຂີດຄວາມສາມາດໃນການປັບຕົວ ແລະ ຮັບມືກັບການປ່ຽນແປງຂອງ ດິນຟ້າອາກາດ, ສະແດງຄວາມຂອບໃຈຕໍ່ໂຄງການສ້າງສວນອຸທິຍານດິຈິຕອນຂອງ ສປປ ລາວ (Lao Digital Park) ໃຫ້ເປັນເຂດນິຄົມອຸດສາຫະກໍາດີຈີຕອນແນໃສ່ດຶງດູດບັນດາບໍລິສັດເຕັກໂນໂລຊີຈາກຕ່າງປະເທດເຂົ້າມາ ລົງທຶນໃນ ສປປ ລາວ ຫຼາຍຂຶ້ນໂດຍສະເພາະການສ້າງຄວາມພ້ອມໃຫ້ສັງຄົມລາວກ້າວເຂົ້າສູ່ຍຸກດີຈີຕອນ, ສະແດງຄວາມຂອບໃຈຕໍ່ການຊ່ວຍເຫຼືອໃນການພັດທະນາຊັບພະຍາກອນມະນຸດ, ການສະໜອງທຶນການສຶກສາ, ການສະໜັບສະໜູນດ້ານວັດທະນະທຳ, ການທ່ອງທ່ຽວ ແລະ ອື່ນໆ. ພ້ອມນັ້ນ, ສອງຝ່າຍເຫັນດີສືບຕໍ່ການ ຮ່ວມມືໃນລະດັບພາກພື້ນ ແລະ ສາກົນ ເປັນຕົ້ນການຮ່ວມມືໃນຂອບອາຊຽນ-ສ ເກົາຫຼີ, ແມ່ນ້ຳຂອງ-ສ ເກົາຫຼີ, ອົງການ ສປຊ ແລະ ອື່ນໆ, ສອງຝ່າຍຍັງໄດ້ແລກປ່ຽນຄຳຄິດເຫັນຕໍ່ສະພາບການພາກພື້ນ ແລະ ສາກົນທີ່ ມີຄວາມສົນໃຈຮ່ວມກັນ.

ໃນໂອກາດທີ່ສະຫງ່າງາມນີ້, ຜູ້ນຳທັງສອງປະເທດກໍໄດ້ເຂົ້າຮ່ວມເປັນສັກຂີພິຍານໃນພິທີລົງນາມ ສັນຍາ ຈຳນວນ 3 ສະບັບຄື:

1. ສັນຍາວ່າດ້ວຍການຮ່ວມມືກ່ຽວກັບການປ່ຽນແປງດິນຟ້າອາກາດລະຫວ່າງ ສປປ ລາວ ແລະ ສ ເກົາຫຼີ. 2. ສັນຍາຂອບການຮ່ວມມືລະຫວ່າງລັດຖະບານແຫ່ງ ສປປ ລາວ ແລະ ສ ເກົາຫຼີ ກ່ຽວກັບບັນ ດາໂຄງການຮ່ວມມືກັບກອງທຶນຮ່ວມມືເພື່ອການພັດທະນາເສດຖະກິດ (EDCF) ຂອງ ສ ເກົາຫຼີໃນໄລຍະ 2024- 2027.

3. ບົດບັນທຶກຄວາມເຂົ້າໃຈກ່ຽວກັບການຮ່ວມມືດ້ານວຽກງານການຫຼຸດຜ່ອນທາດອາຍເຮືອນແກ້ວ ຈາກການທໍາລາຍປ່າໄມ້ ແລະ ການເຮັດໃຫ້ປ່າໄມ້ຊຸດໂຊມ, ຊຶ່ງເປັນການຈັດຕັ້ງປະຕິບັດມາດຕາ 6 ຂອງສົນທິສັນຍາປາຣີ ລະຫວ່າງກະຊວງກະສິກໍາ ແລະ ປ່າໄມ້ແຫ່ງ ສປປ ລາວ ແລະ ກະຊວງປ່າໄມ້ ແຫ່ງ ສ ເກົາຫຼີ.

ໃນຕະຫຼອດບົນເສັ້ນທາງ 29 ປີແຫ່ງການພົວພັນ ແລະ ຮ່ວມມືສອງຝ່າຍລະຫວ່າງລັດຖະບານ ແລະ ປະຊາຊົນ 2 ຊາດລາວ-ສ ເກົາຫຼີ ໃນໄລຍະຜ່ານມາແມ່ນໄດ້ຮັບການພັດທະນາ ແລະ ສືບຕໍ່ເສີມຂະຫຍາຍ ຢ່າງຕໍ່ເນື່ອງໃນຫຼາຍຂົງເຂດວຽກງານຊຶ່ງໄດ້ປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ແລະ ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນເທື່ອລະກ້າວ. ເຖິງແມ່ນວ່າຈະຍັງມີສິ່ງ ທ້າທາຍຕ່າງໆ ຢູ່ໃນພາກພື້ນ ແລະ ສາກົນ, ເຊື່ອໝັ້ນຢ່າງຍິ່ງວ່າການພົວພັນທີ່ດີໃນດ້ານການເມືອງ, ເສດຖະກິດ ແລະ ການພົວພັນລະຫວ່າງປະຊາຊົນສອງປະເທດພວກເຮົາຈະໄດ້ຮັບການສືບຕໍ່ຮັດແໜ້ນ ແລະ ຍົກລະດັບ ຂຶ້ນເພື່ອແນໃສ່ນຳຜົນປະໂຫຍດຕົວຈິງມາສູ່ປະຊາຊົນລາວ ແລະ ສ ເກົາຫຼີ ໃນຊຸມປີຕໍ່ໄປໃຫ້ຫຼາຍຂຶ້ນຢ່າງບໍ່ຢຸດຢັ້ງ.

ແຫຼ່ງ: ປະ​ຊາ​ຊົນ